1-2. Enke fa Toli 8:27-31, 35-38 e soi, da saide a heiheiman fu Etiyopiya be wani dopu?

I WANI dopu enke wan bakaman fu Yesesi? A omen sama dopu fu di den lobi Yehofa, den e teke den sani di a du gi den fu bigi tu. Meke u luku a toli fu wan heiheiman di be e wooko gi a umankownu fu Etiyopiya.

² Di a Etiyopiyaman fusutan taki a mu dopu, a á daaidaai fu dopu. (Leisi Toli 8:27-31, 35-38.) San meke a be de kabakaba fu dopu? A man ya be lobi a Wowtu fu Gadu. Di a be komoto a Yelusalem e go a Etiyopiya a be e leisi wan pisi fu a bukulolo fu Yesaya. Di Filipesi taki anga en, a be fusutan taki a wan gaan sani Yesesi be du gi en. Ma saide a man ya be go a Yelusalem? A di a be lobi Yehofa meke a be du a sani ya. Fa u du sabi? A dini a be go dini Yehofa a Yelusalem. A man ya be fika den sani di den sama fi en be e biibi, neen a bigin dini a tuu Gadu makandaa anga a foluku fu Yehofa. Fu di a man ya be lobi Yehofa, meke a du ete wan pelensipali sani. A dopu, neen a toon wan bakaman fu Kelestesi.​—Mat. 28:19.

3. San a wantu sani di sa tapu wan sama fu dopu? (Luku a faki: „ San de aini yu ati?”)

³ Te i lobi Yehofa, a sani ya sa meke i wani dopu. Ma lobi sa tapu i fu dopu tu. Saide u sa taki a sani ya? Kande yu e feele taki den famii anga den mati fi i ati o  boon a yu te i dopu (Mat. 10:37). Kande ai taanga gi i fu fika son sani di i lobi, winsi fa i sabi taki Yehofa e buuse den (Ps. 97:10). Efuso kande i be gwenti fii fesa di abi fu du anga falisi biibi. Kande yu e pakisei fa yu anga den famii fi i be e piisii a den fesa ya. Den sani ya sa meke a taanga gi i fu fika sani di Yehofa e buuse (1 Kor. 10:20, 21). Neen meke i mu akisi iseefi taki: „San, efuso sama mi moo lobi?”

4. San na a moo pelensipali sani di o meke wan sama wani dopu?

⁴ Kande fosi i bigin sutudeli anga Yehofa Kotoigi, i be e si a Beibel enke wan pelensipali buku kaba. Kande i be lobi Yesesi tu. Kande i lobi de makandaa anga den Kotoigi. Ala den sani ya a bun sani. Ma winsi i lobi den sani ya, toku a moo pelensipali sani di mu meke i wani dopu, na a lobi di i lobi Yehofa. Efi i lobi Yehofa moo ala den sani ya, i ná o meke nawan sani, efuso sama tapu i fu dini en. Te i lobi Yehofa, a sani ya o meke i wani dopu, ma a o yeepi i tu fu dini en anga i hii ati baka te i dopu.

5. San wi o luku aini a artikel ya?

⁵ Yesesi be taki u mu lobi Yehofa anga u hii ati, u hii libi, u hii fusutan, anga ala u kaakiti (Malik. 12:30). San o yeepi u fu lobi Yehofa enke fa Yesesi taki? Efu wi e teke ten pakisei fa Yehofa lobi u, a sani ya o meke useefi lobi en (1 Yoh. 4:19). A artikel ya o soi u san u mu du fu lobi Yehofa fu u sa dopu.

6. Enke fa Romesama 1:20 e soi, da san a wan fasi fa u sa kon sabi Yehofa?

⁶ Te yu e luku den sani di Gadu meke, yu o kon sabi sowtu manii a abi. (Leisi Romesama 1:20; Openb. 4:11). Te wi e teke ten pakisei den meti anga bon di Yehofa meke, wi e si taki ná pikin koni a koni. Poti pakisei na a foondoo fasi fa i sikin meke (Ps. 139:14). Te u luku a san, wi e si taki na pikin kaakiti Yehofa abi. Boiti a san, a omen miliyun sitali de ete (Yes. 40:26). * Te yu e luku den sani ya, yu o moo lesipeki Yehofa, a Sama di meke den. A bun fu sabi taki Yehofa abi makiti anga koni. Ma efu u wani wi anga en toon mati, u mu kon sabi en moo bun.

