1. Saide son man e libi wan fasi anga den uman anga den pikin?

SAN yu e pakisei te i yee a wowtu ‘edeman’? Son mannengee a fa den si den gaansama fu den be e libi anga den uman anga den pikin, a so den e libi anga du fu den tu. Yanita, wan sisa di e tan a Europa taki: ‘Den sama na a pisi pe mi e tan e si enke mannengee bun moo umansama. Den fende taki a osuwooko umansama meke fu du.’ Luke, wan baala di e tan na Ameekankondee taki: ‘Son dda e leli den boi fu den taki umanpikin ná a taki, a mannengee na a taki a kaba.’ Ma a ná so Yehofa wani wan man libi anga en uman. (Luku Malikisi 7:13 tu.) San o yeepi wan man fu de wan bun osufamii edeman?

2. San wan osufamii edeman mu fusutan bun? Saide a mu fusutan a sani ya?

² Te wan man fusutan bun fa Yehofa wani a tyai a faantiwowtu fi en, a sani ya o yeepi en fu de wan bun osufamii edeman. A mu fusutan tu saide Yehofa poti wan edeman aini a osufamii, anga fa a sa waka a Yehofa anga Yesesi baka. Saide wan man mu fusutan den sani ya? A fu di Yehofa, a Sama di gi en a faantiwowtu ya, e luku efu ai du en wooko bun.​—Luk. 12:48b.

3. Enke fa 1 Korentesama 11:3 e soi, da fa Yehofa sete a edeman wooko?

³ Leisi 1 Korentesama 11:3. A tekisi ya e soi fa Yehofa sete a osufamii fi en. A Yehofa e taki gi a osufamii fi en di de a hemel anga goontapu. A poti son sama enke edeman, ma ai luku fa den sama ya e tyai a faantiwowtu di a gi den  (Rom. 14:10; Efe. 3:14, 15). Yehofa poti Yesesi enke a edeman fu a kemeente, ma ai luku fa Yesesi e du a wooko ya (1 Kor. 15:27). Di Yehofa sete a osufamii, a poti a man enke edeman fi en uman anga den pikin, ma Yehofa anga Yesesi e luku fa ai du a wooko ya.​—1 Peit. 3:7.

4. San Yehofa anga Yesesi abi a leti fu du?

⁴ Yehofa abi a leti fu soi u fa u mu tyai useefi, bika neen na a edeman fu a osufamii fi en. A abi a leti fu sitaafu den sama di nai wooko anga san a taki tu (Yes. 33:22). Yesesi abi a leti fu taigi u fa u mu tyai useefi tu, bika neen na a edeman fu a kemeente. A sa sitaafu den sama di nai wooko anga san a taki.​—Gal. 6:2; Kol. 1:18-20.

5. Sowtu faantiwowtu osufamii edeman abi? Fa den mu tyai a faantiwowtu ya?

⁵ Leti enke Yehofa anga Yesesi, wan osufamii edeman sa soi en osufamii fa den mu du sani (Rom. 7:2; Efe. 6:4). Ma te ai du a sani ya, a mu wooko anga san a Wowtu fu Gadu taki (Odo 3:5, 6). Neen osufamii wawan a sa poti weiti gi, a á mu poti weiti gi taa sama di á de aini en osufamii (Rom. 14:4). Te den pikin fi en bigi komoto a osu, den mu lesipeki en ete, ma a denseefi mu luku fa den o du sani, a neen e taki gi den moo.​—Mat. 19:5.

6. Saide Yehofa poti sama fu teke fesi?

⁶ A di Yehofa lobi u meke a poti sama fu teke fesi. Efu a á be du a sani ya, u be o go e du sani fanyafanya (1 Kor. 14:33, 40). Efu sani be e waka so, wi á be o libi na a wan, wi á be o piisii tu. Efu Yehofa á be poti sama fu teke fesi, wi á be o sabi sama mu taki fa sani o waka aini a olikanisâsi.

