1-2. San o yeepi wan Beibelsutudi fu go a fesi?

AMY wan sisa di e tan a Fidyi taki: ‘Mi be lobi den sani di mi be e leli di mi be e sutudeli Beibel. Mi be sabi tu taki den sani di mi be e leli a tuu, ma a di mi bigin mosoo anga den baala anga sisa fosi mi go a fesi te enke fa mi dopu ya.’ A sani di Amy taki e soi taki a o moo makiliki gi wan Beibelsutudi fu go a fesi, te den baala anga sisa aini a kemeente e yeepi en.

² Ala peleikiman aini a kemeente sa yeepi wan Beibelsutudi fu go a fesi (Efe. 4:16). Wan pionili sisa den e kai Leilani di e tan a Vanuwatu taki: ‘Wan nongo e taki: “Wan sama namo á poi kiya wan pikin.” A so a de anga a yeepi di wi e yeepi wan sama fu toon Yesesi bakaman tu. Na ala sama aini a kemeente mu yeepi en fu go a fesi.’ Leti enke fa den sama aini wan osufamii, mati, anga den sama a sikoo e leli wan pikin pelensipali sani fu a libi, a so ala peleikiman aini a kemeente sa yeepi wan sutudi. Den sa soi en fa a mu du son sani, den mu e gi en taanga-sikin tu. Den sani ya o yeepi en fu a go a fesi te enke a dopu.​—Odo 15:22.

3. San u sa leli fu den sani di Ana, Dorin, anga Leilani taki?

³ Saide a peleikiman di abi a sutudi mu meke taa peleikiman yeepi a Beibelsutudi fi en? Ana, wan spesuutu pionili di e tan a Moldova taki: ‘Wan kodo sama á poi yeepi wan sutudi anga ala den sani di a abi  fanowdu.’ Dorin, wan taa spesuutu pionili fu Moldova taki: ‘Son yuu, wan peleikiman e taki wan sani di mi á be denki seefi fu gi a sutudi taanga-sikin.’ Leilani taki: ‘Te a sutudi si fa den baala anga sisa e booko den ede anga en, da ai si taki u na a foluku fu Yehofa tuu.’​—Yoh. 13:35.

4. San wi o luku aini a artikel ya?

⁴ Kande yu e akisi iseefi taki: ‘Fa mi sa yeepi wan sama fu go a fesi efu a ná mi e sutudeli anga en?’ Aini a artikel ya wi o luku san i sa du te wan sama kai i fu go anga en a wan sutudi, anga san i sa du te wan sutudi bigin kon a den komakandaa. Wi o luku tu fa owluman sa yeepi wan Beibelsutudi fu go a fesi te enke a dopu.

5. San i mu holi a pakisei te wan sama kai i fu go anga en a wan sutudi?

⁵ Te u de a wan sutudi, na a sama di abi a sutudi abi a faantiwowtu fu yeepi en fu fusutan den sani di ai leli. Te wan sama kai i fu go anga en a wan sutudi, a go yu e go fu holibaka gi en (Peleik. 4:9, 10). Fa i sa holibaka gi a peleikiman di abi a sutudi?

6. Fa i sa wooko anga a sani di sikiifi a Odo 20:18 te wan sama kai i fu go anga en a wan sutudi?

⁶ Seeka fosi u go na a sutudi. Taki anga a peleikiman di abi a sutudi fosi u go sutudeli anga a sama. (Leisi Odo 20:18.) I sa akisi a peleikiman taki: ‘San a sutudi e biibi? Omen yali a abi? Neen wawan e tan? Sowtu toli yu o luku anga en tide? San i wani a sutudi leli te wi o luku a pisi ya? San mi mu holi a pakisei te mi e taki anga en? Fa mi sa gi en taanga-sikin fu go a fesi?’ A peleikiman ná o poi taigi yu ala sani fu a sutudi, ma den sani di a o taigi i sa yeepi i fu gi a sutudi taanga-sikin. Na a sani ya wan zendeling den e kai Joy e du. A taki: ‘Te mi taki anga a taa peleikiman fosi u go na a sutudi, a sani ya e meke a moo makiliki gi en fu sabi fa a mu gi a sutudi taanga-sikin.’

