1. San yonkuu baala poi du?

YONKUU baala, a omen sani i sa du aini a olikanisâsi fu Yehofa, bika i yonkuu, yu abi omen kaakiti (Odo 20:29). A omen sani yu e du kaba fu yeepi den baala anga sisa aini a kemeente. Kande yu e meke moiti fu toon dinali, ma kande yu e si enke i yonkuu tumisi fu tyai a faantiwowtu de. Ma winsi i yonkuu, toku den sani di yu e du aini a kemeente nownow, sa meke taawan fitoow i.

2. San wi o luku aini a artikel ya?

² Wi o taki fu Kownu David aini a artikel ya. Wi o taki tu fu Kownu Asa anga Kownu Yowsafat fu Yuda. Wi o luku san be miti den dii man yaaso, san den du di den sani ya miti den, anga san yonkuu baala sa leli fu den.

3. Fa yonkuu baala sa yeepi den gaandiwan aini a kemeente?

³ Di David be yonkuu, a be leli du sani di be sa tyai wini gi taawan. En anga Yehofa a be bun mati. A be sabi pee poku tu, neen meke a be fende a wooko fu toosutu Saul, a sama di Yehofa be poti enke kownu (1 Sam. 16:16, 23). Yonkuu baala, i sabi du wan sani di sa tyai wini gi den taawan aini a kemeente? Kande i sa leli den gaandi baala anga sisa fa den sa wooko anga a telefon  fu den. I sa leli den tu fa den sa seeka gi den komakandaa efuso sutudeli anga denseefi anga den telefon. Somen fu den á sabi wooko anga den sani ya, neen meke efu u yeepi den, den o teke en fu bigi.

4. Fa yonkuu baala sa waka a David baka? (Luku a fowtow a fesise fu A Wakititolen.)

⁴ David be e wooko taanga, a be e du en wooko bun tu, neen meke sama be sa fitoow en. Di David be yonkuu, neen be e luku den sikapu fi en dda. A wooko ya á be makiliki. David be taigi Kownu Saul taki: ‘Masaa, wan leisi di mi be e luku den sikapu fu nda wan lew kon, wan taa leisi wan beer kon. A tu leisi den meti ya kisi u sikapu fu tyai gwe. Mi lon na a lew baka neen mi naki en towe a doti, neen mi puu a sikapu neen mofu’ (1 Sam. 17:34, 35). David á be e feele fu feti gi den sikapu fi en dda, bika a be sabi taki neen be mu kibii den. Yonkuu baala sa waka a David baka. U mu e wooko taanga. Te den baala gi u wan wooko, u mu meke moiti fu du en bun.

5. Enke fa Psalm 25:14 e soi, da san na a moo pelensipali sani di yonkuu baala mu du?

⁵ Di David be yonkuu, en anga Yehofa a be bun mati. A be sabi taki a ná a deki-ati di a be abi, efuso a sabi di a be sabi pee poku a be den moo pelensipali sani. David á be e si Yehofa enke en Gadu namo, ma en anga Yehofa a be bun mati. (Leisi Psalm 25:14.) Yonkuu baala, u mu meke moiti fu wi anga Yehofa toon bun mati, a dati na a moo pelensipali sani di u mu du. Efu wi anga Yehofa a mati, u sa fende son gaandi aini a kemeente.

6. Fa son sama be e si David?

⁶ Son sama be e si enke David be yonkuu tumisi fu du son sani. Taawan be fende taki den á be poi fitoow en. Di David taki a o feti anga Goliyat, neen Saul taigi en taki: ‘Yu a wan boi ete’ (1 Sam. 17:31-33). Aseefi dei de, wan fu den baala fu David be taigi en taki a á be e luku den sikapu fi en dda bun (1 Sam. 17:26-30). Ma Yehofa be sabi David bun. A á be e si enke a yonkuu tumisi. A be sabi taki David be e du en  wooko bun. David be e fitoow en mati Yehofa, neen meke a yeepi en fu wini Goliyat.​—1 Sam. 17:45, 48-51.

7. San a toli fu David e leli u?

⁷ San a toli fu David e leli u? Ai soi taki u mu abi pasensi. Te i kon moo bigi, ai taanga gi son sama di be sabi yu a pikinnengee ten fu si yu enke gaansama. Ma Yehofa sabi fa i de tuutuu. A sabi sama a yu, anga san i poi du (1 Sam. 16:7). I mu meke moiti fi yu anga Yehofa toon bun mati. David be e luku den sani di Yehofa meke. A so a be e kon sabi sowtu manii Yehofa abi. Na a sani ya yeepi en fi en anga Yehofa toon mati (Ps. 8:3, 4; 139:14; Rom. 1:20). I mu e begi Yehofa tu fu a yeepi i. Kande den pikin a sikoo e soso i fu di yu a wan Yehofa Kotoigi. Efu a so, i sa begi Yehofa fu a yeepi i fu pasa a tesi ya. I mu wooko anga den sani di sikiifi aini Beibel, anga den buku anga felon di a olikanisâsi meke tu. Ala yuu te i si fa Yehofa yeepi i, yu o moo fitoow en. Te taawan e si fa yu e wooko anga den sani di Yehofa e leli u, den o moo fitoow i.

