1. Gi wan toli di e soi saide wi abi Yehofa fanowdu fu soi u faw mu du sani.

 KOW taki i lasi a busi. A omen ogii sa miti i, bika sani enke sineki efuso doti-kwata sa nyan i. Ma efii fende wan sama di sa tyai kon a ganda, ná pikin piisii yo piisii. A goontapu ya de enke busi. A omen sani de aini di sa poli wi anga Yehofa. Ma a naw wawan de, bika Yehofa e soi wi a pasi di u mu waka. Ai kibii u fu ogii á miti u. Ai yeepi u tu fu doo aini a nyun goontapu pe wo libi fu teego.

2. Fa Yehofa e tii a foluku fi en?

² Fa Yehofa e tii a foluku fi en aini a ten ya? Yehofa e tii a foluku fi en anga yeepi fu a Beibel. Ma ai koboloiki libisama fu du a sani ya tu. Ai koboloiki a ‘koni saafu di u sa fitoow’ fu giw den leli di wi abi fanowdu fu u sa du sani anga koni (Mat. 24:45). Boiti dati, Yehofa e koboloiki taa sama fu tii a foluku fi en. Den owluman anga den kelen-owluman e giw taanga-sikin fu holidoo te tesi e miti u. Aini den lasiti dei we libi nownow. Neen meke ai bigi giw taki Yehofa e soi u faw mu du sani. A sani ya e yeepi u fu wi anga en á poli. Ai yeepi u fu piisii nownow anga fu piisii fu teego aini a ten di e kon.

3. San wo luku aini a artikel ya?

³ Toku son yuu ai taanga fu aliki te Yehofa e poti wi a pasi, moomoo te a wan baala efuso wan sisa soi wi wan sani di u mu wooko neen. Saide? Bika son yuu u nai lobi den sani di den e taigi u. We si enke wa poi wooko anga a sani di den taigi u tu. Te den sowtu sani ya e pasa, u mu  holi a pakisei taki a Yehofa na a sama di e tii a foluku fi en. U mu holi a pakisei tu taki a soso wini we fende te we wooko anga den sani di ai taigi u. Aini a artikel ya, wo luku wantu sani di o yeepi u fu moo fitoow Yehofa. Wo si (1) fa a be e tii a foluku fi en a fositen, (2) fa ai tii a foluku fi en aini a ten ya, anga (3) sowtu wini we fende te we wooko anga den sani di ai leli u.

FA YEHOFA BE E TII DEN ISLAYELISAMA

4-5. Fa Yehofa soi taki a Mosesi na a sama di a be teke fu tii den Islayelisama? (Luku a fowtow a fesise fu A Wakititolen.)

⁴ A Mosesi na a sama di Yehofa be teke fu tyai den Islayelisama komoto a Egepte. A be soi den taki neenseefi be poti Mosesi fu tii den. Te mmanten a be e soi den a pasi anga wan woluku. Ma te neti da a be e tyai den anga wan faya (Ek. 13:21). Na a woluku baka Mosesi waka te enke den doo na a Lebi Ze. Ma den suudati fu Egepte be de a den baka. Neen meke ná pikin feele den Islayelisama be e feele, bika den be e si enke den Egepte suudati be o kii den. Den be si enke a wan fowtu Mosesi meke di a tyai den go na a Lebi Ze. Ma a ná wan fowtu a be meke, a Yehofa seefi be meke a tyai den go de (Ek. 14:2). Yehofa be du wan gaan wonduu fu fii den.​—Ek. 14:26-28.

⁵ Ala den 40 yali di den be de aini a sabana, Mosesi be e tan waka na a woluku baka. a Yehofa be fika a woluku wan hii pisiten na a tenti fu Mosesi tapu. Ala den Islayelisama be poi si en (Ek. 33:7, 9, 10). Anga a woluku ya Yehofa be e taki anga Mosesi. Bakaten da a be e taigi den Islayelisama san Yehofa be taigi en (Ps. 99:7). Den be poi si kiin taki a Yehofa seefi be poti Mosesi fu tii den.

