1. San dyalusu du anga a famii fu Yowsefu?

YAKOPU be lobi ala den boi fi en, ma a be moo lobi Yowsefu. Fa den taa baala fu Yowsefu be e fii di den si taki den dda be moo lobi Yowsefu? A sani ya meke den dyalusu anga en te neen den bigin buuse en. Yowsefu á be du nawan sani fu meke den baala fi en buuse en. Tokuso den seli en enke saafu, neen den lei gi den dda taki a wan ogii meti kii a boi fi en di a be moo lobi. Dyalusu meke den buuya a osufamii fu den dda. Ná pikin hati a sani di den du hati den dda.​—Gen. 37:3, 4, 27-34.

2. Enke fa Galasiyasama 5:19-21 e soi, da saide wi á mu e dyalusu anga taawan?

² Beibel taki dyalusu * a wan fu den sani fu a „sondu sikin” di sa tapu wan sama fu go aini a Kownukondee fu Gadu. (Leisi Galasiyasama 5:19-21.) Dyalusu e meke sama libi ogii anga taawan, ai meke sama kwali anga denseefi, ai meke sama ati e boon a taawan sosokaali.

3. San wi o luku aini a artikel ya?

³ A toli fu den baala fu Yowsefu e soi taki dyalusu sa buuya wan osufamii. Winsi fa u ná o seli u baala efuso sisa, tokuso ala wi abi sondu, wi ati e koli u (Yel. 17:9). Neen meke son leisi a sa pasa taki wi e dyalusu anga taawan. Wi o luku wantu toli aini Beibel di o yeepi u fu si san a wantu sani di sa meke u bigin dyalusu anga taawan.  Baka dati, wi o luku san u mu du efu a sani ya pasa, anga san u mu du fu wi á poli a freide aini a kemeente.

4. Saide den Filisteyasama be e dyalusu anga Isaki?

⁴ Te wan sama gudu. Isaki be gudu, neen meke den Filisteyasama be e dyalusu anga en (Gen. 26:12-14). Den iti doti tapu den peti pe Isaki be e kisi wataa gi den meti fi en (Gen. 26:15, 16, 27). Leti enke den Filisteyasama, a so son sama aini a ten ya e dyalusu anga taawan fu di den abi sani di den ná abi. A ná wani namo den wani den sani di a sama abi, ma den e winsi tu taki a sama lasi den sani di a abi.

5. Saide den kelikifesiman be e dyalusu anga Yesesi?

⁵ Te omen sama lobi wan sama. Den Dyu kelikifesiman be e dyalusu anga Yesesi, fu di sama be lobi en (Mat. 7:28, 29). A Gadu be sende Yesesi kon a goontapu fu leli sama a tuu, tokuso den kelikifesiman be e paati omen lei fu poli Yesesi nen (Malik. 15:10; Yoh. 11:47, 48; 12:12, 13, 19). San a toli ya e leli u? Ai leli u taki u mu luku bun fu wi á dyalusu anga wan baala efuso sisa fu di a abi manii di e meke den sama aini a kemeente lobi en. Peesi fu u dyalusu anga en, a moiti u mu meke fu useefi kon abi den bun manii di e meke sama lobi en.​—1 Kor. 11:1; 3 Yoh. 11.

6. Fa Diotreifes soi taki a be e dyalusu?

⁶ Te wan sama abi gaandi aini a olikanisâsi. Aini a ten fu den apostel, Diotreifes be e dyalusu anga den baala di be e teke fesi aini a Kelesten kemeente. A be wani de „a moo pelensipali wan a den mindii”, neen meke a be e paati omen lei fu apostel Yohanisi anga wantu taa apostel fu poli den nen (3 Yoh. 9, 10). Winsi wi á be o du a sani di Diotreifes du, toku u sa bigin dyalusu anga wan baala efuso sisa di fende wan gaandi di u be wani. Kande yu e denki a iseefi taki i be sa du a wooko de leti enke en, efuso moo bun seefi.

7. San dyalusu sa du anga u?

⁷ Dyalusu a wan takuu manii. Efi i kweki a manii ya, a taanga fu puu en aini yu ati. Efi yu e fii iseefi, efuso e denki iseefi namo, a sani ya o meke i moo dyalusu anga taawan. Leti enke fa gaasi e tapu wan boomiki fu goo bun, a so dyalusu sa tapu den moin manii di u be sa abi. A sa meke a taanga gi u fu lobi taawan anga fu soi taawan taki wi e booko wi ede anga den. Solanga u fii enke u bigin dyalusu anga wan sama, u mu meke moiti puu a fii de aini wi ati. San o yeepi u fu wi á dyalusu anga taawan?

