1. San yeepi Yopu fu kon sabi Yehofa moo bun?

 A OMEN sama be e taki anga Yopu a pisiten di a be de a libi, ma noiti aw feegete di Yehofa be taki anga en. Yehofa be taigi Yopu fu a luku wantu fu den sani di a meke. A sani ya be yeepi en fu si taki ná pikin koni Yehofa koni. A si tu taki aa taanga gi Yehofa fu solugu den sani di a meke. A sani ya be e leli Yopu taki efu Yehofa poi solugu den meti di a meke, da a poi solugu en tu (Yopu 38:39-41; 39:1, 5, 13-16). Fu di Yopu be luku wantu fu den sani di Yehofa meke, meke a be kon sabi sowtu manii a abi.

2. Saide ai taanga gi u son yuu fu ondoosuku den sani di Yehofa meke?

² Leti enke Yopu, efi ye ondoosuku den sani di Yehofa meke, a sani ya o yeepi i fu kon sabi en moo bun. Ma a ná ala yuu a sani ya makiliki, bika efi ye tan aini wan foto, a ná ala den sani di Yehofa meke ye poi si. Winsi ye tan a busikondee peesi, toku i mu meke ten fu ondoosuku den sani di Yehofa meke. Neen meke kow luku sowtu wini i sa fende te ye meke ten fu ondoosuku den sani di Yehofa meke. Yo si tu fa Yehofa anga Yesesi koboloiki den sani ya fu leli sama. Boiti dati, yo si sowtu sani i sa leli fu den sani di Yehofa meke.

3. Sai soi taki Yehofa be wani Adan piisii anga den sani di a meke?

³ Yehofa be wani den fosi libisama piisii anga den sani di a meke. Di Yehofa meke Adan, a poti en aini wan moin paladeisi. A be gi en a wooko tu fu meke a paladeisi kon moo bigi (Gen. 2:8, 9, 15). Pakisei fa Adan be sai fii te a  be e si fa den boomiki e goo. A be wan gaandi Adan be abi fu solugu a dyali fu Eden. Yehofa be taigi Adan taki a mu gi ala den meti wan nen (Gen. 2:19, 20). Enseefi be sa du a sani ya, ma a be gi Adan a faantiwowtu ya. Fosi Adan be gi den meti wan nen, a be e ondoosuku den bun. A be e luku den sani di den be e du tu. Bakadati, da a be e gi den meti wan nen di fiti den. A be musu e switi gi Adan fu du a wooko ya. A wooko di Yehofa be gi Adan be yeepi en fu si taki Yehofa koni tuutuu. A be yeepi en tu fu si taki den sani di Yehofa meke moin.

4. (a) Saide u mu ondoosuku den sani di Yehofa meke? (b) Sowtu wan fu den sani di Yehofa meke i moo lobi?

⁴ U mu ondoosuku den sani di Yehofa meke, bika neenseefi wani wi ondoosuku den. Yehofa e taigi u taki: ‘Opo yu ede luku go a tapu.’ Bakadati ai akisi u taki: ‘Sama meke ala den sani di ye si?’ A piki á taanga fu fende, bika a Yehofa meke den (Yes. 40:26). Ala den sani di de a hemel, goontapu, anga a ze, a Yehofa meke den. Boiti dati, a omen sani we leli fu Yehofa te we luku den sani ya (Ps. 104:24, 25). Pakisei a fasi fa Yehofa meke u. Te we luku den sani di Yehofa meke we piisii. Fu di u poi si, tesi, fii, yee, anga sumee, meke u poi piisii fu ala den sani di Yehofa meke.

5. Enke fa Romesama 1:20 e soi, da sowtu wini we fende te we ondoosuku den sani di Yehofa meke?

⁵ Beibel e soi u wan taa sani di e soi saide u mu ondoosuku den sani di Yehofa meke. Den sani ya e soi u sowtu manii Yehofa abi. (Leisi Romesama 1:20.) Poti pakisei a den sani di Yehofa meke, da yo si taki ná pikin moin den moin. Den sani ya e soi u taki ná pikin koni Yehofa koni. Pakisei den somen switi nyanyan di we nyan. Den sani ya e soi taki Yehofa lobi libisama. Te we poti pakisei a den sani di Yehofa meke, a sani ya e yeepi u fu kon sabi en moo bun. Wi anga en e toon moo bun mati tu. Meke u poti pakisei now a wantu fasi fa Yehofa koboloiki den sani di a meke, fu leli sama wantu pelensipali sani.

