Mi meke a Kanada, aini a foto Kibek. A Faansi den e taki aini a foto ya. A nda anga mma den be e kai Louis anga Zélia. Den be lobi mi, den be abi switifasi tu. Nda á be lobi takitaki, ma a be lobi leisi. Mi be lobi sikiifi, neen meke mi be wani toon wan sama di e sikiifi nyunsu.

Di mi be abi wan sani fu 12 yali, Rodolphe Soucy, wan man di be e wooko anga nda be kon a wi osu anga wan mati fi en. Den man ya a be Yehofa Kotoigi. A ten de mi á be sabi tyaipi sani fu den Kotoigi. Mi á be e suku fu sabi sani fu den tu. Toku mi be lobi a fasi fa den be e koboloiki Beibel fu piki den akisi fu u. Nda anga mma be lobi a sani ya tu, neen meke u bigin sutudeli Beibel anga den Kotoigi.

A ten de a wan Lomusu sikoo mi be e go. Son yuu mi be e taigi den pikin di mi anga den be e sidon aini wan kalasi san mi leli na a Beibel sutudi. Den sama di be e leli wi a sikoo a be pilisite. Di den yee taki a so e pasa, neen wan fu den gi mi sen na ala den pikin fesi. A taki mi wani tyai buuya kon aini den sani di den e leli. Den á be poi soi mi aini Beibel taki den sani di mi e leli a ná tuu. Mi be fusutan taki mi á be mu go na a sikoo de moo. Neen meke nda anga mma poti mi a wan taa sikoo.

Mi be e sutudeli Beibel ete, ma mi á be e go a fesi, bika mi be e feele fu peleiki osu fu osu. Lomusu keliki be abi tyaipi makiti aini a kondee a ten de, neen meke den be e du sani fu tapu a peleikiwooko.  A Maurice Duplessis be e tii Kibek a ten de. A man ya be e wooko makandii anga Lomusu keliki. A be e holibaka gi den sama di be e du ogii anga Kotoigi. A ten de efi yu á be abi deki-ati, yu á be poi peleiki.

John Rae a wan fu den baala di yeepi mi fu mi á feele moo. A baala ya be go na a Gileyad sikoo, di a sikoo ya be holi du fu neigin leisi. Winsi fa John be abi ondoofeni, tokuso a be abi sakafasi, sama á be e feele fu taki anga en. A á be lobi taigi mi san mi mu du, ma a omen sani mi leli di mi luku a fasi fa a be e du sani. John á be kaba sabi taki Faansi, neen meke mi be lobi wooko anga en aini a peleikiwooko, da mi be e yeepi en anga a Faansi. A paa di mi be e paa anga John yeepi mi fu kon abi deki-ati fu dini Yehofa. Tin yali baka di mi be miti den Kotoigi, mi dopu a 26 mei 1951.

Gaanse fu den peleikiman aini a pikin kemeente fu Kibek a be pionili. Fu di mi be e paa anga den meke miseefi bigin pionili. A ten de, anga Beibel wawan u be e wooko te u be e peleiki. Wi á be abi buku anga talakitaati, neen meke u be mu sabi wooko bun anga a Beibel. Mi meke moiti fu leli wantu Beibeltekisi di mi be sa koboloiki aini a peleikiwooko. Omen sama a den Beibel fu den Lomusu keliki wawan den be e wani leisi.

Aini 1952 mi toow anga Simone Patry, wan sisa di be de aini a kemeente pe mi be de. Simone be e dini Yehofa anga en hii ati. Baka di u toow, u foloisi go a Montreal. Aini a fosi yali di u toow, Yehofa belesi wi anga wan meisyo. U kai en Lise. Winsi fa mi be tapu anga a pioniliwooko fosi u toow, tokuso wi á be e libi bigi. A sani ya be e yeepi u fu man du moo aini a kemeente enke osufamii.

