1. Enke fa Mateyesi 24:9 e soi, da saide wi á mu foondoo te sama e libi ogii anga u?

YEHOFA meke wi anga a fii fu lobi taawan. Wi e fii bun te u sabi taki taawan lobi u. Neen meke ai hati u te sama e libi ogii anga u. Son leisi wi e feele san den sama ya sa du anga u. Luku a toli fu wan sisa den e kai Georgina di e tan a Europa. A taki: ‘Di mi be abi 14 yali, mma be e libi ogii anga mi fu di mi e dini Yehofa. Mi be e fii enke sama á lobi mi. Mi be e fii enke mi á bun.’ * Wan baala den e kai Danylo taki: ‘Wan leisi suudati fon mi, den kosi mi, neen den taigi mi taki den o du ogii anga mi fu di mi e dini Yehofa. Ná pikin feele mi be e feele. A be e hati mi tu te mi be e pakisei den sani di den du anga mi.’ Ai hati u te sama e libi ogii u. Ma a nai foondoo u, bika Yesesi be taigi u taki sama be o buuse u fu di wi e dini Yehofa.​—Leisi Mateyesi 24:9.

2-3. Saide sama e buuse den bakaman fu Yesesi?

² A goontapu e buuse den bakaman fu Yesesi. Saide? Bika leti enke Yesesi, ‘u nai mumui anga a goontapu’ (Yoh. 15:17-19). Neen meke winsi fa wi e lesipeki den tiiman, toku u nai si den enke Gadu. U nai si a faaka fu a kondee enke sani di u mu dini tu. A Yehofa wawan wi e dini. Wi e si Yehofa enke a wan kodo Sama di abi a leti fu tii, winsi fa Saatan anga den bakaman fi en e feti fu poli a nen fi en (Gen. 3:1-5, 15). Wi e paati a nyunsu taki na a Kownukondee fu Gadu wawan poi puu ala den polobelema fu libisama. Dyonson a Kownukondee ya o puu ala den taa tiimakiti di de (Dan. 2:44; Openb. 19:19-21). Den sama di abi sakafasi e poolo te den yee a bosikopu ya. Ma den  sama di e du ogii nai wani yee a taki ya.​—Ps. 37:10, 11.

³ Sama e buuse u tu fu di wi e libi enke fa Yehofa wani. A fasi fa sama e libi nownow nai kai anga den weiti fu Yehofa. Aini a ten ya, sen nai kisi sama moo fu libi wan hululibi. Den e du ala den sani di be meke Yehofa poli Sodom anga Gomora (Yud. 7). Fu di u nai libi enke den, meke den e soso u. Den e fende taki u nai teke sama enke fa den de.​—1 Peit. 4:3, 4.

4. San o yeepi u fu holidoo te sama e libi ogii anga u?

⁴ San o yeepi u fu holidoo te sama e libi ogii anga u? U mu e biibi taki Yehofa o yeepi u. Leti enke fa wan skelt e tapu den ga di feyanti e sutu kon a wan suudati, a so a biibi fu wi ‘e kii a faya fu den ga di a ogiiwan e sutu kon a u’ (Efe. 6:16). Ma a ná biibi wawan u mu abi. U mu lobi taawan tu. Saide? Bika lobi o yeepi u fu wi ‘ati nai boon gaw’. A o yeepi u tu fu holidoo winsi san e pasa (1 Kor. 13:4-7, 13). Meke u luku fa a lobi di u lobi Yehofa, den baala anga sisa, anga a lobi di u lobi den sama di e libi ogii anga u, o yeepi u fu holidoo winsi san e pasa.

5. San Yesesi be poi du fu di a be lobi en Dda?

⁵ A neti fosi Yesesi dede, a taigi den bakaman fi en taki: ‘Mi e du san a Dda taigi mi fu du, fu di mi lobi en’ (Yoh. 14:31). Na a lobi di Yesesi lobi Yehofa yeepi en fu pasa ala den tesi di be miti en. Efu u lobi Yehofa anga u hii ati, useefi o poi pasa den tesi di e miti u.

