1. San a wantu sani di e miti den sama di e dini Yehofa?

WAN gaan tesi e miti i nownow? Kande wan sama aini a kemeente du wan sani anga i di hati i (Yak. 3:2). Kande den sama di yu e wooko anga den, efuso den pikin a sikoo e soso i fu di yu e dini Yehofa (1 Peit. 4:3, 4). Kande i famii e puubei fu tapu i fu go a komakandaa, efuso den wani tapu i fu taigi taawan san yu e biibi (Mat. 10:35, 36). Te sani e taanga gi i, kande yu o wani gi abaa. Ma winsi san e miti i, Yehofa o yeepi i fu du sani anga koni. A o gi yu a kaakiti di yu abi fanowdu fu holidoo.

2. Enke fa Romesama 15:4 e soi, da sowtu wini wi e fende te wi e leisi a Wowtu fu Gadu?

² Beibel e taki san son sama be du di tesi be miti den. Saide Yehofa meke sama sikiifi den toli ya poti aini Beibel? A fu leli u wan sani. Na a sani ya Yehofa meke apostel Pawlesi sikiifi a Romesama 15:4. (Leisi en.) Te wi e leisi den toli ya, wi e fende taanga-sikin. Ma efu u wani fende wini fu den, wi á mu e leisi den namo da a kaba. U mu meke moiti fu lobi den sani di wi e leli. A sani ya o yeepi u fu kengi a fasi fa wi e denki. San u mu du efu u wani Beibel yeepi wi anga den polobelema fu u? U sa du den fo sani ya: (1) Begi, (2) Du enke i be  de ape, (3) Teke ten pakisei san i leisi, anga (4) Du san i leli. Wi o luku fa u sa du den fo sani ya te wi e sutudeli. * Baka dati wi o wooko anga den fo sani ya fu luku san u sa leli fu Kownu David anga apostel Pawlesi.

3. San i mu du fosi i leisi Beibel? Saide i mu du a sani ya?

³ (1) Begi. Fosi i leisi Beibel, akisi Yehofa fu a yeepi i fu fusutan den sani di yu o leisi. Efi i wani sabi fa i mu losi wan polobelema, i sa akisi Yehofa fu a yeepi i fu si sani aini Beibel di o yeepi i fu du sani anga koni.​—Filip. 4:6, 7; Yak. 1:5.

4. San o yeepi i fu fusutan wan Beibel toli moo bun?

⁴ (2) Du enke i be de ape. Te sama e gi u wan toli, u poi si aini wi ede fa sani be sa waka winsi wi á be de ape. A so Yehofa meke u. Te yu e leisi wan toli fu wan sama aini Beibel, puubei fu si fa sani be waka, du enke i be de ape. Puubei fu si den sani di a sama be e si, puubei fu fii fa a be e fii.

5. San i mu du te yu e leisi Beibel? Saide i mu du a sani ya?

⁵ (3) Teke ten pakisei san i leisi. Te yu e leisi Beibel, i mu teke ten pakisei den sani di yu e leisi, da i luku fa i sa wooko anga den. A sani ya o yeepi i fu fusutan a sani di yu e leisi moo bun. Te yu e leisi Beibel, akisi iseefi den sani ya: ‘San a sama di de aini a toli du fu losi a polobelema fi en? Fa Yehofa yeepi en? Fa a toli ya sa yeepi mi fu holidoo te tesi e miti mi?’

6. Saide u mu e du san u leli?

⁶ (4) Du san i leli. Yesesi taki efu u nai du san u leli, da u de enke wan man di meke en osu a santi tapu. A fu soso a wooko taanga fu meke a osu fi en. Bika efu wan gaan winta wai, efuso wan gaan wataa kon, a osu fi en o booko (Mat. 7:24-27). A letiso a de te wi e leisi Beibel. Winsi u begi, u pakisei fa sani waka, u teke ten pakisei san u leisi, ma u nai du san u leli, da a leti enke a fu soso u du ala den sani de. Te tesi o miti u, u ná o poi holidoo. Efu wi e leisi Beibel da wi e du san u leli, wi o go e du sani anga koni. U ná o buuya te tesi o miti u, u biibi o taanga tu (Yes. 48:17, 18). Wi o wooko anga den fo sani ya fu luku san u sa leli fu wan sani di be miti Kownu David.

7. Sowtu toli wi o luku?

⁷ Wan bun mati efuso wan famii fi i du wan hati sani anga i? Efu a sani ya miti i, a toli fu Kownu David sa yeepi i. En boi Absalom be wani kii en, bika a be wani toon kownu neen peesi.​—2 Sam. 15:5-14, 31; 18:6-14.

8. San i mu du efi i wani Yehofa yeepi i?

⁸ (1) Begi. Pakisei a toli fu David anga Absalom, da i taigi Yehofa fa yu e fii fu a sani di a sama du anga i (Ps. 6:6-9). Taigi Yehofa kiin fa yu e fii. Akisi en fu a yeepi i fu si fa a toli ya sa yeepi yu anga a polobelema fi i.

