1. San e yeepi a osufamii fu Yehofa fu libi na a wan?

WI E piisii taki u de aini a osufamii fu Yehofa. San e yeepi u fu libi na a wan? Wan fu den sani di e yeepi u, a di wi e lesipeki den sama di Yehofa poti fu teke fesi. Te u fusutan saide Yehofa poti sama fu teke fesi, ao moo makiliki gi u fu libi na a wan.

2. San wi o luku aini a artikel ya?

² Aini a artikel ya, wi o luku fa Yehofa sete a edeman wooko aini a kemeente. Wi o piki den akisi ya: ‘Sowtu faantiwowtu Yehofa gi den sisa aini a kemeente? Na ala dopu baala a edeman fu den sisa aini a kemeente? A faantiwowtu di den owluman abi na aseefi enke du fu den osufamii edeman? Meke u luku fosi fa u mu si den sisa aini a kemeente.

3. San o yeepi u fu teke den sani di den sisa e du aini a kemeente fu bigi?

³ Ai bigi gi u fu si fa den sisa e wooko taanga fu solugu den osufamii, fa den e paati a bun nyunsu fayafaya, anga fa den e yeepi taawan aini a kemeente. Te wi o fusutan moo bun fa Yehofa anga Yesesi e si umansama, a sani ya o yeepi u fu moo lesipeki den sisa fu u. Wi o luku tu fa apostel Pawlesi be e libi anga umansama.

4. Fa Beibel e soi taki Yehofa nai si mannengee bun moo umansama?

 ⁴ Beibel e soi taki Yehofa nai si mannengee bun moo umanpikin. Aini a ten fu den apostel, a mannengee anga umanpikin Yehofa be gi en santa yeye. A sani ya meke den be poi taki taa tongo, den be poi du omen taa wonduu tu (Toli 2:1-4, 15-18). A mannengee anga umansama Yehofa salufu fu go tii makandaa anga Yesesi a hemel (Gal. 3:26-29). A mannengee anga umansama abi a okasi fu libi fu teego a goontapu ya (Openb. 7:9, 10, 13-15). A mannengee anga umansama Yehofa gi a wooko fu paati a bun nyunsu tu (Mat. 28:19, 20). A Beibel buku Toli fu den apostel e taki fu wan sisa den be e kai Preskela anga en man Akwila. Apolos a be wan man di be go a hei sikoo, ma na a sisa ya anga en man be yeepi en fu fusutan Beibel moo bun.​—Toli 18:24-26.

5. Fa Lukasi 10:38, 39, 42 e soi taki Yesesi be e lesipeki umansama?

⁵ Yesesi be e lesipeki umansama. Den Faliseiman be e si mannengee bun moo umansama, den á be e taki anga umanpikin aini sama ini, den á be e leli den sani fu a Wowtu fu Gadu tu. Ma Yesesi á be de so. A mannengee anga umansama a be e leli pelensipali sani fu a Wowtu fu Gadu. * (Leisi Lukasi 10:38, 39, 42.) Te a be e go peleiki a taa peesi, a be e tyai umanpikin tu (Luk. 8:1-3). Di a weki baka, a umanpikin a sende fu go taigi den apostel taki a weki baka.​—Yoh. 20:16-18.

6. Fa Pawlesi soi taki a be e lesipeki umansama?

⁶ Apostel Pawlesi be taigi Timotiyesi taki a mu e lesipeki umansama. A taigi en taki ‘a mu si den uman di gaandi moo en enke en mma’. A taigi en tu taki ‘a mu si den yonkuu uman enke en sisa’ (1 Tim. 5:1, 2). Winsi fa Pawlesi meke moiti fu yeepi Timotiyesi fi en biibi taanga, toku a membee en taki neen mma anga en gaanmma yeepi en fu kon sabi Yehofa (2 Tim. 1:5; 3:14, 15). Di Pawlesi be sikiifi a biifi gi den Romesama, a kai wantu sisa a den nen di a sende odi gi den. Pawlesi be si taki den sisa ya be e wooko taanga, neen meke a gafa den.​—Rom. 16:1-4, 6, 12; Filip. 4:3.