8-9. San be yeepi David fu wakiti anga pasensi te enke a be toon kownu? San yonkuu baala sa leli fu a toli fu David?

⁸ Meke u luku wan taa sani di be miti David. Baka di Yehofa salufu David, a omen yali a be mu wakiti fosi a bigin tii enke kownu fu Yuda (1 Sam. 16:13; 2 Sam. 2:3, 4). San be yeepi David fu wakiti anga pasensi? David á be e sidon booko en ede anga den polobelema fi en, ma a be e du san a be poi du. Di David be lowe go tan na a pisi fu den Filisteyasama, a teke a okasi de fu feti anga den feyanti fu den Islayelisama. A be du a sani yaaso fu kibii den sama fu Yuda.​—1 Sam. 27:1-12.

⁹ San yonkuu baala sa leli fu David? Du ala san i poi fu yeepi den baala anga sisa fi i. Meke u luku a toli fu wan baala den e kai Ricardo. * Senten di a be yonkuu, a be wani du a kowownu pioniliwooko. Ma den owluman be taigi en taki a á be kaba ete. En ati á boon a den owluman, ma a meke moiti du moo aini a peleikiwooko. A taki: ‘Bakaten mi kon si taki den baala be abi leti, mi be mu wooko a wantu sani ete. A dati mi du tu. Mi be e meke moiti fu go na ala den sama di be wani sabi moo, mi be e seeka fosi mi go a den tu. A so mi kon fende mi fosi Beibelsutudi. Moo mi be e peleiki, moo a be e moo makiliki gi mi fu taki anga sama aini a peleikiwooko.’ Nownow Ricardo a wan fayafaya pionili, en a wan dinali tu.

10. San David be du fosi a teke wan pelensipali bosoloiti?

¹⁰ Meke u luku wan taa sani di be miti David. Di David anga den man fi en be de a Filisteya, wan leisi den be fika den uman anga den pikin a osu neen den go a wan feti. Di den gwe, neen feyanti go kisi den sama fu den tyai gwe. David a be wan bun fetiman, a be sa fende wan fasi fu fii den sama fi en. Ma a á du a sani de. A begi Yehofa, neen a akisi en san a mu du. David go na a pilisite Abiyatar fu suku yeepi a Yehofa. A akisi Yehofa taki: ‘Mi mu go a den fufuuman baka?’ Yehofa taigi en taki a sa go, bika a o wini den feyanti, da a tyai den  sama, anga ala den sani di den be fufuu kon baka (1 Sam. 30:7-10). San a toli ya leli i?

11. San i mu du fosi i du wan sani?

¹¹ Fosi i du wan sani, a be o bun fu akisi i mma anga i dda fa den e si a sani di i wani du. I sa taki anga den owluman tu. Yehofa e fitoow den owluman, neen meke iseefi sa fitoow den. A taki den man ya de enke kado gi a kemeente (Efe. 4:8). Meke moiti fu waka na a biibi fu den baala ya baka. Te den e poti yu a pasi, i mu aliki. A sani ya o yeepi i fu du sani anga koni. Now wi o luku a toli fu Kownu Asa.

12. Sowtu manii Kownu Asa be abi di a be bigin tii?

¹² Di Asa be yonkuu, a be abi deki-ati anga sakafasi. Baka di en dda Abiya dede, neen Asa bigin puu den falisi gadu di sama be e dini aini a kondee. Asa taigi den ‘sama fu Yuda taki den mu dini Yehofa, a Gadu fu den afo fu den. A taigi den tu taki den mu holi den weiti fi en’ (2 Kolon. 14:1-7). Di Sera, a kownu fu Etiyopiya be o kon feti anga Yuda anga wan miliyun suudati, Asa begi Yehofa fu yeepi en. A taki: ‘Yehofa, te i wani yeepi sama, i nai luku efu den ipi efuso taanga. Yehofa u Gadu, mi e begi i, yeepi u baa, bika a yu wi e fitoow.’ Den sani di Asa taki ya e soi taki a be e biibi taki Yehofa be poi kibii a foluku fi en. Neen meke ‘Yehofa yeepi en fu wini den Etiyopiyasama’.​—2 Kolon. 14:8-12.

13. San miti Asa bakaten? Saide a sani ya miti en?

¹³ Di wan miliyun suudati be kon fu feti anga Asa, a be begi Yehofa, neen Yehofa yeepi en fu wini den suudati ya. Ma bakaten di Kownu Baasa fu Islayeli kon fu feti anga Yuda, Asa á fitoow Yehofa moo. A Siriya a go suku yeepi. Sani á waka bun di a du a sani ya. Yehofa meke polofeiti Hanani taigi en taki: ‘I ná o wini den suudati fu a kownu fu Siriya, bika na a kownu fu Siriya i fitoow, yu á fitoow Yehofa.’ Fanafu di Asa du a sani ya, na ala yuu taa kondee be e kon feti anga Yuda (2 Kolon. 16:7, 9; 1 Kow. 15:32). San a toli ya e leli u?

