SUTUDI-ARTIKEL 10
Saide i mu dopu?
‘U mu dopu.’—TOLI 2:38.
SINGI 34 Du sani anga wan kiin ati
SAN WO LELI a
1-2. Sai pasa te wan sama e dopu? San wo luku aini a artikel ya?
I SI pe wan kulu sama e dopu kaba? Fosi den sama ya dopu, ye yee fa den e piki anga den hii ati te a baala e poti den tu akisi gi den. Den famii anga den mati fu den e poolo anga den. Te den sama di o dopu komoto aini a wataa, den baala anga sisa e naki ana gi den. Ye si fa den e piisii tu. Te u luku omen sama e dopu aini wan yali, da u sa taki ala wiki a omen dunsu sama e paamisi Yehofa taki den o libi enke fa a wani, da den dopu.
2 Ma fa a de anga yu? Efu yu abi a pakisei fu dopu, da yu a wan sama di pelensipali gi Yehofa, bika ye ‘suku en’ winsi fa a goontapu ya ogii (Ps. 14:1, 2). Na ala sama a artikel ya sikiifi gi, winsi i yonkuu efuso i gaandi. Ala sama di dopu kaba wani tan dini Yehofa anga den hii ati. Neen meke wo luku dii sani fu saide u wani dini Yehofa.
I LOBI A TUU
A omen dunsu yali kaba Saatan e poli Yehofa nen (Luku paragraaf 3-4)
3. Saide den sama di e dini Yehofa lobi a tuu? (Psalm 119:128, 163)
3 Yehofa e gi a foluku fi en taanga-sikin fu ‘lobi a tuu’ (Sak. 8:19). Yesesi be e gi den bakaman fi en taanga-sikin fu libi a wan letifasi (Mat. 5:6). A sani ya wani taki den be mu e angii fu du san bun, fu du sani di Yehofa lobi. I lobi a tuu? U sabi taki i lobi en. Ya lobi lei. Ya lobi ogii tu. (Leisi Psalm 119:128, 163.) Efu wan sama lobi lei, da ai waka a Saatan, a tiiman fu a goontapu ya baka (Yoh. 8:44; 12:31). Saatan wani poli a nen fu Yehofa. Senten aini a dyali fu Eden, neen Saatan e paati lei fu Yehofa. A wani sama si Yehofa enke wan Gadu di nai booko en ede anga sama. Boiti dati, a wani sama si Yehofa enke wan Gadu di e kibii bun sani gi sama (Gen. 3:1, 4, 5). Fu di Saatan lei gi Yehofa, meke sama e denki ogii fi en. Te sama ‘á lobi a tuu’, da Saatan e meke den du omen sowtu ogii.—Rom. 1:25-31.
4. Fa Yehofa soi taki en na ‘a Gadu fu a tuu’? (Luku a fowtow tu.)
4 Yehofa a wan Gadu ‘di nai lei’. Neen meke ai leli den sama di lobi en a tuu (Ps. 31:5). Fu di Yehofa e leli den sama dini en a tuu, meke Saatan á poi koli den anga den lei fi en. Boiti dati, Yehofa e leli den sama di e dini en taki den mu e taki a tuu. Den mu e libi a wan letifasi tu. A sani ya e meke den abi wan kiin kosensi (Odo 13:5, 6). Di i sutudeli Beibel Yehofa meke i fii, bika i nai biibi den lei fu Saatan moo. Yu abi freide aini yu ati. I leli tu taki a fasi fa Yehofa e du sani na a moo bun fasi (Ps. 77:13). Neen meke i wani du sani di Yehofa lobi (Mat. 6:33). Boiti dati, i wani soi taki den sani di Saatan taki fu Yehofa a lei a lei gi en. Ma fai sa du a sani ya?
