1. San Yesesi taigi den bakaman fi en a neti fosi a dede? (Luku a fowtow a fesise fu A Wakititolen.)

A NETI fosi Yesesi dede, a taigi den bakaman fi en taki: „U mu lobi useefi. Leti enke fa mi lobi u, a so u mu lobi useefi.” A taigi den tu taki: „A so ala sama o sabi taki wi a mi bakaman, te u lobi useefi.”​—Yoh. 13:34, 35.

2. Saide u mu lobi useefi?

² Yesesi be taki a te den bakaman fi en be o lobi denseefi enke fa a lobi den, da sama be o si kiin taki den a tuu Kelesten. I be man si a sani ya kiin na a ten fu den apostel. Neen meke u mu meke moiti fu lobi useefi, winsi a á makiliki.

3. San wi o luku aini a artikel ya?

³ Fu di wi a sondu sama, meke a ná ala yuu a makiliki fu lobi taawan anga u hii ati. Ma winsi a sani ya á makiliki, toku u mu meke moiti fu waka a Kelestesi baka. Aini a artikel ya, wi o luku fa lobi o yeepi u fu meke en bun anga taawan. Wi o luku tu fa lobi o yeepi u fu wi á paati bee, anga fa a o yeepi u fu e kai taawan kon a wi osu. Te wi e luku a artikel ya, akisi iseefi taki: ’San mi sa leli fu baala anga sisa di tan soi lobi winsi a á be makiliki?’

4. Enke fa Mateyesi 5:23, 24 e soi, da saide u mu meke en bun anga u baala efuso sisa te den du wan sani anga u?

⁴ Yesesi soi u taki a pelensipali fu meke en bun anga u baala efuso sisa te den du wan hati sani anga u. (Leisi Mateyesi 5:23, 24.) Efu u wani Gadu lobi u, u mu e libi  bun anga taawan. Yehofa e piisii te ai si taki wi e meke moiti fu libi bun anga u baala anga sisa. Efu wi e holi taawan na ati, a fu soso wi o meke moiti fu dini en.​—1 Yoh. 4:20.

5. San be meke a taanga gi Mark fu meke en bun anga wan baala?

⁵ A ná ala yuu a makiliki fu meke en bun anga taawan. Saide? Meke u luku san be miti wan baala den e kai Mark. * Wan baala kuutu en sosokaali. Baka dati neen a baala go taigi den taa baala anga sisa soso ogii fi en. San Mark du? Mark taki: „Mi ligei anga en, bika mi ati be boon.” Bakaten a hati Mark taki a ligei anga a baala, neen meke a go akisi en paadon. A be wani meke en bun anga a baala, ma a baala á be wani. Biginbigin Mark pakisei taki: ’Efu a á wani meke en bun anga mi, da saide mi mu e lon neen baka?’ Ma a kelen-owluman gi en taanga-sikin fu a á gi abaa. San Mark du?

6. (a) San Mark du fu meke en bun anga a baala? (b) Fa Mark du san sikiifi a Kolosesama 3:13, 14?

⁶ Bakaten Mark go ondoosuku enseefi luku, neen a fusutan taki a be mu soi sakafasi. Son leisi a be e si enke a bun moo taawan. A be kon si taki a be mu kengi a fasi fa a be e denki (Kol. 3:8, 9, 12). A go na a baala ya baka fu akisi en paadon fu a fasi fa a be tyai enseefi. Mark sikiifi wantu biifi gi a baala tu, fu soi en taki a be hati en taki a taki goofu anga en. A akisi a baala efu den be sa toon mati baka. Mark tyai kado gi a baala tu di a be si enke a be o lobi. Ma a tyali taki a baala be holi en na ati ete. Toku Mark tan soi lobi gi a baala, a gi en paadon tu enke fa Yesesi be taki. (Leisi Kolosesama 3:13, 14.) Efu u  meke moiti neen wan baala efuso sisa á wani meke en bun anga u, da a lobi di u lobi en o yeepi u fu gi en paadon. A sani ya o yeepi u tu fu begi Yehofa fu a yeepi u fu u sa meke en bun baka.​—Mat. 18:21, 22; Gal. 6:9.

7. (a) San Yesesi gi u taanga-sikin fu du? (b) San be miti wan sisa?

⁷ Yesesi be taki a fa u wani taawan libi anga u, a so u mu libi anga den tu. A taki a na den sama di lobi u wawan u mu lobi (Luk. 6:31-33). San i be o du efu wan baala efuso sisa á wani taki anga yu a komakandaa? A sani ya nai pasa makiliki, ma a be miti wan sisa den e kai Lara. A taki: „Wan sisa á be wani taki anga mi, ma mi á be sabi fu saide. Mi be e booko mi ede te, mi á be e wani go a komakandaa.” Biginbigin Lara be e pakisei taki: ’Mi á du sani anga en. Boiti dati, den taa baala anga sisa seefi nai kaba fusutan a sisa ya.’