7. Enke fa Efeisesama 5:25, 28 e soi, da fa Yehofa wani wan man libi anga en uman?

⁷ Efu a wan bun sani taki Gadu poti a man fu teke fesi aini a osufamii, da saide gaanse uman aini a ten ya e fii taki den man fu den e fooseli den? We, a fu di somen man aini a ten ya nai wooko anga san Yehofa taki. Pe fu den wooko anga san a taki, den e wooko anga san den gwenti, efuso san den si den gaansama fu den be e du. Den e tyotyo den uman fu den, den nai booko den ede anga fa den uman e fii. Son man e libi ogii anga den uman fu di den wani soi sama taki den uman nai taki gi den. Den e du a sani ya tu fu soi a uman taki a den na a man aini a osu. Son man e denki taki winsi a á poi dwengi en uman fu lobi en, toku a poi dwengi en fu du san a wani. * Den man di e du sani na a fasi ya nai denki bun seefiseefi, den ná abi nawan doopu lesipeki gi a uman fu den. A ná dati Yehofa be abi a pakisei di a poti mannengee enke edeman fu a osufamii.​—Leisi Efeisesama 5:25, 28.

8. San o yeepi wan man fu de wan bun osufamii edeman?

⁸ Efu wan man wani de wan bun osufamii edeman, a mu luku fa Yehofa anga Yesesi e du a edeman wooko fu den, da a waka a den baka. Wi o luku tu sani di e soi taki Yehofa anga Yesesi e du a edeman wooko fu den bun. Baka dati wi o luku fa den sani ya sa yeepi osufamii edeman fu libi bun anga den uman anga den pikin fu den.

9. Fa Yehofa e soi taki a abi sakafasi?

 ⁹ Sakafasi. Sama á de a hemel anga goontapu di koni enke Yehofa, tokuso Yehofa e aliki den sama di e dini en te den e taki fa den e denki fu son sani (Gen. 18:23, 24, 32). Son leisi ai wooko anga san den taki tu (1 Kow. 22:19-22). Yehofa ná abi sondu, ma toku a nai poti pakisei a den pikinpikin fowtu di wi e meke. Ai holi a pakisei taki wi a sondu libisama, neen meke ai yeepi u fu sani sa waka bun anga u (Ps. 113:6, 7). Beibel e soi taki Yehofa e yeepi sama te den fuka (Ps. 27:9; Heb. 13:6). Kownu David be fusutan taki a di Yehofa abi sakafasi meke a gi en a okasi fu wooko gi en. Yehofa yeepi en tu fu du den wooko di a be gi en.​—2 Sam. 22:36.

10. Fa Yesesi soi taki a abi sakafasi?

¹⁰ Luku a toli fu Yesesi. Neen a be Masaa, ma toku a wasi a futu fu den bakaman fi en. Saide Yehofa meke den sikiifi a toli ya aini Beibel? A di a be wani osufamii edeman, anga taa sama waka a Yesesi baka. Yesesi be taki: ‘Mi soi u fa u mu du en, fu u waka a mi baka’ (Yoh. 13:12-17). Winsi fa Yesesi be abi wan hei posisi, toku a á be e sidon gi sama fu du sani gi en, ma a be e du ala san a poi fu yeepi taawan.​—Mat. 20:28.

11. Fa osufamii edeman sa soi sakafasi leti enke Yehofa anga Yesesi?

¹¹ San u leli? A omen fasi osufamii edeman sa soi taki den abi sakafasi. Wan osufamii edeman di abi sakafasi e holi a pakisei taki en uman anga en pikin a sondu sama, neen meke den o go e meke fowtu. Ai aliki te den sama aini en osu e taigi en fa den e si wan toli, winsi a sani di den taki nai kai anga en. Marley, wan sisa di e tan na Ameekankondee taki: ‘A ná ala yuu mi anga mi man e denki go na a wan se, ma ai teke en fu bigi te mi e taigi en fa mi e denki fu wan toli. Ai aliki mi, son leisi ai wooko anga san mi taigi en.’ Wan man di abi sakafasi e yeepi en uman boli, wasi tyobosani, sibi osu, efuso wasi koosi, winsi sama na a pisi pe den e tan e si den wooko ya enke umanpikin wooko. A ná ala yuu a sani ya makiliki. Saide? Wan sisa den e kai Rachel taki: ‘Den sama  na a pisi pe wi e tan e si wan man enke wisiwasiman efu ai yeepi en uman wasi tyobosani efuso kiin osu. Den e si enke na a uman e taki gi en.’ Efu a so den sama na a pisi pe yu e tan e denki, da holi a pakisei taki Yesesi be wasi den futu fu den bakaman fi en. A ten de a wan saafu be e du a wooko ya. Wan bun osufamii edeman e du ala san a poi fu meke en uman anga en pikin piisii, winsi sama o taki en sani. Boiti sakafasi, sowtu taa manii wan osufamii edeman mu abi?

