1-2. Efu ya kaba fu dopu ete, da saide ya mu fii booko-saka? (Luku a fowtow a fesise fu A Wakititolen.)

 EFII si enke i kaba fu dopu, neen den owluman fii kemeente taki a bun, da ya mu daaidaai fu dopu. Na pikin belesi yo fende te ye dini Yehofa.

² Kande i wani dopu, ma wan sama soi i wantu sani di i mu wooko ete fosi yo man dopu. Kande iseefi si taki i mu kengi wantu sani tu. We efu a so, ya mu fii booko-saka. I sa tan meke moiti fu doo a maiki ya, winsi i gaandi efuso i yonkuu.

3. San a heiheiman fu Etiyopiya be akisi Filipesi? (Toli fu den apostel 8:36, 38)

³ Leisi Toli fu den apostel 8:36, 38. Wan heiheiman fu Etiyopiya be akisi Filipesi taki: ‘Sai tapu mi fu dopu?’ A man ya be wani dopu, ma a be kaba fu dopu?

4. Fa a Etiyopiya man soi taki a be wani leli moo sani fu a Wowtu fu Gadu?

⁴ A Etiyopiya man ya be go a Yelusalem fu dini Gadu (Toli 8:27). A man ya a ná be wan Dyu, a teke a be teke a Dyu biibi. A omen sani fu Yehofa a be musu leli aini den Hebrew buku. A be wani leli moo sani tu. Di Filipesi doo na a Etiyopiya man ya, san a be si ai du? A be e leisi a bukulolo fu a polofeiti Yesaya (Toli 8:28). Den sani ya á be makiliki fu fusutan. A heiheiman ya á be  wani sabi wantu sani namo, ma a be wani leli moo sani fu a Wowtu fu Gadu.

5. San a Etiyopiya man be e du anga den sani di a be e leli?

⁵ A man ya a be wan pelensipali man di be e wooko gi a Umankownu Kandase fu den Etiyopiyasama. Neen be e luku ala den gudu fu a umankownu ya (Toli 8:27). A sani ya e soi taki na ala yuu a man ya be e abi sani fu du. A be abi tyaipi faantiwowtu, ma toku ala yuu a be e meke ten fu dini Yehofa. A ná sabi namo a man ya be wani kon sabi a tuu, ma a be e du den sani di a be e leli tu. Neen meke a be e go te a Yelusalem fu dini Yehofa na a tempel. Winsi fa a bunbun moiti a man ya be mu meke fu man dini Yehofa, toku aa be e meke nawan sani tapu en.

6-7. San yeepi a Etiyopiya man fu kon moo lobi Yehofa?

⁶ A omen sani Filipesi leli a Etiyopiya man di aa be sabi ete. Wan fu den sani di a be leli en, a taki a Yesesi na a Mesiyas (Toli 8:34, 35). Di a man ya be kon sabi san Yesesi du gi en, ná pikin bigi a sani ya bigi gi en. San a du di a kon sabi den sani ya? A man ya a ná be wan Dyu, ma toku a be teke a Dyu biibi. A be sa taki mi naw toon wan Kelesten, bika a be de aini a Dyu biibi kaba. Ma toku aa du a sani de. Den sani di Filipesi be leli en be meke a kon moo lobi Yehofa anga Yesesi. A sani ya kengi en hii libi, bika a be wani toon wan bakaman fu Yesesi. Di Filipesi si taki a man ya be kaba fu dopu neen a dopu en.

⁷ Efi ye du sani enke a Etiyopiya man ya, iseefi sa dopu tu. Iseefi o man taki anga i hii ati enke a Etiyopiya man taki: ‘Sai tapu mi fu dopu?’ Meke u luku fai sa du den sani di a man ya be du. A be e tan leli sani fu Gadu. A be e du san a be leli tu. Boiti dati, a be e meke moiti fu kon moo lobi Gadu.

