1-2. Enke fa Mateyesi 5:11 e soi, da san u mu du te tesi e miti u?

YESESI be paamisi den bakaman fi en taki den be o de anga piisii, ma a be taigi den tu taki tesi be o miti den (Mat. 10:22, 23; Luk. 6:20-23). Wi e piisii taki wi a Yesesi bakaman, ma son leisi famii e wani tapu u fu dini Yehofa. Son leisi lanti e du ogii anga u. Boiti dati, den sama a wookope efuso sikoo e wani dwengi u fu du sani di Yehofa á lobi. Fa wi e fii te den sani ya e miti u? Den sani ya sa gi u booko-ede.

² Nawan sama nai piisii te ogii e miti en, ma Beibel taki u mu piisii te tesi e miti u. Yakowbesi be taki pe fu u sidon e booko wi ede, u mu piisii te tesi e miti u (Yak. 1:2, 12). Yesesi be taki u mu piisii winsi sama e libi ogii anga u. (Leisi Mateyesi 5:11.) San o yeepi u fu holidoo anga piisii winsi tesi e miti u? A omen sani u sa leli te u luku a biifi di Yakowbesi be sikiifi gi den fosi Kelesten. Meke u luku fosi sowtu tesi be e miti den Kelesten ya.

3. San pasa baka di Yakowbesi toon wan bakaman fu Yesesi?

³ Yakowbesi a be wan afu baala fu Yesesi. A á langa baka di a toon wan Kelesten, neen sama bigin du ogii anga den Kelesten a Yelusalem (Toli 1:14; 5:17, 18). Baka di sama kii Sitefanesi, son wan fu den disipel ‘lowe go na ala se fu Yudeya anga Samaliya’. Taawan lowe go a Siprus anga Antiyokiya tu (Toli 7:58–8:1; 11:19). Ná pikin sani be e miti den Kelesten a ten de, ma toku den be e paati a  bun nyunsu fayafaya na ala se pe den be go. A omen kemeente den be opo aini den foto di Rome be e tii (1 Peit. 1:1). Ma a omen taa sani be miti den fosi Kelesten.

4. Sowtu tesi be e miti den fosi Kelesten?

⁴ A omen sowtu tesi be e miti den fosi Kelesten. A pisiten fu a yali 50, Klawdiyus a tiiman fu Rome, yaki ala den Dyu puu aini a kondee. Ala den Dyu di be toon Kelesten be abi fu foloisi komoto a den osu go tan a wan taa peesi (Toli 18:1-3). Aini a pisiten fu a yali 61, Pawlesi be sikiifi taki sama be e du ogii anga den Kelesten. Den be e poti den a sitaafu-osu, den be e fufuu den sani fu den tu (Heb. 10:32-34). Boiti den sani ya, son Kelesten be pooti, taawan be siki.​—Rom. 15:26; Filip. 2:25-27.

5. Sowtu akisi wi o luku?

⁵ A pisiten di Yakowbesi sikiifi a biifi gi den Kelesten aini a yali 62, a be sabi san be e miti den baala anga sisa. Yehofa be meke a sikiifi a biifi ya gi den Kelesten fu soi den san den mu du fu man holidoo anga piisii te tesi be e miti den. Wi o luku wantu sani aini a biifi fu Yakowbesi, da wi o piki den akisi ya: Fu sowtu piisii Yakowbesi be e taki? San sa meke wan Kelesten lasi a piisii ya? Fa koni, biibi, anga deki-ati o yeepi u fu holidoo anga piisii te tesi e miti u?

6. Enke fa Lukasi 6:22, 23 e soi, da san e yeepi wan Kelesten fu piisii winsi tesi e miti en?

⁶ Son sama e denki taki a te den abi wan bun gusontu, te den abi moni, anga  te den osulibi e waka bun fosi den o man piisii. Ma a piisii di Yakowbesi e taki fi en ya, a wan fu den manii di a yeye fu Gadu e meke sama abi. Winsi sani nai waka bun aini i libi, toku i sa abi a piisii ya (Gal. 5:22). Wan Kelesten e piisii aini en ati te a sabi taki ai du sani enke fa Yehofa wani. Ai piisii tu te a sabi taki ai waka a Yesesi baka. (Leisi Lukasi 6:22, 23; Kol. 1:10, 11). A piisii di wan Kelesten e piisii, de enke a faya fu wan alantei. Winsi winta e wai a á poi kii a faya, bika a gaasi fu a alantei e kibii en. A so a de tu taki winsi u siki, efuso u ná abi moni, toku den sani ya á poi poli a piisii fu u. Winsi famii anga taa sama e libi ogii anga u, toku u poi piisii ete. Moo sama e libi ogii anga u, moo wi e piisii, bika a sani ya e soi taki wi a tuutuu bakaman fu Kelestesi (Mat. 10:22; 24:9; Yoh. 15:20). Neen meke Yakowbesi sikiifi taki: ‘U mu piisii mi baala te ala sowtu tesi e miti u.’​—Yak. 1:2.

7-8. Sowtu wini wi e fende te tesi e miti u?