5. Fai sa soi taki ye holibaka gi a tuu?
5 Ye libi a wan fasi di e soi taki i nai biibi den lei fu Saatan. Ye holibaka gi a tuu. Efi ye du a sani ya, da ye soi taki i wani Yehofa enke i Tiiman. Ye soi tu taki i wani du sani enke fa a wani. Fai sa du a sani ya? I sa du a sani ya tei paamisi Yehofa taki yo libi enke fa a wani, da i dopu. Efii lobi a tuu, a sani ya o yeepi i fu man go a fesi fu dopu bakaten.
I LOBI YESESI KELESTESI
6. Enke fa Psalm 45:4 e soi, da saide i lobi Yesesi?
6 Saide i lobi Yesesi? Psalm 45:4 e soi saide i mu lobi Yesesi (Leisi en.) Yesesi lobi a tuu, a lobi te sama abi sakafasi. A lobi te den e libi a wan letifasi tu. Efii lobi a tuu, efii lobi te sama e libi a wan letifasi, da i musu lobi Yesesi. Pakisei fa Yesesi be e holibaka gi a tuu (Yoh. 18:37). Fa Yesesi be e soi taki a abi sakafasi?
7. Sai lobi fu a fasi fa Yesesi e soi sakafasi?
7 A fasi fa Yesesi be e du sani e soi taki a abi sakafasi. Aa be e poti pakisei neenseefi, neen Dda a be e gi gaandi ala yuu (Malik. 10:17, 18; Yoh. 5:19). Fa ye fii tei luku a fasi fa Yesesi be e soi sakafasi? A nai meke i moo lobi a Manpikin fu Gadu noh? A nai meke i wani waka neen baka noh? Eeye. Saide Yesesi abi sakafasi? A di a lobi en Dda, neen Dda baka ai waka (Ps. 18:35; Heb. 1:3). Yesesi abi denseefi manii di en Dda abi. A sani ya nai meke i moo lobi en noh?
8. Saide u lobi a Kownu fu u?
8 Ai bigi gi u taki wi abi Yesesi enke u Kownu, bika en na a moo bun Tiiman. A Yehofa seefi gi Yesesi leli. Neen poti en fu tii enke Kownu tu (Yes. 50:4, 5). Pakisei a fasi fa Yesesi soi taki a lobi u (Yoh. 13:1). Yesesi aw Kownu, neen meke u lobi en. Ai kai den sama di lobi en mati. Ma den mati fi en lobi en tu, bika den e du san a taki (Yoh. 14:15; 15:14, 15). Ná pikin bigi ai bigi gi u taki wi anga a Manpikin fu Yehofa a mati.
9. Saide u sa taki a dopu fu Yesesi anga du fu wan Kelesten na aseefi?
9 Wan fu den sani di Yesesi taki den bakaman fi en mu du, a fu dopu (Mat. 28:19, 20). A soi den fa den mu du a sani ya. Ma a dopu fu Yesesi anga du fu den bakaman fi en kengi pikinso. (Luku a faki di den e kai ‘ Saide a dopu fu Yesesi anga du fu den bakaman fi en a ná aseefi?’) Winsi fa den kengi pikinso, toku den abi sani di de aseefi. A dopu di Yesesi dopu e soi taki a be de kabakaba fu du a wani fi en Dda (Heb. 10:7). A dopu di den bakaman fu Yesesi e dopu e soi sama taki den paamisi Yehofa taki den o libi enke fa a wani. A dini di den e dini Yehofa e kon toon a moo pelensipali sani gi den, leti enke Yesesi.
10. Fa a lobi di i lobi Yesesi o yeepi i fu dopu?
10 I sabi taki Yesesi na a Manpikin fu Gadu. Neen na a sama di Yehofa poti fu tii u. I kon sabi tu taki Yesesi e du sani pilisisi enke en dda. A be e gi den sama di angii be e kii nyanyan. A be e toosutu den sama di be e fii booko-saka. A be e deesi den sama di siki (Mat. 14:14-21). Ye si fa Yesesi e tii a kemeente aini a ten ya (Mat. 23:10). I kon sabi tu taki enke Kownu fu Gadu Kownukondee Yesesi o du moo sani aini a ten di e kon. Fai sa soi taki i lobi en? A te ye meke moiti fu waka neen baka (Yoh. 14:21). Wan fasi fai sa du a sani ya, a tei paamisi Yehofa taki yo libi enke fa a wani, da i dopu.