12. Fa Yehofa anga Yesesi soi taki den lobi u?

¹² Lobi. Yehofa lobi u (1 Yoh. 4:7, 8). A di Yehofa lobi u meke a gi wi a Beibel anga a olikanisâsi fi en fu yeepi u fu toon en mati. Ai soi u taki ai booko en ede anga u, a sani ya e meke u fii bun. Yehofa e gi u san wi abi fanowdu ala dei tu. Beibel taki ‘ai gi wi ala sani di e meke u piisii’ (1 Tim. 6:17). A di a lobi u meke ai poti wi a pasi te u meke wan fowtu. A meke en Manpikin kon dede gi u tu fu pai fu u sondu. Yesesi seefi soi taki a lobi u di a kon dede gi u (Yoh. 3:16; 15:13). Efu wi e aliki Yehofa anga Yesesi, noiti den o gwe fika u.​—Yoh. 13:1; Rom. 8:35, 38, 39.

13. Saide wan osufamii edeman mu e soi taki a lobi en osufamii? (Luku a faki ‘ San wan man di á toow langa ete mu du efu a wani en uman lesipeki en?’)

¹³ San u leli? Wan osufamii edeman mu lobi en osufamii. Saide a sani ya pelensipali? Apostel Yohanisi be taki: ‘Wan sama di á lobi en baala di ai si, á poi lobi Gadu di a nai si’ (1 Yoh. 4:11, 20). Wan man di lobi en osufamii, o meke moiti fu waka a Yehofa anga Yesesi baka. Ao yeepi en osufamii fu den anga Yehofa toon mati, ao soi taki ai booko en ede anga en uman anga en pikin. Ao meke moiti tu fu den abi nyanyan, koosi, anga wan peesi fu tan (1 Tim. 5:8). Ao leli den pikin fi en fa fu du sani anga koni, ao go e poti den a pasi. Ao go e meke moiti fu du sani enke fa Yehofa wani. Te ai du sani, ao go e holi a osufamii fi en a pakisei. Meke u poti  pakisei a den sani di u taki fu den ya. Wi o si fa osufamii edeman sa waka a Yehofa anga Yesesi baka te ai du den sani ya.

14. Fa wan osufamii edeman sa yeepi en osufamii fu toon Yehofa mati?

¹⁴ Yeepi yu osufamii fu dini Yehofa. Yesesi be e waka neen Dda baka, neen meke a yeepi den bakaman fi en fu den biibi taanga (Mat. 5:3, 6; Malik. 6:34). Na aseefi sani ya wan osufamii edeman mu du. A mu yeepi en osufamii fu den anga Yehofa toon mati. A dati na a moo pelensipali wooko fi en (Deit. 6:6-9). A mu e yeepi en osufamii fu sutudeli a Wowtu fu Gadu, go a komakandaa, anga fu du a peleikiwooko. A mu yeepi den tu fu den á gwe fika Yehofa.

15. Fa wan osufamii edeman sa soi taki ai booko en ede anga en osufamii?

¹⁵ Soi yu osufamii taki yu e booko yu ede anga den. Ala yuu Yehofa be e taigi Yesesi taki a lobi en (Mat. 3:17). Yesesi seefi be e taigi den bakaman fi en taki a lobi den, ma a be e du sani gi den tu fu soi taki a lobi den. Den bakaman fu Yesesi be e taigi en tu taki den lobi en (Yoh. 15:9, 12, 13; 21:16). Wan fasi fa wan osufamii edeman sa soi taki a lobi en uman anga en pikin, a te ai sutudeli Beibel anga den. A mu e gafa den te den du wan bun sani, a mu e taigi den tu taki a lobi den.​—Odo 31:28, 29.

