1. San Peleikiman 3:7 e leli u?

SON sama lobi taki, taawan á lobi taki. Aini a artikel ya, wi o si taki wan ten de fu taki anga wan ten fu de pii. (Leisi Peleikiman 3:7.) Son yuu wi e winsi taki son baala anga sisa be e taki moo ipi, ma son leisi wi e winsi taki son wan á be e taki ipi so.

2. Sama abi a leti fu taigi u on ten, anga fa u mu taki?

² A taki di u poi taki, a wan kado di Yehofa gi u (Ek. 4:10, 11; Openb. 4:11). Ai soi wi aini Beibel fa u mu wooko anga a kado ya. Aini a artikel ya wi o luku wantu toli aini Beibel di o yeepi u fu sabi on ten u mu taki, anga on ten u mu de pii. Wi o luku tu fa Yehofa e pakisei fu den sani di wi e taigi taawan. Wi o luku fosi on ten u mu taki.

3. Enke fa Romesama 10:14 e soi, da on ten u mu taki?

³ Ala yuu u mu de seekaseeka fu taki fu Yehofa anga a Kownukondee fi en (Mat. 24:14; leisi Romesama 10:14). Te wi e du a sani ya, da wi e waka a Yesesi baka. Wan fu den moo pelensipali sani di meke Yesesi kon a goontapu, a be fu leli sama fi en Dda (Yoh. 18:37). Ma u mu holi a pakisei taki a fasi fa wi e taki pelensipali tu. Neen meke te wi e taki anga sama fu Yehofa ’wi á mu taki anga ati boon, ma anga lesipeki’. U mu soi taki wi e booko wi ede anga a fasi fa den sama e fii efuso san den e biibi (1 Peit. 3:15). Te wi o du a sani ya, da a ná taki namo wi o taki anga den, ma wi o doo den ati tu.

4. Enke fa Odo 9:9 e soi, da fa owluman sa yeepi taawan?

⁴ Owluman mu taki anga wan baala efuso sisa, efu den si taki a abi yeepi fanowdu. Den mu luku on ten na a moo bun yuu fu taki anga a baala efu a sisa fu den á gi en sen  a sama ini. Den mu wakiti te den anga a sama wawan de, da den taki anga en. Owluman e meke moiti fu taki switi anga den baala anga sisa. Ma den nai feele fu soi den tekisi aini Beibel di o yeepi den fu du sani anga koni. (Leisi Odo 9:9.) Saide wi á mu feele fu taki te a de fanowdu? Wi o luku wan toli fu wan man di be mu poti den boi fi en a pasi, anga wan uman di be mu go taki anga wan man di be o toon kownu.

5. Saide u sa taki Eli be de pii a wan yuu di a be mu taki?

⁵ A Gaan Pilisite Eli be abi tu manpikin di a be lobi tuutuu. Ma den manpikin fu Eli á be e lesipeki Yehofa. Den a be pilisite aini a tabernakel. Ma den á be e tyai denseefi bun, den á be e lesipeki den ofaandi di a foluku be e tyai gi Yehofa. Boiti dati, den be e libi wan hululibi (1 Sam. 2:12-17, 22). Enke fa a Weiti fu Mosesi e soi, da den manpikin fu Eli be mu dede. Ma Eli be meke den tan wooko aini a tabernakel, winsi fa a be sabi taki den á be e tyai denseefi bun (Deit. 21:18-21). Fa Yehofa be fende a sani di Eli du? Yehofa taigi Eli taki: „Yu e gi den manpikin fi i gaandi moo mi.” Bakaten Yehofa kii den tu ogii-ati man ya.​—1 Sam. 2:29, 34.

6. San a toli fu Eli e leli u?

⁶ Wi e leli wan pelensipali sani fu a toli fu Eli. Efu wan mati, efuso wan famii fu u du wan sani di Yehofa á lobi, wi á mu feele fu taigi en. U mu soi en fa Yehofa e pakisei fu a sani di a du. U mu gi en taanga-sikin fu suku yeepi a den owluman (Yak. 5:14). Noiti wi á mu de enke Eli. Wi á mu hei u famii efuso mati moo Yehofa. Wi abi deki-ati fanowdu fu go soi wan sama taki a meke wan fowtu, ma a abi wini te u du a sani ya. Wi o luku a toli fu a Islayeli uman di den e kai Abigayeli. Wi o si taki a uman ya á be du sani enke Eli.

7. Saide Abigayeli go taki anga David?

⁷ Abigayeli a be a uman fu wan guduman den be e kai Nabal. Di David anga den man fi en be e lon gi Kownu Saul, den be e luku den sikapu fu Nabal wan pisiten fu kibii den fu sama á fufuu den. Nabal be teke a sani di den man ya be du gi en fu bigi? Nono. Di David sende akisi Nabal pikinso wataa anga nyanyan,  Nabal ati boon te neen a gi den man fu David gaan taki (1 Sam. 25:5-8, 10-12, 14). Di David yee san Nabal taki, a be wani kii ala den mannengee di be de aini a osu fu Nabal (1 Sam. 25:13, 22). San be o tapu David fu a á du a ogii ya? Abigayeli be fusutan taki a be mu go taki anga David. Winsi fa David be de anga 400 fetiman di angii be e kii, tokuso Abigayeli á feele, a teke deki-ati go taki anga en.

