1. Saide wi e lesipeki son sama? San wi o leli aini a artikel ya?

FA WI e soi taki wi e gi wan sama gaandi? A te wi e poti pakisei na a sama anga te wi e lesipeki en. Gaanse leisi, a den sama di du sani di sama lobi wi e lesipeki efuso den sama di abi wan gaan faantiwowtu. Aini a artikel ya, wi o luku sama a den sama di u mu lesipeki. Wi o luku saide u mu lesipeki den tu.

2, 3. (a) Saide u mu gi Yehofa gaandi moo ala taa sama? (Luku a fowtow na a bigin.) (b) Sama na a Pikin Sikapu di kai a Openbaring 5:13? Saide u mu gafa en?

² Openbaring 5:13 taki u mu gi „a sama di sidon na a kownu sutuu anga a Pikin Sikapu” gaandi. „A sama di sidon na a kownu sutuu” a Yehofa Gadu. Aini Openbaring kapitel 4 den engel e taki saide u mu gi Yehofa a Gadu „di e libi fu teego” gaandi. Den engel  taki: „Yehofa wi Gadu, a yu fiti fu kisi ala gaandi, anga gafa anga makiti bika a yu meke ala sani. A di i be wani, neen ede meke den de. A yu meke den.”—Openbaring 4:9-11.

³ „A Pikin Sikapu” di kai a Openbaring 5:13, a Yesesi. Fa u du sabi? Di Yesesi be de a goontapu, den be e kai en „a Pikin Sikapu fu Gadu di e puu sondu a goontapu” (Yohanisi 1:29). Sowtu taa kownu be de kabakaba fu dede gi a foluku fi en? Neen meke u mu gi Yesesi gaandi, bika neen na „Kownu fu den sama di e tii enke kownu anga Masaa fu den sama di e tii enke masaa” (1 Timotiyesi 6:14-16). Kande yu e fii enke den dunsudunsu engel di be e singi taki: „A Pikin Sikapu di den be kii fiti fu fende makiti, gudu, koni, kaakiti, gafa, gaandi anga belesi.”—Openbaring 5:12.

4. Saide u mu gi Yehofa anga Yesesi gaandi?

⁴ Yohanisi 5:22, 23 e soi taki Yehofa poti Yesesi fu kuutu libisama. Dati na a moo gaan sani di e soi saide u mu gi Yesesi gaandi. Te wi e gi Yesesi gaandi, da wi e gi Yehofa gaandi tu. A sani de o yeepi u fu fende teego libi.—Leisi Psalm 2:11, 12.

5. Saide u mu lesipeki ala sama?

⁵ Di Gadu meke libisama, a meke den enke enseefi (Genesesi 1:27). A sani ya e soi taki libisama poi soi den manii fu Gadu. Libisama poi soi lobi anga switifasi. Den poi fii gi taawan tu. Boiti dati, libisama meke anga wan kosensi. A kosensi e yeepi den fu sabi san bun anga san á bun, san fiti anga san á fiti (Romesama 2:14, 15). Gaanse sama lobi moin sani anga kiin sani. Den wani libi na a wan anga taawan. A sani ya nai foondoo wi, bika a so Yehofa de. A lobi moin sani. A lobi te ala sani e waka bun tu. A sani ya e soi kiin taki libisama abi den manii fu Yehofa. Neen meke u mu abi lesipeki gi libisama.—Psalm 8:5.

6, 7. Saide te Yehofa Kotoigi e lesipeki taawan den nai du en enke den sama fu a goontapu ya?

⁶ U sabi taki a de fanowdu fu lesipeki taawan. Ma fa u mu lesipeki den? Gaanse sama e wani du sani enke den sama fu a goontapu fu Saatan. Son sama e si taawan enke gadu. Pe fu den lesipeki den enke fa Yehofa wani, den e lesipeki den pasa peesi. Den e du efuso wei koosi enke politikiman, keliki fesiman, sportman, sama di e pee aini felon anga taa balinen man.

⁷ Den bakaman fu Yesesi sabi taki a á fiti fu lesipeki sama pasa peesi. Fu ala den sama di libi a goontapu ya, a Yesesi wawan baka u mu waka. A soi wi anga a libi fi en fa u mu tyai useefi (1 Peitilisi  2:21). Wi á mu feegete taki: „Ala sama e sondu. Nawan sama poi gendee enke Gadu” (Romesama 3:23). Wi á mu si nawan libisama enke gadu. Efu wi e lesipeki wan libisama pasa peesi, wi o meke Yehofa ati boon.

8, 9. (a) Fa Yehofa Kotoigi e si den tiiman? (b) On ten u ná o aliki lanti?

