1. San wan sama mu du fosi a bigin meke wan osu?

MEKE u taki wan sama wani meke wan osu. A sama sabi kaba sowtu osu a wani meke. Dati wani taki a mu bigin bai sani wantenwanten da a bigin bow? Nono. A mu du wan pelensipali sani fosi a bigin meke a osu. A mu pakisei luku omen moni a o abi fanowdu fu kaba meke a osu. Saide a mu du a sani ya? Bika a mu sabi efu a moni di a abi sai fu kaba meke a osu. Efu a teke ten teli ala den kosutu fosi a bigin, a o man kaba meke a osu fi en na a yuu di a poti.

2. Enke fa Lukasi 14:27-30 e soi, da fu sowtu sani i mu denki bun fosi i dopu?

² A di i lobi Yehofa anga i hii ati meke i wani dopu? Efu a so, da leti enke wan sama di wani meke wan osu, iseefi mu sidon luku fosi efi yu o man tyai a faantiwowtu ya. Saide? Luku san Yesesi be taki a Lukasi 14:27-30. (Leisi en.) Yesesi be e taigi den sama di e aliki en san a wani taki fu de wan bakaman fi en. A be taki efu wan sama wani de wan bakaman fi en, a be mu de kabakaba fu nyan pina fi en ede (Luk. 9:23-26; 12:51-53). Neen meke fosi i dopu, i mu sidon denki luku fa i libi o de di yu o toon wan bakaman fu Yesesi. Efi i du a sani ya, a o moo makiliki gi i fu tan dini Yehofa anga i hii ati baka te i dopu.

3. San wi o luku aini a artikel ya?

³ A abi wini te i toon wan bakaman fu Kelestesi? Eeye! Te wan sama dopu, a omen belesi ai fende aini a ten ya. Ma aini a ten di e kon, a o fende moo belesi. Meke u  luku wantu pelensipali akisi di abi fu du anga dopu. Den akisi ya o yeepi i fu sabi efi i kaba fu dopu.

4. (a) San a wani taki fu paamisi Yehofa taki yu o libi enke fa a wani? (b) Enke fa Mateyesi 16:24 e soi, da san a wani taki fu ná „teli” iseefi moo?

⁴ San a wani taki fu paamisi Yehofa taki yu o libi enke fa a wani? Fosi wan sama dopu, a mu paamisi Yehofa aini begi taki a o dini en fu teego. Te i paamisi Yehofa a sani ya, i nai „teli” iseefi moo. (Leisi Mateyesi 16:24.) Dati wani taki yu a fu Yehofa. Moo so moin gaandi á de (Rom. 14:8). I paamisi Yehofa taki fanafu a dei de, i ná o du sani moo enke fa iseefi wani, ma enke fa a wani. Te i paamisi Yehofa taki yu o dini en, a wan sweli i meke. Yehofa nai dwengi nawan sama fu du a sani ya. Ma te i paamisi en kaba taki yu o dini en, a wani i du san i paamisi.​—Ps. 116:12, 14.

5. Te wan sama paamisi Yehofa taki a o libi enke fa a wani, anga te a dopu na aseefi sani?

⁵ Te wan sama paamisi Yehofa taki a o libi enke fa a wani, anga te a dopu na aseefi sani? Te i paamisi Yehofa taki yu o libi enke fa a wani, taa sama nai sabi. Ma te i dopu a wan konkelesi efuso kelen-komakandaa na a ala sama e si. Te i dopu, yu e soi taa sama taki i paamisi Yehofa taki yu o dini en. * A dopu di yu e dopu, a fu soi taawan taki i lobi Yehofa anga i hii ati, i hii libi, i hii fusutan, anga ala i kaakiti. Yu e soi tu taki noiti yu o gwe fika Yehofa.​—Malik. 12:30.

6-7. Enke fa 1 Peitilisi 3:18-22 e soi, da saide u mu dopu?