14. Fa i sa soi taki yu e fitoow Yehofa? Enke fa 1 Timotiyesi 4:12 e soi, da sowtu wini yu o fende te yu e fitoow Yehofa?

 ¹⁴ I mu abi sakafasi da i fitoow Yehofa ala yuu. Di i dopu, i soi kaba taki i biibi taanga, i soi tu taki yu e fitoow Yehofa. Anga ala piisii Yehofa teke yu aini a osufamii fi en. Ma te i dopu, yu á kaba ete. I mu tan fitoow Yehofa. Kande yu e fitoow Yehofa te i mu teke pelensipali bosoloiti. Ma yu e soi taki yu e fitoow en aini ala sani? Yu e fitoow Yehofa te yu e luku sowtu wooko yu o teke, san yu o du fu piisii, efuso san yu o du anga i libi? Te i mu du den sani ya, yu á mu fitoow iseefi. Luku san Beibel e taki fu a sani di i wani du, da i wooko anga san i leli (Odo 3:5, 6). Efi yu e du sani na a fasi ya, yu o meke Yehofa piisii. Den baala anga sisa aini a kemeente o lesipeki i tu.​—Leisi 1 Timotiyesi 4:12.

15. Enke fa 2 Koloniki 18:1-3; 19:2 e soi, da sowtu fowtu Kownu Yowsafat meke?

¹⁵ Ala wi abi sondu, neen meke na ala yuu wi o go e meke fowtu. Ma a sani ya á mu tapu i fu du ala san i poi gi Yehofa. Luku a toli fu Kownu Yowsafat. A be abi bun manii. Di a be yonkuu, ‘a be e suku yeepi na a Gadu fi en dda. A be e holi den weiti fi en tu’. Boiti dati, a be sende sama go na ala den foto fu Yuda fu leli a foluku san a Weiti fu Yehofa e taki (2 Kolon. 17:4, 7). Ma winsi fa Yowsafat be abi bun manii, toku a ná ala yuu a be e du sani anga koni. Wan leisi a be du wan sani di Yehofa á lobi, neen Yehofa sende polofeiti Hanani go puu kaasi gi en. (Leisi 2 Koloniki 18:1-3; 19:2.) San a sani ya e leli u?

16. San a toli fu Rajeev leli i?

¹⁶ I mu e aliki te taawan e poti yu a pasi. A omen yonkuu baala ai taanga gi fu poti a dini di den e dini Yehofa a fesi. Efu a sani ya e taanga gi i tu, yu á mu gi abaa. Luku a toli fu wan yonkuu baala den e kai Rajeev. A taki: ‘Di mi be moo yonkuu, mi á be sabi san mi be wani du anga mi libi. Mi á be lobi go a komakandaa anga peleikiwooko. A soso koi, anga sport be de a mi ede.’  San yeepi Rajeev? Wan owluman di be e booko en ede anga en go taki anga en. Rajeev taki: ‘A yeepi mi fu fusutan san 1 Timotiyesi 4:8 wani taki.’ Rajeev be abi sakafasi, neen meke a wooko anga san a baala soi en. A go sidon pakisei san a den moo pelensipali sani aini en libi. A taki: ‘A sani ya yeepi mi fu bigin poti a dini di mi e dini Yehofa a fesi.’ Sowtu wini a fende di a du a sani ya? Rajeev taki: ‘Wantu yali baka di a baala taki anga mi, mi toon dinali aini a kemeente.’

17. Fa den baala anga sisa e si den yonkuu baala di e dini Yehofa?

¹⁷ Ná pikin lobi den baala anga sisa lobi den yonkuu baala di e dini Yehofa makandaa anga den (Sef. 3:9). Ai switi gi den fu si fa yu e wooko taanga gi Yehofa anga piisii. Den baala anga sisa ya lobi i.​—1 Yoh. 2:14.

18. Enke fa Odo 27:11 e soi, da fa Yehofa e si den yonkuu baala di e dini en?

¹⁸ Yonkuu baala, ná feegete taki Yehofa lobi i, ai fitoow i. A be taki aini den lasiti dei, wan gaan kulu yonkuman be o de kabakaba fu wooko gi en (Ps. 110:1-3). Yehofa sabi taki i lobi en, a sabi tu taki i wani wooko gi en. Neen meke i mu e pasensi anga taawan, yu á mu e kuutu iseefi tumisi tu. Te i meke wan fowtu, i mu aliki te taawan e poti yu a pasi. I mu si enke a Yehofa seefi e taki anga i (Heb. 12:6). I mu e du ala den wooko di den baala gi yu anga i hii ati. Ma a moo pelensipali sani di i mu meke moiti fu du, a fu meke i Dda di de a hemel piisii anga ala san yu e du.​—Leisi Odo 27:11.