8. San Yohanisi 17:3 taki i mu du?

⁸ Leisi Yohanisi 17:3. A den sani di Yesesi taki aini a tekisi ya meke i bigin sutudeli Beibel? Na a tekisi ya yeepi omen sama fu bigin sutudeli Beibel. Ma a tekisi ya e soi tu taki u mu tan leli sani fu Gadu. Noiti wo kaba leli sani fi en (Peleik. 3:11). A fu teego wo tan leli sani fu Gadu. Moo ye leli sabi Yehofa, moo yu anga en o toon bun mati.​—Ps. 73:28.

9. San u mu du baka te u kon fusutan den moo pelensipali leli fu Beibel?

 ⁹ Te we kon leli sabi Yehofa, a den moo pelensipali sani fu Beibel we leli. Aini a biifi di Pawlesi be sikiifi gi den Hebrew Kelesten, a be taki den sani ya a ‘den moo pelensipali sani’. A be soi taki den sani ya de leti enke a meliki di wan yonkuu pikin e diingi (Heb. 5:12; 6:1). Ma a be soi tu taki u mu go a fesi. U mu meke moiti fu kon fusutan den taa sani aini a Wowtu fu Gadu, den sani di moo taanga fu fusutan. I lobi den pelensipali sani fu Beibel di i leli? I wani go a fesi fu kon sabi moo sani fu Yehofa? I wani fusutan moo bun san a den sani di Yehofa o du aini a ten di e kon?

10. Saide ai taanga gi son sama fu sutudeli Beibel?

¹⁰ A ná ala yuu a makiliki fu sutudeli. Ma fa a de anga yu? Kande den leli ya sikoo fai mu leisi anga fai mu ondoosuku sani? I be e piisii tei be e du a sani ya? I be e si enke a sani ya e tyai wini gii? Efuso i kon si taki ya poi leli sani anga buku? Efu a so ye fii, holi a pakisei taki a so omen sama e fii tu. Yehofa poi yeepi i, bika neen na a moo bun Leliman.

11. Fa Yehofa e soi taki neen na a ‘Gaan Leliman’?

¹¹ Yehofa e kai enseefi wan ‘Gaan Leliman’ (Yes. 30:20, 21). A abi pasensi, a abi switifasi, ai fusutan fa we fii. A nai suku fowtu a den sama di ai gi leli tu (Ps. 130:3). Boiti dati, a naw akisi i fu du wan sani di a sabi taki i naw poi du. Holi a pakisei taki a Yehofa meke a masonson fii (Ps. 139:14). Yehofa meke wi anga a fii fu e leli sani. A wani we leli sani fu teego. A wani we piisii tu te we teke leli. Neen meke u mu e angii fu leli moo sani fu Beibel (1 Peit. 2:2). Poti maiki di i sa doo. I sa poti enke maiki fu e leisi Beibel ala dei anga fu e sutudeli en ala wiki (Yow. 1:8). Efi ye du den sani ya, Yehofa o yeepi i fu kon lobi sutudeli a Wowtu fi en.

12. Saide u mu e poti pakisei na a libi fu Yesesi anga a fasi fa a be e du a peleikiwooko te we sutudeli?

¹² U mu e teke ten pakisei fa Yesesi be e du sani, anga fa a be e du a peleikiwooko. Efu u wani tan dini Yehofa aini a ogii goontapu ya, da u mu meke moiti fu waka a Yesesi baka (1 Peit. 2:21). Yesesi be taigi den bakaman fi en taki a omen sani be o miti den (Luk. 14:27, 28). Ma a be e biibi taki leti enke fa a be poi holidoo, a so den bakaman fi en poi holidoo tu (Yoh. 16:33). U sa sutudeli a libi fu Yesesi, da u luku faw sa waka neen baka ala dei.

13. San u mu e akisi Yehofa? Saide u mu e akisi en a sani ya?

¹³ A ná sabi namo i mu sabi sani fu Gadu, ma den sani di ye kon sabi fi en mu yeepi i fu kon moo lobi en. I mu meke moiti fu kon sabi sani di e yeepi i fu moo fitoow en tu (1 Kor. 8:1-3). Te ye meke moiti fu leli sabi Yehofa moo bun, begi en fu a yeepi i fu moo biibi en (Luk. 17:5). A de kabakaba fu aliki den sowtu begi ya. Efi yu abi tuutuu biibi, a sani ya o yeepi i fu moo go a fesi.​—Yak. 2:26.

