Nda anga mma leli sabi a waaleiti na a pisiten fu a yali 1920. A ten de den á be toow ete. Mi meke na a bigin fu a yali 1939. Di mi be nyoni u be e tan a Ingiisikondee. Mi be e go anga nda anga mma a komakandaa. Bakaten mi poti mi nen na a Teyokalasiya Diniwooko-sikoo. Mi sabi ete di mi be holi a fosi lezing. Mi be satu te a wan bangi tapu mi be mu taampu fu kisi a kateder. A sigisi yali mi be abi a ten de. Mi be e senuwe te, bika a omen gaansama be de ape.

Nda be sikiifi wan satu kaita gi mi fu soi sama aini a peleikiwooko. A aitin yali mi be abi di mi wawan go koko fu a fosi leisi a wan sama doo. Di a sama leisi a kaita, neen a teke wan buku. Mi poolo te, neen mi lon go taigi nda. Mi be e piisii te mi be e go a den komakandaa anga te mi be de aini a peleikiwooko. Na a sani ya meke mi be wani du a fuuten diniwooko.

Nda be pai gi mi fu mi e fende a Wakititolen ala mun. O moo mi be e leisi den, o moo mi be e lobi a Beibel. Te mi be fende a Wakititolen a gawgaw mi be e kaba leisi en. Den sani di mi be e leisi yeepi mi fu moo fitoow Yehofa. Neen meke mi paamisi en taki mi o libi enke fa a wani, neen mi dopu.

Mi anga nda anga mma be go na a konkelesi di be holi a New York aini a yali 1950. Fodewooko 3 augustus den be taki fu den sama di e du a zendeling wooko. A baala Carey Barber be holi a dopu lezing a dei de. Bakaten a baala ya be toon wan fu den baala di e tii a wooko a hii goontapu. Di  a poti den dopu akisi, mi opo taampu neen mi piki: ‘Eeye’. A 11 yali mi be abi a ten de, ma mi be fusutan taki a wan pelensipali sani mi du. Mi be e feele fu go aini a wataa, bika mi á be sabi suwen. Mi omu tyai mi go na a peesi pe den be e dopu sama, neen a taigi mi taki mi ná abi fu feele. A be abi leti. Di mi go aini a wataa, wan fu den baala dopu mi, neen wan taawan diki mi puu aini a wataa. Mi futu a kisi doti seefi. Fanafu a pelensipali dei de, Yehofa tan seeka a pasi fu mi.

Baka di mi kaba sikoo, mi be wani pionili. Ma den muneli be wani mi go a hei sikoo. Mi aliki den neen mi go a universiteit. A á teke langa fosi mi kon si taki efu mi be tan na a sikoo mi á be o poi dini Yehofa anga mi hii ati. Mi begi Yehofa fu a toli, neen mi sikiifi wan biifi fu piki den muneli taki mi o fika a sikoo. Mi be e fitoow Yehofa anga mi hii ati, neen meke mi bigin pionili.

Aini yuli 1957 mi bigin anga a fuuten diniwooko aini a foto Wellingborough. Mi akisi den baala di be e wooko na a Betel fu London efu den be sa yeepi mi suku wan baala di be o man pionili makandaa anga mi. Mi bigin pionili makandaa anga Baala Bert Vaisey. A omen sani a leli mi. A be e peleiki fayafaya, neen meke mi meke moiti waka neen baka. A ten de a mi anga Baala Vaisey anga sigisi gaandi sisa be de aini a kemeente. A seeka di mi be e seeka gi den komakandaa yeepi mi fu moo fitoow Yehofa. Te mi be e taigi taawan san mi leli, a sani ya be e moo taanga mi biibi.

Den be sooto mi wan pisiten fu di mi á be wani toon suudati. Baka di mi losi neen mi miti Barbara, wan spesuutu pionili sisa. U toow aini 1959, u be de kabakaba fu go na ala pe den baala be sende u go. A fosi peesi pe den sende u go a Lancashire, wan peesi a Ingiisikondee. Aini yanuari 1961 den kai mi fu go na a owluman sikoo na a Betel a London. A wan mun langa a sikoo ya be holi. Baka a sikoo neen den gi mi a gaandi fu du a kelen wooko. Mi du a wooko ya tu wiki langa anga wan taa kelen-owluman na a foto Birmingham, neen a leli mi fa mi mu du a wooko. Barbara be kon anga mi tu. Baka dati, mi anga Barbara go du a kelen wooko a Lancashire anga Cheshire.

