1. San Adan anga Efa lasi? San a be a bakapisi?

SAMA i denki abi a leti fu taki san bun anga san á bun? Di Adan anga Efa nyan a sii fu a bon fu sabi bun anga ogii, den soi taki den á be wani Yehofa taki gi den moo. Den be wani taki gi denseefi san bun anga san á bun (Gen. 3:22). Di den taangayesi Yehofa a omen sani den lasi. Den anga Yehofa a ná be mati moo. Den lasi a gaandi tu fu libi fu teego. Boiti dati a sani di den du tyai sondu anga dede gi ala den bakapikin fu den (Rom. 5:12). A sani di Adan anga Efa du tyai soso ogii.

2-3. (a) San a Etiyopiya man taki di Filipesi peleiki gi en? (b) Sowtu wini wi e fende te u dopu? Sowtu akisi wi o luku?

² A Etiyopiya man di Filipesi be peleiki gi, á be tyai enseefi enke Adan anga Efa. A be teke san Yehofa anga Yesesi du gi en fu bigi, neen meke a á be daaidaai fu dopu (Toli 8:34-38). Te u paamisi Yehofa taki wi o libi enke fa a wani neen u dopu, wi e soi taki wi e teke san en anga Yesesi du gi u fu bigi leti enke a Etiyopiya man. Boiti dati wi e soi taki wi e biibi taki a Yehofa na a sama di mu taigi u san bun anga san á bun.

³ Pakisei den wini di wi e fende te wi e dini Yehofa. Wi abi a okasi fu fende ala den belesi di Adan anga Efa lasi. Wi o fende teego libi tu. Fu di wi e biibi Yesesi, meke Yehofa e gi u paadon fu u sondu. Ai yeepi u fu  abi wan kiin kosensi tu (Mat. 20:28; Toli 10:43). Wi e kon aini a gaan osufamii fu Yehofa di a lobi. Wi o fende moo belesi aini a ten di e kon (Yoh. 10:14-16; Rom. 8:20, 21). Son sama di leli sabi Yehofa e daaidaai fu waka na a Etiyopiya man baka, winsi fa den sabi taki den o fende den belesi ya. San e tapu den fu dopu? San o yeepi den fu sani á tapu den fu dopu?

4-5. San be e tapu wan yonkuman Avery anga wan yonkuu uman Hannah fu dopu?

⁴ Son sama e si enke den á bun sai. Wan yonkuman den e kai Avery mma anga en dda a Kotoigi. En dda a wan owluman di e du en wooko bun. Ma toku Avery be e feele fu dopu. Saide? A taki: „Mi be e si enke mi ná o poi tyai miseefi bun enke mi dda.” Boiti dati Avery be e si enke a á be o poi tyai den faantiwowtu di a be o fende te a be o dopu. A taki: „Mi be e feele enke den be o akisi mi fu begi a komakandaa, fu holi lezing anga fu teke fesi a wan peleikiwooko komakandaa.”

⁵ Hannah, wan yonkuu uman di abi 18 yali, be e si enke a á bun. En mma anga en dda a Kotoigi. Ma toku a be e si enke a á be o man holi den weiti fu Yehofa. Saide? Fu di a be e fii enke nawan sani di ai du bun. Son leisi a fii ya be e moo en te, da a be e gi enseefi mankei. Te a be e du a sani ya, a be e moo fii booko-saka. Hannah taki: „Noiti mi taigi sama san mi be e du. Mma anga nda seefi mi á be taigi. Boiti dati mi be e si enke noiti Yehofa be o wani mi dini en fu di mi be e du a sani de.”

6. San be e tapu Vanessa fu dopu?

⁶ Mati. Vanessa di abi 22 yali taki: „Mi be abi wan mati di mi be sabi beina 10 yali kaba.” Ma a mati fu Vanessa á be e gi en taanga-sikin fu dopu. Ná pikin fii Vanessa fii a sani ya. A taki: „Ai taanga gi mi fu meke mati, neen meke mi be e booko mi ede taki efu mi fika a mati fu mi, mi á be o fende taa mati.”

7. San Makayla be e feele? Saide a be e feele a sani ya?

⁷ Son sama e si enke den o du wan gaan sondu. Di wan yonkuu uman den e kai Makayla be abi feifi yali, en gaan baala komoto a waaleiti. Di a be e goo kon bigi, a be e si fa en mma anga en dda be e kusumi fu a fasi fa en  baala be e tyai enseefi. Makayla taki: „Mi be e feele taki efu mi be dopu, mi be o meke wan fowtu, da den be o puu mi na a kemeente. A sani de be o meke mma anga dda moo kusumi.”

