ALA sama wani taawan si den fu bun sama. Toku a á makiliki fu abi bunfasi aini a ten ya. A omen sama ’á lobi bun sani’ (2 Tim. 3:3). A denseefi e taki gi denseefi san bun anga san á bun. Te i luku en bun den e taki ’bun a ogii, da ogii a bun’ (Yes. 5:20). Boiti dati, wi abi sondu neen meke ai taanga gi u fu abi bunfasi. A fasi fa u kiya sa meke a taanga gi u fu abi a manii ya tu. Kande wi e fii enke Anne * di e dini Yehofa omen yali kaba. A taki: „Ai taanga gi mi fu biibi taki mi poi de wan bun sama.”

Ma winsi fa, ala u poi abi bunfasi. A manii ya a wan fu den manii di a santa yeye e meke sama abi. A santa yeye na a moo taanga kaakiti di de. A poi yeepi wi anga iniiwan sani di e meke a taanga gi u fu abi bunfasi. Meke u luku san a bunfasi anga san o yeepi u fu abi a manii ya.

Wan sama di abi bunfasi ná abi takuu manii. Sowan sama e meke moiti fu du bun ala yuu. A manii ya e tyai wini gi taawan. Te wan sama abi bunfasi ai yeepi taawan efuso puu den a fuka.

Kande yu e si taki son sama lobi du bun gi den famii anga den mati. Ma a den sama ya wawan u mu du bun gi? A tuu taki a ná ala yuu wi o poi soi a manii ya, bika Beibel taki: „Nawan leti-ati sama de a goontapu, di e du bun ala yuu. Sama á de a goontapu di nai sondu” (Peleik. 7:20). Apostel Pawlesi be taki: „Mi sabi taki nawan bun sani de aini mi. Dati wani taki aini mi sikin” (Rom. 7:18). A sani ya e soi taki efu u wani abi a manii ya u mu waka a Yehofa baka.

A Yehofa abi a leti fu taki san bun anga san á bun. Beibel taki fu Yehofa taki: „Yu a wan bun Gadu, den sani di yu e du bun tu. Leli mi den weiti fi yu” (Ps. 119:68). Meke u luku tu fasi fa Yehofa e soi bunfasi enke fa a tekisi ya e soi.

Yehofa abi bunfasi. Bunfasi a wan fu den pelensipali manii di Yehofa abi. Pakisei san a be taigi Mosesi. A be taigi en taki: „Mi o meke i si a bun-ati fu mi.” Di Yehofa meke Mosesi si fa a gendee anga fa a abi bun-ati, Mosesi yee wan siten e taki: „Yehofa, Yehofa, a wan Gadu di abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki. Ai du bun gi dunsudunsu sama. Ai gi sama paadon te den meke fowtu, te den du ogii efuso sondu. Ma a ná o puu a sitaafu fu den sama di meke fowtu. Te wan dda sondu, den manpikin fi en, den galanpikin fi en, anga den pikin fu den galanpikin fi en o fende sitaafu” (Ek. 33:19; 34:6, 7). A sani ya e soi kiin taki a soso bun sani Yehofa e du. Yesesi na a moo bun sama di be de a goontapu ya, tokuso a be taki:  „Nawan sama bun. A wan kodo sama di bun, a Gadu.”​—Luk. 18:19.

A soso bun sani Yehofa e du. Ala sani di Yehofa e du e soi kiin taki a abi bunfasi. „Yehofa e du bun gi ala sama. Ai soi tyali-ati gi ala den sani di a meke” (Ps. 145:9). Te Yehofa e soi bunfasi, a nai paati bee. Neen meke u de a libi. Ai gi wi ala san wi abi fanowdu fu tan a libi (Toli 14:17). Yehofa e soi u bunfasi tu, te ai gi u paadon. A psalm sikiifiman taki: „Yehofa, yu a wan bun Gadu. I de kabakaba fu gi sama paadon” (Ps. 86:5). I sa biibi taki „Yehofa ná o mombii den sama di e dini en anga wan kiin ati bun sani”.​—Ps. 84:11.

Gadu meke wi anga denseefi manii fi en, neen meke useefi poi abi bunfasi. U poi du bun sani tu (Gen. 1:27). Toku a Wowtu fu Gadu e gi u taanga-sikin fu „leli fu du bun” (Yes. 1:17). Fa u sa leli fu du bun? Wi o luku dii sani di o yeepi u fu du a sani ya.

A fosiwan: U sa begi Yehofa fu a gi wi en santa yeye, bika na a santa yeye e yeepi Kelesten fu abi bunfasi (Gal. 5:22). A santa yeye poi yeepi u fu lobi san bun anga fu buuse ogii (Rom. 12:9). Beibel taki Yehofa poi ’yeepi u fu du efuso taki sani di bun ala yuu’.​—2 Tes. 2:16, 17.

Du fu tu: U mu e leisi a Wowtu fu Gadu. Te wi e leisi a Beibel, Yehofa e leli u „fa fu du bun”. Ai yeepi u tu fu de „seekaseeka fu du ala sowtu bun wooko” (Odo 2:9; 2 Tim. 3:17). Te wi e leisi Gadu Wowtu anga te wi e sidon pakisei san u leli, wi e poti den bun sani di u leli fu Gadu aini wi ati. Bakaten wi o man wooko anga den sani ya te wi abi den fanowdu.​—Luk. 6:45; Efe. 5:9.

