AINI a Weiti di Yehofa be gi den Islayelisama, a be taigi den taki den be sa tyai mabembe efuso osu-doifi enke ofaandi gi en. Efu wan sama á be poi tyai wan meti enke ofaandi, da a be sa tyai wan fu den foo ya enke ofaandi (Lef. 1:14; 12:8; 14:30). Saide a tu sowtu foo den be sa tyai enke ofaandi? Wan fu den sani a taki a ná ala yuu sama be e poi fende mabembe. Saide?

Mabembe á be e tan a wan peesi. Te a peesi be waan aini Islayeli, da na ala se i be sa fende den. Ma te oktober be doo, den be e fee go a den kondee pe a peesi á be koo, da te a peesi be bigin waan aini Islayeli, den be e daai kon ape baka (Singi 2:11, 12; Yel. 8:7). A sani ya be e meke a taanga gi den Islayelisama fu tyai mabembe enke ofaandi a den koo pisiten fu a yali.

Ma den osu-doifi a wan peesi den be e tan, neen meke na a hii yali den be sa fende den foo ya aini Islayeli. Den sama seefi be sa kweki den foo ya tu (Luku Yohanisi 2:14, 16 tu.) Wan buku e taki: ‘Sama be e kweki doifi aini ala den pikin foto a Palestina. Den sama be e meke olo gi den foo ya fu tan.’​—Luku Yesaya 60:8 tu.

Yehofa be taigi den Islayelisama taki den sa tyai den tu sowtu foo ya enke ofaandi. A sani ya e soi taki a be e holi a pakisei san den be poi du. A á be e fooseli den fu tyai sani enke ofaandi di a be sabi taki be o taanga gi den fu fende.