1-2. San wan sama mu du fosi a dopu?

 AINI den feifi yali di pasa, a moo enke wan miliyun sama dopu enke wan Yehofa Kotoigi. A omen fu den sama ya leli a waaleiti ‘yonkuuyonkuu’, leti enke Timotiyesi (2 Tim. 3:14, 15). Ma son sama a di den kon moo bigi fosi den kon a waaleiti. Wantu yali pasa, wan uman di be e sutudeli Beibel anga den Yehofa Kotoigi dopu di a be abi 97 yali.

² Efi yu a wan sama di e sutudeli Beibel efuso i mma anga i dda a wan Yehofa Kotoigi, ye pakisei fu dopu? Efi ye pakisei fu du a sani ya, moo so á de. Na a moo bun sani dii sa du. Ma fosi i dopu, i mu paamisi Yehofa taki yo libi enke fa a wani. Aini a artikel ya, yo si san a wani taki fu paamisi Yehofa taki yo libi enke fa a wani. Yo si saw yeepi i tu fi ya daaidaai fu paamisi Yehofa taki yo libi enke fa a wani, dai dopu.

SAN A WANI TAKI FU PAAMISI YEHOFA TAKI YO LIBI ENKE FA A WANI?

3. Kai wantu sama aini Beibel di be paamisi Yehofa taki den o dini en.

³ Te Beibel taki wan sama paamisi Yehofa taki aw dini en, da a sani ya wani taki Yehofa teke a sama ya fu du wan wooko gi en. A hii foluku fu Islayeli be paamisi Yehofa taki den o dini en. Ma son wan fu den Islayelisama be e du pelensipali wooko gi Yehofa tu. Aron a be wan fu den sama ya. A be e tei wan paata pisi gowtu neen fesi ede fu soi taki a be e du wan apaiti wooko gi Yehofa.  A sani ya be e soi taki neen a be a gaan pilisite (Lef. 8:9). Den Nasireisama seefi be e du wan pelensipali wooko gi Yehofa. A wowtu ‘Nasireisama’, komoto fu a Hebrew wowtu ‘nazir’. A wowtu ya wani taki ‘a wan di poti apaiti’ efuso ‘meke wan paamisi’. Den Nasireisama be mu du wantu sani di be sikiifi aini a Weiti fu Mosesi.​—Num. 6:2-8.

4. (a) San na a wooko fu wan sama di paamisi Yehofa taki aw libi enke fa a wani? (b) San den wowtu ‘ná teli iseefi moo wani taki’? (Luku a fowtow tu.)

⁴ Tei paamisi Yehofa taki yo libi enke fa a wani, da a sani ya wani taki ye toon wan bakaman fu Yesesi. Na a dini di ye dini Yehofa o de a moo pelensipali sani gii. Sai mu du moo tei toon wan Kelesten? Yesesi be taki: ‘Efu wan sama wani waka a mi baka, aa mu teli enseefi moo, ma a mu teke en pina ponsu da a tan waka a mi baka’ (Mat. 16:24). A sani ya wani taki tei paamisi Yehofa taki yo libi enke fa a wani, yo abi fu fika son sani di aa lobi (2 Kor. 5:14, 15). I naw libi enke fa a sondu sikin wani. Yo fika sani enke hululibi tu (Gal. 5:19-21; 1 Kor. 6:18). Aw hati i taki i fika den sowtu libi ya? We efii lobi Yehofa tuutuu, neen ye biibi taki a fasi fa a wani i libi moo bun gii, a naw hati i taki i nai du son sani moo (Ps. 119:97; Yes. 48:17, 18). Wan baala den e kai Nicholas taki: ‘I sa si den weiti fu Yehofa enke wan sitaafu-osu, ma i mu si den enke wan koi tu di e tapu wan lew fu aa du ogii anga i.’

5. (a) Fai sa paamisi Yehofa taki yo libi enke fa a wani? (b) Saide a paamisi di wan sama e paamisi Yehofa taki aw libi enke fa a wani anga a dopu di ai dopu a ná aseefi?

⁵ Fai sa paamisi Yehofa taki yo libi enke fa a wani? I mu taigi en aini begi taki  neen wawan yo dini. I mu paamisi en tu taki a den sani di a wani i du, o de den moo pelensipali sani aini i libi. Tei paamisi Yehofa a sani ya, da a leti enke i paamisi en taki yo lobi en ‘anga i hii ati, i hii libi, ala i fusutan, anga ala i kaakiti’ (Malik. 12:30). Tei paamisi Yehofa aini begi taki yo libi enke fa a wani, a yu anga en wawan e sabi. Te yo dopu, yo soi ala sama taki i paamisi Yehofa taki yo libi enke fa a wani. Tei paamisi en a sani ya, a wan sweli i meke. Yehofa wani i holi iseefi na a paamisi dii meke.​—Peleik. 5:4, 5.