14. Fa apostel Peitilisi soi taki a pelensipali fu e du den sani di we leli? (Luku a fowtow tu.)

¹⁴ Apostel Peitilisi be soi u saide den bakaman fu Yesesi mu e du san den e leli. A be taki fu a toli fu Nowa. Yehofa  be taigi Nowa taki a be o kii den ogii sama fu a ten fi en anga wan fuudu. Ma a sabi di Nowa be sabi a sani ya wawan á be sai fu kibii en anga en osufamii. Peitilisi be taki fosi a fuudu kon, ‘Nowa be e meke a ark’ (1 Peit. 3:20). Nowa anga en osufamii meke a ark enke fa Yehofa be soi den (Heb. 11:7). Peitilisi be taki den sani di Nowa be du, na aseefi enke a dopu di sama e dopu nownow. A be sikiifi taki: ‘A letiso dopu e fii sama tu’ (1 Peit. 3:21). U sa maiki den sani di ye du nownow fu seeka fu dopu anga den sani di Nowa anga en osufamii be du omen yali fu meke a ark. Sai mu du efii wani dopu?

15. Faw sa soi taki den sondu di u be du e hati u tuutuu?

¹⁵ Fosi wan sama dopu, a mu soi taki den sondu di a be e du e hati en tuutuu (Toli 2:37, 38). Efu ai hati i tuutuu taki i be e du sani di á bun, a sani ya o yeepi i fi ya du den sani de moo. I tapu anga ala sani di i sabi taki Yehofa á lobi? Efii be e libi wan hululibi, somoko efuso kosi, i tapu anga den sani ya? (1 Kor. 6:9, 10; 2 Kor. 7:1; Efe. 4:29) Efu ya tapu anga den sani ya ete, i mu tan meke moiti fu kengi. I sa akisi a sama di e sutudeli anga i fu yeepi i. I sa akisi den owluman fii kemeente fu yeepi i tu. Efi ye tan anga i mma anga i dda ete, i sa akisi den fu yeepi i fu feti anga wan swakifasi di yu abi, di e tapu i fu dopu.

16. Sai mu du efii wani tan dini Yehofa anga i hii ati?

¹⁶ I mu e du den sani di o yeepi i fu taanga i biibi. I mu e meke moiti fu go a den komakandaa. Tei go a komakandaa, i mu e meke moiti fu gi piki tu (Heb. 10:24, 25). Efii doo a maiki fu bigin peleiki, i mu e go ala yuu aini a peleikiwooko. Moo ye du a peleikiwooko, moo yo lobi en (2 Tim. 4:5). Efi ye tan anga i mma anga i dda ete, akisi iseefi taki: ‘A mma anga nda e membee mi ala yuu fu go a komakandaa? A den e sende mi fu go peleiki efuso a miseefi wani du den sani ya?’ Efu a iseefi e du den sani ya, da ye soi taki i biibi taanga. Ye  soi tu taki i lobi Yehofa. Boiti dati, ye soi en taki ye teke den san di ai du gii fu bigi. Den sani ya e soi taki ye dini Gadu anga i hii ati (2 Peit. 3:11; Heb. 13:15). Te u de kabakaba fu gi Yehofa den moo bun sani di wi abi, a sani ya e meke a piisii. (Luku 2 Korentesama 9:7 tu.) Useefi e piisii tu, bika u sabi taki we du ala san u man gi Yehofa.