8. San o yeepi u fu wi á dyalusu anga taawan?

⁸ Efu wi abi sakafasi, neen wi e tifeedi anga san wi abi, u ná o dyalusu anga taawan. Te wan sama abi sakafasi, a nai fii enke a bun moo taawan. Wan sama di abi sakafasi, nai fii enke a mu fende sani moo wan taawan (Gal. 6:3, 4). Wan sama di e tifeedi, e piisii anga san a abi, a nai maiki enseefi anga taawan (1 Tim. 6:7, 8). Te wan sama abi sakafasi, neen ai tifeedi anga san a abi, a o piisii te a si taki sani e waka bun gi wan taawan.

9. Enke fa Galasiyasama 5:16 anga Filipisama 2:3, 4 e soi, da san a santa yeye sa yeepi u fu du?

⁹ Wi abi a santa yeye fu Gadu fanowdu  fu yeepi u fu wi á dyalusu anga taawan. A sa yeepi u tu fu abi sakafasi, anga fu tifeedi anga san wi abi. (Leisi Galasiyasama 5:16; Filipisama 2:3, 4.) A yeye fu Yehofa sa yeepi u fu sabi fa wi e denki anga saide wi e du son sani. Gadu sa yeepi u fu puu falisi denki anga fii aini wi ati. A sa yeepi u tu fu pakisei sani di e gi u taanga-sikin (Ps. 26:2; 51:10). Wi o luku san be yeepi Mosesi anga Pawlesi fu den á dyalusu anga taawan.

10. Fa Mosesi soi taki a á be e dyalusu anga taawan? (Luku a fowtow a fesise fu A Wakititolen.)

¹⁰ Mosesi be abi a gaandi fu du omen sani gi a foluku fu Gadu, ma a á be e tapu taawan fu denseefi fende gaandi. Wan leisi Yehofa teke pikinso fu a santa yeye di a be gi Mosesi, gi wantu gaanwan fu Islayeli di be taampu koosube fu a komakandaa tenti. A á langa baka dati, neen Mosesi yee taki tu man di be e teke fesi gi a foluku be fende santa yeye tu, neen den bigin taki polofeititoli. Ma den man ya á be kon na a komakandaa tenti. San Mosesi du di Yowsuwa taigi en fu a tapu den man ya fu den á taki polofeititoli moo? Mosesi á dyalusu di a fusutan taki Yehofa be poti pakisei a den tu man ya. Ma a be piisii taki Yehofa be gi den man ya a gaandi fu taki polofeititoli (Num. 11:24-29). San a toli fu Mosesi e leli u?

11. Fa owluman sa de enke Mosesi?

¹¹ Efi yu a wan owluman, den akisi i wan leisi kaba fu leli wan taa baala wan wooko di i be lobi? Kande a yu be e holi A Wakititolen-sutudi ala wiki. Efi yu abi sakafasi enke Mosesi, i ná o dyalusu efu den baala akisi i fu leli wan moo yonkuu baala a wooko ya. Ma anga ala piisii yu o yeepi i baala.

12. Fa omen Kelesten aini a ten ya e soi taki den abi sakafasi? Fa den e soi taki den e tifeedi anga sani?

¹² Meke u luku wan taa sani di e miti baala te den kon gaandi. Kande a omen yali den be de fesiman fu den owluman aini a kemeente pe den de. Ma te den tapu 80 yali, den de kabakaba fu fika a wooko ya gi wan moo yonkuu baala. Te wan kelen-owluman tapu 70 yali, a abi fu fika a kelen wooko. Ma den baala ya e soi taki den abi sakafasi, bika den e de kabakaba fu du wan taa wooko aini a olikanisâsi. Den yali di pasa, a omen sama di be e wooko a Betel a hii goontapu be mu komoto a Betel. Omen fu den baala anga sisa ya bigin du a pionili-wooko. Den nai dyalusu anga den sama di den baala di e teke fesi gi a wooko di den be e du fosi.

13. Saide Pawlesi be sa dyalusu anga den 12 apostel?

¹³ Apostel Pawlesi seefi a be wan sama di be e tifeedi anga san a abi, a be abi sakafasi tu. Pawlesi á be e dyalusu anga taawan. Winsi fa a be e wooko taanga aini a olikanisâsi, a á be e fii enseefi. A be taki: „Mi na a moo pikinwan fu ala den apostel. A á fiti fu den kai mi apostel” seefi (1 Kor. 15:9, 10). Den 12 apostel be e waka anga Yesesi di a be de a goontapu ya. Ma a baka di Yesesi daai go a hemel baka fosi Pawlesi toon wan Kelesten. Winsi fa Pawlesi be toon „wan apostel gi den taa kondee sama”, tokuso en a ná be wan fu den 12 apostel di be e waka anga Yesesi (Rom. 11:13; Toli 1:21-26). Pawlesi be sa dyalusu taki den taa apostel be de makandaa anga Yesesi di a be de a goontapu, ma a á du a sani de. A be e tifeedi anga den gaandi di a be abi.