Du fu dii: U mu du ala san u man fu ’waka a den sama di e du bun baka’ (3 Yoh. 11). Beibel e taki fu omen sama di u sa waka a den baka. Den moo bun sama di u sa waka a den baka, a Yehofa anga Yesesi. Ma u sa leli fu taa sama di be abi bunfasi tu. Tu fu den sama ya a Tabita anga Barnabas (Toli 9:36; 11:22-24). I sa leli omen sani fu den te yu e leisi san Beibel e taki fu a fasi fa den be e yeepi taawan. Te yu e leisi san Beibel e taki fu den, poti pakisei a san iseefi sa du fu yeepi taawan aini yu osufamii anga a kemeente. Poti pakisei a den wini di Tabita anga Barnabas fende fu di den be abi bunfasi. Iseefi o fende wini te yu e yeepi taawan.

 U sa leli fu sama aini a ten ya di abi bunfasi tu. Son wan fu den sama ya a owluman di e wooko taanga aini a kemeente. Den baala ya „lobi san bun”. Wi á mu feegete den sisa fu u di e soi anga den sani di den e du taki den e „leli taawan bun sani” (Tit. 1:8; 2:3). Wan sisa den e kai Roslyn taki: „Wan mati fu mi e du ala san a man fu yeepi taawan anga fu gi den taanga-sikin aini a kemeente. Ai sidon pakisei san e miti den. A lobi gi den kado efuso yeepi den a wan taa fasi. Mi e si a sisa ya enke wan sama di abi bunfasi tuutuu.”

Yehofa e gi a foluku fi en taanga-sikin fu „suku san bun” (Am. 5:14). Te wi e du a sani ya, u ná o lobi den weiti fu Yehofa namo, ma wi o fende taanga-sikin fu du san bun.

Te wi e du bun gi taawan, wi á mu si enke a namonamo u mu abi dii sani fu gi den. Pakisei a toli ya: Efu u wani wan sani di u paandi goo, wi á mu nati en wan pasi namo anga tyaipi wataa, ma u mu nati en pikinpikin omen leisi. A so u mu si bunfasi tu. A den pikinpikin sani di wi e du gi taawan e soi taki wi abi bunfasi.

Beibel taki u mu ’de kabakaba fu du iniiwan bun sani’ (2 Tim. 2:21; Tit. 3:1). Efu wi e poti pakisei a san e miti taawan, wi o man si san u mu du fu yeepi den (Rom. 15:2). Son leisi u mu paati san wi abi anga den (Odo 3:27). Kande u sa kai wan sama fu kon nyan wan pikin sani a wi osu efuso fu gi en taanga-sikin. Efu u sabi taki wan sama siki, u sa sende wan biifi gi en. U sa go luku en efuso telefon en tu. Wi abi omen okasi fu „taki sani di e gi sama taanga-sikin te a de fanowdu. Da den sama di e aliki, o yee sani di e tyai wini gi den”.​—Efe. 4:29.

Leti enke Yehofa, wi e suku fasi fu du bun gi ala sama. U nai paati bee. Wan fu den moo bun fasi fa u sa du a sani ya, a te wi e paati a bun nyunsu fu a Kownukondee gi ala sama. Leti enke fa Yesesi be taki, wi e du bun gi sama winsi den e buuse u (Luk. 6:27). Noiti a fowtu fu du bun efuso fu yeepi taawan, bika „weiti á de di e kuutu den sani ya” (Gal. 5:22, 23). Efu wi e du bun gi taawan winsi den e libi ogii anga u, wi o man yeepi den fu kon dini Gadu efuso gafa en.​—1 Peit. 3:16, 17.

Na „a fasi fa wan bun sama e tyai enseefi o meke sani waka bun anga en” (Odo 14:14). San a den wini di wi o fende te wi e libi bun anga taawan? Te wi e libi bun anga taawan, a o moo makiliki gi den fu libi bun anga wi tu (Odo 14:22). Winsi wan sama nai libi bun anga u, efu wi e tan du bun gi en a sa kengi wan dei.​—Rom. 12:20.

Efu u tapu fu du ogii, da u bigin du bun, a omen wini wi o fende. A omen baala anga sisa ondoofeni a sani ya. Luku a toli fu Nancy. A taki: „Fosi mi á be e tyai miseefi bun. Mi be e libi wan hululibi. Mi á be abi manii. Ma di mi bigin du den sani di mi leli aini Gadu Wowtu, mi bigin piisii aini a libi. Nownow mi abi lesipeki gi miseefi.”

Yehofa e piisii te wi abi bunfasi, neen meke u mu meke moiti fu abi a manii ya. Winsi taawan nai si san wi e du, Yehofa e si. A sabi ala den bun sani di wi e du efuso pakisei (Efe. 6:7, 8). Sowtu wini wi o fende te wi abi bunfasi? „Yehofa lobi sama di e du bun” (Odo 12:2). Neen meke u mu du ala san u man fu abi a manii ya. Yehofa paamisi u taki: „Ala sama di e du bun o fende gafa, gaandi anga freide.”​—Rom. 2:10.