16. San wan osufamii edeman mu du? San a mu holi a pakisei te ai du a sani ya?

¹⁶ Solugu yu osufamii. Yehofa be e solugu den Islayelisama winsi fa den be e taanga-yesi en son yuu (Deit. 2:7; 29:5). Ai solugu wi aini a ten ya tu (Mat. 6:31-33; 7:11). Di Yesesi be de a goontapu, a be e gi den bakaman fi en nyanyan (Mat. 14:17-20). A omen siki sama a be e deesi tu (Mat. 4:24). Efu wan osufamii edeman wani Yehofa piisii anga en, da a mu e solugu en osufamii. Ma a á mu e wooko te da a ná abi ten fu sutudeli anga en osufamii. A mu e meke ten fu du sani makandaa anga den tu.

17. Fa Yehofa anga Yesesi e leli u?

¹⁷ Leli yu osufamii. A di Yehofa wani sani waka bun anga u meke ai leli u (Heb. 12:7-9). Yesesi be lobi den sama di a be e leli tu, leti enke en Dda (Yoh. 15:14, 15). Te den á be e tyai denseefi bun, a be e poti den a pasi, ma a be e taki switi anga den te a be e du a sani ya (Mat. 20:24-28). A be e holi a pakisei taki den bakaman fi en be o go e meke fowtu bika den a sondu sama.​—Mat. 26:41.

18. San osufamii edeman mu holi a pakisei?

¹⁸ Wan osufamii edeman di e waka a Yehofa anga Yesesi baka e holi a pakisei taki en uman anga en pikin o go e meke fowtu  (Kol. 3:19). Te den meke wan fowtu a ná o holi den na ati, ma ao meke moiti fu poti den a pasi anga ala sakafasi enke fa Galasiyasama 6:1 e taki. Bika ai holi a pakisei taki enseefi e meke fowtu. Ai holi a pakisei tu taki leti enke Yesesi, a mu e tyai enseefi bun da en uman anga en pikin o man waka neen baka.​—1 Peit. 2:21.

19-20. Fa osufamii edeman sa waka a Yehofa anga Yesesi baka anga a fasi fa den e du sani?

¹⁹ Holi yu osufamii a pakisei te yu e du sani. Ala yuu Yehofa e du sani di e tyai wini gi taawan. A ná di Yehofa be e fuka meke a meke libisama anga engel, ma a di a be wani den piisii meke a meke den. A ná sama be dwengi Yehofa fu a sende Yesesi kon a goontapu fu dede gi u, ma a di a be wani yeepi u meke a du a sani ya. Yesesi seefi e du sani di e tyai wini gi taawan (Rom. 15:3). Winsi fa Yesesi be e weli son leisi, toku a á be e yaki den sama di be e kon neen, ma a be e leli den.​—Malik. 6:31-34.

²⁰ Wan bun osufamii edeman sabi taki a á makiliki fu du sani di o tyai wini gi en anga en osufamii ala yuu. Neen meke a nai wooko anga fa ai fii, ma ai denki bun fosi a du wan sani. A nai feti du sani, ma ai meke moiti fu wooko anga san Yehofa taki * (Odo 2:6, 7). Te osufamii edeman e du sani na a fasi ya, den e soi taki den nai denki denseefi namo. A sani ya o meke en uman anga en pikin piisii.​—Filip. 2:4.

21. San wi o luku aini a taa artikel?

²¹ A wan pelensipali wooko Yehofa gi osufamii edeman, ai luku tu fa den e du a wooko ya. Efu wan man e meke moiti fu du sani enke Yehofa anga Yesesi, ao de wan bun osufamii edeman. Efu a uman seefi e du sani enke fa Yehofa taki, a osulibi o waka bun. Fa wan uman mu si en man? On ten a sa taanga gi wan uman fu saka enseefi neen man ondoo? Wi o luku den akisi ya aini a taa artikel.