Aini 2012, sama di e suku fositen sani fende wantu pisi fu wan doti patu di gaandi 3000 yali. Den be poolo di den fende den pisi fu a patu ya. Saide? Den be e poolo fu di sani be sikiifi a den pisi fu a patu ya.

Di den miti ala den pisi fu a patu kon a wan, den be man leisi san sikiifi neen. A be sikiifi aini Kana-antongo taki: „Esbaa-al Ben Beda” dati wani taki „Esbaa-al, manpikin fu Beda.” A fositoon sama fende wan gaandi sani anga a nen ya neen tapu.

Beibel e taki fu wan sama di den e kai Esbaa-al tu, wan fu den manpikin fu Kownu Saul (1 Koloniki 8:33; 9:39). Wan koniman den e kai Yosef Garfinkel be de aini fende a patu ya. A taki: „A bun fu holi a pakisei taki a nen Esbaa-al de aini Beibel. Ma now den sabiman di e ondoosuku sani fu fositen kon si taki wan sama be abi a nen ya tuu, ma aini a pisiten di kownu David be e tii wawan wan sama be abi a nen ya.” Disi a wan taa sani di e soi taki son gaandi sani di sama e fende, e kai anga san sikiifi aini Beibel.

A taa nen fu a manpikin fu Saul di den e kai Esbaa-al a Isboset (2 Samuweli 2:10). Saide den puu „baa-al” na a kaba pisi fu a nen fu a manpikin fu Saul neen den poti „boset”? Ondoosukuman taki kande a sama di sikiifi a Beibel buku 2 Samuweli, á be wani poti a nen Esbaa-al fu di a nen ya be e meke den Islayelisama pakisei Baa-al. Baa-al a be a gadu fu den Kaana-ansama. Den Kaana-ansama be e biibi taki na a gadu ya be e meke alen kai. Ma a nen Esbaa-al sikiifi aini a Beibel buku 1 Koloniki ete.