SUTUDI-ARTIKEL 13
Koboloiki den sani di Yehofa meke fu leli den pikin fii
‘Sama meke ala den sani di ye si?’—YES. 40:26.
SINGI 11 Den sani di Gadu meke e gafa en
SAN WO LELI a
1. San mma anga dda wani den pikin fu den du?
MMA ANGA DDA, u sabi taki u wani yeepi den pikin fu u fu kon sabi Yehofa. U wani den lobi en tu. Ma wa poi si Gadu. Fai sa yeepi den pikin fii fu si Yehofa enke wan tuutuu sama? Fai sa yeepi den fu den anga Yehofa toon mati?—Yak. 4:8.
2. Fa mma anga dda sa yeepi den pikin fu den fu kon sabi sowtu manii Yehofa abi?
2 Wan fu den moo pelensipali fasi faw sa yeepi den pikin fu u fu den anga Yehofa toon mati, a te we sutudeli Beibel anga den (2 Tim. 3:14-17). Ma Beibel e soi u wan taa fasi fa yonkuuwan anga Yehofa sa toon mati. Aini a Beibel buku Odo, wan dda e membee a boi fi en taki aa mu feegete den manii fu Yehofa di ai si tei ai luku den sani di a meke (Odo 3:19-21). Wo luku wantu fasi fa mma anga dda sa koboloiki den sani di Yehofa meke, fu yeepi den pikin fu kon sabi sowtu manii a abi.
KOBOLOIKI DEN SANI DI YEHOFA MEKE FU LELI DEN PIKIN FII
3. Fa mma anga dda sa yeepi den pikin fu den?
3 Beibel taki te u luku den sani di Gadu meke u man si ‘kelle sowtu manii Gadu abi’ (Rom. 1:20). Kande u lobi go koi anga den pikin fu u. U sa koboloiki a ten de, fu yeepi den pikin fu u fu kon si sowtu manii Yehofa abi te we luku den sani di a meke. Meke u luku san mma anga dda sa leli fu den sani di Yesesi be taki.
4. Fa Yesesi koboloiki den sani di Yehofa meke fu leli den disipel fi en? (Lukasi 12:24, 27-30)
4 Luku fa Yesesi be e leli sama anga den sani di Gadu meke. Wan leisi a be taigi den bakaman fi en fu den luku den foo anga den boomiki. (Leisi Lukasi 12:24, 27-30.) Di Yesesi be e taki fu den boomiki anga den foo, a be sa taki fu taa meti anga taa foo. Ma a taki fu sani di den disipel fi en be sabi bun. A ten di Yesesi be e taki fu den foo, kande den disipel fi en be man si fa den foo e fee. Kande den be e si den boomiki di a be e taki tu. Pakisei fa Yesesi e soi en ana go a den boomiki anga den foo te ai taki anga den disipel fi en. San Yesesi du baka di a taki fu den foo anga den boomiki? A soi den disipel fi en taki Yehofa lobi gi sama sani. A abi switifasi. A soi den tu taki leti enke fa Yehofa e solugu den foo anga den boomiki, a so ai solugu den sama di e dini en.
5. Fu san mma anga dda sa taki te den wani leli den pikin fu den sani fu Yehofa?
5 Fa mma anga dda sa waka a Yesesi baka te den e leli den pikin fu den? I sa taigi den pikin fii sowtu meti efuso boomiki i moo lobi. Bakadati dai soi den san den sani ya e leli u fu Yehofa. Efii wani a pikin fii poti pakisei te ye leli en, i mu taki fu wan sani di a moo lobi. Te ye taki fu sani di a pikin lobi, a sani ya o yeepi en fu moo poti pakisei te ye leli en sowtu manii Yehofa abi.
