1. Saide Yesesi begi Yehofa fu kibii den bakaman fi en?

A NETI fosi Yesesi dede, a be e booko en ede anga den bakaman fi en te a be e pakisei den sani di be o miti den te a be o dede. Fu di Yesesi be lobi den mati fi en, meke a be akisi en Dda fu ‘kibii den fu a ogiiwan á du ogii anga den’ (Yoh. 17:14, 15). Yesesi be sabi taki di a be o daai go a hemel, Saatan Didibii be o du ogii anga ala den sama di e dini Yehofa, neen meke a begi Yehofa fu kibii den.

2. Saide u sa biibi taki Yehofa o aliki te u begi en fu a yeepi u?

² Fu di Yehofa lobi en Manpikin meke a du san a akisi en. Efu wi e du ala san u poi fu libi enke fa Yehofa wani, a o lobi u tu. Te wi e begi en fu a yeepi u, a o go e aliki u. Yehofa a wan Dda di lobi u, neen meke u sa biibi taki na ala yuu a o solugu u. Efu a á be o du a sani ya, da a be o gei enke Saatan abi leti di a taki Yehofa a ná wan bun Tiiman.

3. Saide u moo abi Yehofa fanowdu aini a ten ya?

³ U moo abi Yehofa fanowdu aini a ten ya, bika ná pikin boon ‘Saatan ati e boon di den fiingi en kon a goontapu’ (Openb. 12:12). Ai koli omen sama fu biibi taki te den e du ogii anga u, da ‘a Gadu den e wooko gi’ (Yoh. 16:2). Son sama di nai biibi taki wan Gadu de, e du ogii anga u fu di u nai libi enke den. Ma winsi san e miti u, u ná abi fu feele. Saide? Bika a Wowtu fu Gadu taki: ‘Masaa e du san a paamisi ala yuu. Neen meke a o yeepi u fu wi abi deki-ati. A o kibii u fu a ogiiwan á du ogii anga u’ (2 Tes. 3:3). Fa Yehofa e kibii u? Meke u luku tu fasi fa ai du a sani ya.

4. Enke fa Efeisesama 6:13-17 e soi, da san Yehofa gi u fu kibii u?

⁴ Yehofa gi u wantu fetisani di o yeepi u te Saatan e suku fu poli wi anga en. (Leisi Efeisesama 6:13-17.) A den moo bun fetisani Yehofa gi u. Ma efu u wani den kibii u, u mu wei ala den. Wi á mu puu den tu. San a den fetisani di Gadu gi u? Meke u poti pakisei a ibiiwan fu den.

5. San na a lelibuba di u mu banti a u mindii? Saide u mu wei a lelibuba ya?

⁵ A lelibuba. Ala sani di tuu mu de enke wan lelibuba di banti a u mindii. Den sani di tuu na ala den sani di wi e leli aini a Wowtu fu Gadu. Saide u mu wei a lelibuba ya? A fu di Saatan na ‘a dda fu lei’ (Yoh. 8:44). A omen dunsu yali kaba ai lei. Beibel taki ai koli sama ‘a hii goontapu’ (Openb. 12:9). Ma den sani di sikiifi aini Beibel e yeepi u fu Saatan á fende u koli. Fa wi e wei a lelibuba ya? Wi e du a sani ya te wi e meke moiti fu sabi Yehofa, te wi e dini en enke fa a wani, anga te wi e du sani anga wan kiin ati.​—Yoh. 4:24; Efe. 4:25; Heb. 13:18.

6. San a wani taki fu wei leti-du enke wan sani di e kibii u boofu-ati? Saide u mu wei wan sani fu kibii u boofu-ati?

⁶ A sani di e kibii u boofu-ati. Leti-du mu de enke wan sani di u wei fu kibii u boofu-ati. A sani ya a den weiti fu Yehofa di e yeepi u fu libi enke fa a wani. Saide u mu wei leti-du a u boofu-ati? Leti enke fa wan suudati be e wei wan sani fu kibii en boofu-ati, a so den leli fu Yehofa e kibii u fu a goontapu fu Saatan á poli u (Odo 4:23). Yehofa wani u dini en fu di u lobi en anga u hii ati (Mat. 22:36, 37). Saatan wani u lobi den sani fu a goontapu ya di Yehofa e buuse. Bika a sabi taki efu u lobi den sani ya, u ná o dini Yehofa anga u hii ati moo (Yak. 4:4; 1 Yoh. 2:15, 16). Ma te a si taki u nai poti pakisei a den sani fu a goontapu ya, da ai du sani anga u fu meke u feele fu u sa gwe fika Yehofa.