I LOBI YEHOFA
11. San na a moo pelensipali sani saide we dopu?
11 San na a moo pelensipali sani saide we dopu? Yesesi be taki san na a moo gaan weiti. A be taki: ‘I mu lobi Yehofa a Gadu fii anga i hii ati, i hii libi, i hii fusutan, anga ala i kaakiti’ (Malik. 12:30). A so i lobi Yehofa?
A Yehofa gi u ala den bun sani di e meke a libi e switi gi u (Luku paragraaf 12-13)
12. Saide i lobi Yehofa? (Luku a fowtow tu.)
12 A omen sani de di meke u lobi Yehofa. A Yehofa ‘na a sama di gi u libi’. Neen e ‘gi u ala bun sani anga ala sani di naabi fowtu’ (Ps. 36:9; Yak. 1:17). Ala bun sani di e meke we piisii, a Yehofa gi u den.
13. Saide a dede di Yesesi dede gi u a wan kado?
13 A dede di Yesesi kon dede gi u a wan kado di Yehofa gi u. Saide u sa taki a sani ya? Yehofa anga Yesesi sabi denseefi bun. Yesesi be taki: ‘Nda lobi mi’ ‘miseefi lobi Nda tu’ (Yoh. 10:17; 14:31). A omen miliyun yali den be e wooko makandaa, neen meke den be kon moo lobi denseefi (Odo 8:22, 23, 30). Pakisei fa Yehofa be e fii di a gi pasi fu a Manpikin fi en pina te enke a dede. Yehofa lobi ala sama. A lobi i tu. Neen meke a be de kabakaba fu sende a Manpikin fi en kon dede gi u fu u sa fende teego libi (Yoh. 3:16; Gal. 2:20). Na a sani ya na a moo pelensipali sani saide u lobi Yehofa.
14. San na a moo bun sani di i sa du anga i libi?
14 Moo ye leli sabi Yehofa, moo yo lobi en. Yu anga Yehofa sa de mati nownow, ma yu anga en sa de mati fu teego tu. Ai gii taanga-sikin fu du sani di e meke en ati piisii (Odo 23:15, 16). A ná taki i mu e taki namo taki i lobi Yehofa, ma den sani di ye du, o soi efii lobi en tuutuu (1 Yoh. 5:3). A dati na a moo bun sani di i be sa du anga i libi.
15. Fai sa soi Yehofa taki i lobi en?
15 Fai sa soi Yehofa taki i lobi en? A fosi sani, a taki yo paamisi en aini begi taki yo libi enke fa a wani (Ps. 40:8). Bakadati, da i dopu fu soi sama taki i paamisi Yehofa taki yo libi enke fa a wani. Enke faw be taki kaba, da tei dopu ye piisii. A dei ya na a moo pelensipali dei aini i libi. Yo bigin libi wan nyun libi. Yo libi gi Yehofa (Rom. 14:8; 1 Peit. 4:1, 2). Kande aa be makiliki gii fu teke a bosoloiti ya, ma na a moo bun sani di i be sa du, bika a opo a pasi gii fu piisii tuutuu fu a libi. Saide u taki so?
16. Enke fa Psalm 41:12 e soi, da san Yehofa o du gi den sama di e dini en?
16 Sama á de di lobi gi sama sani enke Yehofa. Winsi san u gi Yehofa, di aw gi u baka, aw gi u moo enke san u be gi en (Malik. 10:29, 30). Winsi fa a goontapu ya ogii nownow, toku Yehofa o gii a moo switi libi. Ma dati a ná ala ete, bika a dopu di i dopu, opo a pasi gii fu fende moo belesi fu Yehofa. Yo man dini i Dda Yehofa fu teego. Wo moo lobi useefi tu. Boiti dati, leti enke fa Yehofa e libi fu teego, a so iseefi o libi fu teego.—Leisi Psalm 41:12.
