1-2. (a) Saide son sama nai fitoow den sama di abi makiti? (b) San wi o luku aini a artikel ya?

 AINI a ten ya, a omen sama nai fitoow den sama di abi makiti. Den e si taki den sama di e koti kuutu efuso den politikiman, e du bun gi den sama di gudu, ma den nai yeepi den sama di pooti. Beibel taki: ‘Fanafu di libisama bigin tii taa libisama, sani nai waka bun gi den’ (Peleik. 8:9). Boiti dati, den kelikifesiman seefi nai du sani a wan letifasi. A sani ya meke omen sama nai biibi Gadu moo. Neen meke te wan sama e sutudeli, u mu yeepi en fu a fitoow Yehofa, anga den sama di a poti fu teke fesi.

² A ná den sama di e sutudeli Beibel wawan mu leli fu fitoow Yehofa anga den sama di a poti fu teke fesi. Den sama di e dini Yehofa omen yali kaba seefi mu e biibi taki ala yuu Yehofa e du sani a wan letifasi. Aini a artikel ya wi o luku dii sani di sa meke a taanga gi u fu biibi taki Yehofa e du sani a wan letifasi ala yuu: (1) Te wi e leisi son toli aini Beibel, (2) te a olikanisâsi e soi u fa u mu du sani, anga (3) te sani o miti wi aini a ten di e kon.

3. Saide son toli aini Beibel sa meke a taanga gi u fu fitoow Yehofa?

 ³ Te wi e leisi Beibel, a ná ala yuu wi e fusutan saide Yehofa be e du son sani. Aini a buku Numeri, wi e leisi taki Yehofa be kii wan Islayeliman di be go piki udu a Sabadei. Ma aini 2 Samuweli wi e leisi taki omen ondoo yali baka dati, Yehofa gi Kownu David paadon di a teke sama uman anga di a kii a man fu a uman ya (Num. 15:32, 35; 2 Sam. 12:9, 13). Kande yu e akisi iseefi taki: ‘Saide Yehofa gi David paadon, ma a kii a man di be go piki udu a Sabadei? A sondu fu a man ya á be bigi enke du fu David.’ Fu man piki a akisi ya, wi o luku dii sani di u mu holi a pakisei te wi e leisi Beibel.

4. Fa Genesesi 18:20, 21 anga Deitolonomi 10:17 e yeepi u fu fitoow a fasi fa Yehofa e du sani?

⁴ Son leisi Beibel nai taigi wi ala sani. Luku a toli fu David anga a Islayeliman baka. Wi e leisi aini Beibel taki den sondu fu David be hati en. A be meke moiti kengi en manii tu (Ps. 51:2-4). Ma sowtu manii a man di be go piki udu a Sabadei be abi? A sani di a be du be hati en? A fosi leisi a be du a sani ya? Den be bali en kaba, neen a á be aliki? Beibel nai piki den akisi ya, ma u mu holi a pakisei taki Yehofa ‘nai du ogii’ (Deit. 32:4). Te Yehofa e du sani, a nai wooko anga mi yee taki. A nai paati bee tu. A den sani ya e meke libisama nai koti kuutu a wan letifasi. (Leisi Genesesi 18:20, 21; Deitolonomi 10:17.) O moo wi e leli sabi Yehofa anga a fasi fa ai du sani, o moo wi o fitoow en. Winsi u nai kaba fusutan son sani di wi e leisi aini Beibel nownow, toku u sabi taki ‘ala yuu Gadu e du sani a wan letifasi’.​—Ps. 145:17.

5. Saide u nai kuutu sani a wan letifasi ala yuu? (Luku a faki di den e kai ‘ Sondu meke u nai kaba fusutan saide Yehofa e du son sani’.)

⁵ Fu di wi abi sondu meke son yuu u nai kuutu sani a wan letifasi. Gadu meke wi enke fa a de, neen meke ai hati u te wi e si fa sama e libi ogii anga taawan (Gen.  1:26). Ma fu di wi abi sondu, meke u nai kuutu sani a wan letifasi ala yuu. Fu man fusutan a toli ya moo bun, pakisei fa Yona ati be boon di Yehofa gi den sama fu Ninifei paadon (Yona 3:10–4:1). Ma pakisei tu san pasa di Yehofa du sani na a fasi ya. A moo enke 120.000 fu den sama ya tan a libi fu di den kengi den manii. Te i luku a toli bun, da a Yona á be kuutu den sama ya a wan letifasi.

