Toku Yehofa wani u wakiti en anga pasensi. A wani u wakiti te enke a yuu fi en doo. Saide a wani u du a sani ya? Saw yeepi u fu piisii winsi fa we wakiti?

SAIDE YAHOFA WANI U WAKITI?

Beibel taki: ‘Yehofa e wakiti anga pasensi fu du bun sani giw. Aw opo taampu fu soi u tyali-ati. Bika Yehofa a wan Gadu di e kuutu sani a wan letifasi. Ala den sama di e wakiti en anga pasensi o de koloku’ (Yes. 30:18). A den Dyu di á be e aliki Yehofa Yesaya be taigi den sani ya (Yes. 30:1). Ma den Dyu di á be gwe fika Yehofa, be kon abi howpu di den yee den sani di Yesaya taki. Den wowtu ya e gi a foluku fu Yehofa taanga-sikin aini a ten ya tu.

U mu wakiti anga pasensi leti enke Yehofa. A poti wan ten di aw tyai wan kaba kon na a ogii goontapu ya. Na a dei anga yuu ai wakiti fu doo (Mat. 24:36). Di a ten de o doo, aw kon a kiin taki den sani di Saatan taki fu Yehofa anga den sama di e dini en a ná tuu. Aw puu Saatan anga ala den sama di e holibaka gi en, ma aw ‘soi tyali-ati giw’.

U sabi taki Yehofa naw puu den tesi di e miti u nownow, ma ai soi u taki u sa piisii te we wakiti en. Enke fa Yesaya be taki, daw sa piisii te wakiti anga pasensi fu Yehofa du bun giw (Yes. 30:18). a Saw yeepi u fu de anga piisii? Fo sani de di sa yeepi u.

FAW SA PIISII TE WE WAKITI

Poti pakisei a den bun sani di e pasa aini i libi. A omen sani be miti Kownu David (Ps. 37:35). Ma toku a sikiifi taki: ‘De pii, da ye wakiti Yehofa. Tan wakiti en anga i hii ati. Aa mu hati i te taawan e du sani fu meke den libi waka bun. Ya mu dyalusu tei si fa sama e waka e du den ogii di den abi a pakisei’ (Ps. 37:7). David seefi wooko anga a sani di a taki, bika a be e pakisei san Yehofa be paamisi en. A be  taigi en taki aw fii en. A be e teke den sani di Yehofa be e du gi en fu bigi tu (Ps. 40:5). Useefi mu e poti pakisei a den bun sani fu a libi. Wa mu e poti pakisei a den sani di e pasa namo. A sani ya o yeepi u fu wakiti Yehofa anga pasensi.

Gafa Yehofa ala yuu. A David sikiifi Psalm 71. A be taigi Yehofa taki: ‘Ma mi dati o tan wakiti i. Mio gafa i ala yuu’ (Ps. 71:14). Fa David be e gafa Yehofa? A be e taki anga taa sama fu Yehofa. A be e singi tu (Ps. 71:16, 23). Leti enke David u sa piisii te we wakiti Yehofa. We gafa en te we du a peleikiwooko, te we taki fi en anga u famii efuso den mati fu u. We gafa en tu te we singi. Taa leisi te ye singi wan Kownukondee singi poti pakisei a san den wowtu wani taki anga fa den e meke i piisii.

Meke den baala anga sisa gii taanga-sikin. Di sani be e miti David, a be taigi Yehofa taki: ‘Fu dii du bun gi mi meke mio tan fitoow a nen fii makandaa anga ala den sama di nai gwe fika i’ (Ps. 52:9). Den baala anga sisa sa giw taanga-sikin, te we go a den komakandaa anga te we du a peleikiwooko. Den sa giw taanga-sikin tu te we kon makandaa anga den fu nyan wan sani.​—Rom. 1:11, 12.

Meke a howpu fii kon moo taanga. Psalm 62:5 e taki: ‘Mio wakiti Gadu anga pasensi, bika neen e meke mi abi howpu.’ A howpu fu u mu taanga, moomoo efu we si enke a kaba nai doo gawgaw. U mu e biibi taki Yehofa o du ala den sani di a paamisi u winsi u mu wakiti. Efu we sutudeli a Wowtu fu Gadu anga den polofeititoli, a howpu fu wi o kon moo taanga. Te we si fa den buku fu Beibel e kai anga denseefi anga fa Yehofa e yeepi u fu u kon sabi en moo bun, a howpu fu we kon moo taanga tu (Ps. 1:2, 3). Boiti dati, u mu e ‘begi anga santa yeye’ fu wi anga Yehofa sa tan de mati, winsi we fa we wakiti fu a giw teego libi enke fa a paamisi u.​—Yud. 20, 21.

Leti enke Kownu David, u sa biibi taki Yehofa e poti pakisei a den sama di e wakiti en. Aw soi den sama ya bun-ati (Ps. 33:18, 22). Tan wakiti Yehofa anga pasensi. Poti pakisei a den bun sani di e pasa aini i libi, gafa Yehofa ala yuu, meke den baala anga sisa gii taanga-sikin, meke a howpu fii kon moo taanga tu.