Saide a man di Bowas be e kai ‘mi mati’ taki aw lasi efu a toow anga Rut? (Rut 4:1, 6)

Aini a ten fu Beibel, efu wan man be dede sondee fu a meke pikin, da den be mu piki wantu akisi: San o pasa anga a pisi doti fi en? A famii nen fu a man ya be o de ete? A weiti fu Mosesi e piki den akisi ya.

San be o pasa anga a pisi doti fu wan man di dede efuso di seli a doti fi en fu di a kon pooti? Wan baala efuso wan koosube famii fi en be abi a leti fu bai en teke baka. A so a gudu ya á be o komoto aini a famii.​—Lef. 25:23-28; Num. 27:8-11.

Fa a sani ya be o meke sama á feegete a nen fu a man di dede? Enke fa a toli fu Rut e soi, da a wan swagi fu a uman efuso wan koosube famii fu a man be mu toow anga en. A fosi pikin di den be o meke be o tyai a nen fu a man di dede. A be o fende den gudu tu di a man be abi a leti fu fende. A sani ya be o tyai wini gi a uman fu a man di dede.​—Deit. 25:5-7; Mat. 22:23-28.

Luku a toli fu Naomi. A be toow anga Elimeilek. Di a man ya anga den boi fi en dede, Naomi á be abi nawan sama fu solugu en moo (Rut 1:1-5). Di a daai go baka a Yuda, neen a taigi Rut, a main fi en fu akisi Bowas fu a bai a pisi doti fu den. A man ya a be wan koosube famii fu Elimeilek (Rut 2:1, 19, 20; 3:1-4). Ma Bowas be sabi taki wan moo koosube famii fu Elimeilek be de. Aini Beibel Bowas e kai a man ya ‘mi mati’. Na a man ya be abi a leti fu bai a pisi doti fu Elimeilek.​—Rut 3:9, 12, 13.

Biginbigin a man ya be wani yeepi Rut (Rut 4:1-4). A be sabi taki a omen moni a be mu pai fu a pisi doti. A be sabi tu taki Naomi á be o poi meke pikin moo di be o fende a pisi doti fu Elimeilek. Neen be o fende a goon de. A so a be o kon moo gudu.

Ma a kengi pakisei di a yee taki a be mu toow anga Rut, bika a be fende taki a be o lasi. Neen meke a taki: ‘Mi naw poi bai a doti efuso mio lasi’ (Rut 4:5, 6). Saide a man ya be kengi pakisei?

Bika efu a man ya efuso wan taa sama be o toow anga Rut, neen den meke wan pikin, da na a pikin de be o fende den gudu fu Elimeilek. Saide a man ya be e fii enke a be o lasi? Beibel nai taki nawan sani fu a toli de. Ma kande a fu den sani ya ede.

• A fosi sani, a taki a sosokaali a man ya be o bai a doti de, bika á neen be o fende a doti ma na a boi fu Rut.

• Du fu tu sani, a taki neen be o abi fu solugu Rut anga Naomi.

• Du fu dii sani, a taki efu en anga Rut be meke pikin, da den pikin fi en be o abi fu paati den gudu fi en anga den pikin fu Rut.

• Du fu fo sani, a taki efu a man ya á be meke nawan pikin, da na a boi fu Rut be o fende a doti fu Elimelek anga du fi en. Te a be o dede, a wan pikin di á be e tyai en nen be o fende a pisi doti fi en. A fu di a man ya á be wani lasi den gudu fi en, meke aa be wani yeepi Naomi. Neen meke a meke Bowas wan taa famii fu Elimeilek bai a doti fu Rut. Bowas du a sani ya, bika a be wani ‘a famii gudu tan fu a man di dede.’​—Rut 4:10.

Enke faw si da a man ya be e denki enseefi namo. Na a nen anga den gudu fi en a be e pakisei. Aa be e denki fa a be sa yeepi taawan. Ma winsi fa a man ya á be wani lasi a nen fi en, toku nawan sama aini a ten ya a sabi fa de be e kai en. A lasi a gaandi di Bowas be fende fu de enke wan fu den afo fu a Mesiyas, Yesesi Kelestesi. A wan tyali sani taki a man ya á be wani yeepi sama di de a nowtu, fu di a be e denki enseefi namo.​—Mat. 1:5; Luk. 3:23, 32.