7. Saide a bun fu seeka iseefi te wan sama akisi i fu go anga en a wan sutudi?

⁷ Te wan sama kai i fu go anga en a wan sutudi, a be o bun fi i seeka a pisi di wi o luku fosi i go na a sutudi (Esra 7:10). Dorin, a baala di u be taki fi en kaba taki: ‘Mi e teke en fu bigi te a taa peleikiman seefi seeka fosi u go na a sutudi. Te a du a sani ya, da enseefi o poi taki sani di e gi a sutudi taanga-sikin.’ Te a sutudi si taki u tu man seeka, a sani ya o  yeepi en fu si taki a pelensipali fu seeka fosi u sutudeli. Winsi yu á poi seeka iseefi finifini, toku a be o bun fu luku den moo pelensipali sani fu a pisi di wi o luku.

8. San i mu du efi i wani a begi fi i gi a sutudi taanga-sikin?

⁸ Begi a wan pelensipali pisi fu a sutudeli di wi e sutudeli anga sama. Neen meke a bun fu pakisei a fesi san yu o taki efu a peleikiman di abi a sutudi akisi i fu begi. Te i du a sani ya, da yu o man taki sani aini a begi fi i di o gi a sutudi taanga-sikin (Ps. 141:2). Hanae di e tan a Yapan taki: ‘Wan leisi, a sama di e sutudeli anga mi be tyai wan taa sisa kon na a sutudi. Noiti mi feegete a begi fu a sisa ya. A fasi fa a be e begi be e soi kiin taki en anga Yehofa a bun mati. Mi be wani de enke en. Mi be fii bun di a kai mi nen aini a begi.’

9. Enke fa Yakowbesi 1:19 e soi, da fa i sa holibaka gi a peleikiman di abi a sutudi?

⁹ Holibaka gi a sama di abi a sutudi. Omamuyovbi, wan spesuutu pionili di e tan a Nigeliya taki: ‘A taa peleikiman sa holibaka gi i te ai taki sani fu yeepi a sutudi fu fusutan a toli moo bun. Ma a á mu e taki ipi tumisi, bika a neen abi a sutudi.’ Fa yu o du sabi san i mu taki, anga on ten i mu taki wan sani? (Odo 25:11) Aliki bun te a peleikiman di abi a sutudi e taki, poti pakisei a san a sutudi e taki tu. (Leisi Yakowbesi 1:19.) Te yu e du a sani ya, yu o sabi on ten i mu taki, anga san i mu taki. Yu á mu e taki ipi tumisi. Luku bun tu fi i nai koti a peleikiman di abi a sutudi mofu te ai taki. Efu a peleikiman di abi a sutudi e taki fu wan toli, ná abaa go a wan taa toli. Ma i sa poti akisi efuso gi ageisitoli di o yeepi a sutudi fu fusutan a toli moo bun. Winsi a ná ala yuu yu abi wan sani fu taki na a pisi di wi e luku, a ná abi toobi. I sa e gafa a sutudi. E soi en taki yu e booko yu ede anga en, da a sani de o gi en taanga-sikin fu go a fesi.

10. Fa den ondoofenitoli fu u sa yeepi den Beibelsutudi?

¹⁰ Taigi den fa Yehofa yeepi i. Efi i si enke a de fanowdu, i sa taigi a sutudi fa i kon a waaleiti, sowtu tesi be miti i, anga fa Yehofa yeepi i (Ps. 78:4, 7). Kande den sani di yu o taigi en o yeepi en fu go a fesi. Den sa yeepi en tu fu si fa a sa pasa den tesi di e miti en (1 Peit. 5:9). Gabriel, wan pionili di e tan a Balasili taki san be yeepi en di a be e sutudeli Beibel. A taki: ‘Te den baala be e taigi mi san be miti den, mi be e si taki a ná  mi wawan sani be e miti. Den toli fu den soi mi taki Yehofa e si den tesi di e miti u. Efu a be yeepi den fu pasa den tesi fu den, da a o yeepi mi tu.’