8. San Lara du fu meke en bun anga a sisa? San a toli fi en e leli u?

⁸ Lara meke moiti fu meke en bun anga a sisa. A begi Yehofa, neen a go taki anga a sisa. Di den kaba taki den baasa, neen den meke en bun. A be gei enke a sani be kaba. Lara taki: „Ma bakaten, a sisa du aseefi sani baka. A sani ya be meke mi fii booko-saka.” Biginbigin Lara be e si enke a te a taa sisa be o kengi en manii fosi a be o man piisii. Ma bakaten, Lara kon fusutan taki a moo bun sani di a be sa du, a fu tan soi switifasi gi a sisa anga fu gi en paadon anga en hii ati (Efe. 4:32–5:2). Lara be e holi a pakisei taki tuutuu lobi „nai holi taawan na ati. A abi boo anga ala sani. Ai biibi ala sani, ai howpu ala sani, ai holidoo winsi san e pasa” (1 Kor. 13:5, 7). A sani ya yeepi Lara fu a á booko en ede moo. Efi yu e meke moiti fu meke en bun anga i baala anga sisa,  neen yu e tan soi den taki i lobi den, i sa biibi taki ’a Gadu fu lobi anga freide o de anga i’.​—2 Kor. 13:11.

9. Enke fa Toli 10:34, 35 e soi, da saide wi á mu e paati bee?

⁹ Yehofa nai paati bee. (Leisi Toli 10:34, 35.) Te u nai paati bee, wi e soi taki Yehofa a u Dda. Te u lobi taawan enke fa u lobi useefi, anga te wi e meke moiti fu libi bun anga u baala anga sisa, wi e soi taki wi e aliki Yehofa.​—Rom. 12:9, 10; Yak. 2:8, 9.

10-11. San yeepi wan sisa fu kengi a fasi fa a be e denki?

¹⁰ A moo taanga gi son sama fu lobi ala sama. Meke u luku san be miti wan sisa den e kai Ruth. Di a be yonkuu, wan sama fu wan taa kondee be du wan hati sani anga en. Sowtu bakapisi a sani ya be abi? Ruth taki: „Mi á be e wani yee sani fu a kondee de. Mi be e si enke na ala den sama fu a kondee de be tan so, winsi den a be Kotoigi.” San yeepi Ruth fu kengi a fasi fa a be e denki?

¹¹ Ruth be fusutan taki a be mu meke moiti kengi a fasi fa a be e denki. A bigin leisi ondoofenitoli fu a kondee ya aini a Jaarboek. A taki: „Mi be e meke taanga moiti fu denki bun fu den sama ya. Mi be kon si taki den baala anga sisa fu a kondee de e dini Yehofa fayafaya. Mi be kon fusutan taki den a be mi baala anga sisa tu.” Ruth fusutan taki a be mu du moo. A taki: „Te mi miti baala anga sisa fu a kondee de, mi e meke moo moiti fu soi switifasi gi den. Mi e gi toli anga den fu sabi den moo bun.” San a be a bakapisi? Ruth taki: „Bakaten mi á be e denki ogii fu sama fu a kondee de moo.”

12. Sowtu polobelema wan sisa den e kai Sarah be abi?

¹² Son sama e paati bee sondee fu den sabi. Wan sisa den e kai Sarah, be denki taki a nai paati bee, bika a á be e kuutu sama fu di den de fu wan taa nasi, fu di den pooti, fu di den abi son posisi efuso fu di den abi son faantiwowtu aini a olikanisâsi. Ma a taki: „Ma mi be kon fusutan taki mi be e paati bee.” Fa a be e paati bee? Den sama fu Sarah a sikoo sama. Neen meke anga soso sama di be go a bunbun sikoo a be e paa. Wan leisi a taigi wan mati fi en taki: „Anga Kotoigi di go a bunbun sikoo mi e paa. Mi á poi paa anga den wan di á go a hei sikoo.” A sani ya e soi kiin taki Sarah be mu kengi en manii. Ma fa a be o du a sani ya?

13. San a kengi di Sarah kengi a fasi fa a be e denki e leli u?

¹³ A wan kelen-owluman yeepi Sarah fu kengi a fasi fa a be e denki. Sarah taki: „A gafa mi fu di mi e dini Yehofa fayafaya, fu den piki di mi e gi, anga a fasi fa mi e fusutan den leli fu Beibel. Baka dati a soi mi taki moo wi e fusutan den leli fu Beibel moo u mu e meke moiti fu abi sakafasi, anga tyali-ati.” Sarah wooko anga den sani di a kelen-owluman taigi en. A taki: „Mi kon fusutan taki a moo pelensipali sani, a fu lobi taawan.” A sani ya meke a bigin denki taa fasi fu den baala anga sisa fi en. Sarah taki: „Mi meke moiti fu si den bun manii fu den di meke Yehofa lobi den.” Fa a de anga yu? Wi á mu e si enke u bun moo taawan fu di u go a hei  sikoo. Efu u „lobi ala den baala fu u”, u ná o paati bee.​—1 Peit. 2:17.

