1. San e meke wi e du bun sani efuso sani di á bun?

 WINSI u dopu taade ya efuso omen yali kaba, toku ala u wani abi manii di Yehofa lobi. Fu man abi den manii ya, u mu kengi a fasi fa wi e denki. Saide? Bika gaanse leisi a den sani di wi e denki wi e du. Efu ala yuu wi e denki fu du sani di a sondu sikin wani, wi o taki sani di á bun, wi o du sani di á bun tu (Efe. 4:17-19). Ma efu wi e meke moiti fu denki sani di bun, wi o go e taki efuso du sani di o meke u Dda di de a hemel piisii.​—Gal. 5:16.

2. San wi o luku aini a artikel ya?

² Enke fa u be luku aini a artikel di pasa, da a ná ala yuu wi o poi denki sani di bun. Son leisi wi o go e denki sani di á bun. Ma u mu meke moiti fu wi á du den sani ya. Fosi u dopu, u mu meke moiti fu u nai taki efuso du sani di Yehofa á lobi. Disi na a fosi sani di u mu du efu u wani kengi a fasi fa u be de fosi. Efu u wani Yehofa piisii anga u tuutuu, u mu holi a weiti di e taki: ‘U mu toon nyun sama’ (Kol. 3:10). Aini a artikel ya, wi o piki den akisi ya: San a wani taki fu ‘toon nyun sama’? San o yeepi u fu tan du sani enke fa Yehofa wani?

3. Enke fa Galasiyasama 5:22, 23 e soi, da san a wani taki fu toon nyun sama? Fa u sa du a sani ya?

³ Te Beibel e taki ‘u mu toon nyun sama’, da a sani ya wani taki u mu meke moiti fu du sani enke Yehofa. Fu man du a sani ya, u mu meke moiti fu kon abi den manii di a yeye fu Gadu e meke sama abi. A fasi fa wi e fii anga  a fasi fa wi e denki o kengi. Wi o go e du sani taa fasi tu. (Leisi Galasiyasama 5:22, 23.) Wan sama di e meke moiti fu toon wan nyun sama, lobi Yehofa anga a foluku fi en (Mat. 22:36-39). A o holidoo anga piisii winsi tesi e miti en (Yak. 1:2-4). A o meke moiti fu libi na a wan anga taawan (Mat. 5:9). A o abi pasensi, a o go e taki switi anga sama tu (Kol. 3:13). Sowan sama e meke moiti fu du bun ala yuu (Luk. 6:35). Den sani di ai du e soi taki ai fitoow en Dda di de a hemel (Yak. 2:18). A nai ligei te sama e suku toobi anga en. A poi dwengi enseefi tu te en ati boon.​—1 Kor. 9:25, 27; Tit. 3:2.

4. Saide na ala den manii di kai a Galasiyasama 5:22, 23 u mu meke moiti fu abi efu u wani toon wan nyun sama?

⁴ Wan sama di e meke moiti fu toon wan nyun sama, mu abi ala den manii di kai a Galasiyasama 5:22, 23. Taa manii de aini Beibel tu di Yehofa wani wi abi. * Wan sama á poi taki a o teke wantu fu den manii ya da a bun kaba, bika ala den manii ya e go anga denseefi. Efi i lobi taa sama enke fa i lobi iseefi, yu o abi pasensi anga den, yu o taki switi anga den tu. Efi yu abi bun-ati tuutuu, yu o abi tyali-ati, yu o go e dwengi iseefi tu.

5. San a wani taki fu ‘denki enke fa Kelestesi e denki’? Saide u mu ondoosuku a libi fu Yesesi? (1 Korentesama 2:16)

⁵ Leisi 1 Korentesama 2:16. Efu u wani toon nyun sama ‘u mu e denki enke fa Kelestesi e denki’. A sani ya wani taki u mu meke moiti fu waka a Yesesi baka. Di Yesesi be de a goontapu ya, a soi taki a abi ala den manii di a yeye fu Gadu e meke sama abi. A be soi den manii ya pilisisi enke fa Yehofa seefi be o soi den, efu u be poi si en (Heb. 1:3). O moo wi e denki enke Yesesi, o moo wi o du sani enke en. A sani ya o meke a moo makiliki gi u fu toon wan nyun sama.​—Filip. 2:5.

6. San u mu holi a pakisei te wi e meke moiti fu toon nyun sama?

⁶ Kande yu e si enke u ná o poi du sani enke Yesesi. Kande yu e denki taki: ‘Yesesi á be abi sondu, mi ná o poi de enke en’. Efu a so yu e fii, holi den sani ya a pakisei. A fosi sani, a taki di Yehofa  meke libisama, a be meke wi anga denseefi manii fi en anga Yesesi. Neen meke efi i meke moiti tuutuu, i sa du sani enke den winsi yu o go e misi son yuu (Gen. 1:26). Du fu tu, a taki a santa yeye fu Gadu na a moo taanga kaakiti di de a hemel anga goontapu. A yeye ya poi yeepi u fu du sani di wi á be o poi du anga u eigi kaakiti. Du fu dii, a taki Yehofa e holi a pakisei taki wi á poi du sani pilisisi enke Yesesi bika wi abi sondu. Neen meke a o gi u 1000 yali fu kengi kon toon sama di ná abi sondu moo (Openb. 20:1-3). Ma nownow Yehofa wani u meke ala moiti fu du sani enke en. A wani u fitoow en tu.

