1. San wan sama be mu du efu a be wani taki anga a kownu fu Persiya?

MEKE u taki i be e tan aini Persiya, wan sani fu 2500 yali pasa. I wani taki anga a kownu fu a kondee, neen meke i teke pasi go a Susan, a foto pe a kownu e tan. Ma a kownu be mu gi i pasi fosi i be sa go taki anga en. Efi i be go na a kownu sondee a gi i pasi, a sani de be sa tyai dede gi i.​—Est. 4:11.

2. Saide wi á mu e feele fu taki anga Yehofa?

² Ai bigi gi u taki Yehofa á de enke a kownu ya. Yehofa pelensipali moo ala libisama tiimakiti, tokuso u sa taki anga en ala yuu. A á wani u feele fu taki anga en. Beibel e kai Yehofa a „Sama di meke ala sani”, „a Moo Taanga Gadu”, anga „Masaa fu hemel anga goontapu”. Tokuso Yehofa wani u kai en u „Dda” tu (Mat. 6:9). Ai bigi gi u taki Yehofa wani u si en enke u Dda.

3. Saide a fiti fu kai Yehofa u „Dda”? San wi o luku aini a artikel ya?

³ A fiti fu u kai Yehofa u „Dda”, bika neen meke u (Ps. 36:9). Yehofa a u Dda, neen meke u mu e aliki en. Te wi e du sani enke fa a wani, wi o fende wini (Heb. 12:9). Aini a ten di e kon, wi o libi fu teego a goontapu, efuso hemel. Ma wi e fende wini nownow kaba te wi e aliki Yehofa. Aini a artikel ya, wi o luku fa Yehofa e soi taki en a wan Dda di lobi u. Wi o luku tu saide u sa biibi taki a ná o gwe fika u noiti. Ma meke u luku fosi saide u sa biibi  taki Yehofa lobi u, anga saide u sa biibi taki ai booko en ede anga u.

4. Saide ai taanga gi son sama fu si Yehofa enke den Dda?

⁴ Ai taanga gi i fu si Gadu enke i Dda? Son sama e fii enke a Moo Taanga Gadu nai booko en ede anga libisama. Ma Yehofa á wani u fii so, bika a lobi u. Neen gi u libi, a wani u toon en mati. Na aseefi sani ya apostel Pawlesi be taigi den sama fu Ateine di be e aliki en. Baka dati a taigi den taki Yehofa „á de faawe fu u” (Toli 17:24-29). Gadu á wani u feele fu taki anga en, leti enke fa wan pikin nai feele fu go taki anga en dda, fu di a sabi taki en dda lobi en.

5. San a toli fu wan Kelesten sisa e leli u?

⁵ Ai taanga gi son sama fu si Yehofa enke den Dda, fu di den dda be e libi ogii anga den. Wan Kelesten sisa taki: „Nda be lobi taigi mi hati sani. Di mi bigin sutudeli Beibel, a be taanga gi mi fu si Yehofa enke wan Dda di lobi mi. Ma moo mi be e leli sabi Yehofa, moo mi be e lobi en.” Efu a so yu e fii enke a sisa ya, ná booko yu ede tumisi. Dyonson iseefi o si taki Yehofa na a moo bun Dda di de.

6. Enke fa Mateyesi 11:27 e soi, da san a wan fasi fa Yehofa yeepi u fu si en enke wan Dda di lobi u?

⁶ Yehofa wani u si en enke wan Dda di lobi u, neen meke a meke sama sikiifi den sani di Yesesi be e taki, anga den sani di a be e du poti aini Beibel. (Leisi Mateyesi 11:27.) Yesesi be e du sani leti enke fa en Dda be o du sani efu a be de a goontapu. Neen meke a be taki: „A sama di si mi, si a Dda tu” (Yoh. 14:9). Te Yesesi be e taki fu Yehofa, a be lobi kai Yehofa Dda. Aini den Beibel buku Mateyesi, Malikisi, Lukasi anga Yohanisi, a wan sani fu 165 leisi Yesesi kai Yehofa „Dda”. Saide Yesesi be lobi kai Yehofa en Dda? A be e du a sani ya fu soi sama taki Yehofa a wan Dda di lobi u.​—Yoh. 17:25, 26.

7. San wi e leli fu Yehofa te u luku fa a be e libi anga en Manpikin Yesesi?

⁷ San wi e leli fu Yehofa te u luku fa a be e libi anga en Manpikin Yesesi? Ala yuu Yehofa be e aliki Yesesi te a be e begi en, a be e piki den begi fi en tu (Yoh. 11:41, 42). Winsi san be e miti Yesesi, a be e fii taki Yehofa be de anga en ala yuu.​—Luk. 22:42, 43.

