1-2. On ten Yehofa e piisii anga a dini di wi e dini en?

 SAN yu e pakisei te i yee a wowtu ‘dini’? Kande yu e pakisei wan baala di sutu kini a doti e begi Yehofa fosi a go siibi. Efuso kande yu e pakisei wan osufamii di e piisii te den e du a Osufamii Anbegi.

² Ala den sani ya a wantu fasi fa wi e dini Gadu. Yehofa e piisii anga a dini di den e dini en? We, a o piisii anga den efu den e du san a taki. A o piisii tu efu den e dini en fu di den lobi en. U lobi Yehofa anga u hii ati. U sabi taki neen u mu dini, neen meke u wani du ala san u poi fu dini en enke fa a wani.

3. San wi o luku aini a artikel ya?

³ Aini a artikel ya, wi o luku on ten Yehofa be e piisii anga den sama di be e dini en a fosi. Wi o taki fu aitin sani tu di Yehofa wani u du te wi e dini en. Te wi e luku den sani ya, a be o bun fu pakisei fa u sa du sani moo bun te wi e dini Yehofa. Boiti dati, wi o luku saide wi e piisii te wi e dini Yehofa enke fa a wani.

4. Fa den sama di be e dini Yehofa a fosi be soi taki den lobi en?

⁴ Den sama enke Abel, Nowa, Abalaham anga Yopu be soi taki den lobi Yehofa. Fa den be du a sani ya? Den be e aliki Gadu ala yuu, den be e du sani di e soi taki den e biibi en anga den hii ati tu. Son wan fu den be fika omen sani a baka fi en ede. Beibel nai taigi wi ala den sani di  den du, ma u sabi taki den be du ala san den poi fu meke Yehofa piisii. Na a sani ya meke a be e piisii anga a dini di den be e dini en. Bakaten Yehofa be gi den Islayelisama a Weiti fu Mosesi. A weiti ya be e soi den pilisisi fa den be mu dini Yehofa efu den be wani a piisii anga den.

5. Fa Yehofa be wani sama dini en baka di Yesesi dede?

⁵ Baka di Yesesi kon dede gi u, a á be de fu den sama di e dini Yehofa holi a Weiti fu Mosesi moo (Rom. 10:4). Den bakaman fu Yesesi be mu holi wan nyun weiti, ‘a weiti fu Kelestesi’ (Gal. 6:2). A weiti ya na ala den sani di Yesesi be e leli den bakaman fi en, anga den sani di a be du di a be de a goontapu. Den bakaman fu Yesesi be mu meke moiti fu waka neen baka. A so den be o soi taki den e holi a weiti fu Kelestesi. Kelesten aini a ten ya e meke moiti fu holi a weiti fu Kelestesi tu, bika den wani Yehofa piisii. Den sabi tu taki te den e du a sani ya, ‘den o fende kaakiti’.​—Mat. 11:29.

6. Fa a artikel ya o yeepi u?

⁶ Te wi e luku den aitin fasi fa wi e dini Yehofa aini a ten ya, i mu akisi iseefi taki: ‘Mi moo go a fesi aini den sani ya?’ I mu akisi iseefi tu taki: ‘San mi sa du fu dini Yehofa moo bun?’ I mu piisii anga san yu e du nownow, ma i mu akisi Yehofa tu fu a yeepi i fu si san i mu du moo bun.

7. Fa Yehofa e fii te wi e begi en anga u hii ati?

⁷ Begi, a wan fasi fa wi e dini Yehofa. Beibel e maiki den begi fu wi anga den sumeeswiti kandaa di den be e boon gi Yehofa na a tempel anga a tabernakel (Ps. 141:2). A sumee fu den kandaa ya be e meke Yehofa piisii. A so Yehofa e piisii tu te wi e begi en anga u hii ati. U ná abi fu taki kofaliki sani (Odo 15:8; Deit. 33:10). Yehofa e piisii te wi e begi en anga te wi e gi en daa. A wani i taigi en san a den booko-ede fi i, anga san i wani a du gi i. Ma fosi i begi Yehofa, a be o bun fu pakisei san yu o taki aini a begi. Te yu e du a sani ya, u Dda di de a hemel o piisii anga den begi fi i, leti enke fa a be e piisii anga den sumeeswiti kandaa di den be e boon gi en a fositen.