A baka tin yali fosi mi bigin pakisei fu du a pioniliwooko baka. Aini 1962, mi go na a Kownukondee Diniwooko Sikoo fu owluman, di be holi wan mun langa na a beikantoo fu Kanada. Den be poti mi anga wan baala den e kai Camille Ouellette aini a wan kambaa. Mi be foondoo fu si fa Camille be lobi a peleikiwooko, bika a baala ya be toow, a be abi pikin tu. A ten de, gaanse baala anga sisa fu a foto Kibek di be abi pikin á be e du a pioniliwooko. Tokuso na a sani ya Camille be e meke moiti fu du. A ten di mi anga en be  de aini wan kambaa, a gi mi taanga-sikin fu luku efu mi be o man du a fuuten diniwooko. Wantu mun baka a sikoo, mi kon si taki mi be sa du a pioniliwooko baka. Son sama á be si enke a wan koni sani mi be e du, ma tokuso mi á gi abaa. Mi be e biibi taki Yehofa o belesi den moiti di mi be e meke fu du moo aini a peleikiwooko.

Aini 1964, mi anga Simone be fende a gaandi fu du a spesuutu-pioniliwooko a Kibek, a foto pe u kiya. A wantu yali u tan a Kibek enke spesuutu-pionili. A ten de sama á be e du ogii anga u so moo te u be e du a peleikiwooko, ma toku a á be makiliki.

Wan sataa bakadina, sikowtu kisi mi a Sainte-Marie, wan pikin foto koosube fu Kibek. Den sooto mi, bika den fende taki mi á be abi pampila di e soi taki lanti gi mi pasi fu peleiki. Bakaten den tyai mi go a wan kuutubakaa den e kai Baillargeon. Sama be e feele a man ya. A akisi mi sama o de a afukati fu mi. A dyombo di mi taigi en taki a Glen How *, neen a taki: „Ooho, na a man ya baka!” Glen How a be wan baala di be de afukati. A omen sama be sabi en. A omen toli a baala ya wini gi Kotoigi kaba. A á langa baka dati neen a kuutu bangi piki mi taki mi ná abi fu go a kuutu moo, bika mi á be du ogii.

Fu di tesi be e miti wi a Kibek, meke a be taanga fu fende wan bun peesi fu holi komakandaa. A wan peesi pe den be e poti wagi, a pikin kemeente fu u be e holi komakandaa. Te a koo ten fu a yali be doo, anga wan pikin masini den baala be e waan a peesi pikinso. Wantu yuu fosi a komakandaa bigin, u be e sidon lontu a masini ya, da u be e gi ondoofenitoli fu gi useefi taanga-sikin.

A moin fu si fa a peleikiwooko go a fesi den yali di pasa. Aini 1960, a wantu pikin kemeente namo be de a Kibek, a se fu Côte-Nord, anga a se fu Gaspé. Nownow, a omen baala anga sisa de a den peesi ya. Den baala anga sisa e holi komakandaa aini moin Kownukondee zaal.

Mi anga Simone fende a gaandi fu du a kelen wooko aini 1970. Baka dati, aini 1973, mi toon distrikt-opziener. A omen sani mi leli fu baala Laurier Saumur * anga David Splane * di be e du a kelen wooko tu. Baka ala den kelen komakandaa, mi anga David be e luku san u be sa du moo bun. Wan leisi David taigi mi taki: „Léonce, mi be lobi a lasiti lezing di i be holi. A be bun, ma den somen toli di i taki fu den aini a lezing, a dii lezing mi be o paati den.” Mi be lobi taki  fu omen sowtu sani aini wan kodo lezing. Mi be mu leli fu nai taki fu toli di á de fanowdu aini wan lezing.

A den distrikt-opziener be e gi den kelen owluman taanga-siki a ten de. Ma mi anga gaanse fu den peleikiman fu Kibek be gwenti, neen meke den be e wani wooko anga mi te mi be go a den kemeente. Winsi fa mi be lobi wooko anga den, a sani ya be e meke mi ná abi ten gi a kelen owluman di mi be go fu gi taanga-sikin. Wan leisi wan fu den kelen owluman taigi mi a wan switifasi taki: „A wan moin sani taki yu e wani wooko anga den baala anga sisa, ma ná feegete taki a mi i kon. Miseefi abi taanga-sikin fanowdu.” A sani ya yeepi mi fu paati a ten fu mi moo bun.

Aini a yali 1976 wan sani di mi á be denki miti mi. Mi uman Simone siki te neen a dede. Simone be lobi yeepi taawan, a á be e denki enseefi namo. A be lobi Yehofa. A be wan bun uman. A de di mi be e de aini a peleikiwooko ala yuu yeepi mi fu mi á kusumi tumisi baka di a dede. Bakaten mi toow anga wan sisa den e kai Carolyn Elliott. A sisa ya a be wan pionili di be foloisi kon a Kibek fu yeepi anga a peleikiwooko. A Ingiisi Carolyn be e taki. Carolyn lobi taki anga sama, moomoo efu a si taki a wan sen sama. Ná pikin yeepi a yeepi mi di a bigin pionili makandii anga mi.