6. Saide Yehofa ná abi fu taigi u saide ai du son sani?

⁶ Yehofa ná abi fu taigi libisama saide ai du son sani. A tuu taki aini den ten di pasa Yehofa be e meke den sama di e dini en taigi en fa den be e fii fu den sani di a be e du (Gen. 18:25; Yona 4:2, 3). Son yuu a be e taigi den saide ai du son sani (Yona 4:10, 11). Ma Yehofa ná abi fu du a sani ya. Neen na a Sama di meke ala sani, neen meke a ná abi fu taki anga u fosi a du wan sani.​—Yes. 40:13, 14; 55:9.

7. San e taanga gi u fu du son yuu? Saide a sani ya e taanga gi u?

⁷ Wi e biibi anga u hii ati taki Yehofa e du san bun ala yuu. Ma kande ai taanga gi u fu biibi den sama di Yehofa poti fu teke fesi. Son leisi kande wi e akisi useefi efu den sama ya e du sani enke fa Yehofa wani tuutuu. Kande a so den sama a fosi be e denki tu. Meke u luku a toli di u be taki fi en aini  paragraaf 3 baka. Kande wan famii fu a man di be go piki udu a Sabadei be sa akisi enseefi taki: ‘Ma Mosesi taki anga Yehofa seefi fosi a meke sama kii a man ya?’ Efuso pakisei a toli fu Uriya. Kande wan mati fu a man ya be sa denki taki a fu di David a kownu meke den á kii en fu a ogii di a du. Wi á sabi fa sani waka tuutuu, ma san u sabi a taki Yehofa e fitoow den sama di a poti fu teke fesi. Neen meke efu u nai fitoow den sama ya, da wi á poi taki wi e fitoow Yehofa.

8. Fa den baala di e teke fesi aini a ten ya e meke moiti fu du sani enke den fosi Kelesten? (Toli fu den apostel 16:4, 5)

⁸ Aini a ten ya, Yehofa e koboloiki ‘a koni saafu di u sa fitoow’ fu tii a olikanisâsi fi en a goontapu ya (Mat. 24:45). Leti enke den baala di be e teke fesi na a ten fu den fosi Kelesten, a so a koni saafu e soi den owluman fa den mu du sani. (Leisi Toli fu den apostel 16:4, 5.) Den owluman e meke moiti fu yeepi a kemeente fu du sani enke fa den baala ya e taki. Te wi e aliki den owluman anga te wi e du sani enke fa den e soi u, da wi e soi taki wi e fitoow Yehofa.

9. On ten a sa taanga gi u fu wooko anga san den owluman taki? Saide a sani ya sa taanga gi u?

⁹ Son leisi kande ai taanga gi u fu du san den owluman taki. Wi e si a sani ya te u luku fa sani kengi aini den yali di pasa. A omen kemeente anga kelen den paati. Neen meke den akisi son peleikiman fu go a wan taa kemeente. Efu den akisi i fu du a sani ya, kande ai taanga gi i fu gwe fika den mati anga den famii fi i. Na a santa yeye e soi den owluman sowtu kemeente ibiiwan peleikiman mu go? Nono. Kande a sani ya e meke a taanga gi u fu du san den taki. Ma u mu holi a pakisei taki a Yehofa gi den owluman a faantiwowtu de, bika ai fitoow den, neen meke useefi mu fitoow den tu. *

10. Enke fa Hebrewsama 13:17 e soi, da saide u mu e aliki den owluman?

 ¹⁰ Saide u mu aliki den owluman, winsi son yuu u nai kaba fusutan a fasi fa den e du sani? Bika te wi e du a sani ya wi e yeepi a foluku fu Gadu fu libi na a wan (Efe. 4:2, 3). A kemeente e moo go a fesi te ala sama e wooko makandaa anga den baala di e teke fesi. (Leisi Hebrewsama 13:17.) A moo pelensipali sani a taki wi e soi Yehofa taki wi e fitoow en te wi e fitoow den sama di a poti fu teke fesi.​—Toli 20:28.