6. Enke fa Romesama 5:3-5 e soi, da fa a foluku fu Yehofa e fii te sama e libi ogii anga den fu di den e dini Yehofa?

⁶ Lobi e yeepi den sama di e dini Yehofa fu holidoo te sama e du ogii anga den. Wan leisi di a Moo Gaan Kuutu-osu fu den Dyu be taigi den apostel taki den á mu peleiki moo, den á be du san den man ya be taki. Fu di den be lobi Yehofa meke ‘den be aliki en moo libisama’ (Toli 5:29; 1 Yoh. 5:3). Na aseefi lobi ya e yeepi den baala fu wi aini a ten ya te lanti e du ogii anga den. Winsi san e miti den, den nai gwe fika Yehofa. Te goontapu e buuse u, u nai lasi-ati, ma wi e si en enke wan gaandi te sama e du ogii anga u fu Yehofa ede.​—Toli 5:41; leisi Romesama 5:3-5.

7. San u mu du te u famii e libi ogii anga u fu di wi e dini Yehofa?

⁷ Te den famii fu wi e libi ogii anga u fu di wi e dini Yehofa, a sani ya sa meke u nai piisii moo. Te u bigin sutudeli Beibel, kande u famii o wani tapu u fu di den e si enke a koli sama e koli u. Son wan e si enke wi ede nai wooko bun moo. (Luku Malikisi 3:21 tu.) Kande den e ligei anga u, efuso du taa sani fu tapu u fu wi á sutudeli. Te den sani ya e miti u, wi á mu foondoo, bika Yesesi be taki: ‘Den feyanti fu wan sama, o de en eigi famii’ (Mat. 10:36). Winsi u famii e libi ogii anga u, toku u nai si den enke u feyanti. A lobi di u lobi Yehofa e yeepi u fu moo lobi taa sama, neen meke wi e libi bun anga den winsi san den e du anga u (Mat. 22:37-39). Ma a sani ya á wani taki wi o du sani di Yehofa e buuse fu di u lobi den famii fu u.

8-9. San be yeepi wan sisa fu holidoo di tesi be e miti en?

⁸ Georgina, di u be kai na a bigin holidoo winsi fa en mma be e libi ogii anga en. A taki: ‘A mi anga mma be bigin sutudeli Beibel. Ma baka sigisi mun di mi taigi en taki mi wani go a den komakandaa, a  bigin libi ogii anga mi. Bakaten mi be kon fusutan taki a be bigin taki anga sama di daai baka gi Yehofa. Te mi anga en be e taki, a be e suku fu koli mi anga den lei di den be e taigi en fu a olikanisâsi. Son leisi a be e kosi mi, a be e hali mi a mi uwii, a be e yoko mi, a be e towe den buku fu mi tu. Di mi tapu 15 yali neen mi dopu. Fu di mma be wani mi gwe fika Yehofa, meke a poti mi a wan peesi pe den e poti yonkuuwan di nai tyai denseefi bun. Son wan be e somoko takuu tabaka, taawan be e fufuu efuso du taa sani di Yehofa á lobi. Ai moo taanga fu holidoo te a sama di e du ogii anga i, a wan sama di be mu lobi i, wan sama di mu soi taki ai booko en ede anga i.’

⁹ San yeepi Georgina fu holidoo? A taki: ‘Na a dei di mi kaba leisi a hii Beibel mma bigin ligei anga mi. A leisi di mi be leisi a hii Beibel yeepi mi fu biibi anga mi hii ati taki a disi na a tuu biibi. Mi be kon sabi Yehofa bun. Ala yuu mi be e begi en, a be e aliki den begi fu mi tu. A pisiten di mi be e tan na a peesi pe mma be sende mi go, wan sisa be kai mi kon neen osu fu sutudeli Beibel makandaa. Den taa baala anga sisa be e gi mi taanga-sikin tu te mi be go a komakandaa. Mi be e fii enke mi anga den a be famii. Mi be e si kiin taki winsi sama be e du ogii anga u, Yehofa taanga moo den.’

10. San u sabi taki Yehofa o du gi u?

¹⁰ Apostel Pawlesi be taki ‘sani á de di poi tapu Gadu anga Yesesi fu lobi u’ (Rom. 8:38, 39). Winsi wi o pina fu wan pisiten, toku noiti Yehofa o gwe fika u. Ala yuu a o gi wi a kaakiti di wi abi fanowdu fu holidoo. Leti enke fa Yehofa be meke den baala anga sisa gi Georgina taanga-sikin, a so a o meke den gi u taanga-sikin tu.

11. Yesesi be taigi den bakaman fi en aini Yohanisi 15:12, 13 taki den mu lobi denseefi. Fa lobi be o yeepi den te tesi be miti den?

