1-2. Saide Yehofa gi wi a okasi fu kon aini a osufamii fi en? Fa a du a sani ya?

YEHOFA kai u kon aini a osufamii fi en. A sani ya e bigi gi u tuutuu. A osufamii ya na ala den sama di e dini Yehofa anga den hii ati. Den sama di de aini a osufamii fu Yehofa lobi denseefi, den e biibi taki a dede fu Yesesi o tyai wini gi den. A omen wini wi e fende nownow fu di wi e dini Gadu. Ma aini a ten di e kon wi abi a howpu fu libi fu teego a hemel, efuso aini wan paladeisi a goontapu.

² A di Yehofa lobi u meke a gi wi a okasi fu kon aini a osufamii fi en. Ma fu man du a sani ya, Yehofa be abi fu pai wan paiman (Yoh. 3:16). Beibel taki Gadu „bai u di a pai wan paiman” (1 Kor. 6:20). Di Yehofa meke en Manpikin dede gi u, a gi wi a okasi fu toon en mati. U sa kai a moo pelensipali Sama fu hemel anga goontapu u Dda. Enke fa u be luku na a artikel a fesi, da Yehofa na a moo bun Dda di u be sa abi.

3. San wi e akisi useefi kande? (Luku a faki „ Yehofa e poti pakisei a mi?”)

³ Wan Beibel sikiifiman be taki: „San mi o gi Yehofa fu ala den bun di a du mi?” Kande wi e akisi useefi a sani ya tu (Ps. 116:12). We, noiti wi o man pai u Dda di de hemel fu den sani di a du gi u. Ma fu di Yehofa lobi u, meke useefi lobi en. Apostel Yohanisi taki: „A fu di Gadu fosi lobi u, meke u man lobi Gadu anga taa sama tu” (1 Yoh. 4:19). Fa u sa soi Yehofa taki u lobi en?

4. Enke fa Yakowbesi 4:8 e soi, da saide u mu meke moiti fu kon koosube a Yehofa?

⁴ Yehofa wani u toon en mati, a wani wi e taki anga en ala yuu. (Leisi Yakowbesi 4:8.) Yehofa taki u mu e „begi naamo”. A paamisi u taki a o aliki u solanga wi e begi en (Rom. 12:12). Noiti Yehofa e abi sani fu du te da a ná abi ten fu aliki den begi fu u. Useefi e aliki Yehofa te wi e leisi en Wowtu Beibel, anga den taa buku di a olikanisâsi fi en e meke fu yeepi u fu fusutan a Beibel moo bun. Wan taa fasi fa wi e aliki Yehofa, a te wi e de anga ala u pakisei a den Kelesten komakandaa. Leti enke fa wan pikin anga en mma anga dda e kon moo koosube fu denseefi te den e taki ala yuu, a so wi o tan koosube fu Yehofa te wi e taki anga en ala yuu.

5. Fa u mu e begi?

⁵ Fa yu e begi? Yehofa wani u taigi en fa wi e fii, anga ala san de a wi ati (Ps. 62:8). Neen meke a bun fu akisi useefi taki: ’Te mi e begi, a denseefi sani mi e taki ala yuu?’ U sabi taki i lobi Yehofa anga i hii ati. Yu á wani yu anga en poli. Ma fu du a sani ya, i mu e taki anga en ala yuu. Taigi en san de a yu ati. Taigi en san e meke yu e piisii, anga san a den booko-ede fi i. Ná feele fu suku yeepi a Yehofa.