6. San a toli fu Christopher mma e leli i?
6 Aa de fanowdu fu mma anga dda teke tyaipi ten fu go ondoosuku wan meti efuso wan taa sani fosi den sa taki fu den sani ya. Di Yesesi be taki fu den foo anga den boomiki, aa be taki tyaipi sani fu den sani ya. Aa be taki finifini fa den foo e nyan anga fa den boomiki e goo. Kande den pikin fii lobi te ye taki finifini fu den sani di Yehofa meke. Ma son yuu i sa soi en wan sani, dai poti wan akisi gi en. Luku fa Christopher mma be e leli en di a be yonkuu. A baala ya taki: ‘Te mma be wani u poti pakisei a den sani di Yehofa meke, da a be e taki wan sani di o hali u pakisei. Te u be de a wan peesi pe mongo de a be lobi taki: “Luku fa den mongo bigi. Ná pikin moin den moin. Yehofa koni ye.” Te u be de koosube fu a ze a be lobi taki: “Luku fa den balon bigi. Yehofa á taanga noh?”’ Christopher taki: ‘Den sani di mma be e taki be e yeepi u fu teke ten pakisei den sani di Yehofa meke.’
7. Fai sa yeepi den pikin fii fu teke ten pakisei den sani di Yehofa meke?
7 Te den pikin fii e kon moo bigi, i sa leli den fu teke ten pakisei den sani di Yehofa meke. I sa yeepi den fu luku sowtu manii fu Yehofa den e si, te den e luku den sani ya. I sa taki fu wan fu den sani di Yehofa meke. Bakadati dai akisi den pikin fii taki: ‘San a sani ya e leli i fu Yehofa?’ Yo foondoo tei yee san a pikin fii taki.—Mat. 21:16.
ON TEN I SA KOBOLOIKI DEN SANI DI YEHOFA MEKE FU LELI DEN PIKIN FII?
8. San den mma anga dda aini Islayeli be sa du te den be de a pasi e go a wan peesi?
8 Mma anga dda aini a ten fu Islayeli, be mu taki anga den pikin fu den fu den weiti fu Yehofa te den be de a pasi (Deit. 11:19). A omen pasi be de a den bakabini peesi aini Islayeli. Te den be de a pasi a omen meti anga foo den be e si. Den be e si boomiki tu. Te wan osufamii aini Islayeli be e go a wan taa peesi, den be e fende okasi fu taki anga den pikin fu den fu den sani di Yehofa meke. Leti enke den Islayelisama, useefi abi a okasi fu koboloiki den sani di Yehofa meke fu leli den pikin fu u. Kow luku wantu fasi fa son mma anga dda du a sani ya.
9. San a toli fu den sisa ya e leli u?
9 Wan sisa di e tan aini wan gaan foto a Indiya taki: ‘Te mi anga mi man anga den pikin fu u be e go luku den famii fu u di e tan den busikondee peesi, u be lobi taki fu den sani di Yehofa meke anga den pikin fu u. Mi si taki den pikin fu u e moo poti pakisei a den sani di Yehofa meke te u de a den busikondee peesi. Mma anga dda, noiti den pikin fu u o feegete a ten di wi anga den be de a wan moin peesi. Katya wan sisa fu Moldova taki: ‘Di mi be moo nyoni, mi anga mma be lobi go a den busikondee peesi. Mia poi feegete a ten de. Ai bigi gi mi taki mma leli mi yonkuuyonkuu fu poti pakisei a den sani di Yehofa meke. A yeepi mi tu fu luku san den sani ya e leli mi fu Yehofa.’
Winsi a foto ye tan, toku i sa si sani di Yehofa meke fu leli den pikin fii (Luku paragraaf 10)
10. San mma anga dda sa du efu ai taanga gi den fu go a den busikondee peesi fu poti pakisei a den sani di Yehofa meke? (Luku a faki di den e kai ‘ Sani di sa yeepi mma anga dda’.)
10 Ma sai sa du efu aa makiliki gii fu go te a den busikondee peesi? Amol, wan baala di e tan a Indiya tu taki: ‘A pisi pe mi e tan a omen yuu langa den mma anga dda e de a wooko. A omen moni yu abi fu pai fu go a den busikondee peesi tu. Tokuso i sa poti pakisei a den sani di Yehofa meke. Tei de a den moin dyali pe sama e go koi, i sa luku den sani di Yehofa meke. Tei de a wan hei peesi e luku go a ondoo, i sa taki fu den sani di Yehofa meke tu.’ Efi ye poti pakisei a den sani di Yehofa meke, iseefi osi taki a omen sani de koosube a pe ye tan. Kande yo si sani enke mila, foo, boomiki efuso taa sani. Yu anga den pikin fii sa taki fu den sani ya (Ps. 104:24). Wan sisa di e tan aini Doisilikondee taki: ‘Mma lobi boomiki. Neen meke te mi anga en be e go a wan peesi a be lobi soi mi moin boomiki.’ A omen felon anga buku a olikanisâsi fu wi abi di e taki fu den sani di Yehofa meke. Mma anga dda, u sa wooko anga den sani ya fu leli den pikin fu u sani fu Yehofa. Winsi pe ye tan i sa yeepi den pikin fii fu poti pakisei a den sani di Yehofa meke. Meke u go poti pakisei now a wantu manii di Yehofa abi di i sa leli den pikin fii.