17-18. Sowtu manii o yeepi i fu dopu? Fa a manii ya o yeepi i? (Odo 3:3-6)

¹⁷ Efi ye meke moiti fu doo a maiki fu dopu, son sani o go e miti i. Kande son sama o go e soso i fu a nyun biibi fi yu ede. Efuso kande den o go e libi ogii anga i (2 Tim. 3:12). Kande ye feti fu tapu anga wan sani di i sabi taki á bun, ma son yuu ye du a sani ya baka. Efuso kande ye si enke i naw doo a maiki fu dopu ete. San o yeepi i fu holidoo winsi den sani ya e miti i? Na a lobi di i lobi Yehofa o yeepi i.

¹⁸ A lobi di i lobi Yehofa na a moo pelensipali sani. (Leisi Odo 3:3-6.) Efii lobi Yehofa tuutuu, yo man pasa den tesi di e miti i. Beibel e soi taki Yehofa nai pee anga den sama di e dini en. A lobi den tuutuu, neen meke noiti aw gwe fika den. Nawan sama o man poli wi anga en (Ps. 100:5). Yehofa meke wi enke fa enseefi de (Gen. 1:26). Neen meke u poi lobi en na a fasi ya tu. San o yeepi u fu lobi en enke fa a lobi u?

19. Fai sa soi taki ye teke den sani di Yehofa e du gii fu bigi? (Galasiyasama 2:20)

¹⁹ Wan sani di o yeepi i fu lobi Yehofa, a te ye teke den sani di ai du gii fu bigi (1 Tes. 5:18). Akisi iseefi ala dei taki: ‘Fa Yehofa soi mi taki a lobi mi?’ Bakadati te ye begi, kai wantu sani di Yehofa du gii, dai gi en daa fu dati. Ya mu e poti pakisei a den sani di Yehofa e du gi ala sama namo, ma i mu meke moiti fu si san ai du gii tu. Bakaten apostel Pawlesi seefi be kon fusutan taki a omen sani Yehofa be du gi en. (Leisi Galasiyasama 2:20.) Akisi iseefi taki: ‘Mi e soi Yehofa taki mi lobi en tu?’ A lobi di i lobi Yehofa o yeepi i fu holidoo winsi sowtu tesi e miti i. A sani ya o yeepi i tu  fu tan du den sani di i mu du enke wan Kelesten. Efi ye du den sani ya, da ye soi i Dda Yehofa taki i lobi en.

20. Sai mu du efii wani libi enke fa Yehofa wani? Saide a sani ya a wan pelensipali sani?

²⁰ Bakaten yo kon moo lobi Yehofa, da yo paamisi en taki yo dini en i hii libi. Fanafu a dei di i paamisi Yehofa a sani ya, yu a fi en fu teego. Winsi sai pasa aini i libi, a paamisi ya nai kengi. A wan leisi aini i libi namo ye paamisi Yehofa a sani ya. Na a sani ya na a moo pelensipali sani di wan sama sa du aini en libi. Pakisei a sani ya: A omen sani yo du aini i libi, ma a moo bun sani di i sa du, a fu paamisi Yehofa taki yo libi enke fa a wani (Ps. 50:14). Saatan o du ala san a poi fu meke ya lobi i Dda moo. Ai du a sani ya fu di a wani i gwe fika Yehofa. Ma ya mu meke Saatan wini (Yopu 27:5). A lobi di i lobi Yehofa o yeepi i fu tan du sai paamisi en. Aw yeepi i tu fi yu anga i Dda di de a hemel toon moo bun mati.

21. Saide u sa taki tei dopu a wan nyun libi i bigin?

²¹ Baka tei paamisi Yehofa taki yo libi enke fa a wani, taki anga den owluman fii kemeente fu sabi efii kaba fu dopu. Holi a pakisei taki te yo dopu ya kaba ete, ma a bigin i bigin anga wan nyun libi. Ai hii libi langa yo dini Yehofa. Neen meke, du ala sai poi nownow fu kon moo lobi en. Poti maiki di o yeepi i fu kon moo lobi en tu. Den sani ya o yeepi i fu dopu. A dei di yo dopu o de wan fu den moo piisii dei aini i libi. Ma dati na a bigin namo. Meke moiti fu lobi Yehofa anga a Manpikin fi en fu teego.