7. Fa wi e soi taki u wei a sani di e kibii u boofu-ati?

⁷ Te wi e meke moiti fu wooko anga den sani di Yehofa e leli wi aini Beibel, da wi e soi taki u wei a sani di e kibii u boofu-ati (Ps. 97:10). Son sama e fii enke den weiti fu Yehofa e tapu den fu du san den wani. Ma efu u nai wooko anga den sani di wi e leli aini Beibel moo, wi o de enke wan suudati di puu a sani di e kibii en boofu-ati aini wan feti fu di a fende taki a ibi tumisi. A sani de be sa tyai dede gi en. Den sama di lobi Yehofa, nai si den weiti fi en enke wan ibi. Ma den e si den enke wan sani di e kibii den.​—1 Yoh. 5:3.

8. San a wani taki fu wei a susu fu a bun nyunsu a u futu?

⁸ Pawlesi taki a paati di wi e paati a bun nyunsu fu freide anga u hii ati o de enke wan susu a u futu. Dati wani taki na ala yuu u mu de seekaseeka fu paati a bun nyunsu fu a Kownukondee. Te wi e paati den sani di u leli anga taawan, u biibi e moo taanga. Wi e fende taanga-sikin te wi e si fa a foluku fu Yehofa e paati a bun nyunsu na a hii goontapu winsi pe den de. Den e peleiki osu fu osu, a sikoo, a wookope, anga peesi pe sama e du bisnis. Te den famii fu den di á de a waaleiti kon luku den, den e peleiki gi den tu. Efu wi á be o peleiki moo fu di wi e feele, u be o de enke wan suudati di puu en susu aini wan feti. A sani de be o meke a kisi  mankei neen futu. A be o moo makiliki gi den feyanti fu du ogii anga en. Boiti dati, a á be o poi du san a basi taigi en moo.

9. Saide u biibi mu taanga enke wan gaan skelt?

⁹ A biibi fu u mu de enke a gaan skelt di den suudati be e tyai fu tapu den ga fu den feyanti. Wi e biibi taki Yehofa o du ala san a paamisi u. A sani ya o yeepi u fu kii a faya fu den ga di a ogiiwan e sutu kon a u. Saide u biibi mu taanga enke wan gaan skelt? Efu u biibi á taanga, wi o biibi den lei di den sama di daai baka gi a biibi e paati fu a olikanisâsi. U ná o poi holidoo te sama e soso u fu di wi e dini Yehofa. Winsi a sikoo u de efuso wooko, na a biibi fu wi o yeepi u fu wi á du sani di Yehofa á lobi (1 Peit. 3:15). Kande i fende wan wooko di e pai tyaipi moni, ma a wooko ya o tapu i fu go a komakandaa, fu du a peleikiwooko efuso fu du wan fu den taa sani di u mu du enke Kelesten. Efu a biibi fi i taanga, i ná o teke den sowtu wooko ya (Heb. 13:5, 6). Kande sama e du ogii anga i fu di yu e dini Yehofa, ma toku yu e holidoo winsi san e miti i. A sani ya e soi taki i biibi taanga enke wan gaan skelt.​—1 Tes. 2:2.

10. San na a suudati-ati? Saide u mu wei en?

 ¹⁰ A suudati-ati na a howpu di wi abi taki Yehofa o pai ala den sama di e dini en enke fa a wani. Wi abi a howpu tu taki efu a kon taki u dede, Yehofa o weki u baka (1 Tes. 5:8; 1 Tim. 4:10; Titesi 1:1, 2). Leti enke fa a suudati-ati be e kibii a ede fu a suudati, a letiso a howpu di wi abi e kibii a denki fu u. Fa ai du a sani ya? Howpu e yeepi u fu poti pakisei a den sani di Yehofa paamisi u. Ai yeepi u tu fu wi á buuya te tesi e miti u. Fa wi e soi taki u wei a suudati-ati ya? Wi e du a sani ya te wi e meke moiti fu denki enke fa Gadu e denki. Wan fasi fa wi e soi taki wi e denki enke fa Gadu e denki, a te wi e fitoow Gadu, pe fu u fitoow den gudu fu a goontapu ya di sa poli.​—Ps. 26:2; 104:34; 1 Tim. 6:17.

11. San na a feti-how fu a yeye? Saide u mu wooko anga a feti-how ya?

¹¹ A feti-how fu a yeye na a Wowtu fu Gadu. A Wowtu fu Gadu e yeepi u fu sabi efu den sani di wi e biibi a tuu. Ai yeepi sama tu fu tapu anga den sowtu a sowtu libi di e tyai takuu bakapisi gi den (2 Kor. 10:4, 5; 2 Tim. 3:16, 17; Heb. 4:12). A sutudeli di wi e sutudeli anga useefi, anga den sani di wi e leli a komakandaa e yeepi u fu sabi a Beibel bun (2 Tim. 2:15). Boiti den sani di Yehofa gi u fu feti, a gi wi ete wan pelensipali sani fu kibii u. San na a sani ya?

12. Sowtu taa sani o yeepi u fu wini Saatan anga den bakaman fi en? Saide wi abi a sani ya fanowdu?

¹² Wan suudati di abi ondoofeni sabi taki en wawan ná o poi wini wan feti, a abi taawan fanowdu. A so useefi abi u baala anga sisa fanowdu fu man wini Saatan anga den bakaman fi en. Yehofa gi u ‘tyaipi baala anga sisa’ a hii goontapu di de kabakaba fu yeepi u.​—1 Peit. 2:17.

