AINI Beibel ten, wan man efuso a famii fu a man be mu pai den famii fu wan uman fosi a be sa toow anga en. Son leisi a moni den be e gi a famii. Ma den be sa gi den meti, efuso diidii sani tu. Ma son leisi a wooko a man be e wooko gi a famii fu a uman, enke fa Yakopu be wooko seibin yali gi a dda fu Lakeli (Gen. 29:17, 18, 20). Saide den be e du a sani ya?

Wan Beibel ondoosukuman den e kai Carol Meyers taki: ‘Te wan sama be komoto aini a famii, a wooko be e moo ibi gi a famii ya, bika aini a ten de gaanse sama be e paandi goon, efuso kweki meti. Te a man be pai a famii fu a uman, efuso gi den kado, da a famii á be e fii en so.’ A pai di a man be e pai den famii fu a uman be e meke den tu famii ya kon moo koosube a denseefi tu. Efu wan fu den be fuka, a be sabi taki a taawan be o yeepi en. Boiti dati, te a man be pai den famii fu a uman, da a sani ya be e soi taki a wani a uman tuutuu. A be e soi tu taki a o poi solugu a uman di a o tyai en go neen osu.

Ma a sani ya á wani taki a seli den Islayelisama be e seli den umanpikin fu den. Wan buku di e taki fu fositen Islayeli taki: ‘Kande omen sama e si enke a bai den man be e bai den uman fu den, ma a ná so sani be de. A man be e pai a famii fu soi taki ai bigi gi en taki den gi en a umanpikin fu den.’

Aini son kondee aini a ten ya, den e du a sani ya ete. Efu Kelesten mma anga dda o akisi wan man fu gi den moni fosi a sa toow anga a umanpikin fu den, den á mu akisi ipi tumisi (Filip. 4:5; 1 Kor. 10:32, 33). A so den o soi taki den a ná sama di giili efuso lobi moni (2 Tim. 3:2). Te Kelesten mma anga dda nai akisi wan gaan moni, a man ná o abi fu diipi a toowdei, fu di a mu wooko moo taanga fu fende ala a moni di den wani. Efu a wan baala di e du a pioniliwooko, a ná o abi fu fika a wooko ya fu go suku moo moni fu pai den famii fu a uman.

Aini son kondee, lanti poti weiti di e soi omen wan famii mu pai fosi wan man sa toow anga wan uman. Efu a so sani de na a pisi pe yu e tan, i mu wooko anga san lanti taki. Saide? Beibel taki u mu du san lanti taki solanga den nai akisi u fu taangayesi Gadu.​—Rom. 13:1; Toli 5:29.