8. Sowtu okasi wi e fende fu gafa Yehofa?

⁸ Wan taa fasi fa wi e dini Yehofa a te wi e gafa en (Ps. 34:1). Te wi e taigi taawan fa u lobi Yehofa anga fa den sani di ai du e bigi gi u, da a gafa wi e gafa en. Efu u wani gafa Yehofa, u mu e teke ten pakisei ala den sani di ai du gi u. A sani ya o meke u moo teke den sani ya fu bigi. Te wi e peleiki, wi e fende a okasi fu gafa Yehofa. A leti enke wi e ‘tyai wan ofaandi gi Gadu anga u mofu’ (Heb. 13:15). Leti enke fa u mu teke ten pakisei san wi o taki fosi u begi, a so u mu teke ten pakisei san wi o taki te wi e peleiki. U wani gafa Yehofa anga u hii ati, neen meke wi e du a peleikiwooko anga piisii.

9. Sowtu wini wi e fende te wi e go a komakandaa? Gi wan toli di e soi sowtu wini i fende di yu e go a komakandaa.

⁹ Te wi e go a komakandaa, a wan taa fasi fa wi e dini Yehofa. Yehofa be taigi den Islayelisama taki: ‘Dii leisi aini wan yali, ala den mannengee mu kon a  Yehofa fesi na a peesi di a o soi u’ (Deit. 16:16). Te den be e go na a peesi pe den be mu kon makandaa sama á be e fika fu luku den osu anga den goon fu den. Ma Yehofa be paamisi den taki: ‘Te wi e go dini Yehofa u Gadu dii boo wan yali, nawan sama o kon teke a kondee fu u’ (Ek. 34:24). Den Islayelisama be e fitoow Yehofa, neen meke ala yali den be e go a den fesa ya. A omen wini den be e fende te den be e du a sani ya. Wan fu den wini di den be e fende, a taki den be e kon sabi a Weiti fu Gadu moo bun. Den be e fende ten tu fu pakisei den bun di Yehofa be e du gi den. Boiti dati, den be e piisii fu de makandaa anga taa sama di be e dini Yehofa (Deit. 16:15). A denseefi wini ya wi e fende te wi e go a komakandaa. Boiti dati, ná pikin piisii Yehofa e piisii te wi e seeka fu gi piki a den komakandaa fu gi taawan taanga-sikin.

10. Saide a pelensipali fu singi gafa Yehofa?

¹⁰ Wan taa fasi fa wi e dini Yehofa a te wi e singi makandaa anga u baala anga sisa (Ps. 28:7). Singi a be wan pelensipali sani gi den Islayelisama te den be e dini Yehofa. Kownu David be poti 288 Leifisama fu be singi na a tempel (1 Kolon. 25:1, 6-8). Aini a ten ya, u sa soi Yehofa taki u lobi en te wi e singi gi en. U ná abi fu de gaan singiman fosi u sa singi gafa en. Pakisei a toli ya. A omen leisi wi e misi te wi e taki, ma a sani ya nai tapu u fu taki aini a kemeente. A nai tapu u fu peleiki tu (Yak. 3:2). A letiso a de anga a singi di wi e singi gi Yehofa. U sa singi gafa en, winsi wi e si enke u tongo á moin.