11-12. Saide u mu bali wadaa gi den sutudi te den kon a komakandaa?

¹¹ Efu wan Beibelsutudi wani go a fesi te enke a dopu, a mu e go a den komakandaa ala yuu. A o fende wini te ai du a sani ya (Heb. 10:24, 25). Kande na a sama di e sutudeli anga en o kai en kon a komakandaa a fosi leisi. Ma te a doo ape kaba, na ala u sa gi en taanga-sikin fu tan kon a den komakandaa. Fa u sa du a sani ya?

¹² Bali wadaa gi a sutudi (Rom. 15:7). Efu u taki switi anga a sutudi te a kon a komakandaa, a sani ya sa meke a wani kon baka taa leisi. Go taki anga en te i si en, tyai en go taki anga taa baala anga sisa. Winsi a ná yu abi a sutudi toku i sa poti pakisei neen, bika kande a sama di e sutudeli anga en á doo komakandaa ete, efuso kande ai du taa sani. Aliki a sutudi te ai taki, soi taki yu e booko yu ede anga en. Sowtu wini i sa fende te yu e du den sani ya? Luku a toli fu wan baala den e kai Dmitrii. A baala ya á dopu langa ete, ma nownow en a wan dinali. A taki: ‘A fosi leisi di mi go a wan komakandaa, wan baala si mi taampu a doose, neen a kon taki anga mi. A kai mi go aini se. A omen taa sama be kon taki anga mi tu. A sani ya be foondoo mi. Ná pikin lobi mi be lobi a komakandaa. Na ala dei mi be sa wani go a komakandaa. A fositoon mi go a wan peesi neen sama libi switi anga mi so.’

13. Fa a fasi fa yu e tyai iseefi sa yeepi wan Beibelsutudi?

¹³ A sutudi mu man waka a yu baka. A fasi fa yu e tyai iseefi o soi a sutudi taki a wi na a foluku fu Gadu (Mat. 5:16). Vitali, wan pionili baala di e tan a Moldova taki: ‘Mi be e luku fa den baala anga sisa be e tyai denseefi. A sani ya soi mi kiin taki a den Yehofa Kotoigi abi a tuu biibi.’

14. Fa a fasi fa yu e tyai iseefi sa yeepi wan sutudi fu go a fesi?

¹⁴ Efu wan sutudi wani dopu, a mu e du den sani di ai leli. A ná ala yuu a sani ya makiliki. Ma te a sutudi si den wini di yu e fende te yu e du san sikiifi aini Beibel, a sani ya sa gi en taanga-sikin fu waka a yu baka (1 Kor. 11:1). Luku a toli fu Hanae baka. A taki: ‘Mi be e si fa den  baala anga sisa e du den sani di mi be e leli. Mi be e si fa den be e gi taawan taanga-sikin, fa den be e gi denseefi paadon, anga fa den be e soi taki den lobi taawan. Den baala anga sisa á be e kuutu denseefi, ala yuu den be e fende wan bun sani taki. Mi be wani de enke den.’

15. Enke fa Odo 27:17 e soi, da saide u mu meke mati anga den sutudi di e kon a komakandaa?

¹⁵ Meke mati anga a sutudi. Te a sutudi e kon a den komakandaa, i mu e tan soi taki yu e booko yu ede anga en (Filip. 2:4). Meke moiti fu kon sabi en moo bun. I ná abi fu sabi ala sani fu a sutudi, ma i sa akisi en fa a sutudi e go. Akisi en fa ai go anga en osufamii, efuso fa ai go anga a wooko fi en. Efu ai go a sikoo, i sa akisi en fa ai go a sikoo tu. Gafa en te i si taki ai meke moiti fu du den sani di ai leli. Den sani ya o meke yu anga en toon mati. Te i meke mati anga a sutudi, a sani de e yeepi en fu go a fesi. (Leisi Odo 27:17.) Nownow Hanae a wan kowownu pionili. A taki: ‘Di mi kon abi mati aini a kemeente, a be e moo switi gi mi fu go a den komakandaa. Winsi mi be weli, toku mi be e go a komakandaa. Fu di mi be abi mati aini a kemeente meke a be moo makiliki gi mi fu fika den mati di á be e dini Yehofa. Mi be wani toon Yehofa mati tu, neen meke mi dopu.’