11. San o yeepi u fu moo fitoow a fasi fa den owluman e du sani?

¹¹ Wan sani di o yeepi u fu moo fitoow den owluman, a te wi e holi a pakisei taki te den e du sani di abi fu du anga a kemeente, den e akisi Yehofa en santa yeye fosi. Boiti dati, den e wooko anga den leli fu Beibel anga den buku fu a olikanisâsi. Den baala ya wani Yehofa piisii, neen meke den e meke moiti fu luku a foluku fu Yehofa bun. Den sabi tu taki den o abi fu gi faantiwowtu a Yehofa fu a fasi fa den e libi anga a foluku fi en (1 Peit. 5:2, 3). Pakisei a sani ya. Den sama fu a goontapu ya nai libi na a wan, bika den e fende taki a nasi fu den, a politiki palitei di den de, efuso a biibi fu den na a moo bun wan. Ma a foluku fu Yehofa e libi na a wan fu di den e dini a tuu Gadu. A di Yehofa e holibaka gi a olikanisâsi fi en meke u poi libi na a wan.

12. San den owluman mu luku fosi den puu wan sama aini a kemeente?

¹² Yehofa gi den owluman a gaan faantiwowtu fu holi a kemeente kiin. Te wan Kelesten du wan gaan sondu, Yehofa wani den owluman luku efu den mu puu en aini a kemeente. Ma den mu luku fosi efu a sondu di a du e hati en tuutuu. Kande a sama e taki a sani di a du e hati en. Ma ai du sani fu soi taki a sondu di a du e hati en tuutuu? Ai meke moiti fu a á du a sani ya moo? Efu a takuu mati be koli en go du sani di Yehofa á lobi, a de kabakaba fu fika den mati ya? Te den owluman e luku den toli ya, den mu begi Yehofa, da den luku san a Wowtu fi en e taki. Den mu luku tu fa a sama di du a sondu e fii fu a sondu di a du. A den sani ya o yeepi den fu sabi efu den mu puu wan sama di du wan gaan sondu aini a kemeente.​—1 Kor. 5:11-13.

13. Anga san wi e booko wi ede te den puu wan mati efuso wan famii fu wi aini a kemeente?

¹³ San sa meke a taanga gi u fu fitoow den owluman? Kande a nai taanga gi u fu aliki den owluman te a sama di den puu aini a kemeente a ná wan mati efuso wan famii fu u. Ma meke u taki a sama di den puu aini a kemeente a wan koosube famii efuso wan mati fu u. Kande wi e si enke den owluman á kuutu a toli bun. Efuso kande wi e si enke den á du sani enke fa Yehofa be o du sani. San sa yeepi u fu aliki den baala te den sowtu sani ya e pasa?

14. San o yeepi u te den puu wan famii efuso wan mati fu wi aini a kemeente?

¹⁴ U mu holi a pakisei taki a ná a kemeente wawan e fende wini te den puu wan sama di du wan ogii aini a kemeente. Ma a sama di du a sondu seefi e fende wini fu a sani ya. A Yehofa seeka sani na a fasi ya. Efu den á be e puu sama di du wan ogii aini a kemeente, a sani ya be sa meke den taawan du sani di Yehofa á lobi (Gal. 5:9). Biginbigin kande a sama  o go e si enke a sani di a du á bigi so. Efuso kande ai si enke a ná abi fu kengi fu du sani enke fa Yehofa wani (Peleik. 8:11). Fosi den owluman puu wan sama aini a kemeente, den e ondoosuku sani bun. Bika den sabi taki ‘a ná libisama den e kuutu sani gi, ma a Yehofa’.​—2 Kolon. 19:6 7.