14. San wi o du efu wi abi sakafasi, da u tifeedi anga san wi abi?

 ¹⁴ Efu wi abi sakafasi, neen wi e tifeedi anga san wi abi, da leti enke Pawlesi wi o lesipeki den sama di Yehofa gi son gaandi (Toli 21:20-26). Yehofa poti owluman fu teke fesi aini a Kelesten kemeente. Winsi fa denseefi abi sondu, tokuso a Yehofa poti den fu yeepi u (Efe. 4:8, 11). Efu wi e lesipeki den man ya, neen wi e wooko anga den leli di den e gi u, wi anga Yehofa ná o poli. Wi anga den taa baala anga sisa aini a kemeente o go e libi na a wan tu.

15. San u mu du?

¹⁵ Efu wi e dyalusu anga taawan, u ná o poi libi bun anga useefi. Neen meke u mu puu ala dyalusu fii aini wi ati. Wi á mu e du sani di sa meke taawan dyalusu tu. A sani ya o yeepi u fu du san sikiifi a Romesama 14:19. A taki: „U mu meke moiti fu libi bun anga taawan. U mu meke moiti fu du sani di e gi taawan taanga-sikin.” San u sa du fu yeepi taawan fu den á dyalusu? San o yeepi u fu libi bun anga taawan?

16. Fa u sa yeepi taawan fu den á dyalusu?

¹⁶ Den sani di wi e du, sa meke taawan dyalusu. A goontapu fu Saatan e leli u taki u mu e „poolo anga den gudu” di wi abi (1 Yoh. 2:16). Ma a sani ya e meke sama dyalusu anga taawan. Wan fasi fa u sa yeepi taawan fu den á dyalusu, a te u nai gafa fu den gudu di wi abi efuso sowtu  nyun sani wi o bai. Wan taa fasi fa u sa yeepi taawan fu den á dyalusu, a te u nai fii useefi fu di wi abi faantiwowtu aini a kemeente. Efu wi e gafa fu den gaandi di wi abi, a sani ya sa meke taawan dyalusu anga u. Ma efu wi e poti pakisei a taawan, da wi e gafa den fu den bun sani di den e du, wi o yeepi den fu tifeedi anga san den abi. A so a kemeente o man libi na a wan.

17. San den baala fu Yowsefu be man du? San be yeepi den fu du a sani ya?

¹⁷ Dyalusu a wan sani di u poi puu aini wi ati. Luku a toli fu den baala fu Yowsefu baka. Omen yali baka di den libi ogii anga Yowsefu, den anga en miti a Egepte. Fosi Yowsefu meke den baala fi en sabi sama neen, a du wantu sani fu luku efu den kengi. A kai den kon nyan neen tafaa, neen a gi en baala Benyamin nyanyan moo ala den taawan (Gen. 43:33, 34). Toku den taa baala fi en á dyalusu anga Benyamin. Ma den soi taki den be e booko den ede anga den pikin baala. Den be e booko den ede anga den dda Yakopu tu (Gen. 44:30-34). Fu di den baala fu Yowsefu á be e dyalusu moo, meke a famii fu den be e libi na a wan baka (Gen. 45:4, 15). A leti so a de aini a ten ya tu. Efu u puu ala den dyalusu fii di e kon aini wi ati, wi o libi na a wan anga den sama aini wi osufamii, anga den baala anga sisa aini a kemeente.

18. Enke fa Yakowbesi 3:17, 18 e soi, da san o pasa efu wi e meke moiti fu libi bun anga taawan?

¹⁸ Yehofa á wani wi e dyalusu anga useefi, ma a wani u libi na a wan. A moiti wi abi fu meke fu man du a sani ya, bika enke fa u si aini a artikel ya, da dyalusu a wan fii di ala sama mu feti anga en (Yak. 4:5). Wi e tan aini wan goontapu tu pe sama e si dyalusu enke wan kowownu sani. Efu wi e meke moiti fu abi sakafasi, efu wi e tifeedi anga san wi abi, efu wi e teke sani fu bigi, u ná o go e dyalusu anga taawan. Ma wi o go e libi bun anga taawan, bika wi o lobi den anga u hii ati.​—Leisi Yakowbesi 3:17, 18.