⁷ Yakowbesi be taki fu ete wan sani di e yeepi Kelesten fu holidoo te tesi e miti den. A be taki ‘a te tesi miti a biibi fu u fosi wi o man holidoo’ (Yak. 1:3). Fosi te sama be e meke fetihow, da den be e poti a ayee a faya, baka dati den be e saka en aini wataa. A sani ya be e meke a moo taanga. Den tesi di e miti u de enke den sani di wan sama e du fu meke wan ayee how kon moo taanga. Te wi e holidoo te tesi e miti u, a sani ya e meke a biibi fu u kon moo taanga. Neen meke Yakowbesi be taki: ‘U mu holidoo, wi á mu gi abaa, da wi o bun na ala fasi, u ná o abi nawan fowtu’ (Yak. 1:4). Te wi e holi a pakisei taki den tesi di e miti wi e yeepi u fu u biibi kon moo taanga, a sani ya o yeepi u fu holidoo anga piisii.

⁸ Yakowbesi be taki fu wantu sani tu di sa meke wi á piisii moo. San a den sani ya? San u sa du fu den á poli a piisii fu u?

9. Saide wi abi koni fanowdu te tesi e miti u?

⁹ Sani di sa poli a piisii fu u: Te wi á sabi san u mu du. Te tesi e miti u, u mu meke Yehofa yeepi u fu du sani di o meke a piisii. U mu begi en tu fu a yeepi u fu du sani di o tyai wini gi den baala anga sisa fu u (Yel. 10:23). Boiti dati, u mu sabi san u mu du te tesi e miti u, efuso san u mu taigi den sama di e du ogii anga u. Efu wi á sabi san u mu du te tesi e miti u, a sani ya o meke u fii enke u ná o poi pasa a tesi. A sa meke u nai piisii moo tu.

10. Enke fa Yakowbesi 1:5 e soi, da san u mu du te wi abi koni fanowdu?

 ¹⁰ San u mu du: Begi Yehofa fu a gi i koni. Efu u wani piisii te tesi e miti u, u mu akisi Yehofa fu a yeepi u fu du sani anga koni. (Leisi Yakowbesi 1:5.) San u mu du efu wi e fii enke Yehofa nai piki den begi fu u? Yakowbesi taki u mu ‘tan begi’ Gadu. Winsi omen leisi wi e akisi Yehofa fu a yeepi u, en ati nai weli a u, en ati nai boon a u tu. Efu u tan begi Yehofa, ao gi wi a koni di wi abi fanowdu fu pasa den tesi di e miti u (Ps. 25:12, 13). Tyali e kisi en te ai si den sani di e miti u, neen meke a de kabakaba fu yeepi u. A sabi di u sabi a sani ya e meke u piisii. Ma fa Yehofa o gi u koni te wi e begi en?

11. San a wan taa sani di o yeepi u fu du sani anga koni?

¹¹ Yehofa e soi wi aini en Wowtu Beibel fa u mu du sani anga koni (Odo 2:6). Neen meke efu u wani du sani anga koni, u mu e sutudeli Beibel anga den buku fu a olikanisâsi. Ma a ná sutudeli wawan u mu e sutudeli, ‘u mu e du san a wowtu fu Gadu e taki tu’ (Yak. 1:22). Efu wi e wooko anga san a Wowtu fu Gadu e taki, wi o go e libi bun anga taawan, u ná o go e suku fini tumisi. Boiti dati, wi o moo fii gi taawan (Yak. 3:17). Den manii ya o yeepi u fu holidoo anga piisii, winsi sowtu tesi e miti u.

12. Saide u mu meke moiti fu sabi a Beibel bun?

¹² A Wowtu fu Gadu de enke wan sipikii di e yeepi u fu si san u mu kengi aini u libi (Yak. 1:23-25). Kande di i sutudeli Beibel, i si taki i mu meke moiti fi yu ati nai boon gaw so moo. Yehofa e yeepi u fu sabi san u mu du te sama e du sani di e meke wi ati boon. Te wi ati nai boon gaw, ai moo makiliki gi u fu wi á ligei te  sama e suku toobi anga u. Ai yeepi u tu fu denki fosi u du wan sani (Yak. 3:13). Neen meke u mu meke moiti fu sabi a Beibel bun.

13. Saide u mu poti pakisei a den toli fu sama aini Beibel?

¹³ Son leisi a te sani miti u fosi wi e fusutan taki u mu kengi u manii. Ma a á switi fu leli sani na a fasi de. A moo bun fasi fu leli sani, a te wi e luku sowtu wini taawan fende di den tyai denseefi bun, anga san miti den sama di á tyai denseefi bun. Neen meke Yakowbesi gi u taanga-sikin fu poti pakisei a sama enke Abalaham, Rakab, Yopu, anga Eliya, da u meke moiti waka a den baka (Yak. 2:21-26; 5:10, 11, 17, 18). Den sama ya be e dini Yehofa anga den hii ati. A omen tesi be e miti den, ma toku den holidoo anga piisii. Leti enke fa den sama ya be holidoo, a so Yehofa poi yeepi u fu holidoo tu.