6. San u sa leli fu den foo di e fee fu a wan peesi go na a taawan a son pisiten fu a yali?

⁶ Yehofa poti wan yuu di son sani mu pasa. Ala yali na a kaba fu februari anga mindii fu mei, den Islayelisama be gwenti si wan sowtu gaan weti foo e fee aini kulu  pasa na a kondee. Gadu be taigi den Islayelisama taki: ‘Den weti foo seefi sabi on ten den mu fee go a wan taa peesi’ (Yel. 8:7). Leti enke fa Yehofa poti wan ten pe den foo ya be e kon a wan, a letiso a poti wan ten di aw kuutu a goontapu. Te we luku fa son foo e fee aini kulu fu a wan peesi go na a taawan, a sani ya e soi u taki u sa biibi taki Yehofa o poli a ogii goontapu ya na a yuu di a poti.​—Hab. 2:3.

7. San u sa biibi te u luku a fasi fa den foo e fee? (Yesaya 40:31)

⁷ Yehofa e gi den sama di e dini en kaakiti. Yehofa be meke polofeiti Yesaya taigi den Islayelisama di be e fii booko-saka taki aw gi den kaakiti baka. A be paamisi den taki ‘den o fee enke agaa’. (Leisi Yesaya 40:31.) Den Islayelisama be lobi si fa den agaa e fee a tapu sondee fu den naki den mapaapi omen leisi. Den be e opo den mapaapi, da a winta be e tyai den go te a tapu. A sani ya e soi u taki Yehofa poi gi den sama di e dini en kaakiti, leti enke fa ai gi den agaa kaakiti fu fee. Te u si wan agaa e fee a tapu sondee fu ai naki en mapaapi omen leisi, holi a pakisei taki Yehofa poi gi u a kaakiti di wi abi fanowdu fu losi den polobelema fu u.

8. San Yopu leli di a poti pakisei a den sani di Gadu meke? San useefi sa leli fu den sani ya?

⁸ U sa fitoow Yehofa. Yehofa be soi Yopu taki a sa fitoow en (Yopu 32:2; 40:6-8). Di Yehofa be taki anga Yopu, a be taigi en fu a luku den sani di a meke. Sani enke den sitali, a woluku, anga a fasi fa tapu e koti faya. Yehofa be taigi en fu a poti pakisei a den meti tu. A be taki fu kaw anga asi (Yopu 38:32-35; 39:9, 19, 20). Den sani ya nai soi a kaakiti fu Yehofa namo, ma den e soi taki a koni. Den e soi tu taki Yehofa lobi u. Baka di Yopu luku den sani di Yehofa meke, a be e moo fitoow en (Yopu 42:1-6). Efu we ondoosuku den sani di Yehofa meke, a sani ya o yeepi u fu si taki a koni. Aw yeepi u fu si tu taki a abi kaakiti moo u. A poi puu den tesi di e miti u. Den sani ya e yeepi u fu moo fitoow en.

9-10. San a san anga a alen e leli u fu Yehofa?

⁹ Yesesi be sabi den sani di Yehofa meke bun, bika a be wooko makandaa anga en Dda fu meke hemel anga goontapu. Beibel taki Yesesi a wan ‘sama di koni fu du en wooko’ (Odo 8:30). Di Yesesi be de a goontapu, a be e taki fu den sani di Yehofa meke, fu leli den bakaman fi en sani fi en Dda. Luku wantu sani di a be leli den.

¹⁰ Yehofa lobi ala sama. Di Yesesi be e holi a lezing na a mongo, a be taki fu a alen anga a san. A omen sama nai si den sani ya fu gaan sani. Wi abi den sani ya fanowdu fu tan a libi. Efu Yehofa be wani, aa be abi fu gi den sama di nai dini en den sani ya. Ma ai meke a san pii gi ala sama. Ai meke alen kai gi ala sama tu (Mat. 5:43-45). Di Yesesi be taki anga den bakaman fi en fu den sani ya, a be wani soi den taki Yehofa lobi ala sama. Te we si fa a san e dongo efuso te a alen e kai, a sani ya e meke u piisii. A sani ya e membee u tu taki Yehofa lobi ala sama. Leti enke Yehofa, u wani soi den sama di we peleiki gi taki u lobi den.

11. Sowtu taanga-sikin we fende te we luku den foo?

¹¹ Yehofa e gi u den sani di wi abi fanowdu. Yesesi be taki: ‘Luku den foo di e fee  a tapu. Den nai sai sii efuso koti nyanyan. Den nai kibii nyanyan aini magisin tu, tokuso u Dda di de a hemel e gi den sani fu nyan.’ Den sama di be de ape di Yesesi be taki a sani ya, be e si foo e fee a tapu di a akisi den taki: ‘Wa pelensipali moo den foo ya noh?’ (Mat. 6:26). Yesesi be wani soi den anga a toli ya taki Yehofa e booko en ede anga u (Mat. 6:31, 32). A toli ya e gi den sama di e dini Yehofa taanga-sikin. Wan pionili sisa fu Sipanyookondee be e fii booko-saka, bika aa be poi fende wan peesi fu tan. Baka di a si fa den foo e nyan, a sani de be yeepi en fu fii moo bun. A taki: ‘Efu Yehofa e solugu den foo ya, da aw solugu mi tu.’ Aa langa seefi, neen a sisa ya fende wan peesi fu tan.