¹¹ A neti fosi Yesesi dede, a taigi den bakaman fi en taki den mu lobi denseefi. (Leisi Yohanisi 15:12, 13.) A be sabi taki a lobi di den be o lobi denseefi, be o yeepi den fu holidoo te sama be e libi ogii anga den. Meke u luku a toli fu a kemeente di be de a Tesalonika. Fanafu di a kemeente ya sete, neen sama be e libi ogii  anga den. Ma a sani ya á be tapu den baala anga sisa ya fu lobi Yehofa. Den be e dini en anga den hii ati (1 Tes. 1:3, 6, 7). Pawlesi be gi a kemeente taanga-sikin fu meke moiti fu moo lobi denseefi (1 Tes. 4:9, 10). Lobi be o yeepi den fu toosutu den sama di lasi-ati. A be o yeepi den tu fu holibaka gi den wan di swaki (1 Tes. 5:14). Den be du san Pawlesi taki, bika wan sani fu wan yali baka di a sende du fu tu biifi gi den, a taigi den taki: ‘Dei fu dei wi e moo lobi useefi’ (2 Tes. 1:3-5). A lobi di den be lobi denseefi be e yeepi den fu holidoo te sama be e libi ogii anga den.

12. Fa den baala anga sisa fu wan kondee soi taki den lobi denseefi di feti booko a pe den e tan?

¹² Luku a toli fu Danylo anga en uman. Winsi fa feti be booko na a pisi pe den be e tan, toku den be e go a komakandaa ete. Den be e peleiki tu. Den be e paati a nyanyan di den be abi anga den baala anga sisa di á be abi sani fu nyan. Danylo taki: ‘Wan dei den suudati kon anga goni a mi osu, neen den taigi mi taki mi á mu dini Yehofa moo. Di mi á du san den taki neen den fon mi, baka dati den sutu pasa a mi tapu ede fu di den be wani mi feele. Fosi den gwe, den taigi mi taki te den be o kon baka den be o suwa anga mi uman. Ma di den baala yee san pasa, den sende u gawgaw go a wan taa foto. Noiti mi o feegete fa den baala ya soi taki den lobi u. Di u doo na a taa foto, den baala fu ape gi u nyanyan. Den yeepi mi suku wooko anga wan peesi fu tan. A sani ya meke u be poi yeepi taa baala anga sisa tu di be e lowe komoto a peesi pe feti be booko.’ A toli ya e soi taki a lobi di u lobi useefi sa yeepi u fu holidoo te sama e libi ogii anga u.

13. Fa a santa yeye e yeepi u fu holidoo te sama e libi ogii anga u?

¹³ Yesesi be taigi den bakaman fi en taki den mu lobi den sama di e buuse den (Mat. 5:44, 45). A sani ya á makiliki. Ma a santa yeye fu Yehofa sa yeepi u. Lobi, pasensi, sakafasi anga a dwengi di u man dwengi useefi a wantu fu den manii di a yeye ya e yeepi u fu abi (Gal. 5:22, 23). Den manii ya e yeepi u fu holidoo te sama e libi ogii anga u. A omen sama di be e libi ogii anga u kon a waaleiti di den si fa den man, den uman, den pikin, efuso wan Kotoigi di e tan a den se e tyai enseefi. Efu ai  taanga gi i fu lobi den sama di e libi ogii anga i fu di yu e dini Yehofa, begi en fu a gi yu en santa yeye (Luk. 11:13). U sa biibi taki ala yuu a moo bun fu du sani enke fa Yehofa wani.​—Odo 3:5-7.

14-15. Fa den sani di sikiifi a Romesama 12:17-21 yeepi Yasmeen fu libi bun anga en man winsi fa a be e libi ogii anga en?

¹⁴ Luku a toli fu Yasmeen di e tan a Midden Oosten. En man be denki taki a sama koli en go toon wan Yehofa kotoigi, neen meke a be e puubei fu tapu en fu dini Yehofa. En man be e kosi en. A sende famii, wan keliki fesiman anga wan bonuman go taigi en taki den o du sani anga en efu a á tapu fu mosoo anga den Kotoigi. Den taigi Yasmeen tu taki ai booko a famii. Wan leisi di a be de a komakandaa en man go kosi den baala. A omen leisi Yasmeen be e kee fu di en man á be e libi bun anga en.