16. Fa u sa soi wan sutudi taki u lobi en?

¹⁶ Te wan sutudi e meke moiti fu du den sani di ai leli, u mu soi en taki u lobi en. Wan fasi fa u sa du a sani ya a te wi e kai en kon a wi osu (Heb. 13:2). Denis di e tan a Moldova taki: ‘Di u be e sutudeli Beibel, a omen leisi baala anga sisa kai mi anga mi uman fu kon a den osu. Den be e taigi u fa Yehofa yeepi den. A sani ya be e gi u taanga-sikin. A fasi fa den be e libi anga u be yeepi u fu si taki u libi o moo waka bun te wi e dini Yehofa.’ Baka te a Beibelsutudi toon wan peleikiman, i sa wooko anga en aini a peleikiwooko. Diego, wan peleikiman di e tan a Balasili taki: ‘A omen baala anga sisa be e wooko anga mi aini a peleikiwooko. A sani ya yeepi mi fu sabi den moo bun. A omen sani den leli mi tu. Den sani ya yeepi mi fu moo lobi Yehofa anga Yesesi.’

17. Fa owluman sa yeepi den Beibelsutudi di e kon a komakandaa?

¹⁷ Meke ten gi den sutudi. Owluman, te wi e poti pakisei a den Beibelsutudi, a  sani ya sa yeepi den fu go a fesi. Meke ten fu e taki anga den sutudi te den kon a komakandaa. Efi yu e du a sani ya, den o si taki yu e booko yu ede anga den. I mu e kai den a den nen, moomoo te den opo den ana fu gi wan piki, da den o si taki yu e poti pakisei a den. Meke ten fu go anga den peleikiman a den sutudi fu den. A sani ya sa gi a sutudi taanga-sikin. Jackie, wan pionili di e tan a Nigeliya taki: ‘Omen Beibelsutudi e dyombo te den yee taki a baala di kon anga mi na a sutudi a wan owluman. Wan fu den sutudi be taki: “Noiti a pastoo fu mi be o du a sani ya. A den gudu sama wawan ai go luku a osu te den pai en.” Nownow a sutudi ya e kon a den komakandaa.’

18. Fa owluman sa du a sani di sikiifi a Toli fu den apostel 20:28?

¹⁸ Yeepi den peleikiman fu toon moo bun leliman. Owluman abi a faantiwowtu fu yeepi den peleikiman fu du den wooko moo bun. (Leisi Toli fu den apostel 20:28.) Efi i si taki sen e kisi wan peleikiman fu sutudeli anga wan sama te i de ape, i sa akisi en efu a wani i holi a sutudi a leisi de. Jackie taki: ‘Den owluman aini a kemeente lobi akisi mi fa ai go anga den sutudi fu mi. Te mi á sabi fa mi mu yeepi wan sutudi, den e yeepi mi.’ Den owluman sa yeepi den peleikiman fu tan du den wooko anga piisii (1 Tes. 5:11). Jackie taki: ‘Mi lobi te owluman e gi mi taanga-sikin. Te den gafa mi taki mi e du mi wooko bun, mi e fii enke te i diingi wan gaasi koo wataa aini wan hati san. Mi e moo fende kaakiti fu du ala san mi poi aini a peleikiwooko.’​—Odo 25:25.

19. Sowtu gaandi ala wi abi?

¹⁹ Winsi i ná abi sutudi nownow, toku i sa yeepi den sutudi fu taa peleikiman fu go a fesi. Te i go anga wan peleikiman na a sutudi fi en, i sa taki sani fu gi a sutudi taanga-sikin. Meke mati anga den sutudi te den e kon a den komakandaa. Tyai iseefi bun fu den sutudi sa waka a yu baka. Owluman sa yeepi den sutudi te den e poti pakisei a den, anga te den e yeepi den peleikiman fu toon moo bun leliman. Den mu e gafa den tu. Ala wi abi a gaandi fu yeepi den sutudi fu kon dini Yehofa. A sani ya e meke u piisii.