8. Fa Yehofa solugu Yesesi di a be de a goontapu ya?

⁸ Yesesi be sabi taki a Yehofa na a sama di meke en, neen meke a be taki na a Dda „gi mi libi” (Yoh. 6:57). Yesesi be e fitoow en Dda. Yehofa be gi Yesesi ala san a be abi fanowdu fu tan a libi. A gi Yesesi a kaakiti di a be abi fanowdu fu tan dini en anga en hii ati tu.​—Mat. 4:4.

9. Fa Yehofa be soi taki a lobi Yesesi di a be de a goontapu ya?

⁹ Yehofa be lobi Yesesi, neen meke ala yuu a be e soi en kiin taki ai holibaka gi en (Mat. 26:53; Yoh. 8:16). A ná ala yuu Yehofa be e kibii Yesesi fu ogii á miti en. Ma te sani be e miti Yesesi a be e yeepi en fu holidoo. Yesesi be sabi taki ala den sani di be e miti en, a be fu wan pisiten namo (Heb. 12:2). Yehofa soi Yesesi taki a lobi en, bika a be e aliki en, a be e gi en den sani di a be abi fanowdu, a be e gi en leli, a yeepi en tu fu  holidoo (Yoh. 5:20; 8:28). Wi o luku fa u Dda Yehofa e yeepi wi aini a ten ya, leti enke fa a be e yeepi Yesesi.

10. Enke fa Psalm 66:19, 20 e soi, da fa Yehofa e soi taki a lobi u?

¹⁰ Yehofa e aliki den begi fu u. (Leisi Psalm 66:19, 20.) Yehofa taki u mu e begi en naamo, a nai weli fu aliki den begi fu u (1 Tes. 5:17). U sa begi Yehofa winsi pe u de. Winsi on yuu wi e begi en, ai aliki u. Te wi e si fa Yehofa e aliki den begi fu u, wi e moo lobi en. A psalm sikiifiman be taki: „Mi lobi Yehofa tuutuu, bika te mi e begi en ai aliki mi.”​—Ps. 116:1.

11. Fa Yehofa e piki den begi fu u?

¹¹ Yehofa nai aliki den begi fu u namo, ma ai piki den tu. Apostel Yohanisi taki: „Awinsi san wi e akisi [Gadu], a o aliki wi” (1 Yoh. 5:14, 15). Kande Yehofa á piki a begi fu wi enke fa u be denki, ma u mu holi a pakisei taki a sabi san moo bun gi u. Neen meke a ná ala yuu Yehofa e gi u san wi akisi en. Son leisi a pasensi a wani leli u, meke a nai gi wi en na a yuu di wi akisi en.​—2 Kor. 12:7-9.

12-13. Fa u Dda di de a hemel e solugu u?

¹² Yehofa e solugu u. Yehofa e du san a wani ala libisama dda du (1 Tim. 5:8). Ai gi den pikin fi en den sani di den abi fanowdu fu tan a libi. A á wani wi e booko wi ede tumisi anga san wi o nyan, san wi o wei, efuso pe wi o tan (Mat. 6:32, 33; 7:11). Fu di Yehofa lobi u, meke a seeka sani gi u fu u libi waka bun aini a ten di e kon tu.

¹³ A moo pelensipali fasi fa Yehofa soi taki ai booko en ede anga u, na a gi di ai gi u san wi abi fanowdu fu toon en mati. A soi wi aini en Wowtu Beibel sama neen tuutuu, san a abi a pakisei anga a goontapu, saide u de a libi, anga san o pasa aini a ten di e kon. A meke u mma anga u dda, efuso wan taa sama yeepi u fu kon sabi en. Ai meke den owluman anga taa baala anga sisa di abi ondoofeni yeepi u fu wi anga en toon moo bun mati tu. Te wi e go a den komakandaa, Yehofa e leli wi anga den taa baala anga sisa fa u mu libi. Den sani ya a wantu fu den fasi fa Yehofa e soi taki ai booko en ede anga u, leti enke wan dda.​—Ps. 32:8.

14. Saide Yehofa e puu kaasi gi u? Fa ai du a sani ya?

¹⁴ Yehofa e puu kaasi gi u. Yesesi á be abi sondu, ma wi abi sondu, neen meke te u Dda e leli u, son leisi ai puu kaasi gi u tu. Beibel taki: „Na a sama di Yehofa lobi ai puu kaasi gi” (Heb. 12:6, 7). A omen fasi Yehofa e puu kaasi gi u. Den sani di wi e leisi aini Beibel efuso yee a komakandaa, e yeepi u fu si efu u mu kengi a fasi fa wi e denki anga a fasi fa wi e tyai useefi. Son leisi a den owluman e taki anga u. Winsi sowtu fasi Yehofa puu kaasi gi u, u mu holi a pakisei taki a di a lobi u meke ai poti wi a pasi.​—Yel. 30:11.