8. San wan yonkuman den e kai Miles be e feele?

⁸ Te yu e feele sama. Miles dda anga a uman fi en dda e dini Yehofa. Ma en mma a ná wan Kotoigi. Miles taki: „Mi tan anga mma 18 yali langa. Mi be e feele fu taigi en taki mi wani dopu. Mi sabi ete san a be du di nda toon Kotoigi. Mi be e feele taki á be o tapu mi fu dini Yehofa.”

9. Fa sani o waka te i kon fusutan taki Yehofa a wan Gadu di abi lobi anga pasensi?

⁹ Adan anga Efa á be meke moiti fu lobi Yehofa anga den hii ati, neen meke den taangayesi Yehofa di tesi miti den. Toku Yehofa gi den pasi fu libi langa sai fu meke pikin anga fu kiya den pikin enke fa den be wani. Bakaten Adan anga Efa si kiin taki den du wan don sani di den á meke Yehofa tii den. A fosi manpikin fu den kii en pikin baala sosokaali. Te fu kaba ogii anga takuudu be bigin basi libisama (Gen. 4:8; 6:11-13). Ma Yehofa be seeka wan sani kaba fu yeepi den bakapikin fu Adan anga Efa di be o teke a se fi en (Yoh. 6:38-40, 57, 58). Efi i meke moiti fu sabi fa Yehofa e pasensi anga u anga fa a lobi u, yu o moo lobi en. I ná o wani waka a Adan anga Efa baka, ma yu o wani libi enke fa Yehofa wani.

10. Te u sidon pakisei san sikiifi a Psalm 19:7, da fa ai yeepi u fu dini Yehofa?

¹⁰ Meke moiti fu sabi Yehofa moo bun. Moo yu e leli sabi Yehofa, moo yu o fende taanga-sikin fu dini en anga i hii ati. Avery di u be taki fi en na a bigin taki: „Di mi sidon pakisei san mi leisi a Psalm 19:7 mi fende taanga-sikin.” (Leisi en.) Di Avery si  fa Yehofa du san a paamisi aini a tekisi ya, a kon moo lobi en. A ná deki-ati namo lobi e yeepi u fu abi, ma ai gi u taanga-sikin tu fu du san Yehofa lobi. Hannah di u be taki fi en na a bigin taki: „A sutudeli di mi sutudeli Beibel anga miseefi, yeepi mi fu fusutan taki te mi e gi miseefi mankei, ai hati Yehofa tu” (1 Peit. 5:7). Hannah be bigin „du san a wowtu fu Gadu e taki” (Yak. 1:22). San a be a bakapisi? A taki: „Di mi kon si den wini di mi e fende te mi e aliki Yehofa, mi kon moo lobi en. Nownow mi e biibi taki Yehofa poi yeepi mi te mi abi en fanowdu.” Hannah be man tapu anga a gwenti di a be abi fu gi enseefi mankei. A paamisi Yehofa taki a o dini en neen a dopu.

11. San yeepi Vanessa fu meke bun mati? San a sani ya e leli u?

¹¹ Meke moiti fu abi bun mati. Vanessa di u be taki fi en na a bigin, be kon si taki a mati fi en be e tapu en fu dini Yehofa. Neen meke a fika a mati de. Ma a du moo. A du ala san a man fu meke nyun mati aini a kemeente. A taki a toli fu Nowa anga en osufamii yeepi en. Vannesa taki: „Den be e tan a sama ini di á be lobi Yehofa, neen meke anga denseefi den be e paa.” Baka di Vanessa dopu, a toon wan pionili. A taki: „A pionili wooko e yeepi mi fu meke mati aini a kemeente pe mi de anga taa kemeente.” Iseefi sa fende bun mati efi yu e du ala san i man aini a wooko di Yehofa gi u fu du.​—Mat. 24:14.

12. San Adan anga Efa á be abi gi Yehofa? San a be a bakapisi?

¹² I mu abi lesipeki gi Yehofa. Efu wi e lesipeki Yehofa u ná o go e du sani di a á lobi (Ps. 111:10). Efu Adan anga Efa be e lesipeki Yehofa, den á be o taangayesi en. Ma den ná aliki Yehofa. Di den du a sani ya, den kon fusutan taki den toon sondu sama. Den be fusutan tu taki ala den pikin di den be o  meke be o abi sondu, den be o go e dede tu. Di den kon fusutan taki den taangayesi Yehofa neen sen kisi den.​—Gen. 3:7, 21.

13-14. (a) Te u luku san sikiifi a 1 Peitilisi 3:21, da saide wi á mu e feele dede tumisi? (b) Saide u mu lobi Yehofa?