8. San a toli fu Abigayeli e leli u?

⁸ Di Abigayeli miti David, a taki anga en a wan lesipeki fasi. A soi David tu sowtu wini a be o fende efu a be wooko anga san a taki. Anga ala fa a ná Abigayeli be suku a ogii ya, toku a be akisi David paadon fu san be pasa. Abigayeli be sabi taki David a be wan bun man. A be sabi tu taki David be wani du sani a wan letifasi. Boiti dati, a be e biibi taki Yehofa be o yeepi en (1 Sam. 25:24, 26, 28, 33, 34). Leti enke Abigayeli, a so useefi á mu feele fu taki anga u baala anga sisa efu u si taki den e du wan sani di sa meke den sondu (Ps. 141:5). U mu taki a wan lesipeki fasi, ma wi á mu feele fu taigi den a tuu. Te wi e taigi den a tuu, wi e soi taki wi a wan tuutuu mati.​—Odo 27:17.

9-10. San owluman mu holi a pakisei te den e poti taawan a pasi?

⁹ Owluman á mu feele fu taki anga den baala anga sisa, te den fusutan taki den e du wan sani di sa meke den sondu (Gal. 6:1). Owluman e holi a pakisei taki denseefi a sondu sama, neen meke son leisi a o de fanowdu fu taawan poti den a pasi. Ma den nai meke a sani ya tapu den fu poti taawan a pasi (2 Tim. 4:2; Tit. 1:9). Te den e poti taawan a pasi, den  e meke moiti fu taki switi anga den anga ala pasensi. Den lobi den baala anga sisa, neen meke den de kabakaba fu yeepi den (Odo 13:24). Ma a moo pelensipali faantiwowtu fu den owluman a fu gi Yehofa gaandi. Den e du a sani ya te den e yeepi a kemeente fu du sani enke fa Yehofa wani. Den e kibii den baala anga sisa tu fu ogii á miti den.​—Toli 20:28.

¹⁰ Te anga now u luku on ten a de fanowdu fu taki. Ma a abi yuu tu pe u mu de pii. Saide a á makiliki fu de pii ala yuu?

11. Sowtu ageisitoli Yakowbesi gi di e soi on ten u mu taki anga on ten u mu de pii? Saide a ageisitoli ya fiti?

¹¹ Son yuu ai taanga fu sabi on ten u mu taki anga on ten u mu de pii. A Beibel sikiifiman Yakowbesi be gi u wan ageisitoli di e soi taki a sani ya á makiliki. A be taki: „Efu wan sama nai sondu anga en mofu, da a ná abi nawan fowtu. Boiti dati, a man basi en hii sikin. Efu wi e tei tetei na asi mofu fu den du san u wani, wi o man tii den hii sikin tu” (Yak. 3:2, 3). Te wan sama di sidon a wan asi tapu e hali a tetei di de na a asi mofu, a sa meke a asi go a pe a wani. Ma efu a sama losi a asi fu a lon go a pe a wani, a sama anga a asi sa kisi mankei. A so a de tu taki efu wi á sabi on ten u mu taki anga on ten u mu de pii, a sani ya sa tyai polobelema gi wi anga taawan. Meke u luku wantu okasi pe u mu de pii.

12. On ten a bun fu de pii?

¹² San yu e du te i sabi taki wan baala efuso sisa sabi wan sani di a á mu taigi taa sama? Efi i miti wan sama di e tan aini wan kondee pe lanti tapu a wooko,  i be o akisi en fa den e du a wooko aini a kondee de? U sabi taki yu á wani ogii miti i baala anga sisa. A di u lobi den meke wi e wani sabi fa ai go anga den. Te wi e begi, wi e wani akisi Yehofa tu fu a yeepi den anga den polobelema fu den. Ma a den okasi ya, a be o moo bun fu wi á taki efuso akisi son sani. Efu wi e dwengi wan baala efuso sisa fu a taigi u sani di a á mu taigi taa sama, da u nai soi taki u lobi en anga den taa baala anga sisa di e tan aini a kondee. Wi á wani du wan sani di o meke sani moo ogii gi den baala anga sisa fu u. Boiti dati, den baala anga sisa di e tan aini den kondee ya á mu taigi sama fa den Kotoigi e du a peleikiwooko, fa den e holi komakandaa, efuso fa den e du taa sani fu dini Yehofa.