17. Sai sa gi Yehofa di á naabi ete?
17 Tei paamisi Yehofa taki yo libi enke fa a wani da i dopu, yu abi a gaandi fu gi en wan pelensipali sani. A Yehofa gii ala den sani di e meke a libi switi gii. Efii wani soi taki ye teke den sani di ai du gii fu bigi, i sa gi en wan sani di á naabi ete. A sani de na a dini di yo dini en anga i hii ati (Yopu 1:8; 41:11; Odo 27:11). A dati na a moo bun fasi fai sa libi. A lobi di i lobi Yehofa mu de a moo pelensipali sani saide i wani dopu.
I KABA FU DOPU?
18. Sai sa akisi iseefi?
18 I wani dopu? Fai be o piki a akisi ya? Sama á poi piki a akisi ya gii. Neen meke i mu akisi iseefi taki: ‘Sai tapu mi fu dopu?’ (Toli 8:36). Pakisei den dii sani di u luku aini a artikel ya. A fosi sani a taki i lobi a tuu. Akisi iseefi taki: ‘Mi wani si a dei pe ala sama o go e taki a tuu anga a dei pe ala sama o du sani a wan letifasi?’ Du fu tu sani di u luku a taki i lobi Yesesi. Akisi iseefi taki: ‘Mi wani a Manpikin fu Gadu enke mi Kownu? Mi de kabakaba fu waka neen baka?’ Du fu dii sani di u luku na a moo pelensipali wan. Dati na a lobi di i lobi Yehofa. Akisi iseefi taki: ‘Mi wani Yehofa piisii? En a mi Gadu tuutuu?’ Efii piki ala den akisi ya anga ‘iya’ da san e tapu i fu dopu nownow?—Toli 16:33.
19. Saide ya mu daaidaai fu dopu? Gi wan ageisitoli. (Yohanisi 4:34)
19 Efi ye daaidaai fu dopu, da a ageisitoli fu Yesesi ya sa yeepi i. (Leisi Yohanisi 4:34.) Yesesi be taki a du di u mu du a wani fi en dda de enke nyanyan. Saide? Nyanyan bun gi u sikin. Yesesi be sabi taki ala den sani di Yehofa e taigi u bun gi u tu. Yehofa á wani u du sani di o tyai takuu bakapisi gi u. Neen meke a bun fu akisi useefi taki: Yehofa wani mi dopu? Eeye (Toli 2:38). I sa biibi taki te ye du sani enke fa Yehofa wani, a sani ya o tyai wini gii. Efi ya be o daaidaai fu nyan wan nyanyan di i lobi, da saide i mu daaidaai fu dopu?
20. San wo luku aini a taa artikel?
20 Saide son sama e daaidaai fu dopu? Son sama e taki ‘mia kaba ete’. Ma a paamisi di wan sama e paamisi Yehofa taki aw libi enke fa a wani, na a moo bun sani di wan sama sa du. Neen meke i mu denki bun fosi i du a sani ya. Yu abi ten fanowdu tu. Boiti dati, a bunbun moiti i mu meke fu man du a sani ya. Ma efii wani dopu tuutuu, sai sa du fu teke seeka nownow? Wo piki a akisi ya aini a taa artikel.
SINGI 28 Toon Yehofa mati
a Ala sama di e sutudeli mu dopu te fu kaba. San o yeepi i fu doo a maiki ya? Aini a artikel ya, wo taki fu dii sani di sa yeepi wan sama fu dopu. Wo luku tu faw libi o kon de te u paamisi Yehofa taki wo libi enke fa a wani, da u dopu.
