Son Leifisama di á be de pilisite be e du taa wooko. Son wan fu den be e wooko enke sikowtu aini a tempel. Na a sama di be e teke fesi aini a tempel be e taigi den san den mu du. Wan Dyu sikiifiman den be e kai Filo, be taki san a be a wooko fu den sikowtu ya. A taki: „Son wan fu den [Leifisama ya] be e de na a doomofu fu a tempel. Taawan be e de na a doomofu fu a santa peesi [aini a tempel], fu tapu den sama di á be abi a leti fu go aini. Son wan fu den sikowtu ya be e waka lontu a tempel fu holi wakiti. Son wan be e wooko a mamanten, taawan be e wooko a neti.”

A Gaan kuutu osu fu den Dyu be sa akisi den sikowtu ya fu yeepi den. A den Dyu di be e wooko enke sikowtu wawan den tiiman fu Rome be e gi piimisi fu abi fetisani.

A Beibel sabiman di den e kai Joachim Jeremias taki di den go fu kisi Yesesi, „a akisi den saide den á be kisi en senten di a be e gi leli aini a tempel (Mat. 26:55). Efu den sama di be kon fu kisi Yesesi á be e holi wakiti aini a tempel, Yesesi á be o akisi den a sani de”. A sabiman ya e biibi taki a den Leifisama di be e wooko enke sikowtu aini a tempel be wani kisi Yesesi wan pisiten a fesi tu (Yoh. 7:32, 45, 46). Bakaten a sama di e teke fesi aini a tempel anga wantu sikowtu be tyai den disipel fu Yesesi kon na a Gaan kuutu osu fu den Dyu. A gei enke a denseefi man ya be hali Pawlesi puu aini a tempel.​—Toli 4:1-3; 5:17-27; 21:27-30.