6. San den Islayelisama be e du te Yehofa be e poti den a pasi? (Numeri 14:2, 10, 11)

⁶ A tyali taki gaanse fu den Islayelisama á be e si Mosesi na ain. Den á be e si en enke a sama di Yehofa be poti fu tii den. (Leisi Numeri 14:2, 10, 11.) Na a sani ya meke gaanse fu den á go aini a Paamisi kondee.​—Num. 14:30.

7. Sama a den sama di be aliki Yehofa? (Numeri 14:24) (Luku a fowtow tu.)

⁷ Winsi fa son Islayelisama á be aliki Yehofa, toku son wan fu den be aliki en. Yehofa be taki: ‘Kalepu . . . be e du san mi taigi en anga en hii ati.’ (Leisi Numeri 14:24.) Yehofa be belesi Kalepu, bika a be fika en fi en enseefi luku sowtu pisi fu a Paamisi Kondee a be wani (Yow. 14:12-14). Den Islayelisama di Yehofa be gi a okasi fu go aini a Paamisi Kondee be e aliki en. A Yowsuwa na a sama di be o tii a foluku baka Mosesi. ‘Den be e lesipeki en’ (Yow. 4:14). Fu di den be e lesipeki Yowsuwa, meke Yehofa be belesi den. A be gi den a kondee di a be paamisi den.​—Yow. 21:43, 44.

8. Fa Yehofa be e tii a foluku fi en a pisiten di den kownu be e tii? (Luku a fowtow tu.)

⁸ Baka wantu yali Yehofa be poti kuutuman fu tii a foluku. Ma a pisiten di den kownu be e tii a den polofeiti a be e koboloiki fu poti a foluku a pasi. Den kownu di be lobi Yehofa be e wooko anga san den polofeiti taigi den. Kownu David be aliki di polofeiti Natan be poti  en a pasi (2 Sam. 12:7, 13; 1 Kolon. 17:3, 4). Kownu Yowsafat anga den sama fu Yuda be wooko anga san polofeiti Yahasiyel be taigi den. A be taigi den taki: ‘Fitoow den polofeiti fu [Gadu]’ (2 Kolon. 20:14, 15, 20). Di tesi be miti Heskiya a be go suku yeepi a polofeiti Yesaya (Yes. 37:1-6). Ala yuu te den kownu be e wooko anga den sani di Yehofa be e taigi den, a be e belesi den. A be e kibii den tu (2 Kolon. 20:29, 30; 32:22). Den Islayelisama be man si taki a Yehofa seefi be e koboloiki den polofeiti fu tii a foluku fi en. Toku gaanse fu den kownu anga den sama á be e aliki den polofeiti fu Yehofa.​—Yel. 35:12-15.

FA YEHOFA BE E TII DEN FOSI KELESTEN

9. Sama Yehofa be e koboloiki fu poti den fosi Kelesten a pasi? (Luku a fowtow tu.)

⁹ Na a Pinkster fesa di be holi aini a yali 33, Yehofa be sete a Kelesten kemeente. Fa Yehofa be e poti den fosi Kelesten a pasi? A poti Yesesi enke edeman fu a kemeente (Efe. 5:23). Ma Yesesi á be e go na ala den Kelesten fu taigi den san den mu du. A be poti den apostel anga den baala di abi ondoofeni fu teke fesi (Toli 15:1, 2). A be poti owluman fu teke fesi aini a kemeente tu.​—1 Tes. 5:12; Tit. 1:5.

10. (a) San den fosi Kelesten be e du te den baala be e poti den a pasi? (Toli fu den apostel 15:30, 31) (b) Saide son sama na a ten fu Beibel á be e aliki den sama di Yehofa be e koboloiki fu poti den a pasi? (Luku a faki di den e kai ‘ Saide son sama nai wani biibi taki Yehofa poti sama fu tii a foluku fi en.’)