Di u be de a fakansi aini augustus 1962, a beikantoo sende wan biifi gi u fu go na a Gileyad sikoo. Baka di mi anga Barbara begi, u sende piki den baala taki wi o go na a sikoo. Feifi mun baka dati u be de a pasi e go a Brooklyn, New York, fu go na a sikoo. Disi be o de a du fu 38 leisi di a sikoo ya be o holi. A tin mun langa u be o sutudeli Beibel makandaa anga taa baala anga sisa.

 Di u go na a Gileyad sikoo u leli omen sani fu a Wowtu fu Gadu, a olikanisâsi anga den baala anga sisa a hii goontapu. Mi anga mi uman á be doo 30 yali ete, neen meke u meke moiti fu leli sani fu den baala anga sisa di be abi moo ondoofeni. A be e bigi gi mi fu wooko makandaa anga Baala Fred Rusk ala dei. A baala ya a be wan fu den sama di be e leli u na a sikoo. Wan pelensipali sani di a baala ya leli u, a taki ala yuu te wi e poti taawan a pasi, u mu wooko anga a Beibel. Wantu fu den baala di be e holi lezing na a sikoo ya a be Baala Nathan Knorr, Baala Frederick Franz, anga Baala Karl Klein. A omen sani u leli fu a toli fu Baala A. H. Macmillan. A baala ya be abi sakafasi. A be holi wan lezing di be soi u fa Yehofa yeepi a foluku fi en na a pisiten fu 1914 te anga 1919.

Di u de fu kaba a sikoo, Baala Knorr taigi mi anga Barbara taki den o sende u go a Bulundi aini Afiikan. U lon go luku aini den Jaarboek omen peleikiman be de a Bulundi a ten de. Wi á be poi si a nawan peesi omen peleiki be de aini a kondee. A so u fusutan taki sama á be peleiki na a kondee ya ete. Wi á be sabi nawan sani fu Afiikan. U be e feele pikinso, ma begi yeepi u fu wi á buuya.

Sani be de hii taa fasi na Afiikan. A peesi be waan, den sama be abi taa gwenti, u be abi fu leli wan taa tongo tu. U be mu leli taki Faansitongo. U be mu fende wan peesi fu tan tu. Tu dei baka di u doo Bulundi, Baala Harry Arnott di wi anga en be de na a sikoo be de a pasi e go a Zambiya. A yeepi u fu fende wan peesi fu tan. A disi a be u fosi zendeling osu. Ma wi á tan de langa fosi den lanti fu a kondee bigin suku wan fasi fu tapu a wooko, bika den á be sabi sani fu Yehofa Kotoigi. Di u bigin teke gwenti neen den piki u taki u ná o man tan aini a kondee efu u ná abi wooko pampila. A tyali, ma u be mu foloisi go a wan taa kondee. A so den baala sende u go a Uganda.

U be e feele fu go a Uganda sondee pampila, ma toku u fitoow Yehofa neen u  go. Wan baala fu Kanada di be kon yeepi a Uganda be go taki anga wan sama di e wooko na a kantoo di be mu gi wi a pampila, neen a soi en saide u kon aini a kondee sondee pampila. A so den be gi u wantu mun fu seeka den pampila fu u. A sani ya soi u kiin taki Yehofa be de anga u.

Sani be de hii taa fasi aini Uganda. Sama be e peleiki yaaso kaba, ma a 28 Kotoigi namo be de aini a kondee. A omen sama u be e miti di be e taki Ingiisitongo. Ma toku u be si taki efu u be wani yeepi den sama moo bun, u be mu leli winsi wan fu den tongo di den be e taki aini a kondee. U bigin peleiki aini Kampala pe gaanse sama be e taki Lugandatongo. Neen meke u bigin leli a tongo ya. A omen yali a teke fosi u be man taki en bunbun fasi, ma ná pikin wini u fende di u du a sani ya. U be e fusutan den sutudi fu u moo bun. Di den sutudi si a moiti di u be meke fu yeepi den, den be bigin taigi u fa den e fii.

U be e piisii fu leli sama sani fu Yehofa. Ná pikin poolo u poolo di den akisi u fu du a kelen wooko aini a kondee. Na a beikantoo fu Keniya be e luku a wooko a ten de. U be e go a omen peesi aini a kondee fu luku pe u be sa sende spesuutu pionili go. A omen leisi u miti sama di á be miti Kotoigi ete. Den sama ya be e libi bun anga u te. Taawan be e boli nyanyan gi u.