6. San u mu du efu u wani tan koosube fu u Dda di de a hemel?

⁶ Efu u wani tan koosube a Yehofa, u mu e teke den sani di ai du gi u fu bigi. A sani di a psalm sikiifiman be taki a tuu. A be taki: „Yehofa mi Gadu, i du tyaipi sani. A omen foondoo sani i du gi u, ala yuu yu e pakisei u. Sama á de enke i. Efu mi be o puubei fu taigi sama ala den sani di i du, mi á be o poi, bika den ipi te mi á poi teli den” (Ps. 40:5). U nai fii namo taki den sani di Yehofa e du e bigi u, ma wi e du efuso taki sani di e soi taki den sani ya e bigi gi u. Te wi e du den sani ya, wi e soi taki wi anga den sama fu a goontapu ya a ná aseefi. Bika gaanse sama nai teke den sani di Gadu e du gi den fu bigi. A teke di sama nai teke sani fu bigi, a be wan fu den maiki di be o soi taki wi e libi aini den „lasiti dei” (2 Tim. 3:1, 2). Wi á wani de enke den sama ya, di nai teke sani fu bigi.

7. Fa Yehofa wani u libi anga useefi? Saide a wani u libi so anga useefi?

⁷ Mma anga dda á lobi te den pikin fu den e kwali efuso e feti anga denseefi, ma den wani den libi bun anga denseefi. A so a de anga Yehofa tu. A wani ala den sama di e dini en libi bun anga denseefi. Na a lobi di u lobi useefi e soi taki wi a tuu Kelesten (Yoh. 13:35). A sani di a psalm sikiifiman be taki a tuu. A be taki: „Luku fa a bun anga fa a switi te baala e libi na a wan!” (Ps. 133:1) Te u lobi u baala anga sisa, wi e soi taki u lobi Yehofa tu (1 Yoh. 4:20). Wi e piisii taki wi abi baala anga sisa di e ’libi bun anga denseefi’.​—Efe. 4:32.

8. Enke fa 1 Yohanisi 5:3 e soi, da san na a moo pelensipali sani di mu meke wi e aliki Yehofa?

⁸ Yehofa taki pikin mu e aliki den mma anga den dda. A dati a wani u du tu (Efe. 6:1). A Yehofa meke u, neen e holi wi a libi ala dei, neen meke u mu aliki en. Ma a moo pelensipali sani di mu meke wi e aliki Yehofa, a di u lobi en. (Leisi 1 Yohanisi 5:3.) Winsi fa a Yehofa gi wi ala  san wi abi, toku a nai dwengi u fu aliki en. A gi ala sama a okasi fu du san den wani anga den libi. Te wi e aliki Yehofa fu di u lobi en, ai piisii.

9-10. Saide u mu sabi fa Yehofa wani u libi? Sowtu wini wi e fende te wi e libi enke fa a wani?

⁹ Mma anga dda á wani ogii miti den pikin fu den, neen meke den e taigi den san den mu du, anga san den á mu du. Te pikin e du san den mma anga dda taki, den e soi taki den e fitoow den, den e soi tu taki den e lesipeki den. Yehofa a u Dda di de a hemel, neen meke u mu sabi san a wani u du anga san a á wani u du. Te u sabi den sani ya, u mu wooko anga den. A so wi e soi taki u lobi Yehofa. Wi e soi tu taki wi e lesipeki en. Wi e fende wini te wi e du sani enke fa Yehofa wani (Yes. 48:17, 18). Ma sani nai waka bun anga den sama di á wani wooko anga den weiti fu Yehofa.​—Gal. 6:7, 8.

¹⁰ Te wi e du sani enke fa Yehofa wani, u ná o du sani di o meke u siki, u ná o du sani di o meke u fii booko-saka, u ná o du sani di o meke wi anga en poli tu. Yehofa sabi san moo bun gi u. Wan sisa den e kai Aurora, di e tan na Ameekankondee taki: „Mi sabi taki te yu e aliki Yehofa, yu o abi a moo bun libi di wan sama sa abi.” A sani di a sisa ya taki a tuu. Sowtu wini i fende di i du sani enke fa Yehofa wani?