SAIDE I MU PAAMISI YEHOFA TAKI YO LIBI ENKE FA A WANI?

6. Saide wan sama e paamisi Yehofa taki aw libi enke fa a wani?

⁶ A moo gaan sani di e meke wan sama e paamisi Yehofa taki aw dini en a fu di a lobi en. Tei sutudeli Beibel ye kon sabi Yehofa moo bun. Ye kon sabi san a abi a pakisei gi libisama tu. Tei kon sabi den sani ya, a sani ya e meke i kon moo lobi en (Kol. 1:9). A sutudeli di ye sutudeli Beibel meke i kon biibi taki (1) Yehofa de tuutuu. (2) Taki Beibel na a Wowtu fi en. (3) Ye biibi tu taki a abi wan olikanisâsi di e du a wani fi en.

7. Saw mu du fosi u paamisi Yehofa taki wo libi enke fa a wani?

⁷ Den sama di paamisi Yehofa taki den o libi enke fa a wani sabi den moo pelensipali leli fu Beibel. Den e du san den leli tu. Boiti dati, den e paati san den leli anga taawan (Mat. 28:19, 20). Den kon moo lobi Yehofa. Den e du ala san den poi fu dini en wawan tu. A so a de anga i tu? Efii lobi Yehofa anga i hii ati, i naw  dopu fu dii wani i mma anga i dda efuso a sama di e sutudeli anga i piisii. I naw dopu fu dii wani waka a den mati fii baka tu.

8. Fa a teke di yo teke ten pakisei den sani di Yehofa du gii o yeepi i fu paamisi en taki yo libi enke fa a wani? (Psalm 116:12-14)

⁸ Tei pakisei ala den sani di Yehofa e du gii, ye wani soi en taki ye teke en fu bigi taki ai yeepi i. Ye wani paamisi en tu taki yo libi enke fa a wani. (Leisi Psalm 116:12-14.) Beibel taki a Yehofa na a Sama di e gi wi ‘ala bun sani anga ala sani di naabi fowtu’ (Yak. 1:17). A moo gaan bun di Yehofa du giw, a di a meke Yesesi kon dede giw. Pakisei a sani ya. A dede di Yesesi dede giw, o meke wi anga Yehofa toon moo bun mati. A sani ya o meke u fende teego libi tu (1 Yoh. 4:9, 10, 19). A moo bun fasi fai sa soi Yehofa taki ai bigi gii taki a sende en Manpikin kon dede gii, a tei paamisi en taki yo libi enke fa a wani. Tei du a sani ya, ye soi taki den taa sani di a du gii e bigi gii tu (Deit. 16:17; 2 Kor. 5:15). I sa luku a toli ya aini a I sa piisii fu teego! buku toli 46, penti 4. Wan felon fu dii miniti de aini a toli ya tu. A nen fu a felon ya na San u sa gi Gadu?

I DE KABAKABA FU PAAMISI YEHOFA TAKI YO LIBI ENKE FA A WANI, DAI DOPU?

9. Saide ya mu fii booko-saka efii si taki ya kaba fu paamisi Yehofa taki yo libi enke fa a wani?

⁹ Kande ye fii enke ya kaba fu paamisi Yehofa taki yo libi enke fa a wani, dai dopu. Kande i mu kengi wantu sani ete fu man libi enke fa Yehofa wani. Kande i mu meke ten fu taanga i biibi tu (Kol. 2:6, 7). A ná ala Beibelsutudi e go a fesi na aseefi fasi. Son sama e dopu yonkuuyonkuu, taawan e moo gaandi pikinso fosi den dopu. Neen meke ya mu maiki iseefi anga taawan. Meke moiti fu si sai poi du. Meke moiti fu e go a fesi pikinpikin tu, te enke i kaba fu paamisi Yehofa taki yo libi enke fa a wani, dai dopu.​—Gal. 6:4, 5.

10. Sai mu du efii si taki ya kaba fu paamisi Yehofa taki yo libi enke fa a wani dai dopu? (Luku a faki di den e kai ‘ Gi den sama di kiya a waaleiti’.)

¹⁰ Kande i si taki ya kaba fu paamisi Yehofa taki yo libi enke fa a wani dai dopu. Efu a so, tan poti a sani ya enke wan maiki dii wani doo. Begi Yehofa fu a yeepi i fu du den sani dii mu du ete fu man doo a maiki ya (Filip. 2:13; 3:16). Efii begi en fu a yeepi i, i sa biibi taki aw piki a begi fii.​—1 Yoh. 5:14.

