SON leisi te den Beibel sikiifiman be e taki fu wan sani baka, den be e koboloiki denseefi wowtu di den be taki kaba. Meke u luku dii sani di e soi saide den be e taki son sani omen leisi:

A pisiten di a Weiti be sikiifi. Aini a ten fu den Islayelisama a omen sama á be abi wan kopi fu a Weiti. Gaanse sama a te den be go na a Tabernakel fosi den be e yee a Weiti (Deit. 31:10-12). Sani be musu e puu den pakisei te den be taampu omen yuu langa e aliki fa wan sama e leisi a Weiti, bika den sama di be e kon na a tabernakel be ipi (Neh. 8:2, 3, 7). Te a leisiman be e leisi den moo pelensipali pisi omen leisi, da a be e moo makiliki gi a foluku fu membee a Wowtu fu Gadu anga fu du den sani di den yee. Boiti dati, a sani ya be e yeepi den fu membee den taa pisi fu a weiti di Yehofa be gi den.​—Lef. 18:4-22; Deit. 5:1.

A fasi fa a Weiti be sikiifi. Son pisi fu Beibel a singi. Den Beibel buku Psalm, Singi fu Salomo anga Tyali singi, a singi di sama sikiifi. Son yuu den singi ya be e abi wowtu di sama be mu taki omen leisi aini a singi. A sani ya be e yeepi den alikiman fu fusutan san a singi be e leli den. A be e yeepi den tu fu membee den wowtu fu a singi. Luku den wowtu a Psalm 115:9-11: ‘Islayeli, u fitoow Yehofa. Neen e yeepi u, neen aw skelt. Den sama fu Aron, u fitoow Yehofa. Neen e yeepi u, neen aw skelt. U di abi lesipeki gi Yehofa, u fitoow en. Neen e yeepi u, neen aw skelt.’ Te den sama be e singi den wowtu ya ala yuu, a sani ya be e yeepi den fu a singi doo den ati.

Poti pakisei a den moo pelensipali sani. Son Beibel sikiifiman be e taki fu pelensipali sani omen leisi. Di Yehofa be taigi den Islayelisama taki den á mu nyan buulu, a be meke Mosesi sikiifi wantu leisi saide den á mu nyan buulu. Gadu be wani soi den kiin taki a libi fu wan sama efuso wan meti de aini en buulu (Lef. 17:11, 14). Bakaten den apostel anga den owluman fu Yelusalem be sikiifi sowtu sani den Kelesten be mu koti pasi gi efu den wani Gadu piisii anga den. A sani ya be e soi den taki den mu tan faawe fu buulu.​—Toli 15:20, 29.

Winsi fa Beibel e taki fu son sani omen leisi, toku Yehofa á wani wi abi a gwenti fu e taki denseefi wowtu ala yuu. Yesesi be taki: ‘Te ye begi, ya mu e taki denseefi sani ala yuu’ (Mat. 6:7). Baka di a taki a sani ya, a kai wantu sani di u sa akisi Gadu te we begi (Mat. 6:9-13). Neen meke winsi u nai taki denseefi wowtu ala yuu te we begi, toku u sa akisi Yehofa denseefi sani di u gwenti akisi en.​—Mat. 7:7-11.

U si kiin saide son wowtu anga son sani sikiifi omen leisi aini a Wowtu fu Gadu. A sani ya a wan fasi fa a Gaan leliman fu u e leli u fu u fende wini.​—Yes. 48:17, 18.