¹⁰ Den fosi Kelesten be e aliki te den baala be e poti den a pasi? Gaanse fu den be e wooko anga den sani di den baala be taigi den. ‘Den be e poolo te, bika den be e fende taanga-sikin’. (Leisi Toli fu den apostel 15:30, 31.) Fa Yehofa e tii a foluku fi en aini a ten ya?

FA YEHOFA E TII A FOLUKU FI EN AINI A TEN YA

11. Gi wan toli di e soi fa Yehofa e tii a foluku fi en aini a ten ya.

¹¹ Yehofa e tii a foluku fi en aini a ten ya ete. Ai koboloiki en Wowtu anga en  Manpikin fu tii u. A Yesesi a ede fu a kemeente. Yehofa e koboloiki sama fu tii a foluku fi en aini a ten ya ete? Eeye. Pakisei san be pasa aini a yali 1870. Charles Taze Russell anga den mati fi en be kon fusutan taki 1914 be o de wan pelensipali yali (Dan. 4:25, 26). Fu di den be ondoosuku a Beibel, meke den be e biibi taki den polofeititoli di sikiifi aini o kon tuu. Yehofa be belesi a moiti di den be meke fu ondoosuku a Beibel? Eeye. Den sani di pasa aini 1914 soi kiin taki a Kownukondee fu Gadu bigin tii. Aini a yali de a Fosi Goontapu Feti bigin. A omen takuu siki be e paati. Seke-doti be e pasa a omen peesi. Boiti dati, nyanyan be e pina (Luk. 21:10, 11). A Yehofa be e koboloiki den man ya fu tii a foluku fi en.

12-13. San den baala di be e tii a wooko na a pisiten fu a Du Fu Tu Goontapu feti be du fu meke a peleikiwooko go a fesi?

¹² Den baala na a edekantoo be ondoosuku a tekisi fu Openbaring 17:8. Baka di den ondoosuku a tekisi ya, den kon si taki Du Fu Tu Goontapu feti naw meke Alimakedon kon. Den be kon si tu taki baka a feti, wan sowtu freide be o de a goontapu. Den be o poi peleiki gi moo sama. Neen meke winsi fa a be gei enke a sani di den be wani du naw wooko, toku den be sete a Gileyad sikoo. Den be sete a sikoo ya fu leli den zendeling fa den mu du a peleikiwooko na ala se fu goontapu. A pisiten di a feti be e feti, den be e sende den zendeling go peleiki a son kondee kaba. Boiti dati, den baala di e tii a wooko seeka sikoo b aini ala kemeente fu leli u faw mu du a peleikiwooko moo bun. A sikoo ya e yeepi u fu toon bun leliman tu. Den sani ya e seeka u gi a peleikiwooko di u mu du aini a ten di kon.

¹³ We si kiin taki a Yehofa seefi be e tii a foluku fi en a ten de. Fanafu Du Fu Tu Goontapu feti, a foluku fu Yehofa fende a okasi fu peleiki aini omen kondee  sondee fu sama tapu den. A omen sama kon sabi Yehofa. Nownow na ala se fu goontapu a foluku fi en e peleiki.

14. Saide we biibi den sani di a olikanisâsi fu Yehofa e taigi u? Saide we fitoow den owluman? (Openbaring 2:1) (Luku a fowtow tu.)

¹⁴ Den baala di e tii a wooko e du sani enke fa Yesesi wani. Fosi den akisi den baala anga sisa fu du wan sani, den e luku efu Yehofa anga Yesesi e holibaka gi a sani di den wani du. Bakaten den e meke den kelen-owluman anga den owluman taigi a kemeente san den mu du. c Owluman di salufu de a ‘Gadu leti-ana. (Leisi Openbaring 2:1.) Den owluman a sondu sama, neen meke denseefi e meke fowtu. Son yuu Mosesi anga Yowsuwa be e meke fowtu tu. Den apostel seefi be e meke fowtu (Num. 20:12; Yow. 9:14, 15; Rom. 3:23). Toku we si kiin taki a Yesesi e soi den baala di e tii a wooko anga den owluman fa den mu du sani. Aw tan du a sani ya ‘te enke a kaba fu a goontapu doo’ (Mat. 28:20). A sani ya e soi taki u sa fitoow den baala di e teke fesi.