Aini yanuari 1978, mi fende a gaandi fu gi leli na a fosi Pionili-sikoo aini Kibek. Mi be e booko mi ede, bika noiti mi be go na a Pionili-sikoo, a buku di den e luku na a sikoo ya seefi mi á be si ete. A be wan nyun sani gi mi, anga den pionili. Ma mi e gi Gadu daa taki den fosi sama di mi be gi leli na a sikoo ya a be pionili di be abi ondoofeni. Winsi fa a mi be e gi leli na a sikoo ya, tokuso a omen sani mi leli fu den pionili.

 Bakaten, aini 1978 den holi wan gaan konkelesi na a Olympisch Stadion fu Montreal. A nen fu a konkelesi ya a be, „Zegevierend geloof”. A disi a be a moo gaan konkelesi di be holi a Kibek. A moo enke 80.000 sama be kon. Den be gi mi a gaandi fu taki anga omen nyunsuman di be wani sabi moo fu a konkelesi. Mi be piisii fu si den bun sani fu u di den taki a nyunsu. Te i luku ala den takimakandaa di u be abi a tv anga laadiyow, da a pasa 20 yuu. Boiti dati, den nyunsuman be sikiifi omen ondoo artikel tu fu Yehofa Kotoigi. A sani ya meke omen sama kon sabi Yehofa anga a foluku fi en moo bun.

Aini a yali 1996 sani kengi. Fanafu di mi dopu, aini soso Faansi kemeente mi be de, ma now den sende mi go a Toronto pe den e taki Ingiisi. Mi á be poi taki bunbun Ingiisi, neen meke mi ben e feele fu holi lezing. Mi be abi fu begi Yehofa naamo. Mi be mu moo fitoow en tu.

Fosi mi be bigin anga a nyun wooko di den be gi mi, mi be e feele pikinso, ma ná pikin wini mi fende den tu yali di mi tan a Toronto. Anga ala pasensi Carolyn yeepi mi fu taki a Ingiisi. Den baala anga sisa seefi yeepi mi tu, den gi mi taanga-sikin. A gawgaw u meke omen nyun mati.

Boiti taki mi be e teke seeka gi den kelen komakandaa di be e holi sataa anga sonde, mi be e go a peleikiwooko a feeda bakadina fosi a kelen komakandaa. Kande son sama be e pakisei taki: ’Saide yu e go a peleikiwooko wan dei fosi a kelen komakandaa?’ Ma mi be e fende taanga-sikin te mi be e taki anga sama aini a peleikiwooko. Te enke now mi e piisii te mi e du a peleikiwooko.

Aini 1998, den sende mi anga Carolyn go a Montreal enke spesuutu pionili. A omen yali langa mi be abi a wooko fu seeka a peleikiwooko a peesi pe tyaipi sama e pasa. Mi be e wooko makandaa anga nyunsuman tu fu soi sama taki gaanse fu den sani di den e yee fu Yehofa Kotoigi a be lei. Nownow mi anga Carolyn e peleiki gi taa kondee sama di foloisi kon a Kanada. Gaanse fu den sama ya e wani sabi sani fu Beibel.

Ná pikin belesi mi fende aini den 68 yali di mi e dini Yehofa. A moiti di mi meke fu lobi a peleikiwooko, anga a yeepi di mi be poi yeepi taa sama fu kon sabi Yehofa, meke mi piisii tuutuu. Baka di den pikin fu a meisyo fu mi, Lise kon bigi, en anga en man bigin pionili. Ná pikin switi ai switi gi mi te mi e si fa ai piisii fu wooko gi Yehofa. Mi e gi ala den baala anga sisa daa di yeepi mi fu du mi wooko moo bun. Mi si taki a wan kodo fasi fa i sa tan du a wooko di Yehofa gi i, a te yu e meke a santa yeye fi en yeepi i (Ps. 51:11). Mi e gi Yehofa daa taki a gi mi a gaandi fu meke sama sabi a nen fi en.​—Ps. 54:6.