Son Kelesten e koboloiki app fu taki anga den famii efuso taa baala anga sisa. Ma wan Kelesten di koni o holi san Beibel taki a pakisei te ai wooko anga den app ya. Beibel taki: ‘Wan sama di koni e go kibii te a si taki ogii o miti en. Ma a sama di ná abi ondoofeni e waka go doo, neen meke sani miti en.’​—Odo 27:12.

Wi e teke en fu bigi taki Yehofa e kibii u, neen meke u nai mosoo anga sama di sa poli wi anga u baala efuso sisa. U nai mosoo anga sama di den baala puu na a kemeente tu efuso sama di e leli taawan falisi sani (Rom. 16:17; 1 Kor. 5:11; 2 Yoh. 10, 11). A ná ala sama di e kon a komakandaa e tyai denseefi enke fa Yehofa wani tu (2 Tim. 2:20, 21). U mu holi den sani ya a pakisei te wi e suku mati. A o taanga fu sabi efu wan sama a bun mati, efu a internet wawan wi anga en e taki.

Moomoo te a kulu bigi, u mu luku bun, bika son Kelesten be go aini gaan kulu neen a tyai ogii gi den bakaten. Fa wan Kelesten sa soi taki a koni, te wan sama akisi en fu go aini wan kulu di abi omen ondoo efuso omen dunsu sama? I ná o poi sabi fa ala den sama aini a kulu ya de tuutuu. Kande yu á sabi son wan fu den seefi. Psalm 26:4 e taki: ‘Mi nai sidon anga sama di lobi lei. Mi nai paa anga sama di e bidiigi taawan.’ A sani di sikiifi aini a tekisi ya e soi taki anga soso sama di u sabi tuutuu u mu e taki te wi e koboloiki den app ya.

Kelesten mu luku bun on langa den e teke fu gi toli anga den sama aini a kulu. Boiti dati, den mu luku bun sowtu toli den e gi tu. Wi á mu fii enke ala yuu te wan sama sende wan sani kon aini a kulu, da u mu piki. Pawlesi be taigi Timotiyesi taki aini den lasiti dei, a omen sama be o go e gongosa, den be o go e taki sama sani tu (1 Tim. 5:13). Son yuu na aseefi sani sama e du te den de a internet.

Nawan Kelesten di e meke moiti fu du san Yehofa taki wani de a peesi pe sama e taki taawan sani. Denseefi ná o taki sama sani tu (Ps. 15:3; Odo 20:19). Den ná o holibaka gi nawan toli di sama e paati di den á kaba sabi efu a tuu (Efe. 4:25). A omen toli de na a website fu u di u sa poti pakisei. Pakisei a JW Broadcasting^® di e kon ala mun, anga den taa sani di de na a website di e taki fu Beibel. U sa biibi ala den toli di e kon na website ya.

Son Kelesten e koboloiki den app yaaso fu suku sama fu wooko gi den, fu bai sani, fu seli sani, anga fu meke lekalaama gi den sani di den e seli. Den sowtu toli ya a bisnis toli, den ná abi nawan sani fu du anga a dini di wi e dini Yehofa. Beibel taki a fasi fa wi e libi mu soi taki wi á lobi moni, neen meke wan Kelesten á mu koboloiki den baala anga sisa fu den fu meke moni.​—Heb. 13:5.

Ma u sa koboloiki den app ya fu piki moni gi baala anga sisa di de a nowtu efuso fu yeepi baala anga sisa a peesi pe wan gaan ogii pasa? U lobi den baala anga sisa fu u, neen meke wi e yeepi den te den de a nowtu. Wi e meke moiti fu gi den taanga-sikin tu (Yak. 2:15, 16). Ma efu u be o koboloiki den app ya fu piki moni gi baala anga sisa di de a nowtu, a sani ya be o meke a moo taanga gi a beikantoo efuso a kemeente, bika den seeka sani kaba gi sama fu gi moni fu holibaka gi den baala anga sisa ya (1 Tim. 5:3, 4, 9, 10, 16). Nawan fu u be o wani tyai nen taki u wani teke a peesi fu den sama di Yehofa poti fu du den wooko ya.

U wani gi Yehofa gaandi anga ala san wi e du (1 Kor. 10:31). Neen meke u mu konikoni fa wi e wooko anga den sowtu app ya, da u ná o du wan sani di o tyai ogii gi u baala anga u sisa.