15. Saide a de taanga fanowdu fu soi taki wi e fitoow Yehofa nownow?

¹⁵ Dei fu dei a kaba fu a goontapu e moo koosube, neen meke a nownow u mu soi taki wi e fitoow Yehofa anga u hii ati. Bika na a ten fu a gaan banowtu a o moo taanga gi u fu du san Yehofa taki. Kande a ten de u ná o kaba fusutan saide Yehofa e akisi u fu du son sani. Boiti dati, Yehofa ná o taki langalanga anga u. A den baala di e teke fesi a o koboloiki fu taigi u san u mu du. Te den baala ya e taigi u fa u mu du sani, a á be o bun fu e akisi useefi taki: ‘Ma a so Yehofa wani u du sani tuutuu? Efuso a den baala ya e taigi u san denseefi wani?’ Fa yu o du sani te a ten de doo? Yu o fitoow Yehofa anga den sama di a poti fu teke fesi? Na a fasi fa yu e du sani nownow o yeepi i fu piki den akisi ya. Efu nownow a nai taanga gi i fu aliki den baala di Yehofa poti fu teke fesi, da a sani ya ná o taanga gi i tu na a ten fu a gaan banowtu.​—Luk. 16:10.

16. San sa meke a taanga gi u fu fitoow Yehofa aini a ten di e kon?

¹⁶ U mu poti pakisei tu na a fasi fa wi o du sani te Yehofa kon fu kuutu a ogii goontapu ya. Aini a ten ya, wi e howpu taki den sama di gwe fika Yehofa daai kon dini en baka. Wi e howpu tu taki den sama di nai dini Yehofa ete, kon dini en makandaa anga u. Ma na a ten fu Alimakedon Yehofa o meke Yesesi kuutu ala den sama di nai dini en (Mat. 25:31-33; 2 Tes. 1:7-9). Na a ten de u ná o poi taki sama anga sama Yehofa mu soi tyali-ati gi (Mat. 25:34, 41, 46). Wi o biibi taki Yehofa e kuutu sani a wan letifasi? Wi o gwe fika Yehofa efu sani á go enke fa u wani? A de taanga fanowdu fu fitoow Yehofa nownow, bika na a sani ya o yeepi u fu fitoow en anga u hii ati aini a ten di e kon.

17. Sowtu wini wi o fende baka te Yehofa o poli a goontapu ya?

¹⁷ Pakisei fa wi o fii aini a nyun goontapu, te u si fa sani de baka te Yehofa  kuutu a goontapu. Falisi keliki ná o de moo. Den bisnis anga ala den tiiman di e pina sama seefi ná o de moo. Sama ná o siki efuso gaandi moo, den sama fu u ná o dede moo tu. Boiti dati, Gadu o sooto Saatan anga den ogii yeye wan dunsu yali langa. Ala den ogii di den e du na a goontapu ya ná o de moo (Openb. 20:2, 3). Ná pikin piisii wi o piisii te u si taki na a moo bun sani u du di u fitoow Yehofa.

18. San u sa leli fu a sani di den Islayelisama be du aini Numeri 11:4-6 anga 21:5?

¹⁸ Aini a nyun goontapu, kande sani o de di o meke a taanga gi u fu biibi taki Yehofa e du sani a wan letifasi. Pakisei san pasa baka di den Islayelisama komoto enke saafu a Egepte. Omen fu den bigin kuutu fu a mana di Yehofa be e gi den. Den be wani den nyanyan di den be e fende a Egepte baka. (Leisi Numeri 11:4-6; 21:5.) A so wi o du sani tu aini a nyun goontapu? Wi á sabi fa a o de fu seeka a goontapu ya te enke a toon wan paladeisi baka. Ma u sabi taki ná pikin wooko wi o abi a ten de. Boiti dati, kande biginbigin a libi ná o makiliki. Wi o tifeedi anga den sani di Yehofa o seeka gi wi a ten de? Efu wi e tifeedi nownow anga den sani di Yehofa e du gi u, da a ná o taanga gi u fu tifeedi anga den sani di a o du gi wi aini a ten di e kon.

19. San u leli aini a artikel ya?

¹⁹ U mu e biibi taki Yehofa e du sani a wan letifasi ala yuu. U mu e fitoow den sama di Yehofa poti fu teke fesi tu. U mu holi a sani di Yehofa be meke polofeiti Yesaya taigi a foluku fi en a pakisei. A be taigi den taki: ‘Efu u wani taanga, u mu de pii, da u fitoow mi.’​—Yes. 30:15.