¹⁵ Den baala anga sisa na a Kownukondee zaal be e gi Yasmeen taanga-sikin. Den owluman be taigi en fu meke moiti du san sikiifi a Romesama 12:17-21. (Leisi en.) Yasmeen taki: ‘A sani ya á be makiliki. Ma mi begi Yehofa fu a yeepi mi, neen mi puubei fu du san Beibel taki. Te mi man be e iti santi aini a kukuu, mi á be e ligei anga en, ma mi be e kiin mi en. Te a be e kosi mi, mi á be e piki. Te a be siki, mi be e solugu en.’

16-17. San a toli fu Yasmeen e leli u?

¹⁶ Yasmeen fende wini di a tan soi lobi gi a man fi en. A taki: ‘Nownow mi man e moo fitoow mi, bika a sabi taki na ala yuu mi e taki a tuu. Ai aliki mi te mi e taigi en san mi e biibi. Nownow a nai libi ogii anga mi moo. Te mi e go a komakandaa ai taigi mi fu nyan bun fu a komakandaa. A libi fu wi e go moo bun, takitaki nai de aini a osu so moo. Mi e winsi taki wan dei a sa kon dini Yehofa makandaa anga mi.’

¹⁷ A toli fu Yasmeen e soi taki ‘lobi abi boo anga ala sani, ai howpu ala sani, ai holidoo tu winsi san e pasa’ (1 Kor. 13:4, 7). Te sama e libi ogii anga u, a sani ya sa meke u lasi-ati, ma lobi taanga moo den ogii di sama e du anga u. Efu wi e libi bun anga den sama di e libi ogii anga u, a sani ya sa meke denseefi daai libi bun anga u. Yehofa e piisii te wi e soi taki u lobi taawan winsi san den e du anga u. Ma winsi den sama di e libi ogii anga wi á wani kengi, tokuso u sa piisii. San o yeepi u fu piisii winsi sama e libi ogii anga u?

18. Saide u mu piisii te sama e libi ogii anga u?

¹⁸ Yesesi be taki: ‘U mu piisii te sama e buuse u’ (Luk. 6:22). A ná wani u wani sama buuse u, efuso libi ogii anga u. Ma saide u mu piisii te sama e libi ogii anga u? A fosi sani di e meke wi e piisii, a di u sabi taki Yehofa e poolo anga u te a si fa wi e holidoo (1 Peit. 4:13, 14). Du fu tu, wi e piisii fu di u sabi taki u biibi e moo taanga te tesi e miti u (1 Peit. 1:7). Du fu dii, wi e piisii fu di u sabi taki efu u holidoo, wi o fende a teego libi.​—Rom. 2:6, 7.

19. Saide den apostel be e piisii baka di sama be fon den?

¹⁹ Baka di Yesesi go a hemel, den apostel be kon fusutan san a be wani taki di a taki wi o piisii te sama e libi ogii anga u. Wan leisi sama be fon den, neen den taigi den taki den á mu peleiki moo. Di a sani ya miti den apostel, den be e piisii. Saide? Den be e piisii ‘bika Gadu be si den enke sama di fiti fu teke sen fu Yesesi ede’ (Toli 5:40-42). A lobi di den be abi gi a Masaa fu den be bigi moo a feele di den be e feele san sama be o du anga den. Den soi a lobi ya, di den tan paati a bun nyunsu gi ala sama. Aini a ten ya, a omen baala anga sisa e dini Yehofa anga den hii ati winsi tesi e miti den. Den sabi taki Yehofa ná o feegete a wooko di den du gi en, anga a soi di den soi taki den lobi a nen fi en.​—Heb. 6:10.

20. San wi o luku aini a taa artikel?

²⁰ Solanga Saatan e tii a goontapu ya ete, sama o go e libi ogii anga u (Yoh. 15:19). Ma u ná abi fu feele te a sani ya e miti u. Aini a taa artikel wi o si taki Yehofa ‘e yeepi u fu wi abi deki-ati. Ai kibii u tu’ (2 Tes. 3:3). Meke u du ala san u poi fu tan lobi Yehofa, den baala anga sisa, anga den sama di e libi ogii anga u. Te wi e du a sani ya, u biibi o taanga, wi o go e libi na a wan anga taawan, wi o meke Yehofa piisii. Wi o soi tu taki lobi taanga moo den ogii di sama e du anga u.