7. Sowtu akisi wi o luku?

⁷ Te anga now u si taki Beibel nai leli u taki den baala bun moo den sisa. Den sisa aini a kemeente e wooko taanga. Den owluman e teke en fu bigi taki den e yeepi a kemeente fu libi na a wan. Ma toku a bun fu sabi a piki fu den akisi ya: Saide Yehofa wani den sisa wei wan sani tapu den ede te den e du son sani? A den baala wawan e toon owluman anga dinali. A sani ya wani taki ala dopu baala a edeman fu den sisa aini a kemeente?

8. Enke fa Efeisesama 5:23 e soi, da na ala den dopu baala a edeman fu den sisa aini a kemeente?

⁸ A sani ya á de fu lolo, a piki a nono. Den baala a ná edeman fu den sisa aini a kemeente, a Kelestesi a edeman fu a kemeente. (Leisi Efeisesama 5:23.) Wan man di toow, na a ede fi en uman. Wan baala di dopu, a ná ede fi en mma  (Efe. 6:1, 2). Yehofa poti den owluman fu teke fesi aini a kemeente, ma den a ná edeman fu den baala anga sisa aini a kemeente (1 Tes. 5:12; Heb. 13:17). Den sisa di á toow di e tan den wawan, e lesipeki den mma anga den dda, anga den owluman, ma leti enke den baala aini a kemeente, a Yesesi namo a den edeman.

9. Saide wan sisa mu wei wan sani tapu en ede son yuu?

⁹ Yehofa poti mannengee fu teke fesi aini a kemeente, a á gi den sisa a faantiwowtu ya (1 Tim. 2:12). Saide? A fu di a á wani sani waka buuyabuuya aini a olikanisâsi fi en. A fu aseefi sani ya ede meke a poti Yesesi enke edeman fu a kemeente. Efu wan sisa mu du wan sani di a wan baala be mu du, da Yehofa wani a wei wan sani tapu en ede * (1 Kor. 11:4-7). A ná fu di Yehofa e si enke mannengee bun moo umansama meke a wani den sisa du a sani ya, ma a wani den soi taki den e lesipeki a fasi fa a sete sani aini a kemeente. Baka di u luku a pisi ya, meke u go luku sowtu faantiwowtu osufamii edeman anga owluman abi.

10. Saide wan owluman sa denki taki a sa poti weiti gi den baala anga sisa aini a kemeente?

¹⁰ Den owluman lobi Yesesi, den lobi den sikapu di Yehofa anga Yesesi gi den fu luku tu (Yoh. 21:15-17). Kande wan owluman o wani de enke wan dda gi den baala anga sisa aini a kemeente fu di a  lobi den. Kande ai denki taki a sa poti weiti gi den baala anga sisa fu kibii den, leti enke fa wan osufamii edeman e poti weiti gi en osufamii. Boiti dati, son baala anga sisa e akisi owluman fa den mu du son sani fu di den e si den owluman enke den edeman. Ma na aseefi faantiwowtu osufamii edeman anga owluman abi?

11. Sowtu faantiwowtu fu wan osufamii edeman de aseefi enke du fu den owluman?

¹¹ Pawlesi be taki wantu fu den faantiwowtu fu wan osufamii edeman anga wan owluman na aseefi (1 Tim. 3:4, 5). Yehofa wani a osufamii aliki a osufamii edeman (Kol. 3:20). A so a wani den baala anga sisa aini a kemeente aliki den owluman tu. Leti enke fa Yehofa wani osufamii edeman yeepi den osufamii fu den á gwe fika en, a so a wani owluman yeepi den baala anga sisa fu tan aini a olikanisâsi tu. Osufamii edeman mu e soi taki den lobi den osufamii. A so den owluman mu e soi taki den lobi den baala anga sisa aini a kemeente tu. Wan bun osufamii edeman e yeepi a osufamii fi en te den abi polobelema. A so den owluman mu e yeepi den  baala anga sisa tu (Yak. 2:15-17). Yehofa wani osufamii edeman anga owluman tyai a faantiwowtu fu den enke fa a taki. Den ‘á mu e du sani di á sikiifi aini Beibel’.​—1 Kor. 4:6.