14-15. Te u si taki u nai kaba biibi wan sani, da saide meke u mu meke moiti fu taanga a biibi fu u?

¹⁴ Sani di sa poli a piisii fu u: Te u nai kaba biibi den sani di wi e leli. Son leisi u nai kaba fusutan son sani di u leli aini Beibel. Efuso kande Yehofa á piki a begi fu u na a fasi fa u be denki. Den sani ya sa meke u nai biibi Yehofa anga u hii ati moo. Efu wi á meke moiti gawgaw fu taanga u biibi, a sani ya sa meke u gwe fika Yehofa (Yak. 1:7, 8). U ná o biibi moo taki den sani di Yehofa paamisi wi o pasa tuutuu.

¹⁵ Apostel Pawlesi be taki a howpu fu u de enke wan ankaa (Heb. 6:19). Te gaan winta e wai, da a ankaa e yeepi a sipi fu a á wai go naki a siton. Ma a keti fu a ankaa mu bun tu, bika efu a keti di e holi a ankaa fuusu, a gawgaw ao koti. A letiso a de tu taki efu u nai kaba biibi den sani di wi e leli, a sani ya sa meke u gwe fika Yehofa te tesi miti u. Efu u nai biibi Yehofa moo, u ná o abi howpu gi a ten di e kon tu. Yakowbesi be taki wan sama di e dini Yehofa anga tu ati, ‘de enke den balon fu a se di winta e wai go kon’ (Yak. 1:6). Sowan sama ná o piisii seefiseefi.

16. San u mu du te u si taki u nai kaba biibi son sani?

¹⁶ San u mu du: Luku saide i nai kaba biibi son sani, da i meke moiti fu taanga i biibi. Yu á mu daaidaai. Aini a ten fu polofeiti Eliya, den Islayelisama be e dini Yehofa anga tu ati. Eliya be taigi den taki: ‘On langa wi o de ya e daaidaai ete? Efu Yehofa na a tuutuu Gadu, da u dini Yehofa. Ma efu a Baa-al, da neen u mu dini!’ (1 Kow. 18:21) A so a de aini a ten ya tu. Efu u nai kaba biibi son sani, wi á mu sidon, ma u mu meke moiti fu sabi saide u sa biibi taki a Yehofa na a tuu Gadu, san e soi taki Beibel na a Wowtu fi en, anga saide u sa biibi taki a den Yehofa Kotoigi na a foluku fu Gadu (1 Tes. 5:21). Efi i du ala den sani ya, i biibi o taanga. Efi i si taki yu abi yeepi fanowdu, i sa akisi den owluman. Efi i si taki i nai kaba biibi wan sani, i mu meke moiti gawgaw fu man dini Yehofa anga piisii baka.

17. San sa pasa te yu e fii booko-saka naamo?

¹⁷ Sani di sa poli a piisii fu u: Te wi e fii booko-saka. A Wowtu fu Gadu taki: ‘Efu yu e fii booko-saka te nowtu miti i, yu o swaki’ (Odo 24:10). Efi yu e fii booko-saka naamo, i ná o piisii moo.

18. San a wani taki fu holidoo?

¹⁸ San u mu du: Begi Yehofa fu a gi yu a deki-ati di yu abi fanowdu fu holidoo. Te  tesi e miti u, wi abi deki-ati fanowdu fu holidoo (Yak. 5:11). A wowtu ‘holidoo’ di Yakowbesi taki ya, e meke u pakisei wan sama di taampu gingin, a nai komoto a pe a de. Ai meke u pakisei wan suudati di nai lon gi den feyanti fi en. Winsi a á makiliki, toku ai taampu feti anga den.

19. San u sa leli fu apostel Pawlesi?

¹⁹ U sa waka a Pawlesi baka te u luku fa a be abi deki-ati, anga fa a be holidoo. Son leisi a be e fii booko-saka. Te a be e fii so, da a be e begi Yehofa fu a gi en a kaakiti di a be abi fanowdu fu holidoo (2 Kor. 12:8-10; Filip. 4:13). Efu u soi sakafasi neen u begi Yehofa, ao gi wi a kaakiti anga a deki-ati di wi abi fanowdu fu holidoo.​—Yak. 4:10.

20-21. San u sa biibi taki Yehofa o du?

²⁰ Te tesi e miti u, a ná Yehofa e sitaafu u. Yakowbesi be taki: ‘Te ogii miti wan sama, a á mu taki: “A Gadu e du ogii anga mi”, bika sama á poi du ogii anga Gadu. Gadu seefi nai du ogii anga sama’ (Yak. 1:13). Te wi e biibi taki a ná Yehofa e meke sani e miti u, wi anga en o toon moo bun mati.​—Yak. 4:8.

²¹ Yehofa ‘nai kengi’ (Yak. 1:17). Leti enke fa a be yeepi den fosi Kelesten di tesi be e miti den, a so ao yeepi wi aini a ten ya tu. Neen meke efi i begi Yehofa fu a gi i koni, biibi anga deki-ati, ao piki a begi fi i. Ao yeepi i fu holidoo anga piisii winsi san e miti i.