⁸ Fu di son sama abi son faantiwowtu meke a de fanowdu fu lesipeki den. Pakisei san lanti e du gi i. Den e meke moiti fu sama á du ogii na a pisi pe yu e tan. Boiti dati den e meke moiti fu den sama aini a kondee fende san den abi fanowdu. A omen taa wini wi e fende fu den sani di den e du. Apostel Pawlesi taki u mu lesipeki lanti, bika a den e tii a kondee. Boiti dati, a taki u mu wooko anga den weiti fu den. A be taki: „Gi ala sama san den mu fende. Efu lanti taki i mu pai lantimoni, pai en.” Efu ’den wani i lesipeki den, lesipeki den’.—Romesama 13:1, 7.

⁹ Wi enke Yehofa Kotoigi e meke moiti fu lesipeki lanti. Ala kondee abi den gwenti, neen meke a sani di wan tiiman o wani den sama fi en kondee du, o kengi fu san wan taa tiiman wani den sama fi en kondee du. Ma winsi fa, u mu meke moiti fu wooko makandii anga lanti te den e du den wooko. Ma efu den wani u du wan sani di Yehofa á lobi, u ná o du san den taki. Wi o aliki Yehofa. Wi o lesipeki en moo libisama.—Leisi 1 Peitilisi 2:13-17.

10. Saide u sa waka a den sama di be e dini Yehofa a fositen baka?

¹⁰ U sa luku fa den sama di be e dini Yehofa fositen be e lesipeki lanti, da u waka a den baka. Di lanti fu Rome be wani sabi omen sama e tan aini a kondee, Yowsefu anga Maliya go a Betelehem fu poti den nen a lantibuku, winsi fa Maliya be de anga lepi bee (Lukasi 2:1-5). Apostel Pawlesi seefi be e lesipeki lanti. Di sama be lei gi en taki a á be tyai enseefi bun, anga lesipeki a taki anga Kownu Herodes Agripa anga a gaanman fu Yudeya di den e kai Festus di den be e kuutu a toli fi en.—Toli 25:1-12; 26:1-3.

11, 12. (a) Saide u nai lesipeki den fesiman fu keliki moo fa wi e lesipeki taa sama? (b) Fa sani waka di wan Kotoigi fu Oostenrijk be taki a wan lesipeki fasi anga wan bigiman fu kondee?

¹¹ A de fanowdu fu lesipeki den keliki fesiman tu? U mu lesipeki den leti enke fa u be o lesipeki wan taa sama. Ma a á be o bun fu lesipeki den moo taa sama. Saide? Bika falisi keliki nai leli sama a tuu di sikiifi aini Gadu Wowtu. Di Yesesi be de a goontapu a á be kibii den ogii fu den keliki fesiman. A kai den bidiigiman anga ogii-ati fesiman (Mateyesi 23:23, 24). Ma  a á fowtu fu lesipeki den tiiman moo taa sama. Bika den yeepi u wantu leisi fu di wi e lesipeki den.

¹² Wan fu den tiiman di be yeepi Kotoigi a Dr. Heinrich Gleissner. A man ya be de aini wan fu den politiki palitei fu Oostenrijk. Na a du fu Tu Goontapu Feti, den suudati fu Doisilikondee be kisi en. Di den poti en aini wan loko fu tyai go a wan fu den sitaafuman kampu, a miti wan baala di den e kai Leopold Engleitner. Di Baala Leopold Engleitner soi en a wan lesipeki fasi san ai biibi, a be e aliki. Baka a oloku, a omen leisi Gleissner yeepi den Kotoigi aini Oostenrijk. Kande i sabi taa ondoofenitoli tu di e soi taki sani e waka bun te Kotoigi e lesipeki den tiiman fu kondee.

13. Sama u mu lesipeki? Saide u mu lesipeki den?

¹³ U mu lesipeki den baala anga sisa fu a kemeente, moomoo den wan di e teke fesi. Sama enke den owluman, kelen-owluman, beikantoo komte anga den baala di e tii a wooko a hii goontapu. (Leisi 1 Timotiyesi 5:17.) Ala den baala ya e solugu a foluku fu Gadu. Beibel e kai den „man di koni” (Efeisesama 4: 8). Neen meke a de fanowdu fu lesipeki den winsi sowtu kondee den komoto. A ná abi toobi tu sowtu sikoo pampila den abi efuso  sowtu wooko den e du aini a libi. U sa waka a den fositen Kelesten baka te u luku a fasi fa den be e lesipeki den baala di be e teke fesi. Te u miti den baala ya, wi á mu si den enke engel efuso sama di hei moo taawan. Ma u mu lesipeki den fu di den e wooko taanga anga fu di den abi sakafasi.—Leisi 2 Korentesama 1:24; Openbaring 19:10.

14, 15. Saide den owluman anga den fesiman fu den keliki a ná aseefi?

¹⁴ Den owluman de enke sikapuman di abi sakafasi. Den á wani sama si den enke balinen man. A sani ya e soi taki den owluman anga den keliki fesiman fu a ten ya anga den du fu a ten fu Yesesi, a ná aseefi. Yesesi be taki den keliki fesiman „lobi sidon a den moo bun peesi a den nyanyan tafaa. Den lobi sidon te a fesi aini den Dyu keliki. Den lobi te sama e gi den odi a wowoyo”.—Mateyesi 23:6, 7.