7. San wi o luku aini den paragraaf di e kon?

⁷ Ma fa u sa waka a Yesesi baka? Wi o luku fo fu den manii di a yeye fu Gadu e meke sama abi, fa Yesesi be e soi den manii ya, anga san u sa leli fi en. Wi o piki wantu akisi tu di o yeepi u fu si fa u sa kengi kon toon wan nyun sama.

8. Fa Yesesi soi taki a lobi Gadu anga libisama?

⁸ A fu di Yesesi lobi Yehofa anga libisama meke a be de kabakaba fu du den sani di Yehofa akisi en (Yoh. 14:31; 15:13). A fasi fa Yesesi be e libi di a be de a goontapu ya, be e soi taki a lobi libisama tuutuu. A be e libi bun anga ala sama, winsi son sama be e du ogii anga en, toku a be e soi taki a lobi den. Wan fu den moo pelensipali fasi fa a be e soi taki a lobi sama, a di a be e paati a bun nyunsu fu a Kownukondee anga den (Luk. 4:43, 44). Wan taa fasi fa Yesesi soi taki a lobi Gadu anga libisama, a di a be de kabakaba fu pina te enke den kii en a wan ogii-ati fasi. A sani di a du ya gi ala libisama a okasi fu fende teego libi.

9. Fa u sa soi taki u lobi taa sama leti enke Yesesi?

⁹ A di u lobi Yehofa, meke u paamisi en taki wi o libi enke fa a wani, neen u dopu. Wi e soi taki u lobi Yehofa tuutuu, te wi e meke moiti fu libi bun anga taa sama leti enke Yesesi. Apostel Yohanisi be taki: ‘Wan sama di á lobi en baala di ai si, á poi lobi Gadu di a nai si’ (1 Yoh. 4:20). Neen meke i mu akisi iseefi taki: ‘Mi lobi taa sama anga mi hii ati? Mi e soi taki mi e fii gi taawan winsi den e taki goofu anga mi? Mi e koboloiki mi ten anga mi kaakiti fu yeepi taawan fu kon sabi Yehofa? Mi e du a sani ya winsi gaanse fu den nai wani aliki mi? Mi sa poti moo ten a wanse fu yeepi taawan fu toon Yesesi bakaman?’​—Efe. 5:15, 16.

10. Fa Yesesi be e meke moiti fu libi bun anga taa sama?

¹⁰ Yesesi be e meke moiti fu libi bun anga ala sama. Te sama be e libi ogii anga en, a á be e du ogii anga den baka. Ma a be e meke moiti fu meke en bun anga den. A be e gi sama taanga-sikin fu libi bun anga denseefi. A be leli den bakaman fi en taki efu den wani Yehofa piisii anga den, den be mu meke en bun anga den baala te den be abi wan toobi (Mat. 5:9, 23, 24). A omen leisi a leli den apostel fi en tu taki den á be mu e kwali anga denseefi.​—Luk. 9:46-48; 22:24-27.

11. Fa u sa soi taki wi e libi bun anga taawan?

¹¹ Efu u wani libi bun anga taa sama, a ná suku wi á mu e suku toobi namo. Ma u mu e meke moiti fu meke en bun anga taawan te wi anga den abi wan sani. U mu e gi den baala anga sisa fu u taanga-sikin fu du a sani ya tu (Filip. 4:2, 3; Yak. 3:17, 18). A bun fu akisi iseefi den sani ya: ‘San mi de kabakaba fu du fu meke en  bun anga taawan? Te wan baala efuso wan sisa du wan sani di hati mi, mi e holi en na ati? Mi e wakiti fi en fosi kon taki anga mi fosi wi o meke en bun? Efuso a mi fosi e go taki anga en? Efu a de fanowdu, mi e gi taawan taanga-sikin fu meke en bun anga taawan te den abi sani?’

12. Fa Yesesi be e soi switifasi gi taawan?

¹² Yesesi be e libi bun anga taawan (Mat. 11:28-30). A be e soi switifasi gi sama fu di a be e holi taawan a pakisei. Wan leisi, wan uman fu Finisiya begi en fu deesi a umanpikin fi en. Biginbigin a á be wani du san a uman akisi en. Ma di a uman soi taki en biibi taanga, Yesesi deesi a umanpikin fi en (Mat. 15:22-28). Winsi fa Yesesi be e soi switifasi gi sama, toku a á be e daaidaai fu poti den a pasi te a be de fanowdu. Di Peitilisi be wani tapu en fu du san Yehofa wani, a puu kaasi gi en a den taa apostel fesi (Malik. 8:32, 33). A á du a sani ya fu gi Peitilisi sen, ma a be wani leli en anga den taa apostel taki ala yuu den mu du san Gadu wani, winsi a á makiliki. Sen be musu kisi Peitilisi di Yesesi taki so anga en, ma toku a fende wini fu a sani ya.