Bakaten mi bigin teke waka go a taa peesi tu. Te mi be komoto a Kampala, a tu dei langa mi be e waka anga loko fu doo Mombasa aini Keniya. Baka dati mi be e teke sipi go a den Seiseli-tabiki di de na a Indiya Se. Fu 1965 te anga 1972, Barbara be e kon anga mi son leisi te mi be e go a den tabiki ya. Biginbigin a tu peleikiman namo be de a den tabiki ya, neen a toon wan kulu. Bakaten a toon wan kemeente. Mi be e go luku den baala a Eritreya, Etiyopiya, anga Sudan tu.

Di suudati teke a kondee abaa, sani be kengi aini Uganda. A á be makiliki a pisiten de. Ma den sani di pasa soi mi kiin taki u mu e ‘pai gaan lanti san a fu gaan lanti’ (Malik. 12:17). Wan dei den piki u taki den taa kondee sama di e tan aini Uganda, be mu go poti den nen na a sikowtu osu di de koosube fu pe den e tan. Faisi u yee, a so u go wanten. Wantu dei baka dati di u be de aini Kampala, sikowtu kon a mi anga wan taa zendeling. Ala wi ati be e naki. Den taigi u taki a luku u kon luku fa sani e go aini a kondee fu go taigi den tiiman fu u, neen den tyai u go na a gaan sikowtu osu fu a kondee. Di u doo ape u taigi den taki wi a ná toobiman, ma den á be wani yee a sani de. Den sende sikowtu anga goni fu tyai u go na a sikowtu osu di de koosube fu pe u be e tan. Ná pikin poolo u poolo di a sikowtu di u be poti u nen taigi den fu den losi u.

A pisiten de suudati be lobi tapu den pasi. Wi ati be e naki te u be doo den peesi ya, moomoo te den suudati be duungu. Ma ala yuu u be e begi Yehofa fu wi á buuya. Den be e meke u pasa ala yuu. Ma aini 1973 den taki ala den taa kondee sama di á  be abi wooko pampila be mu komoto aini a kondee.

Den baala sende u go a wan taa kondee aini West-Afiikan. A leisi ya den sende u go a Ivoorkust. U be abi fu teke gwenti baka, bika sani be de taa fasi ya. U be abi fu taki Faansitongo ala yuu, u be mu leli wooko anga taa zendeling di be komoto a taa kondee tu. Toku u si fa Yehofa be e holibaka gi u. Sama di be abi sakafasi be e aliki den sani di u be e leli den. U be e si fa Yehofa be seeka a pasi fu u fu di u be e fitoow en.

Wan dei dataa piki u taki Barbara abi kanker. A omen leisi u go a Europa fu tyai en go a dataa. Winsi fa u be abi bunbun dataa toku aini 1983 u kon si taki u be o abi fu tapu anga a zendeling wooko na Afiikan. Ná pikin hati a sani ya hati u.

Di u be e wooko na a Betel fu London, Barbara be e swaki namo. Bakaten a kon dede. Ná pikin taanga-sikin den baala anga sisa a Betel gi mi. Wan toowpaa be yeepi mi fu kisi miseefi baka anga fu tan fitoow Yehofa. Bakaten mi miti Ann, wan sisa di be e kon yeepi a Betel. A sisa ya a be wan spesuutu pionili fosi. Den sani di a be e du be e soi taki a lobi Yehofa tuutuu. Mi anga Ann toow aini 1989. Nownow u tu man e wooko na a Betel a London.

Aini 1995 te anga 2018, mi be abi a gaandi fu e go luku den baala anga sisa a taa kondee. A wan sani fu 60 kondee mi go. Aini ala den kondee pe u be e go mi be e si fa Yehofa e belesi den sama di e dini en winsi san e miti den.

Aini 2017 u be mu go na Afiikan. Mi be poolo taki mi be sa soi Ann Bulundi, pe mi be e du a zendeling wooko fosi. Ná pikin sama e dini Yehofa aini a kondee ya nownow. Na aseefi sitaati di mi be e peleiki osu fu osu aini 1964, den meke wan moin Betel osu. A Betel ya e luku a wooko fu moo enke 15.500 peleikiman.

Di den baala soi mi den kondee di mi be o go aini 2018, ná pikin poolo mi poolo di mi si taki Ivoorkust be de aini. Di u doo Abidyan, a mamafoto, a be gei enke a osu mi be doo baka. Di mi luku a pampila fu den sama di be e tan a Betel, u si taki a Baala Sossou be e tan leti a u se. A ten di mi be e tan ya, a Sossou di mi be sabi a be wan bigiman aini a kondee. Na a boi fi en be de a Betel nownow.

Yehofa du san a be paamisi. Te mi luku ala den sani di miti mi, mi si taki solanga wi e fitoow Yehofa, ao seeka a pasi fu u. Mi wani tan du ala san mi poi gi Yehofa te enke a nyun goontapu doo.​—Odo 4:18.