⁶ A de fanowdu fu dopu? Luku san sikiifi a 1 Peitilisi 3:18-22. (Leisi en.) Leti enke fa a ark fu Nowa be e soi taki a be e biibi, a letiso a dopu di yu o dopu o soi sama taki i paamisi Yehofa taki yu o dini en. Ma a namonamo wan sama mu dopu? Eeye. Peitilisi e taigi u saide a sani ya pelensipali. A fosi sani, a fu di a dopu e „fii sama”. Wi o fii te wi e biibi taki Yesesi dede gi u, neen Gadu weki en baka. U mu e biibi tu taki nownow a de a hemel a „Gadu leti-ana”.

⁷ Du fu tu sani saide u mu dopu, a fu di dopu e yeepi u fu „abi wan kiin kosensi”. Te u paamisi Yehofa taki wi o dini en, da u dopu, wi anga en e toon mati. Gadu e gi u paadon fu den sondu fu u, te wi e soi taki den sani di u be e du e hati u, da u meke moiti fu wi á du den moo. A sani ya e meke wi abi wan kiin kosensi.

8. San mu de a moo pelensipali sani di mu meke i wani dopu?

⁸ San mu de a moo pelensipali sani di mu meke i wani dopu? A sutudeli di yu e sutudeli Beibel yeepi i fu kon sabi fa Yehofa de tuutuu, san a lobi, anga san a á lobi. Den sani di i leli fu Yehofa meke i kon lobi en anga i hii ati. A lobi di i lobi Yehofa, mu de a moo pelensipali sani di mu meke i wani dopu.

9. Enke fa Mateyesi 28:19, 20 e soi, da san a wani taki fu dopu aini a nen fu a Dda, a Manpikin anga a santa yeye?

⁹ Wan taa sani di o meke i wani dopu, a den sani di yu e leli aini Beibel. Te i kon si taki den sani ya a tuu, yu o bigin biibi den. Pakisei san Yesesi be  taki di a be taigi den bakaman fi en fu yeepi taa sama fu toon en bakaman. (Leisi Mateyesi 28:19, 20.) Yesesi be taki den sama di e dopu, mu dopu „aini a nen fu a Dda, a Manpikin anga a santa yeye”. San a sani ya wani taki? Dati wani taki i mu e biibi den sani di Beibel e taki fu Yehofa, Yesesi anga a santa yeye anga i hii ati. Den sani di wi e leli aini Beibel sa yeepi u fu kengi u libi (Heb. 4:12). Meke u luku wantu fu den leli di u sa fende aini Beibel.

10-11. San i leli fu u Dda di de a hemel?

¹⁰ Pakisei den sani di i sabi kaba fu u Dda a hemel. I leli taki en nen a „Yehofa”, neen na a „Moo Gaan Gadu”. I leli tu taki neen „wawan na a tuu Gadu” (Ps. 83:18; Yes. 37:16). A Yehofa meke ala sani, neen e „fii sama” (Ps. 3:8; 36:9). Yehofa seeka sani fu fii wi fu sondu anga dede. A paamisi u tu taki wi o libi fu teego aini a ten di e kon (Yoh. 17:3). Te i paamisi Yehofa taki yu o dini en, neen i dopu, yu e soi taki yu a wan Kotoigi fi en (Yes. 43:10-12). Yu o kon aini a gaan osufamii fi en di de a hii goontapu. Yu anga den baala anga sisa fi yu e piisii taki wi e tyai a gaan nen fu Yehofa, neen meke wi e soi ala sama taki a sani ya e bigi gi u.​—Ps. 86:12.

¹¹ Ai bigi gi u taki wi e fusutan den sani di Beibel e taki fu u Dda di de a hemel. Te yu e biibi den sani di yu e leli, yu o wani paamisi Yehofa taki yu o dini en wawan, da i dopu.

12-13. San i leli fu Yesesi?