U POI SI SOWTU MANII YEHOFA ABI
11. Fa mma anga dda sa yeepi den pikin fu den fu si taki Yehofa lobi u?
11 Efii wani soi den pikin fii taki Yehofa lobi u, i sa taki fu fa den meti e solugu den pikin fu den (Mat. 23:37). I sa taki tu fu fa Yehofa meke omen sowtu sani poti a goontapu. Karina di u be taki fi en kaba taki: ‘Te mi anga mma be e waka, a be lobi gi mi taanga-sikin fu poti pakisei a fa iniiwan fu den boomiki moin. A be e soi mi tu taki a moin fu den boomiki e soi taki Yehofa lobi u. Te anga now mi e poti pakisei a den boomiki. Mi e luku sowtu kololu den abi. Mi e luku fa iniiwan fu den meke tu. Ala yuu te mi si den, den e membee mi taki Yehofa lobi u tuutuu.’
I sa taki fu a fasi fa Yehofa meke u sikin fu soi den pikin fii taki Yehofa koni (Luku paragraaf 12)
12. Fa mma anga dda sa yeepi den pikin fu den fu si taki Yehofa koni? (Psalm 139:14) (Luku a fowtow tu.)
12 Yeepi den pikin fii fu si taki Yehofa koni. Te we luku a koni fu Yehofa anga a koni di libisama abi, da we si taki Yehofa koni moo wi (Rom. 11:33). I sa taki anga den pikin fii fa wataa e daai toon woluku. Na ala peesi wataa e lon go, nawan sani á poi tapu en (Yopu 38:36, 37). I sa taki anga den pikin fii tu fu a fasi fa Yehofa meke u sikin. (Leisi Psalm 139:14.) Luku fa wan dda den e kai Vladimir du a sani ya. A taki: ‘Wan dei a boi fu u di abi feifi yali kai anga a baisigii pii en sikin. Baka wantu dei neen a soo betee. Mi anga mi uman soi en taki Yehofa meke u sikin a wan fasi taki a poi deesi enseefi. U soi en tu taki den sani di libisama meke á poi seeka denseefi, bika efu wan wagi naki anga wan taa wagi, aa poi seeka enseefi. A toli ya yeepi a boi fu u fu si taki Yehofa koni tuu.’
13. Fa mma anga dda sa yeepi den pikin fu si taki Yehofa abi kaakiti? (Yesaya 40:26)
13 Yehofa e taigi u taki u mu poti pakisei a den sitali. A di Yehofa abi kaakiti meke den sitali nai bokusu anga denseefi. (Leisi Yesaya 40:26.) I sa meke den pikin fii luku go a tapu, da i meke den taigi i san den e si. Luku san wan sisa fu Taiwan den e kai Tingting e membee ete di a be yonkuu: ‘Wan neti mi anga mma be de a doose neen u be e luku den sitali. U be poi si den bun, bika u be de faawe fu a mamafoto. A ten de mi be e si enke mia be o poi tan dini Yehofa, bika den pikin a sikoo be e meke a taanga gi mi fu aliki Yehofa. Mma be gi mi taanga-sikin fu poti pakisei na a kaakiti di Yehofa koboloiki fu meke ala den sitali. A soi mi tu taki Yehofa poi koboloiki a kaakiti fi en fu yeepi mi fu pasa iniiwan tesi. A sani ya be yeepi mi fu kon sabi Yehofa moo bun. A yeepi mi fu tan dini Yehofa tu.’