12-13. Fa Romesama 7:2 e soi taki a faantiwowtu fu wan osufamii edeman anga wan owluman a ná aseefi?

¹² Ma te i luku a faantiwowtu fu wan osufamii edeman anga du fu wan owluman, da a omen sani kengi tu. Yehofa gi den owluman a faantiwowtu fu kuutu wan sama aini a kemeente te a nai tyai enseefi bun. A gi den a faantiwowtu tu fu puu wan sama aini a kemeente di á wani kengi. Ma á a gi osufamii edeman den wooko ya.​—1 Kor. 5:11-13.

¹³ Yehofa gi osufamii edeman faantiwowtu tu di a á gi owluman. A gi osufamii edeman a leti fu poti weiti gi den osufamii. (Leisi Romesama 7:2.) Wan osufamii edeman sa taigi den pikin fi en on lati den mu kon a osu te den go a wan peesi. Te den nai aliki en, a sa puu kaasi gi den (Efe. 6:1). Ma wan bun osufamii edeman o taki anga en uman fosi a poti son weiti gi a osufamii, bika en anga en uman a ‘wan sikin’. *​—Mat. 19:6.

14. (a) Enke fa Malikisi 10:45 e soi, da saide a fiti taki Yehofa poti Yesesi enke edeman fu a kemeente? (b) Sowtu faantiwowtu den baala di e tii a wooko abi? (Luku a faki ‘ A faantiwowtu di den baala di e tii a wooko abi’.)

¹⁴ Yehofa bai ala sama aini a kemeente anga a buulu fi en Manpikin. A bai den  sama tu di e biibi taki a dede fu Yesesi o tyai wini gi den. (Leisi Malikisi 10:45; Toli 20:28; 1 Kor. 15:21, 22). A fiti taki Yehofa poti Yesesi enke edeman fu a kemeente, bika neen dede gi u. Neen meke Yesesi abi a leti fu poti weiti gi iniiwan sama aini a kemeente. Efu u nai holi den weiti di a poti, a abi a leti fu sitaafu u (Gal. 6:2). Ma a ná weiti namo Yesesi e poti gi u. Ai solugu u tu bika a lobi u, ai booko en ede anga u.​—Efe. 5:29.

15-16. San den sani di Marley anga Benjamin taki e leli u?

¹⁵ Te den sisa e aliki den sama di Yesesi poti fu teke fesi, den e soi taki den e lesipeki en. A omen sisa e denki enke Marley, di e tan na Ameekankondee. A taki: ‘Mi lobi a fasi fa Yehofa seeka sani aini a kemeente anga a osufamii. Na ala yuu mi mu meke moiti fu lesipeki mi man anga den owluman aini a kemeente, ma a nai taanga gi mi tumisi fu du a sani ya, bika mi man e lesipeki mi. Den owluman e teke den sani di mi e du aini a kemeente fu bigi tu.’

¹⁶ Te den baala e lesipeki den sisa, den e soi taki den e fusutan a edeman wooko. Benjamin, wan baala di e tan a Ingiisikondee taki: ‘Te mi e yee den piki di den sisa e gi a komakandaa, a omen sani mi e leli. Den sisa e leli mi fa mi sa sutudeli anga miseefi anga fa mi sa gi leli moo bun. A omen wini wi e fende fu den sani di den sisa e du.’

17. Saide u mu meke moiti fu fusutan saide Yehofa poti son sama fu teke fesi?

¹⁷ Te den baala, den sisa, den osufamii edeman anga owluman e fusutan saide Yehofa poti son sama fu teke fesi, a sani ya e meke a kemeente libi na a wan. Boiti dati, a sani ya e gi Yehofa, u Dda di lobi u gaandi.​—Ps. 150:6.