¹³ Wi á mu e feele dede tumisi. Yehofa seeka sani gi u fu man libi fu teego. Efu u meke wan fowtu, neen u soi taki a sani di u du e hati u, Yehofa o gi u paadon. A o gi u paadon fu di wi e biibi taki a dede fi en Manpikin o tyai wini gi u. Wan fu den moo bun fasi fa u sa soi taki wi e biibi Yehofa, a te u paamisi en taki wi o libi enke fa a wani, da u dopu.​—Leisi 1 Peitilisi 3:21.

¹⁴ A omen sani e yeepi u fu lobi Yehofa. Ai gi wi omen sani ala dei di e meke a libi switi gi u. Ai yeepi u tu fu kon sabi en anga den sani di a paamisi taki a o du gi u (Yoh. 8:31, 32). A gi wi a Kelesten kemeente di e yeepi u fu sabi fa u mu tyai useefi. Ai yeepi u fu holidoo te wi abi polobelema. A paamisi u tu taki u sa libi fu teego aini wan goontapu pe ala sani e waka bun (Ps. 68:19; Openb. 21:3, 4). Te wi e sidon pakisei ala den sani di Yehofa du gi u kaba fu soi taki a lobi u, wi o moo lobi en. Efu u lobi Yehofa anga u hii ati wi o lesipeki en. U ná o wani du sani di o hati en.

15. San yeepi Makayla fu a á booko en ede so moo?

¹⁵ Makayla di u be taki fi en na a bigin, á be e booko en ede so moo di a kon fusutan taki Yehofa a wan Gadu di e gi sama paadon. A taki: „Mi kon fusutan taki ala sama e meke fowtu fu di wi abi sondu. Mi kon fusutan tu taki Yehofa lobi u. Ai gi u paadon fu di Yesesi dede gi u.” Fu di Makayla kon lobi Yehofa meke a paamisi en taki a o libi enke fa a wani, neen a dopu.

16. San yeepi Miles fu a á meke tesi tapu en fu dopu?

¹⁶ Miles di be e feele taki en mma be o tapu en fu dopu, suku yeepi a wan kelen-owluman. Miles taki: „A kelen-owluman dda be e dini Yehofa, ma en mma á be de a waaleiti. A yeepi mi fu pakisei san mi sa taigi mma fu a si taki a miseefi wani dopu. A ná nda e dwengi mi fu dopu.” Miles mma ati boon di Miles taki anga en. Bakaten Miles be abi fu foloisi. Winsi fa den tesi ya be miti Miles, toku a á gi abaa. A taki: „Di mi kon sabi san Yehofa du gi mi, a doo mi ati. Di mi sidon pakisei a dede di a meke Yesesi dede gi u, mi kon fusutan taki ná pikin lobi Yehofa lobi mi. A sani ya yeepi mi fu paamisi  Yehofa taki mi o libi enke fa a wani, neen mi dopu.”

17. Sowtu okasi ala wi abi?

¹⁷ Di Efa nyan a sii fu a bon aini Eden, a soi taki a á wani en Dda taki gi en moo. Di Adan holibaka gi en, a soi taki a á be e teke den sani di Yehofa du gi en fu bigi. Ala wi abi a okasi fu soi taki u ná o waka a den baka. Te u dopu, wi e soi Yehofa taki wi e biibi taki neen abi a leti fu taki san bun anga san á bun. Wi e soi taki u lobi Yehofa. Wi e soi taki wi e fitoow en tu.

18. San o yeepi i fu dini Yehofa?

¹⁸ Baka te u dopu u mu meke moiti fu libi enke fa Yehofa wani ala dei. A sani de á makiliki. Ma a omen miliyun sama e libi enke fa Yehofa wani ala yali. Efi i wani du a sani ya, i mu e meke moiti fu fusutan a Beibel moo bun. I mu e kon makandaa anga den baala anga sisa. Boiti dati, i mu du ala san i man fu paati den sani di i leli fu Yehofa anga taawan (Heb. 10:24, 25). Fosi i du wan sani, luku san Yehofa taki aini en Wowtu. Luku san a olikanisâsi fi en taki tu (Yes. 30:21). Efi i du den sani ya, ala den sani di yu o du, o waka bun.​—Odo 16:3, 20.

19. San i mu e poti pakisei ala yuu? Saide u mu e poti pakisei na a sani ya?

¹⁹ Efi yu e poti pakisei a den wini di yu e fende fu di yu e wooko anga den leli fu Yehofa, yu o moo lobi Yehofa anga den weiti fi en. Da nawan sani di Saatan o du o man poli yu anga Yehofa. Pakisei fa i libi o de baka wan dunsu yali. Yu o si taki a dopu di i be dopu, a be a moo bun sani di i du aini i libi!