¹⁵ Den owluman e du san Yesesi taki. Yesesi be taigi den taki: „Wi á mu meke sama kai u leliman, bika a wan sama namo a u leliman. Ala wi a baala. Wi á mu kai nawan sama a goontapu ya u dda, bika a wan sama namo a u Dda, a wan di de a hemel. Wi á mu meke sama kai u fesiman tu, bika a wan sama namo a u Fesiman, dati a Kelestesi. A sama di wani de a moo gaanwan, mu dini taawan. Gadu o saka a sama di e hei enseefi, ma a o hei a sama di e saka enseefi” (Mateyesi 23:8-12). Efu den owluman di de a den kemeente a hii goontapu abi sakafasi, den baala anga sisa o lesipeki den. Den o lobi den tu.

16. Saide u mu e meke moiti fu lesipeki taawan?

¹⁶ Son leisi ai teke ten fu sabi fa u mu lesipeki taawan. Den fositen Kelesten seefi be mu meke moiti fu lesipeki taawan (Toli 10:22-26; 3 Yohanisi 9, 10). Ma a ná fu soso wi o meke moiti. Te wi e lesipeki taawan enke fa Yehofa leli u, wi o fende wini.

17. San a wantu wini di wi o fende te wi e lesipeki den sama di abi faantiwowtu?

¹⁷ Efu wi e lesipeki lanti na a pisi pe wi e tan, den o moo de kabakaba fu holibaka gi u te wi e paati a bun nyunsu. Boiti dati den o si a peleikiwooko di wi e du taa fasi. Wan pionili sisa di den e kai Birgit be ondoofeni a sani ya omen yali pasa a Doisilikondee. Di a go a sikoo gi a  meisyo fi en na a kaba fu a yali, neen den sama fu a sikoo taigi en taki, den e teke en fu bigi taki den yali di pasa Kotoigi pikin be de na a sikoo de. Den taki a den Kotoigi pikin meke a sikoo toon wan moo bun sikoo. Birgit taigi den taki „den Kotoigi pikin e leli taki den mu tyai denseefi enke fa Yehofa wani. Yehofa wani den lesipeki den sama di e leli den”. Wan fu den leliman taigi Birgit taki efu ala den pikin fu a sikoo be den enke den Kotoigi, a wooko fu den enke leliman be o moo makiliki. Fu di den leliman be lobi a fasi fa den Kotoigi pikin be e tyai denseefi, meke baka wantu wiki wan fu den go a wan konkelesi fu u.

18, 19. U mu lesipeki den owluman, ma san u mu holi a pakisei?

¹⁸ Den leli di de aini Gadu Wowtu e yeepi u fu fusutan fa u mu lesipeki den owluman aini a kemeente. (Leisi Hebrewsama 13:7, 17.) U mu e gafa den bika den e wooko taanga. Te wi e wooko anga san den e soi u, den o du den wooko anga piisii. Beibel taki u mu meke moiti tu fu u biibi taanga enke du fu den owluman. Ma dati á wani taki u mu wei koosi enke den, u mu taki enke den, efuso leli sama pilisisi enke den. Efu u be o du a sani ya, da a be o gei enke a libisama baka wi e waka a peesi fu u waka a Yesesi baka. Wi á mu feegete taki den owluman a sondu sama enke useefi.

¹⁹ Wi o yeepi den owluman efu u nai si den enke balinen man te wi e lesipeki den. Saide? A o moo makiliki gi den fu abi sakafasi, a o yeepi den tu fu den á fii denseefi. Den ná o si enke den e du sani bun moo taawan tu.

20. Sowtu wini wi e fende te wi e lesipeki taawan?

²⁰ Te wi e lesipeki taawan, da a sani de e yeepi u fu wi á poti pakisei a useefi tumisi. Ai yeepi u tu fu abi sakafasi te taawan e hei u. Ai kibii wi tu, bika ai yeepi u fu holidoo te wan sama di wi e lesipeki du wan sani di meke u fii booko-saka. Boiti dati ai yeepi u fu libi na a wan anga a olikanisâsi fu Yehofa. A olikanisâsi nai gi nawan sama gaandi pasa maiki, a ná abi toobi efu a sama e dini Gadu efu a nai dini Gadu.

21. San na a moo gaan wini di wi o fende te wi e lesipeki taawan?

²¹ A moo gaan wini di wi e fende te wi e lesipeki taawan, na a piisii di wi e meke Yehofa piisii. Wi e soi taki wi e dini en anga u hii ati te wi e lesipeki taawan. Yehofa o man taigi Saatan taki a lei ai lei taki sama á be o dini en anga den hii ati (Odo 27:11). A omen sama a goontapu á sabi fa den mu lesipeki taawan. Ma wi e piisii taki u sabi fa u mu lesipeki taawan a wan fasi di Yehofa lobi.