9. San be miti Kownu David?

⁹ (2) Du enke i be de ape. Pakisei fa sani be waka, da i puubei fu fusutan fa David be e fii. A omen yali Absalom du  sani fu meke a foluku lobi en (2 Sam. 15:7). Di Absalom si taki a foluku lobi en kaba, neen a sende sama paati mofu aini hii Islayeli taki a toon kownu. Absalom be fende Akitofel koli tu, wan fu den bun mati fu David. A man ya a be wan fu den koniman di be e poti David a pasi. Baka di Absalom bali basiya taki a toon kownu, a sende sama fu go kii David. A gei enke David be siki a pisiten de (Ps. 41:1-9). Di David yee san Absalom be wani du anga en, a lowe komoto a Yelusalem. Bakaten den suudati fu Absalom anga den suudati fu David feti. Den suudati fu David wini a feti, neen den kii Absalom.

10. San Kownu David be sa du di tesi miti en?

¹⁰ Pakisei fa David be e fii di den sani ya miti en. A be lobi Absalom, a be e fitoow Akitofel tu. Ma a den tu man ya daai du ogii anga en. Den sete sani fu kii en seefi. A sani ya be sa meke David á fitoow den taa mati fi en moo. A be sa denki taki den be e holibaka gi Absalom tu. Efu a be e denki enseefi namo, en wawan be sa lowe komoto a Yelusalem. Efu a be sidon e kusumi, a be o lasi-ati. Ma David á du nawan fu den sani ya. San yeepi en fu pasa a tesi ya?

11. San David du di tesi miti en?

¹¹ (3) Teke ten pakisei san i leisi. San a toli ya e leli i? Akisi iseefi a sani ya: ‘San David du di den sani ya miti en?’ David á buuya. A á feti du sani, ma a á daaidaai fu du san a be mu du tu. A begi Yehofa fu yeepi en, a akisi den mati fi en fu yeepi en tu. Winsi fa sama be libi ogii anga David, toku a á be puu boon-ati a taawan. A be e fitoow Yehofa anga den mati fi en ete.

12. Fa Yehofa yeepi David?

¹² Fa Yehofa yeepi David? Te i diki go moo dipi, da yu e si taki Yehofa be gi David kaakiti fu pasa a tesi ya (Ps. 3:1-8). Yehofa meke sani waka bun anga David. A yeepi den mati fu David tu fu wini den feyanti fu den.

13. Fa i sa waka a David baka te wan sama du wan hati sani anga i? (Mateyesi 18:15-17)

¹³ (4) Du san i leli. Akisi iseefi taki: ‘Fa mi sa waka a David baka?’ Efu wan sama du wan hati sani anga i, yu á mu daaidaai fu losi a polobelema. Suku fu wooko anga a sani di Yesesi taki a Mateyesi 18. (Leisi Mateyesi 18:15-17.) Ma yu á mu feti du sani anga boon-ati. Begi Yehofa fu a yeepi i fu du sani anga koni. Winsi fa a sani hati i, i mu fitoow den mati fi yu ete. I mu gi den a okasi fu yeepi i tu (Odo 17:17). Meke moiti fu wooko anga san Yehofa taki aini en Wowtu Beibel.​—Odo 3:5, 6.

14. On ten i sa fende wini fu den sani di sikiifi a 2 Timotiyesi 1:12-16; 4:6-11, 17-22?

¹⁴ I famii wani tapu i fu dini Yehofa? Yu e tan aini wan kondee pe lanti tapu a wooko fu Yehofa Kotoigi? Efu den sani ya e miti i, yu o fende taanga-sikin te i leisi 2 Timotiyesi 1:12-16 anga 4:6-11, 17-22. * A sitaafu-osu Pawlesi be de di a sikiifi den tekisi ya.

15. San i sa akisi Yehofa?

¹⁵ (1) Begi. Fosi i leisi den tekisi ya,  taigi Yehofa san a den booko-ede fi i. Taigi en pilisisi fa yu e fii. Akisi Yehofa fu a yeepi i fu si sani aini a pisi ya di o yeepi i fu sabi fa i mu losi a polobelema fi i.

16. San be miti Pawlesi?

¹⁶ (2) Du enke i be de ape. Kon u taki yu a be Pawlesi. I de a sitaafu-osu a Rome. I be go a sitaafu-osu kaba, ma a leisi ya i sabi taki den o kii yu. Wantu mati fi i gwe fika i. Boiti dati, ná pikin weli i weli.​—2 Tim. 1:15.