13. Fa u sa soi switifasi gi taawan?

¹³ Wan fasi fa u sa soi switifasi gi sama, a te wi e poti den a pasi te a de fanowdu. Leti enke Yesesi, i mu e wooko anga san sikiifi aini a Wowtu fu Gadu te yu e du a sani ya. Yu á mu e taki goofu anga sama. I mu e denki bun fu taawan. I mu e biibi taki den o kengi, da den bigin du sani enke fa Yehofa wani. Akisi iseefi den sani ya: ‘Mi e feele fu poti wan sama di mi lobi a pasi, te mi si taki ai du wan sani di Yehofa á lobi? Te mi e poti sama a pasi mi e taki switi anga den? Saide mi e poti a sama a pasi? A fu di a sani di ai du e weli mi ati meke mi e poti en a pasi? Efuso a fu di mi wani yeepi en?’

14. Fa Yesesi be e du bun gi taawan?

¹⁴ Yesesi á be sabi namo san bun, ma a be e du a sani ya tu. Yesesi lobi en Dda, neen meke te a be e du bun gi taawan, a á be e suku wini fi enseefi. Wan sama di lobi du bun gi taawan, e suku fasi fu yeepi den fu di a lobi den. Ma kande yu e akisi iseefi taki: ‘Wan sama sa du bun gi taawan, fu di ai suku wini fi enseefi?’ Eeye. Son sama aini a ten fu Yesesi be e meke taa sama sabi te den be e du bun gi taawan. Den be e du a sani ya fu di den be wani sama gafa den. Neen meke winsi fa a bun den be e du, toku Yehofa á be e piisii anga den.​—Mat. 6:1-4.

15. Fa u sa du bun gi taawan anga wan kiin-ati?

¹⁵ Wi á mu e du bun gi sama fu di u wani fende wini fu a sani ya, ma u mu e du bun gi den fu di u lobi den. Akisi iseefi taki: ‘Te mi si taki mi sa yeepi wan sama mi e yeepi en tuutuu? Efuso a taki mi e taki a mofu namo? Saide mi e du bun gi sama?’

16. San u mu e meke moiti fu du ala dei? Saide u mu du a sani ya?

¹⁶ Wi á mu denki taki te u dopu, da u ná abi fu meke moiti fu kengi moo. U mu tan meke moiti fu du sani enke fa Yehofa wani, winsi on langa u dopu kaba. Wan fasi fa u sa du a sani ya, a te wi e suku fasi ala dei fu soi taki u wani kon abi den manii di a yeye fu Gadu e meke sama abi. Saide? Bika a te wi e meke moiti fu kengi fosi da Yehofa o yeepi wi anga a santa yeye fi en (Gen. 1:2). Neen meke efu u  wani abi den manii ya, u mu e wooko anga san wi e leli. Yakowbesi be taki: ‘A biibi fu wan sama dede te a nai du san ai biibi’ (Yak. 2:26). A so a de anga den taa manii di a yeye fu Gadu e meke sama abi tu. Te wi e soi den manii ya, taa sama e si taki na a yeye fu Gadu e yeepi u.

17. San u mu du te u misi fu soi wan fu den manii di a yeye fu Gadu e meke sama abi?

¹⁷ Winsi u dopu omen yali kaba, toku son yuu a sa taanga gi u fu soi den manii di a yeye fu Gadu e meke sama abi. Ma wi á mu gi abaa. Pakisei a toli ya. Meke u taki i misi piiti wan koosi fi i di i lobi. Yu o towe en wanten? Nono. Yu o meke moiti fu seeka en efi i si taki a sa seeka ete. Te i seeka en kaba, yu o moo kenisikenisi anga en taa leisi. A letiso a de tu anga den manii fu u. Efi yu á soi switifasi, pasensi, efuso lobi gi wan sama wan leisi, a sani ya á mu meke i lasi-ati. Akisi a sama paadon fi yu anga en sa meke en bun baka. Meke moiti fi yu á du a sani de taa leisi moo tu.

18. San Yehofa o yeepi i fu du?

¹⁸ Ai bigi gi u taki Yesesi soi u fa u mu du sani. O moo wi e denki enke en, o moo wi o du sani enke en. Efu wi e du sani enke Yesesi, a o moo makiliki gi u fu kengi a fasi fa u be de fosi. Aini a artikel ya, u luku fo manii di a yeye fu Gadu e meke sama abi. A be o bun fu teke ten sutudeli den taa manii di u mu abi tu. I sa fende artikel di e taki fu ala den manii ya aini a buku di den e kai ‘Ondrosuku Bijbel moro fini-Gi Yehofa Kotoigi’. A buku ya de aini Saanantongo. Suku a pisi di den e kai ‘Kresten fasi fu libi’, da i go a ‘Den fasi fu a yeye’. Efi yu e meke ala moiti fu kengi a fasi fa i be de fosi, Yehofa o yeepi i. A o yeepi i tu fu tan du sani enke fa a wani.