¹² Fa yu e fii te i pakisei den sani di i leli fu a Manpikin? Baka Yehofa, a Yesesi na a moo pelensipali sama a hemel anga goontapu. Yesesi be de kabakaba fu kon dede gi u fu fii wi fu sondu anga dede. Efu wi e biibi a sani ya, wi o kisi paadon fu u sondu, wi o toon Gadu mati, wi o libi fu teego aini a ten di e kon tu (Yoh 3:16). Yesesi a u Gaan Pilisite. A wani yeepi u fu fende wini fu a dede di a kon dede gi u, anga fu toon Gadu mati (Heb. 4:15; 7:24, 25). A Yesesi na a Kownu fu Gadu Kownukondee, neen meke neen o santa a nen fu Yehofa. A Yesesi o puu ogii a goontapu. Yehofa o meke Yesesi seeka a goontapu te enke a toon wan paladeisi (Mat. 6:9, 10; Openb. 11:15). A Yesesi baka u mu waka (1 Peit. 2:21). Te u luku fa Yesesi be e libi di a be de a goontapu, wi e si fa en Dda wani u libi.​—Yoh. 4:34.

¹³ Efi yu e biibi den sani di yu e leli aini Beibel fu Yesesi yu o kon lobi en. A sani ya o meke i wani du sani leti enke en. Te fu kaba, yu o wani paamisi Yehofa taki yu o dini en, da i dopu.

14-15. San i leli fu a santa yeye?

¹⁴ Fa i fende den sani di i leli fu a santa yeye? I leli taki a santa yeye a ná wan sama, ma na a kaakiti fu Gadu. Na a santa yeye Yehofa koboloiki fu meke sama sikiifi Beibel, anga fu yeepi u fu fusutan den leli fu Beibel. A santa yeye e yeepi u tu wooko anga den leli ya (Yoh. 14:26; 2 Peit. 1:21). Yehofa e koboloiki en santa yeye fu gi u „kaakiti di bigi pasa maiki” (2 Kor. 4:7). A santa yeye e gi u kaakiti fu peleiki, anga fu pasa den tesi di e miti u. Ai yeepi u fu holidoo te wi e fii booko-saka. Boiti dati, ai yeepi u fu abi den manii di  sikiifi a Galasiyasama 5:22, 23. Efu wi e biibi Gadu, a o gi wi en santa yeye solanga wi akisi en.​—Luk. 11:13.

¹⁵ A sabi di u sabi taki a santa yeye e yeepi u fu dini Yehofa anga u hii ati e gi u taanga-sikin. Te yu e biibi den sani di i leli fu a santa yeye, yu o wani paamisi Yehofa taki yu o dini en, da i dopu.

16. San u leli te enke now?

¹⁶ A paamisi di yu o paamisi Yehofa taki yu o dini en, a wan gaan sani. Enke fa u luku kaba, da i mu holi a pakisei taki te i dopu tesi o miti i, yu o abi fu fika son sani di be e gwenti tu. Ma den belesi di yu o fende ipi moo den sani di o miti i. Dopu e fii sama, ai yeepi u tu fu abi wan kiin kosensi. A moo pelensipali sani di mu meke i wani dopu, na a lobi di i lobi Yehofa. I mu e biibi den sani di i leli aini Beibel fu a Dda, a Manpikin, anga a santa yeye tu. Te i luku ala den sani di u leli aini den paragraaf ya, da fa i be o piki a akisi ya: „Mi kaba fu dopu?”