11. Enke fa Psalm 48:13 e soi, da saide u mu meke ten fu sutudeli makandaa anga wi osufamii?

¹¹ Wan taa fasi fa wi e dini Yehofa, a te wi e sutudeli Beibel anga te wi e leli den pikin fu u sani fi en. Den Islayelisama á be e wooko a Sabadei. A sani ya be e gi den a okasi fu den anga Yehofa toon moo bun mati (Ek. 31:16, 17). Omen fu den be e teke a dei ya fu leli den pikin fu den den manii fu Yehofa, anga den bun di a be e du gi den. Aini a ten ya, useefi mu meke ten fu e leisi a Wowtu fu Gadu anga fu sutudeli en. A sani ya a wan fasi fa wi e dini Yehofa. Ai yeepi u fu wi anga en toon moo bun mati tu (Ps. 73:28). Te wi e dini Yehofa makandaa enke osufamii, wi e yeepi den pikin fu u fu denseefi toon Yehofa mati.​—Leisi Psalm 48:13.

12. San wi e leli fu a fasi fa Yehofa be e si den wooko di den Islayelisama be e du na a tabernakel?

¹² Te wi e yeepi meke komakandaa peesi, anga te wi e seeka den peesi ya, a wan fasi fa wi e dini Yehofa. Beibel taki den sama di be e wooko na a tabernakel be e du ‘santa wooko’ (Ek. 36:1, 4). Aini a ten ya, Yehofa e si a meke di wi e meke komakandaa peesi enke santa wooko tu. Son baala anga sisa e teke omen ten fu du den sowtu wooko ya. Ai bigi gi u taki den e du a sani ya. Ma den e du a peleikiwooko tu. Kande son wan fu den baala anga sisa ya wani du a pioniliwooko. Owluman sa soi taki den e holibaka gi den te den nai daaidaai fu poti den enke pionili te den si taki den doo den maiki. Boiti dati, ala u sa soi taki wi e holibaka gi den te wi e kiin den komakandaa peesi anga te wi e seeka den fu sani á poli a den.

13. Fa u mu si a gi di wi e gi moni fu holibaka gi a wooko di e du a hii goontapu?

 ¹³ A gi di wi e gi moni fu holibaka gi a peleikiwooko a wan fasi fa wi e dini Yehofa. Den Islayelisama á be mu kon a Yehofa fesi anga leigi ana (Deit. 16:16). Ala sama be mu tyai san den be poi gi en. A so den be e soi taki den be e teke den sani di Yehofa be e du gi den fu bigi. Fa u sa soi taki den sani di Yehofa e du e bigi gi u? Wan fasi fa u sa du a sani ya, a te wi e gi moni fu holibaka gi a kemeente efuso a peleikiwooko di e du a hii goontapu. Ala u mu luku san u poi gi fu holibaka gi a wooko ya. Apostel Pawlesi be taki: ‘Efu wan sama wani gi wan sani, da a wan bun sani ai du, ma na san a man a mu gi, a á mu gi san a á poi gi’ (2 Kor. 8:4, 12). Yehofa e teke en fu bigi te wi e poti moni fu holibaka gi a wooko, winsi fa a nyoni.​—Malik. 12:42-44; 2 Kor. 9:7.

14. Enke fa Odo 19:17 e soi, da fa Yehofa e fii te wi e yeepi den baala anga sisa di de a nowtu?

¹⁴ Te wi e yeepi den baala anga sisa di de a nowtu, a wan fasi fa wi e dini Yehofa. Yehofa be paamisi den Islayelisama taki a be o pai den te den be e du bun gi pootiman (Deit. 15:7, 10). Ala yuu te wi e yeepi wan baala efuso wan sisa di de a nowtu, Yehofa e teke en fu bigi, leti enke neen wi e yeepi. (Leisi Odo 19:17.) Di den Kelesten fu Filipi be sende sani gi apostel Pawlesi di a be de a dunguu-osu, a be kai den sani ya ‘wan sumeeswiti ofaandi di e meke Gadu piisii’ (Filip. 4:18). Denki den sama aini i kemeente, da yu akisi iseefi taki: ‘Wan sama de aini a kemeente di mi sa yeepi?’ Yehofa e piisii te ai si taki wi e koboloiki u ten, u kaakiti, u koni, anga den sani di wi abi fu yeepi den sama di de a nowtu. Ai si a sani ya enke wan fasi fa wi e dini en.​—Yak. 1:27.