WE FENDE WINI TE WE DU SANI ENKE FA YEHOFA WANI

15-16. San ye leli fu den sama di e du sani enke fa Yehofa wani?

¹⁵ Te we du sani enke fa Yehofa wani, a soso wini we fende. Luku a toli fu Andy anga Robyn. Den sama ya wooko anga san den baala di e tii a wooko taki. Neen meke den á be e libi bigi (Mat 6:22). A sani ya meke den be poi yeepi bow Kownukondee zaal. Den be poi yeepi anga taa bow-wooko tu. Robyn taki: ‘Son yuu aini wan pikin toin kambaa u be e tan. Wa be e abi kukuu. A omen fu den sani fu mi di mi be e koboloiki fu meke fowtow mi seli. Mi be lobi meke fowtow. Ná pikin kee mi kee di mi seli den. Ma leti enke Sala, mia be e tyali moo fu den sani di mi fika a baka, ma mi be e piisii fu den sani di mi poi du gi Yehofa’ (Heb. 11:15). Sowtu wini den fende di den du a sani ya? Robyn taki: ‘We piisii tuutuu, bika we gi Yehofa ala san wi abi. Te mi anga mi man e wooko gi Yehofa, we pakisei fa a libi o de aini a nyun goontapu.’ Andy taki: ‘We piisii, bika we gi ala u ten anga u kaakiti fu holibaka gi a wooko fu Yehofa.’

 ¹⁶ San a den taa wini di we fende te we du sani enke fa Yehofa wani? Baka di Marcia kaba hei sikoo, a be wani bigin du a pioniliwooko (Mat. 6:33; Rom. 12:11). A taki: ‘Mi be sa go fo yali a universiteit sondee fu mi pai. Ma mi be wani du moo gi Yehofa. Neen meke mi leli du wan wooko di be o yeepi mi fu pionili bakaten. A wan bun sani mi du. Nownow mi e du a kowownu-pionili wooko. Mi e piisii te. Fu di mi nai wooko ala yuu, meke mi be poi yeepi a Betel. Mi be poi du omen taa sani gi Yehofa tu.’

17. San a wantu taa wini di we fende te we du sani enke fa Yehofa wani? (Yesaya 48:17, 18)

¹⁷ Son yuu den baala e taigi u taki u mu luku bun fu wa feti a gudu baka. U mu luku bun tu fu wa du sani di o meke u pasa den weiti fu Yehofa. Te we du sani enke fa Yehofa wani, a soso wini we fende. We abi wan kiin kosensi. We koti pasi gi omen ogii di be sa miti u (1 Tim. 6:9, 10). Boiti dati, wo poi dini Yehofa anga u hii ati. Sani á de di sa meke u piisii enke te we du sani enke fa Yehofa wani.​—Leisi Yesaya 48:17, 18.

18. Saide i de kabakaba fu du sani enke fa Yehofa wani?

¹⁸ Na a ten fu a gaan banowtu anga a ten fu a Dunsu Yali Tii, Yehofa o tan koboloiki libisama fu tii a foluku fi en (Ps. 45:16). I de kabakaba fu du san den baala o taigi u a ten de, winsi i be o wani du sani taa fasi? Efu we wooko anga den sani di Yehofa e taigi u nownow, aw moo makiliki giw fu wooko anga den sani di aw taigi wi a ten de. Neen meke na ala yuu u mu e aliki den sama di Yehofa e koboloiki fu soi u faw mu du sani (Yes. 32:1, 2; Heb. 13:17). Ala den sani di u luku aini a artikel ya e soi taki u sa fitoow Yehofa te ai soi u faw mu du sani. Ai kibii u fu ogii a miti u. Aw yeepi u te enke u doo a paladeisi.