15. Fa Yehofa e yeepi u fu holidoo te tesi e miti u?

¹⁵ Yehofa e yeepi u fu holidoo te tesi e miti u. Leti enke fa wan dda e holibaka gi en pikin te sani e miti en, a so u Dda Yehofa e yeepi u te tesi e miti u. A gi wi a santa yeye di e yeepi u fu wi á du sani di o meke wi anga en poli (Luk. 11:13). Yehofa e yeepi u tu te den booko-ede fu wi e moo wi. A gi u wan moin howpu di  e gi u taanga-sikin fu holidoo te sani e miti u. Pakisei a sani ya: Winsi san e miti u nownow, u Dda o puu ala den sani ya gi u, bika a lobi u. Den sani di e miti u nownow a fu wan pisiten namo, ma efu u holidoo Yehofa o meke sani waka bun gi u fu teego.​—2 Kor. 4:16-18.

16. San pasa di Adan taangayesi en Dda Yehofa?

¹⁶ Te u luku san Yehofa du baka di Adan sondu, wi e si taki a lobi u. Di Adan taangayesi en Dda di lobi en, neen Yehofa puu en aini a osufamii fi en. Den bakapikin fi en e fii a bakapisi fu a sani di a du tu (Rom. 5:12; 7:14). Ma Yehofa du wan sani wantenwanten fu yeepi den bakapikin fu Adan.

17. San Yehofa du baka di Adan taangayesi en?

¹⁷ Yehofa sitaafu Adan, ma a á fika den bakapikin fi en sondee howpu. A paamisi wantenwanten taki a o teke den sama di e aliki en aini a osufamii fi en baka (Gen. 3:15; Rom. 8:20, 21). A fu a sani ya ede Yehofa sende en Manpikin kon a goontapu. A dede di Yehofa meke en Manpikin kon dede gi u, e soi taki a ná pikin lobi a lobi u.​—Yoh. 3:16.

18. Fa u du sabi taki Yehofa wani wi aini en osufamii baka, winsi u be gwe fika en?

¹⁸ Winsi fa wi abi sondu, toku Yehofa wani wi aini a osufamii fi en. A nai fuka gi u, ma ala yuu a de kabakaba fu yeepi u. Kande u du wan sani di hati Yehofa, efuso u gwe fika en, ma tokuso ai howpu taki wi o daai kon neen baka wan dei. A ageisitoli di Yesesi be gi fu a lasi manpikin, e yeepi u fu fusutan taki Yehofa e booko en ede anga u tuutuu (Luk. 15:11-32). A dda aini a ageisitoli  ya be e howpu taki a boi fi en be o daai kon baka. Di a boi daai kon a osu baka, a dda bali wadaa gi en. Efu u be gwe fika Yehofa, neen u daai kon neen baka, u sa biibi taki u Dda di lobi u, o teke wi anga en hii ati baka.

19. Fa Yehofa o puu ala den polobelema di a sondu fu Adan tyai gi libisama?

¹⁹ U Dda o puu ala den bakapisi di a sondu fu Adan tyai gi u. Baka di Adan sondu, Yehofa paamisi taki a o teke 144.000 sama a goontapu, fu go tii makandaa anga en Manpikin a hemel enke kownu anga pilisite. Yesesi anga den sama di o tii makandaa anga en o yeepi den sama di e aliki Gadu fu den na abi nawan sondu moo aini a nyun goontapu. Efu den sama ya tan aliki Gadu di a lasiti tesi o miti den, a o gi den teego libi. U Dda o piisii di a o si fa a hii goontapu o fuu anga manpikin anga umanpikin di ná abi sondu. A ten de o switi tuutuu!

20. San a wantu fasi fa Yehofa soi taki a lobi u tuutuu? San wi o luku aini a taa artikel?

²⁰ Yehofa soi u taki a lobi u tuutuu. En na a moo bun Dda di u be sa abi. Ai aliki u te wi e begi en. Ai gi u san wi abi fanowdu fu tan a libi, ma ai yeepi u tu fu tan dini en winsi san e miti u. Ai kaasi u te a de fanowdu. Ai holibaka gi u te tesi e miti u. Boiti dati, a o du omen sani gi wi aini a ten di e kon. Wi e piisii, bika u sabi taki u Dda lobi u, ai booko en ede anga u! Aini a taa artikel wi o luku wantu fasi fa u sa soi Yehofa taki ai bigi gi u taki a lobi u.