13. Enke fa Hebrewsama 10:24, 25 e soi, da sowtu wini wi e fende te u de a den komakandaa?

¹³ Wan fasi fa u sa fende taanga-sikin a te wi e go a den komakandaa. (Leisi Hebrewsama 10:24, 25.) Ala wi e fii booko-saka son yuu, ma te wi e go a den komakandaa, da wi e kisi useefi baka. Te wi e yee den piki di den baala anga sisa e gi, wi e fende taanga-sikin. Den lezing di den e holi e gi u taanga-sikin fu tan dini Yehofa tu. Te wi e gi toli fosi a komakandaa bigin anga baka a komakandaa, da wi e gi useefi taanga-sikin (1 Tes. 5:14). Te u de a den komakandaa wi e fende okasi fu yeepi taawan tu. A sani ya e meke u piisii (Toli 20:35; Rom. 1:11, 12). Boiti dati, den komakandaa e yeepi u fu du a peleikiwooko moo bun. Te u de ape wi e leli fa u sa wooko anga den buku anga den felon di wi abi fu leli sama. Neen meke i mu seeka bun fosi i go a den komakandaa. Te i de ape i mu aliki bun. I mu meke moiti tu fu wooko anga den sani di i leli. Efi yu e du den sani ya, yu o de ‘wan bun suudati fu Kelestesi’.​—2 Tim. 2:3.

14. San a wan taa sani di e yeepi u fu feti anga den feyanti fu u?

¹⁴ A omen miliyun engel e yeepi u. I sabi ete omen suudati wan kodo engel be kii? (Yes. 37:36) Da pakisei san omen miliyun engel o poi du. Den engel fu Yehofa taanga omen toon moo den ogii yeye. Nawan sama á de di taanga enke Yehofa. Neen meke te Yehofa de a u se, u taanga moo ala den feyanti fu u winsi den ipi moo u (Kuut. 6:16). Son leisi  kande sama a pe wi e wooko, den pikin a sikoo efuso u famii di á de a waaleiti o taki sani di o meke u fii booko-saka. Te a sani ya pasa, holi a pakisei taki a nai wawan de. Yehofa o yeepi i fu wini a feti ya.

15. Enke fa Yesaya 54:15, 17 e soi, da saide Saatan ná o poi tapu a peleikiwooko?

¹⁵ Ná pikin buuse a goontapu fu Saatan e buuse u. U nai mumui anga politiki, u nai go a feti. Wi e meke sama sabi a nen fu Gadu. Wi e paati a nyunsu taki na a Kownukondee fu Gadu wawan poi puu den polobelema fu libisama. Wi e meke moiti fu libi enke fa Gadu wani. Na a hii goontapu wi e leli sama taki Saatan a wan leiman. Neen na a sama di e tii a goontapu nownow, neen meke sama e dede so (Yoh. 8:44). Wi e paati a nyunsu taki a goontapu fu Saatan o poli. A fu den sani ya ede a goontapu e buuse u. Ma noiti Saatan anga den bakaman fi en o poi tapu a peleikiwooko. Wi o tan du ala san u poi fu gafa Yehofa. Saatan du ala san a poi fu tapu a peleikiwooko, ma a á poi tapu en. Nownow a bun nyunsu e paati na a hii goontapu. A di Yehofa e kibii u, meke u poi du a wooko ya.​—Leisi Yesaya 54:15, 17.

16. Fa Yehofa o kibii a foluku fi en na a ten fu a gaan banowtu?

¹⁶ San o pasa dyonson? Na a ten fu a gaan banowtu Yehofa o kibii wi a tu sowtu fasi. A fosiwan, te Yehofa o meke den tiiman fu a goontapu ya poli a Gaan Babilon, da a o kibii a foluku fi en. A Gaan Babilon na ala den falisi keliki a goontapu (Openb. 17:16-18; 18:2, 4). Du fu tu, di Yehofa o poli a taa pisi fu a goontapu fu Saatan na Alimakedon, a o kibii a foluku fi en tu.​—Openb. 7:9, 10; 16:14, 16.

17. Sowtu wini wi o fende efu u tan a Yehofa se?

¹⁷ Efu u tan a Yehofa se, sani á de di Saatan o du anga u te da Yehofa á poi seeka en baka. Dyonson Yehofa o puu Saatan a pasi fu teego (Rom. 16:20). Neen meke u mu wei ala den sani di Yehofa gi u fu feti. Wi á mu puu nawan fu den sani ya tu. U wawan á mu taampu feti anga Saatan, u mu wooko anga san Yehofa taigi u. U mu holibaka gi den baala anga sisa fu u tu. Efu u du den sani ya, u sa biibi taki u Dda di de a hemel o yeepi u fu wini Saatan anga den bakaman fi en. A o kibii u.​—Yes. 41:10.