7. San i mu biibi fosi yu o man lobi Yehofa anga i hii ati?

⁷ Yehofa lobi i, ai booko en ede anga i. Ai taanga gi i fu biibi taki a Sama di meke hemel anga goontapu e booko en ede anga i? Efu a so yu e fii, da holi a pakisei taki Yehofa „á de faawe fu u” (Toli 17:26-28). David be taigi Salomo taki „Yehofa e ondoosuku ala sama ati”. A be taigi en tu taki efi yu „e suku en, a o meke i fende en” (1 Kolon. 28:9). A di Yehofa ’hali i kon neen’, meke yu e sutudeli Beibel nownow (Yel. 31:3). Moo yu e leli fu den sani di Yehofa du gi i, o moo yu o lobi en.

8. Fa i sa soi taki i lobi Yehofa?

⁸ Wan fasi fa u sa soi taki u lobi Yehofa, a te wi e taki anga en. Te yu e taigi  Yehofa san a den booko-ede fi i, anga te yu e gi en daa fu den sani di ai du gi i, yu o moo lobi en. O moo yu e si fa Yehofa e aliki den begi fi i, o moo yu anga en o toon mati (Ps. 116:1). Yu o kon si taki Yehofa e fusutan fa yu e fii. Ma efi i wani yu anga en toon mati, i mu sabi san a lobi, anga san a á lobi. A wan kodo fasi fa i sa kon sabi san Yehofa lobi anga san a á lobi, a te yu e sutudeli en Wowtu Beibel.

9. Fa i sa soi taki i lobi a Beibel?

⁹ I mu teke en fu bigi taki Gadu gi wi a Beibel. Efi i wani sabi san Yehofa abi a pakisei gi i, i mu sutudeli a Beibel. Na a Beibel wawan man yeepi u fu sabi fa Yehofa de tuutuu, anga san a o du gi u. Wan fasi fa i sa soi taki ai bigi gi i taki Yehofa gi wi a Beibel, a te yu e leisi en ala dei, te yu e seeka bun fosi den kon sutudeli anga i, anga te yu e du den san di i leli (Ps. 119:97, 99; Yoh. 17:17). Yu e leisi Beibel ala dei?

10. San a wan moin sani fu a Beibel?

¹⁰ Wan fu den moin sani fu a Beibel, a taki den sama di sikiifi fu a libi fu Yesesi si omen fu den sani di a be du di a be de a goontapu. Neen meke i sa biibi den sani di Beibel e taki fu Yesesi. Te i kon sabi san Yesesi du anga san a taki, yu o wani toon en mati.

11. San o yeepi i fu lobi Yehofa?

¹¹ I mu lobi Yesesi. Efi i lobi Yesesi, yu o moo lobi Yehofa. Saide? Bika Yesesi abi denseefi manii fi en Dda (Yoh. 14:9). Neen meke, o moo yu e leli sani fu Yesesi, o moo yu o sabi fa Yehofa de tuutuu. Yu o moo lobi Yehofa tu. Pakisei fa Yesesi be e booko en ede anga den sama di taawan be e si fu wisiwasiman fu di den be pooti, siki, efuso swaki. Pakisei den wini di yu e fende tu te yu e wooko anga den sani di Yesesi be e leli sama.​—Mat. 5:1-11; 7:24-27.

12. Te i kon sabi Yesesi moo bun, san yu o wani du?

 ¹² Te yu e teke ten pakisei a sani di Yesesi du gi u fu u sa fende paadon fu sondu, yu o moo lobi en (Mat. 20:28). Te i holi a pakisei taki Yesesi be de kabakaba fu dede gi i, a sani ya sa yeepi i fu fika den sani di i be e du fu kon dini Yehofa (Toli 3:19, 20; 1 Yoh. 1:9). Te i lobi Yehofa anga Yesesi, yu o wani de makandaa anga sama di lobi den tu.

13. San Yehofa e gi den sama di e dini en?

¹³ Lobi den sama di lobi Yehofa. Kande den famii anga mati fi i di nai dini Yehofa, nai kaba fusutan saide i wani dini en. Son leisi den o du sani fu tapu i fu dini en. Ma Yehofa o yeepi i. A o gi i baala anga sisa di de enke famii. Efi yu e de makandaa anga den baala anga sisa ya, yu o fende a lobi anga a taanga-sikin di yu abi fanowdu fu holidoo (Malik. 10:29, 30; Heb. 10:24, 25). Bakaten kande den famii fi i sa kon dini Yehofa makandii anga i.​—1 Peit. 2:12.

