TU YONKUU uman be e waka aini wan foto den e kai Baguio aini Filipeinikondee. Den be si tu sisa taampu e peleiki anga a pikin wagi. Helen, wan fu den sisa di be taampu na a wagi, lafu gi den. Den tu uman ya waka pasa a pikin wagi, ma den á feegete fa Helen be lafu gi den.

Bakaten di den uman ya be de aini wan besi e go a osu, den si wan jw.org bord a wan Kownukondee zaal. Den membee taki na aseefi sani ya den be si na a pikin wagi. Den komakandaa dei be sikiifi na a doomofu fu a Kownukondee zaal. Den saka komoto aini a besi, neen den go luku on ten den komakandaa e holi.

Di den tu uman ya go a wan fu den komakandaa, den foondoo di den si Helen. Di den si en, den fusutan wanten taki neen be lafu gi den. Helen taki: ‘Di mi si den e waka kon a mi, mi be e senuwe pikinso, bika mi á be sabi saide den be e kon a mi.’ Ma den uman taigi Helen taki a fu di den be si en na a pikin wagi, meke den be kon taki anga en.

Den yonkuu uman ya be lobi a komakandaa. Den be e piisii fu de anga den baala anga sisa. Di den si fa den baala anga sisa e kiin a Kownukondee zaal, den be wani yeepi den tu. Wan fu den uman nai tan aini Filipeinikondee moo, ma a taawan bigin go a den komakandaa. A bigin sutudeli Beibel tu. Na a lafu fu Helen tyai den wini ya!