11. San begi e yeepi u fu du?

¹¹ Begi e yeepi u fu du sani enke fa Yehofa wani, winsi a á makiliki. Son yuu  ai taanga fu du san Yehofa wani, bika wi abi sondu. Toku u mu e meke moiti ala yuu fu du sani enke fa a wani. A psalm sikiifiman be begi Yehofa taki: „Yeepi mi fu e angii fu du sani enke fa i wani” (Ps. 51:12). Wan pionili sisa den kai Denise taki: „Te ai taanga gi mi fu du san Yehofa wani, mi e begi en fu a gi mi kaakiti fu du san bun.” U sa biibi taki ala yuu Yehofa e aliki den sowtu begi ya.​—Luk. 11:9-13.

12. San Efeisesama 5:1 taki u mu du?

¹² Leisi Efeisesama 5:1. Enke „pikin di Gadu lobi” wi e du ala san u man fu waka neen baka. Wi e meke moiti fu lobi taawan enke fa Yehofa lobi u, fu abi switifasi enke en, anga fu e gi taawan paadon enke en. Te sama di á sabi Gadu si den moin manii fu u, a sani ya sa meke den wani kon sabi en (1 Peit. 2:12). Kelesten mma anga dda mu e meke moiti ala yuu fu libi anga den pikin fu den enke fa Yehofa e libi anga u. Efu mma anga dda abi den moin manii fu Yehofa, a sani ya o meke den pikin fu den wani toon Yehofa mati tu.

13. San o yeepi u fu abi deki-ati?

¹³ Pikinnengee lobi taki fu den dda. A letiso u mu lobi taki fu Yehofa, bika u wani ala sama sabi en. Wi e fii enke Kownu David di be taki: „Mi o gafa  Yehofa fu den sani di a du” (Ps. 34:2). Ma kande yu a sen sama. San o yeepi i fu abi deki-ati fu taki fu Yehofa? Te wi e pakisei fa Yehofa o piisii te wi e taki fi en, a sani ya o gi u deki-ati. Efu wi e pakisei den wini di taa sama o fende te denseefi kon sabi Yehofa, da u ná o feele moo fu peleiki. Yehofa be yeepi den baala anga sisa fu a ten fu den apostel fu abi deki-ati. U sa biibi taki a o yeepi wi aini a ten ya tu.​—1 Tes. 2:2.

14. Saide a pelensipali fu yeepi sama fu toon Yesesi bakaman ?

¹⁴ Yehofa nai paati bee, neen meke ai piisii te ai si taki u lobi ala sama (Toli 10:34, 35). Wan fu den moo bun fasi fa u sa soi taki u lobi taawan, a te wi e paati a bun nyunsu anga den (Mat. 28:19, 20). Sowtu wini a wooko ya abi? Den sama di e aliki u, o abi wan moo bun libi nownow, ma den o abi a howpu tu fu libi fu teego aini a ten di e kon.​—1 Tim. 4:16.

15-16. Saide wi e piisii?

¹⁵ U Dda Yehofa lobi u, neen meke a wani u de koloku (Yes. 65:14). Winsi a libi taanga gi wi aini a ten ya, toku wi e piisii. Wi e piisii fu di u sabi taki u Dda di de a hemel lobi u. Wi e piisii fu di wi e fusutan den sani di sikiifi aini en Wowtu Beibel (Yel. 15:16). Wi e piisii tu fu de aini a osufamii fu Yehofa, pe wi abi baala anga a sisa di lobi Yehofa, anga den weiti fi en. Den lobi denseefi tu.​—Ps. 106:4, 5.

¹⁶ U nai lasi a piisii fu u, bika u sabi taki aini a ten di e kon a libi o moo switi, te Yehofa o puu ala den sani di e fooseli libisama aini a ten ya. A Kownukondee fi en o meke a hii goontapu toon wan paladeisi. Wi e biibi tu taki den sama di be dede o weki baka (Yoh. 5:28, 29). Ná pikin piisii wi o piisii te a sani ya o pasa. Ma a moo gaan sani di o pasa, a taki ala sama a hemel anga goontapu o gafa Yehofa, den o gi en a gaandi di a fiti fu kisi.