13. Enke fa Odo 11:13 e soi, da san owluman á mu du? Saide den á mu du a sani ya?

¹³ Owluman mu wooko anga san sikiifi a Odo 11:13. (Leisi en.) Den á mu e taigi sama sani di den ná abi a leti fu sabi. A sani ya á makiliki, moomoo efu a owluman toow. Te wan man anga wan uman di toow e taigi denseefi fa den e fii anga san e gi den booko-ede, da a sani ya e meke a toowlibi fu den taanga. Ma owluman sabi taki den á mu taigi den uman fu den sani fu den baala anga sisa aini a kemeente di den á mu sabi. Efu wan owluman du a sani ya, den baala anga sisa aini a kemeente ná o fitoow en moo. Den sama di abi faantiwowtu aini a kemeente á mu de sama di e „bidiigi” taawan (1 Tim. 3:8). A sani ya wani taki den á mu e taki sama sani. Efu wan owluman lobi en uman, a ná o taigi en sani di a ná abi leti fu sabi, bika a sani ya be sa de enke wan ibi gi a uman.

14. Fa wan uman sa yeepi en man fu abi wan bun nen aini a kemeente?

¹⁴ Wan uman sa yeepi en man fu abi wan bun nen, te a nai dwengi en fu taigi en sani di a á mu sabi. Te ai du a sani ya, ai soi taki ai holibaka gi en man. Ma ai soi tu taki ai lesipeki den sama di e fitoow a man fi en anga den kibii toli fu den. Ma a moo pelensipali sani, a taki ai meke Yehofa piisii fu di ai yeepi den baala anga sisa aini a kemeente fu libi na a wan.​—Rom. 14:19.

15. Fa Yehofa be e pakisei fu den dii mati fu Yopu? Saide Yehofa be e denki so fu den?

¹⁵ A Beibel buku Yopu e yeepi u fu sabi fa u mu taki anga on ten u mu taki. Baka di omen ogii miti Yopu, neen fo man kon fu toosutu en. Den man ya be kon fu poti Yopu a pasi tu. Di den man ya kon a Yopu, den tan wan hii pisiten sondee fu taigi en wan sani. Elifas, Bildad, anga Sofar, a dii fu den man ya. Den sani di den taki, e soi kiin taki di den be de pii e luku Yopu, a ná pakisei den be e pakisei fa den be sa yeepi en. Ma a suku den be e suku wan fasi fu soi Yopu taki a wan ogii a be du. Wantu fu den sani di den taki a be tuu, ma gaanse fu den sani di den taki fu Yopu anga Yehofa a be lei. Den taigi Yopu taki en a ná wan bun sama (Yopu 32:1-3). Fa Yehofa be fende den sani di den man ya taki? En ati boon a den dii man ya. A taigi den taki a wan don sani den du, neen a sende den fu akisi Yopu fu a begi gi den.​—Yopu 42:7-9.

16. San wi e leli fu a toli fu Elifas, Bildad anga Sofar?

¹⁶ A omen sani wi e leli fu a toli fu Elifas, Bildad anga Sofar. A fosi sani, a taki  wi á mu kuutu u baala anga sisa (Mat. 7:1-5). Pe fu u kuutu den, u mu aliki bun te den e taki. A so wi o man fusutan fa den e fii tuutuu (1 Peit. 3:8). Du fu tu sani di a toli ya e leli u, a taki u mu e taki switi anga sama. Den sani di wi e taki mu de sani di tuu (Efe. 4:25). Du fu dii sani a taki Yehofa e poti pakisei a den sani di wi e taigi taawan.

17. San a toli fu Elihu e leli u?

¹⁷ Du fu fo man di be go luku Yopu, a be Elihu, wan famii fu Abalaham. Elihu be e aliki di Yopu anga den taa man be e taki. A be e poti pakisei na ala san den be e taki, neen meke a be poi yeepi Yopu fu kengi a fasi fa a be e denki (Yopu 33:1, 6, 17). Elihu á be e suku gaandi gi enseefi efuso taa sama, ma a moo pelensipali sani gi en a be fu gi Yehofa gaandi (Yopu 32:21, 22; 37:23, 24). A toli fu Elihu e leli u taki son leisi u mu de pii, da wi aliki te taawan e taki (Yak. 1:19). Ai leli u tu taki a moo pelensipali sani di mu meke wi e poti taawan a pasi, a di u wani gi Yehofa gaandi.

18. Fa u sa soi taki wi e teke a tongo di Gadu gi u fu bigi?

¹⁸ A tongo di Yehofa gi u, a wan kado. Efu wi e wooko anga san Beibel e taki te wi e luku san wi o taki, anga on ten wi o taki, wi e soi taki wi e teke a kado ya fu bigi. A santa yeye be meke Kownu Salomo sikiifi taki: „Te wan sama taki wan sani na a bun yuu, da a sani di a taki de enke gowtu-apaa aini wan solufu beenki” (Odo 25:11). Te wi e aliki bun te taawan e taki, da u denki bun fosi useefi taki wan sani, den wowtu fu wi o de enke gowtu-apaa. Den ná o moin namo, ma sama o man wooko anga den sani di u taki tu. Den sani di wi o go e taki o gi taawan taanga-sikin, den o meke Yehofa piisii (Odo 23:15; Efe. 4:29). Disi na a moo bun fasi fa u sa soi Yehofa taki wi e teke en fu bigi taki a gi u wan tongo.