17. San Pawlesi be sa du?

¹⁷ Pawlesi be sa denki taki efu a á be e peleiki fayafaya, kande den á be o sooto en. A be sa holi den baala fu Asiya di be gwe fika en na ati tu. A sani ya be sa meke a á fitoow den taa mati fi en moo. Ma Pawlesi á du nawan fu den sani ya. Saide a be e fitoow den mati fi en ete? Saide a be e biibi taki Yehofa be o belesi en?

18. San Pawlesi du di tesi miti en?

¹⁸ (3) Teke ten pakisei san i leisi. Akisi iseefi a sani ya: ‘San Pawlesi du di den sani ya miti en?’ Pawlesi be sabi taki a be o dede, ma a be e holi a pakisei taki a moo pelensipali sani, a fu santa a nen fu Yehofa. A be e tan meke moiti fu gi taawan taanga-sikin. A be soi taki a be e fitoow Yehofa tu, bika na ala yuu a be e begi en (2 Tim. 1:3). Pe fu Pawlesi be poti pakisei a den sama di be gwe fika en, a be e teke en fu bigi taki den mati fi en be e yeepi en. Pawlesi be e tan sutudeli a Wowtu fu Gadu tu (2 Tim. 3:16, 17; 4:13). A be sabi taki Yehofa anga Yesesi lobi en. A be sabi taki den á be o gwe fika en noiti. A be sabi tu taki den be o belesi en fu a taanga wooko di a be du.

19. Fa Yehofa yeepi Pawlesi?

¹⁹ Yehofa be taigi Pawlesi a fesi taki sama be o du ogii anga en fu di a toon wan Kelesten (Toli 21:11-13). Fa Yehofa yeepi Pawlesi? A be e piki den begi fu Pawlesi. A be e gi en taanga-sikin tu (2 Tim. 4:17). Yehofa be taigi Pawlesi taki a be o pai en fu di a be wooko taanga gi en. A meke den mati fu Pawlesi gi en san a be abi fanowdu tu.

20. Enke fa Romesama 8:38, 39 e soi, da fa u sa waka a Pawlesi baka?

²⁰ (4) Du san i leli. Akisi iseefi a sani ya: ‘Fa mi sa waka a Pawlesi baka?’ Leti enke Pawlesi sama o du ogii anga u fu di wi e dini Yehofa (Malik. 10:29, 30). Efu u wani holidoo te tesi e miti u, u mu e begi Yehofa, u mu e sutudeli Beibel tu. U mu holi a pakisei taki a moo pelensipali sani, na a santa di u mu santa a nen fu Yehofa. U sa biibi taki noiti Yehofa o gwe fika u. Sani á de di poi tapu Yehofa fu lobi u.​—Leisi Romesama 8:38, 39; Heb. 13:5, 6.

21. San yeepi Aya anga Hector fu pasa den tesi di be miti den?

²¹ Den toli fu den sama di sikiifi aini Beibel sa yeepi u fu holidoo te tesi e miti u. Aya, wan pionili sisa di e tan a Yapan taki a toli fu Yona yeepi en fu a á feele fu peleiki a peesi pe tyaipi sama e pasa. Hector a wan yonkuu baala di e tan a Indonesia. En dda anga en mma á de a waaleiti, ma a toli fu Rut gi en taanga-sikin fu dini Yehofa.

22. Fa i sa fende wini fu den felon anga den Beibel toli di de a jw.org?

 ²² Pe i sa fende Beibel toli di o gi i taanga-sikin? Den felon anga den Beibel toli di de a jw.org, e yeepi u fu fusutan fa sani be waka aini Beibel ten. Wan pisi de a jw.org tu di den e kai „Teki na eksempre fu sma di ben abi bribi”. * Fosi i luku den felon ya efuso aliki den Beibel toli ya, akisi Yehofa fu a yeepi i fu si fa i sa wooko anga den sani di yu o leli. Te yu e luku den felon efuso aliki den Beibel toli ya, du enke i be de ape a ten di den sani ya be e pasa. Teke ten pakisei san den sama di de aini a toli du fu losi a polobelema fu den, anga fa Yehofa yeepi den. Luku san i sa leli fu den, da i puubei fu du san i leli. Gi Yehofa daa fu a fasi fa ai yeepi. I mu e yeepi taa baala anga sisa tu. Te yu e du a sani ya, yu e soi Yehofa taki ai bigi gi i taki ai yeepi i.

23. Enke fa Yesaya 41:10, 13 e soi, da san Yehofa paamisi u?

²³ A Saatan e tii a goontapu ya, neen meke a libi e taanga gi u. Son yuu u nai sabi fa fu du (2 Tim. 3:1). Ma u ná abi fu booko wi ede tumisi, bika Yehofa sabi san e miti u. A paamisi u taki te sani e miti u, a o holi wi anga en leti-ana. (Leisi Yesaya 41:10, 13.) U sabi taki Yehofa e holibaka gi u. A gi wi en Wowtu Beibel tu di e gi u taanga-sikin fu holidoo winsi san e miti u.