12. Enke fa Mateyesi 10:29-31 e soi, da san den pikin foo e leli u fu Yehofa?

¹² Iniiwan fu u pelensipali gi Yehofa. Fosi Yesesi be sende den apostel fi en fu go peleiki, a be leli den taki den á mu feele den sama di wani du ogii anga den. (Leisi Mateyesi 10:29-31.) Yesesi be taki fu wan pikin foo di be lai aini Islayeli. Aini a ten fu Yesesi, a foo ya á be pelensipali. Ma a be taigi den disipel fi en taki: ‘Nawan fu den foo ya e kai a doti sondee fu u Dda di de a hemel sabi.’ Bakadati a taki: ‘U pelensipali moo tyaipi pikin foo.’ Yesesi be soi den baka fi en taki Yehofa e poti pakisei a iniiwan fu den. A sani ya be o yeepi den fu den á feele te sama be o libi ogii anga den. Den disipel fu Yesesi be musu e membee den sani di a be leli den te den be si den pikin foo te den be e peleiki aini den foto anga den kampu. Tei si wan pikin foo, holi a pakisei taki Yehofa e poti pakisei a iniiwan fu u, bika ‘u pelensipali moo tyaipi pikin foo’. Fu di Yehofa e yeepi u, meke aa de fu u feele te sama e libi ogii anga u.​—Ps. 118:6.

13. San u mu e du efu u wani leli wan sani fu den sani di Yehofa meke?

¹³ A omen sani u sa leli fu Yehofa te we luku den sani di a meke. Faw sa du a sani ya? A fosi sani di u mu du, a taki u mu meke ten fu luku den sani di Yehofa meke. Bakadati, da u luku san den sani ya e leli u fi en. Ma a ná ala yuu ai makiliki gi u fu du den sani ya. Géraldine, wan sisa di e tan a Kamerun taki: ‘A foto mi kiya, neen meke a bunbun moiti mi be mu meke fu luku den sani di Yehofa meke.’ Wan owluman den e kai Alfonso taki: ‘Mi be kon si taki efu mi wani leli wan sani fu den sani di Yehofa meke, mi wawan mu go a wan peesi, da mi sidon pakisei san den sani ya e leli mi fu Yehofa.’

14. San David be e leli te a be e luku den sani di Yehofa meke?

 ¹⁴ David be lobi sidon pakisei den sani di Yehofa meke. A be taki: ‘Te mi luku hemel, den sani di i meke, a mun anga den sitali di i meke, da san a wan libisama di yu e poti pakisei neen?’ (Ps. 8:3, 4) David á be e luku den sitali namo, ma a be e luku san den sitali e leli en fu Gadu. David be kon si taki Yehofa abi makiti. Boiti dati, a be e sidon e pakisei fa a be e goo aini en mma bee. Te David be luku a fasi fa en sikin meke, a sani ya be e yeepi fu si taki ná pikin koni Yehofa koni.​—Ps. 139:14-17.

15. Kai wantu sani di Yehofa meke di e yeepi i fu si sowtu manii a abi. (Psalm 148:7-10)

¹⁵ Leti enke David, na ala se u sa si den sani di Yehofa meke. Efi ye luku den sani di Yehofa meke, yo kon sabi en moo bun. Te ye waan san, pakisei a kaakiti di Yehofa abi (Yel. 31:35). Tei si wan foo e meke nesi, da poti pakisei na a koni fu Yehofa. Te u si wan pikin dagu e feti fu kisi en tee we lafu. A sani ya e soi taki Yehofa wani u piisii. Tei si wan mma e pee anga en pikin, gi Yehofa daa fu a lobi fi en. A omen okasi wi abi fu kon sabi Yehofa, bika ala den sani di a meke e gafa en winsi den nyoni efuso bigi. Winsi den de koosube efuso den de faawe toku den e gafa en.​—Leisi Psalm 148:7-10.

16. San u mu de kabakaba fu du?

¹⁶ Yehofa a Gadu fu u koni, a lobi u, a abi kaakiti tu. Boiti dati, ala den sani di a meke moin. Efu we meke ten luku den sani di Yehofa meke, a sani ya o yeepi u fu kon sabi den manii fi en. Na ala yuu u mu e meke ten fu luku den sani di Yehofa meke, da u luku san den sani ya e leli u fi en. Efu we du a sani ya, wi anga Yehofa o toon moo bun mati (Yak. 4:8). Aini a taa artikel, wo luku fa mma anga dda sa yeepi den pikin fu den fu den anga Yehofa toon moo bun mati te den e luku den sani di a meke.