14. Enke fa 1 Yohanisi 5:3 e soi, da san i kon si di i bigin wooko anga den leli fu Beibel?

¹⁴ I mu lobi den weiti fu Yehofa, i mu e wooko anga den tu. Kande i be e du sani enke fa iseefi be wani fosi i kon sabi Yehofa. Ma now i kon si taki den weiti fu Yehofa moo bun (Ps. 1:1-3; leisi 1 Yohanisi 5:3.) Pakisei den leli di i sa fende aini Beibel fu man, uman, mma anga dda, anga pikin (Efe. 5:22–6:4). I si enke yu osulibi e waka moo bun di i bigin wooko anga den leli ya? I si enke i libi moo waka bun di i paa anga bun mati enke fa Beibel taki? Yu e moo piisii di i wooko anga den leli fu Beibel? (Odo 13:20; 1 Kor. 15:33). Efu wan sama be o akisi i den sani ya, i be o taki, eeye, mi libi e moo waka bun.

15. San i mu du efi i wani sabi fa i mu wooko anga den leli fu Beibel?

¹⁵ Kande a ná ala yuu yu e sabi fa i mu wooko anga den leli fu Beibel. Neen meke a olikanisâsi fu Yehofa meke buku anga taa sani di sa yeepi i fu sabi san bun anga san á bun (Heb. 5:13, 14). Te yu e leisi, efuso sutudeli den buku ya, yu o si taki den sani di sikiifi aini Beibel sa yeepi i fi i libi waka bun. A sani ya o meke i wani de aini a olikanisâsi fu Yehofa.

16. Fa Yehofa sete sani aini a olikanisâsi fi en?

¹⁶ I mu lobi Yehofa, i mu e holibaka gi a olikanisâsi fi en tu. Yehofa paati a foluku fi en aini kemeente. Yesesi na a edeman fu ala den kemeente ya (Efe. 1:22; 5:23). Yesesi poti wan pikin kulu mannengee fu teke fesi aini a olikanisâsi. Yesesi e kai den man ya „a koni saafu di u sa fitoow”. Den man ya e du den wooko bun. Den e yeepi u fu wi anga Yehofa toon mati, anga fu wi anga en tan mati fu teego (Mat. 24:45-47). Wan fu den fasi fa a koni saafu di u sa fitoow e solugu u, na a poti di den e poti owluman fu luku den kemeente (Yes. 32:1, 2; Heb. 13:17; 1 Peit. 5:2, 3). Den owluman ya e du ala san den poi fu yeepi u, fu toosutu u, anga fu yeepi u fu toon wan moo bun mati fu Yehofa. Ma wan fu den moo gaan sani di den baala ya e du gi u, na a soi di den  e soi u fa u sa yeepi taawan fu kon sabi Yehofa.​—Efe. 4:11-13.

17. Enke fa Romesama 10:10, 13, 14 e soi, da saide wi e leli taawan fu Yehofa?

¹⁷ Yeepi taawan fu kon lobi Yehofa. Yesesi be sende den bakaman fi en fu leli taawan fu Yehofa (Mat. 28:19, 20). Son yuu wi e du a sani ya fu di u sabi taki u mu du en. Ma te wi o moo lobi Yehofa, wi o fii aseefi fasi fa apostel Peitilisi anga Yohanisi be e fii. Den be taki: „Wi á poi tapu fu taki fu den sani di u si anga den sani di u yee” (Toli 4:20). Wi e piisii te wi e yeepi taawan fu kon sabi Yehofa. Pakisei fa Filipesi be e piisii di a be yeepi a Etiyopiyaman fu kon sabi den leli fu Beibel te enke a dopu. Efi yu e waka a Filipesi baka, neen yu e peleiki fayafaya enke fa Yesesi be taki, yu e soi taki i wani toon wan Yehofa Kotoigi tuutuu. (Leisi Romesama 10:10, 13, 14.) Leti enke a Etiyopiyaman ya, yu o akisi iseefi taki: „San e tapu mi fu dopu?”​—Toli 8:36.

18. San wi o luku aini a taa artikel?

¹⁸ A dopu di yu o dopu na a moo bun sani di i be sa du aini i libi. A wan gaan sani yu o du, neen meke i mu denki bun san a wani taki fu dopu. San i mu sabi efi i wani dopu? San i mu du fosi i dopu, anga baka te i dopu? Wi o luku den akisi ya aini a taa artikel.