14. Enke fa Hebrewsama 13:16 e soi, da fa Yehofa e fii te wi e kai taawan kon a wi osu?

¹⁴ Yehofa lobi te wi e kai sama kon a wi osu. (Leisi Hebrewsama 13:16.) Yehofa wani u yeepi taawan, moomoo den pootiman (Yak. 1:27; 2:14-17). Neen meke Beibel taki „u mu abi a gwenti fu bali wadaa gi taawan” (Rom. 12:13). Te wi e kai taawan kon a wi osu, wi e soi den taki wi e booko wi ede anga den, taki u lobi den, anga taki u wani toon den mati. Yehofa e piisii te wi e paati san wi abi anga taawan, winsi a wan sani fu diingi, wan sani fu kawkaw, efuso wan pikin alisi. Ai piisii tu te wi e meke ten fu de makandaa anga u baala anga sisa (1 Peit. 4:8-10). Ma a ná ala yuu a makiliki fu soi switifasi gi taawan.

15-16. (a) Saide son sama nai wani kai taawan kon a den osu? (b) San yeepi Edit fu lobi kai sama kon neen osu?

¹⁵ Son leisi wi e daaidaai fu kai sama kon a wi osu fu di wi e booko wi ede anga son sani. Meke u luku a toli fu wan sisa den e kai Edit di man dede kaba. Fosi a toon Kotoigi, a á be gwenti mumui sama. Edit be e si enke a den sama di be abi en moo bun be mu kai sama kon a den osu.

¹⁶ Di Edit toon wan Kotoigi, a kengi a fasi fa a be e denki. A meke moiti fu kai sama kon neen osu. A taki: „Di den be e meke a nyun Kownukondee zaal fu u, wan owluman akisi mi efu wan toowpaa di be o kon yeepi anga a wooko be sa tan tu wiki anga mi. A sani ya meke mi pakisei fa Yehofa be belesi a uman fu Sarfat di man be dede kaba (1 Kow. 17:12-16). Edit meke a toowpaa tan anga en. A fende wini? A taki: „A ná tu wiki  namo den tan, ma a tu mun. Den pisiten di den tan a mi osu, mi anga den toon bun mati.” Edit meke mati aini a kemeente tu. Nownow ai du a pioniliwooko. Den baala anga sisa di e wooko anga en aini a peleikiwooko lobi go luku en a osu. A taki: „Mi e fii bun te mi e gi sama sani. A omen belesi mi e fende tu.”​—Heb. 13:1, 2.

17. San Lukasi anga en uman be kon si?

¹⁷ Kande u gwenti kai sama kon a wi osu kaba. Ma i si enke i sa du a sani ya moo bun? Luku a toli fu Lukasi anga en uman. Den be lobi kai sama kon a den osu, ma a den mma anga den dda, den famii, mati anga a kelen-owluman anga en uman wawan den be e kai kon a den osu. Lukasi taki: „U be kon si taki a den sama di u be sabi bun namo u be e kai kon a wi osu.” San yeepi Lukasi anga en uman fu kai taa sama kon a den osu?

18. San yeepi Lukasi anga en uman fu kai taa sama kon a den osu?

¹⁸ Lukasi anga en uman be man kengi a fasi fa den be e denki di den teke ten pakisei den sani di Yesesi be taki. A be taki: „Efu a den sama di lobi u wawan u lobi, da san u taki wi e du?” (Mat. 5:45-47) Den kon fusutan taki den mu waka a Yehofa baka, bika Yehofa e du bun gi ala sama. Neen meke den bigin kai sama kon a den osu di den á be kai noiti ete. Lukasi taki: „Ná pikin switi ai switi gi u te u kai nyun sama kon a wi osu. Wi e leli sabi den moo bun. Wi e gi useefi taanga-sikin tu.”

19. Fa wi e soi taki wi a tuutuu bakaman fu Yesesi? San i de kabakaba fu du?

¹⁹ U leli taki te u lobi taawan anga u hii ati, wi o meke en bun anga den te wi abi toobi, u ná o go e paati bee. Boiti dati, wi o abi a gwenti fu e kai sama kon a wi osu. Efu u wani lobi u baala anga sisa anga u hii ati, wi á mu e denki ogii fu den. A sani ya o meke u de koloku. Wi o soi tu taki wi a Yesesi bakaman tuutuu.​—Yoh. 13:17, 35.