17. San a wantu sani di wan sama mu du fosi a dopu?

¹⁷ Efi i si enke i kaba fu dopu, da dati wani taki i du wantu pelensipali sani kaba fu toon wan mati fu Yehofa. * A sutudeli di yu e sutudeli Beibel ala yuu yeepi i fu kon sabi Yehofa anga Yesesi moo bun. Yu e biibi den sani di yu e leli tu (Heb. 11:6). Yu e biibi ala den sani di Yehofa paamisi wi aini Beibel. Yu e biibi tu taki a dede fu Yesesi sa fii u fu sondu anga dede. Ai hati i taki i be e du sani di Yehofa e buuse, neen meke i akisi Yehofa fu a gi i paadon fu den sani ya. Boiti dati, i nai du den sani ya moo. I daai i libi, neen i bigin du sani di e meke Yehofa piisii (Toli 3:19). I lobi taigi taa sama den sani di yu e biibi. I doo den maiki fu toon wan peleikiman di á dopu ete, neen i bigin go aini a peleikiwooko makandaa anga a kemeente (Mat. 24:14). Den sani di i du ya meke Yehofa piisii.​—Odo 27:11.

18. San a wantu taa sani di i mu du fosi i sa dopu?

¹⁸ Fosi i dopu, i mu du ete wantu taa sani. Enke fa u be luku kaba, da i mu gi iseefi abaa a Gadu. Begi en te i wawan de, da i taigi en ala san de a yu ati, paamisi en taki yu o dini en solanga i de a libi (1 Peit. 4:2). Baka dati da i taigi a fesiman fu den owluman aini a kemeente pe i de taki i wani dopu. A fesiman fu den owluman o akisi wantu owluman aini a kemeente fu taki anga i. I ná abi fu feele te den baala ya e taki anga i, bika den lobi i. Den o luku den moo pelensipali leli fu Beibel anga i, bika  den wani sabi efi i fusutan taki a dopu di yu o dopu a wan pelensipali sani di o kengi i hii libi. Te den si taki i fusutan den sani ya, da den o piki i taki i sa dopu na a taa gaan komakandaa di e kon.

19-20. San i mu du baka te i dopu? Fa yu o du a sani ya?

¹⁹ San i mu du baka te i dopu? * Ná feegete taki a wan sweli i meke di i paamisi Yehofa taki yu o dini en. I mu du san i paamisi. Fa yu o du a sani ya?

²⁰ Tan koosube fu a olikanisâsi. Te i dopu yu e kon aini wan gaan olikanisâsi pe ala sama e si denseefi enke baala (1 Peit. 2:17). Den baala anga sisa aini a kemeente de enke i famii. Te yu e go a den komakandaa ala yuu, yu e kon sabi den moo bun. I mu e leisi a Wowtu fu Gadu ala dei, da i teke ten pakisei san i leisi (Ps. 1:1, 2). Te yu e teke ten pakisei den sani di i leisi aini Beibel, den o doo yu ati. I mu e „begi naamo” (Mat. 26:41). Te yu e begi Yehofa anga i hii ati, yu o kon moo koosube neen. I „mu tan poti a Kownukondee fu Gadu” a fesi tu (Mat. 6:33). Efi i wani du a sani ya, i mu e si a peleikiwooko enke wan pelensipali sani. Te yu e peleiki ala yuu, i biibi o taanga. Yu o yeepi taawan fu kon sabi Yehofa. A sani ya o meke denseefi abi a howpu fu libi fu teego.​—1 Tim. 4:16.

21. Sowtu wini yu o fende te i dopu?

²¹ A paamisi di i paamisi Yehofa taki yu o dini en, da i dopu, na a moo pelensipali sani di yu o du aini i libi. A tuu taki yu o abi fu fika son sani, ma den wini di yu o fende ipi dyow moo den sani di yu o lasi. Iniiwan tesi di e miti i nownow a fu wan pisiten namo, den ná ibi tu (2 Kor. 4:17). Ma a dopu di yu o dopu o meke i de koloku aini a ten ya, anga a ten di e kon te wi o fende a „tuutuu libi” (1 Tim. 6:19). Gaantangi, denki bun fosi i du a sani ya. Begi Yehofa tu fu a yeepi i fu piki a akisi ya: „Mi kaba fu dopu?”