Te son sama leisi a pisi ya, ai buuya den pikinso. Ma a ná fu aseefi Mefibowset den tekisi ya e taki. U sa leli wan sani fu a toli ya te u luku san be pasa.

Kownu Saul be abi seibin manpikin anga tu umanpikin. A fosi manpikin fi en a be Yonatan. Bakaten Saul anga wan fu den waka uman fi en den e kai Rispa meke wan manpikin den e kai Mefibowset. Ma Yonatan be kai wan fu den manpikin fi en Mefibowset tu. A so Saul be kon abi wan manpikin anga wan galanpikin di be abi aseefi nen.

Bakaten, Kownu Saul be bigin buuse den Gibiyonsama, neen meke a be wani kii ala den. A omen fu den a be fende kii. A sani di a du ya a be wan gaan ogii. Saide? Bika aini a ten fu Yowsuwa, den Islayelisama be meke wan kuudei anga den Gibiyonsama taki den á be o du ogii anga den.​—Yow. 9:3-27.

A kuudei ya be e teli ete aini a ten fu Kownu Saul. Ma Saul á be holi enseefi na a kuudei ya, neen meke ‘en anga en osufamii be abi buulu-paiman’ (2 Sam. 21:1). Di David toon kownu, den Gibiyonsama di be de a libi ete go taki anga en. David akisi den san a be sa du fu pai fu a gaan ogii di Saul be du, bika na a sani ya be o meke Yehofa belesi den Islayelisama baka. Den Gibiyonsama ná akisi David moni, ma den akisi en fu a gi den seibin manpikin fu Saul fu den kii den (Num. 35:30, 31). David gi den san den akisi en.​—2 Sam. 21:2-6.

A ten de Saul anga Yonatan be dede kaba. Ma Mefibowset, a manpikin fu Yonatan, be de a libi ete. A man ya be kisi wan mankei pikinnengee ten di be meke a malengii. A á be de aini di en gaandda be e kii den Gibiyonsama. Boiti dati, David anga Yonatan be sweli taki den be o de mati fu teego. Den bakapikin fu den seefi be de aini a sweli ya tu (1 Sam. 18:1; 20:42). Beibel taki: ‘Ma a kownu (David) soi tyali-ati gi Mefibowset, a manpikin fu Yonatan di be de wan manpikin fu Saul. A be du a sani ya fu di a be membee a sweli di en anga Yonatan, a manpikin fu Saul, be meke a Yehofa fesi.’​—2 Sam. 21:7.

Ma toku David du san den Gibiyonsama akisi en. A gi den tu manpikin fu Saul. Wan fu den a Mefibowset den be e kai en tu. Boiti dati, a gi den feifi galanpikin fu Saul tu (2 Sam. 21:8, 9). Na a sani di David du ya puu a buulu-paiman di be de a den Islayelisama tapu.

A toli ya e leli u wan pelensipali sani. A weiti fu Gadu be e taki kiin taki: ‘Wi á mu kii wan pikin fu den sondu fi en dda ede’ (Deit. 24:16). Neen meke Yehofa á be o meke den kii den tu manpikin anga den feifi galanpikin fu Saul efu den á be de aini kii den Gibiyonsama. Boiti dati, a weiti be e taki tu: ‘A sama di sondu neen mu dede.’ A sani ya e soi taki den seibin sama fu Saul di den kii be musu abi wan ana aini a sani di Saul be du. Neen meke den be mu pai fu den sondu fu den.

A sani ya e leli u tu taki wan sama di meke wan fowtu á poi taki a sama du meke a du a sani de. Wan nongo e taki: ‘Seeka a pasi pe yu e waka, da sani o waka bun gi i.’​—Odo 4:24-27; Efe. 5:15.