14. Fa mma anga dda sa koboloiki den sani di Yehofa meke fu soi den pikin taki en a wan piisii Gadu?
14 Den sani di Yehofa meke e soi taki a wani u piisii. Sabiman kon si taki gaanse meti lobi pee, den fisi anga den foo tu (Yopu 40:20). I si fa den pikin fii e lafu kaba te den si wan meti e pee? Kande den si fa wan pusi e lon a wan bal baka. Efu wan dei i si den pikin fii e lafu fu di wan meti du wan sani di e meke den lafu, i sa membee den taki Yehofa a wan piisii Gadu.—1 Tim. 1:11.
POTI PAKISEI A DEN SANI DI YEHOFA MEKE ENKE OSUFAMII
Te yu anga den pikin fii e go koi a wan peesi a sani ya o yeepi den fu fii moo bun. Aw moo makiliki gi den tu fu taigi i fa den e fii (Luku paragraaf 15)
15. San o yeepi mma anga dda fu sabi fa den pikin fu den e denki? (Odo 20:5) (Luku a fowtow tu.)
15 A ná ala yuu a makiliki gi mma anga dda fu sabi san a den sani di e gi den pikin fu den booko-ede. Efu a sani ya e miti i, da kande i mu meke moiti fu kon sabi fa den pikin fi ye denki. (Leisi Odo 20:5.) Te son mma anga dda e go koi anga den pikin fu den, ai moo makiliki gi den fu kon sabi fa den pikin e denki. Saide? Bika sani á de ape fu puu den pakisei. Masahiko wan baala di e tan aini Taiwan taki: ‘Te wi anga den pikin fu u e go koi, kande te we waka a den mongo sikin efuso te u de a sikinliba den e moo fii bun. Ai moo makiliki gi u fu kon sabi fa den e denki.’ Katya di u be taki fi en kaba taki: ‘Te mi be komoto a sikoo, mma be lobi tyai mi go a wan peesi pe mi anga en be e koi a bon ondoo. Te u be de a den sowtu peesi ya a be e moo makiliki gi mi fu taigi en fa a be go a sikoo anga sai gi mi booko-ede.’
16. Fa den sani di Yehofa meke sa meke osufamii piisii?
16 Te osufamii e teke ten fu poti pakisei a den sani di Yehofa meke, a sani ya o yeepi den fu fii moo bun. Den o piisii tu. Boiti dati, den o moo lobi denseefi. Beibel e soi taki ‘wan ten de fu lafu’ anga ‘wan ten de fu dansi’ (Peleik. 3:1, 4). A omen moin peesi Yehofa meke a goontapu pe u sa du sani di e meke u piisii. A omen osufamii lobi go koi a den busikondee peesi, taawan fu den lobi sidon a sikinliba. Pikinnengee lobi suwen. Den lobi pee tu. Boiti dati, son wan fu den lobi poti pakisei a den meti. A omen okasi wi abi fu poti pakisei a den sani di Yehofa meke. A sani ya e meke we piisii.
17. Saide mma anga dda mu yeepi den pikin fu den fu poti pakisei a den sani di Yehofa meke?
17 Aini a nyun goontapu mma anga dda anga pikin o moo piisii fu den sani di Yehofa meke. A ten de u naw feele meti moo. Denseefi naw go e feele u tu (Yes. 11:6-9). A fu teego wo piisii fu den sani di Yehofa meke (Ps. 22:26). Mma anga dda ná wakiti fu a ten de doo fosi da yo leli den pikin fii fu poti pakisei a den sani di Yehofa meke. Efi ye koboloiki den sani di Yehofa meke fu leli den pikin fii, da den o taki leti enke David taki: ‘Yehofa, nawan sama poi du den sani di ye du.’—Ps. 86:8.
SINGI 134 A faantiwowtu di Gadu gi mma anga dda
a A omen baala anga sisa e membee ete fa den anga den mma anga den dda be e poti pakisei a den sani di Yehofa meke. A sani ya be e meke den piisii. Den á feegete fa den mma anga den dda be e yeepi den fu kon si sowtu manii Yehofa abi, te den be e luku den sani di a meke. Ma fai sa koboloiki den sani di Yehofa meke fu leli den pikin fii? Wo piki a akisi ya aini a artikel ya.