15. Saide u nai si a dini di wi e dini Yehofa enke wan hebi?

¹⁵ A bunbun moiti u mu meke fu dini Yehofa enke fa a wani. A omen ten u mu poti a wan se fu du a sani ya tu. Toku u nai si a dini di wi e dini Yehofa enke wan hebi (1 Yoh. 5:3). Saide? Bika a di u lobi Yehofa meke wi e dini en. Pakisei wan pikin di wani gi en dda wan sani. Kande a pikin e teke en ten teken wan sani gi en dda. A nai hati en taki a du a sani ya, bika a lobi en dda. Ai piisii fu gi en wan sani tu. A letiso a de anga a dini di wi e dini Yehofa. A di u lobi en meke wi e koboloiki u ten anga u kaakiti fu dini en.

16. Enke fa Hebrewsama 6:10 e soi, da fa Yehofa e si den sani di iniiwan fu wi e du gi en?

¹⁶ Mma anga dda di lobi den pikin fu den e fusutan taki a ná ala den pikin fu den o poi du aseefi sani. Den e piisii anga san iniiwan fu den pikin poi du. A letiso u Dda di de a hemel e fusutan taki a ná ala wi o poi du denseefi sani gi en. Kande i poi du moo gi Yehofa moo den taa sama di i sabi. Efuso kande yu á poi du ala san i be sa wani du gi Yehofa fu di i kon gaandi, fu di i siki, efuso fu di i mu solugu yu osufamii. Den sani ya á mu meke i lasi-ati (Gal. 6:4). Yehofa nai feegete a wooko di i du gi en. Efi yu e dini en anga i hii ati fu di i lobi en, a o  piisii anga i, winsi yu á poi du ala san i be sa wani. (Leisi Hebrewsama 6:10.) Boiti dati, Yehofa e si wi ati. A sabi san u be o wani du gi en. A wani u piisii anga den sani di u poi du gi en nownow.

17. (a) San u sa du efu ai taanga gi u fu du wan fu den sani di u mu du fu dini Yehofa? (b) Fa den sani di kai aini a faki di den e kai ‘ Du sani di o meke i piisii’ yeepi i?

¹⁷ San i sa du efu ai taanga gi i fu du wan fu den sani di kai aini a artikel ya? Kande ai taanga gi i fu peleiki, efuso fu sutudeli anga iseefi. Efi i meke moiti du den sani ya, iseefi o si taki o moo yu e du den, o moo a o makiliki gi i. Yu o moo piisii tu. U sa maiki a sani ya anga wan sama di wani leli pee gitali. Efu a wanwan leisi a sama e leli pee a gitali, a ná o sabi pee mi en bun. Ma efu ai meke ten fu du en ala dei, winsi a wantu miniti namo, a o moo sabi en. Di a o teke switi gi en, a hii dei a o go e wani pee a gitali. A so a de anga den sani di wi e du fu dini Yehofa tu.

18. San na a moo pelensipali sani di u sa du aini u libi? Sowtu wini wi e fende te wi e du a sani ya?

¹⁸ A moo pelensipali sani di u sa du aini u libi, a fu dini Yehofa anga u hii ati, bika a fu a sani de a meke u. Te wi e du a sani ya wi o moo piisii. Wi o abi a howpu fu dini Yehofa fu teego tu (Odo 10:22). Nownow u nai buuya te sani e miti u, bika u sabi taki Yehofa e yeepi den sama di e dini en te den abi polobelema (Yes. 41:9, 10). Wi e piisii te wi e dini u Dda di lobi u, bika ‘a fiti fu fende gaandi anga gafa’.​—Openb. 4:11.