SAIDE SON SAMA E DAAIDAAI FU PAAMISI YEHOFA TAKI DEN O LIBI ENKE FA A WANI DA DEN DOPU

11. Fa Yehofa sa yeepi i fi ya gwe fika en?

¹¹ Son sama di kaba fu dopu e daaidaai fu du a sani ya. Kande den e pakisei taki: ‘Efu mi dopu, neen mi du wan gaan sondu den o puu mi aini a kemeente.’ Efu a so ye fii, holi a pakisei taki Yehofa o yeepi i fu holidoo. Aw yeepi i fu du sani di o ‘meke a piisii ala yuu’ (Kol. 1:10). Aw gi yu a kaakiti di yu abi fanowdu fu du san bun. A omen baala anga sisa ai yeepi fu libi enke fa a wani, neen meke i sa biibi taki aw yeepi i tu (1 Kor. 10:13). Yehofa e yeepi a foluku fi en fu tan dini en. Neen meke a wantu sama namo den baala e abi fu puu aini a kemeente.

12. Saw yeepi i fi ya du gaan sondu?

¹² Fu di wi abi sondu meke we fii fu du sani di á bun (Yak. 1:14). Winsi we fii fu  du sani di á bun, toku u poi basi a fii ya. Aw seefi mu luku saw wani du anga u libi. Son sama e taki wa poi basi u fii, anga den sani di we du. Ma a sani ya a ná tuu. I poi dwengi iseefi fi ya du sani di á bun. Wan fu den sani di o yeepi i fu du a sani ya, a begi. I mu begi Yehofa ala dei fu a yeepi i fi ya sondu. I mu abi a gwenti fu e sutudeli Beibel. I mu e go a den komakandaa tu. Boiti dati, i mu e paati sai leli anga taawan. Efii tan du den sani ya, yo man du sai paamisi Yehofa. Aw yeepi i fii tan neen se tu.​—Gal. 5:16.

13. Saw sa leli fu Yowsefu?

¹³ Efii sabi a fesi san yo du fosi tesi miti i, a sani ya o yeepi i fi ya sondu. Beibel e taki fu wantu sama di be du a sani ya. Wan fu den sama ya a Yowsefu. A uman fu Potifar be e kai Yowsefu omen leisi fu siibi anga en. Ma Yowsefu be poti neen ede taki noiti a be o du sowan sani. Beibel taki a taigi a uman taki a naw du a sani de. A taigi en tu taki: ‘Fa mi sa du a gaan ogii ya? Ná sondu mi be o sondu a Gadu fesi noh?’ (Gen. 39:8-10) A sani ya e soi taki Yowsefu be sabi a fesi san a be o du, fosi a uman be kon neen anga den taki de. Neen meke a be moo makiliki gi en fu pasa a tesi ya.

14. Saw yeepi u fu taki nono gi sani di á bun?

¹⁴ Saw yeepi i fu pasa tesi leti enke Yowsefu? A nownow kaba i mu luku san yo du te tesi miti i. Meke moiti fu taki nono gi sani di Yehofa e buuse. Ya mu sidon pakisei den sani ya tu (Ps. 97:10; 119:165). Efii du a sani ya a fesi, a sani de o yeepi i fi ya sondu te tesi miti i, bika yo sabi sai mu du fu pasa a tesi.

15. Fa wan sama sa soi taki ai dini Yehofa anga en hii ati? (Hebrewsama 11:6)

¹⁵ Kande ye biibi taki na a tuu biibi de ya. Kande i wani dini Yehofa anga i hii ati tu. Ma kande wantu sani e holi yu a baka ete. I sa du san David be du. A be taki: ‘Gadu, ondoosuku mi. Ondoosuku mi ati. Ondoosuku mi finifini fii sa sabi sai gi mi booko-ede. Luku efu mi e waka a wan pasi pe ogii sa miti mi, dai soi mi a pasi di o meke mi fende teego  libi’ (Ps. 139:23, 24). Yehofa o belesi den sama di e dini en anga den hii ati. A moiti di ye meke fu doo a maiki fu paamisi en taki yo libi enke fa a wani dai dopu, e meke a si taki i wani dini en.​—Leisi Hebrewsama 11:6.

MEKE MOITI FI YU ANGA YEHOFA TOON BUN MATI

16-17. Fa Yehofa e hali den sama di kiya a waaleiti kon neen? (Yohanisi 6:44)

¹⁶ Yesesi taki a Yehofa e hali den bakaman fi en kon neen. (Leisi Yohanisi 6:44.) A wan gaandi wi abi taki Yehofa e hali u kon neen. Bika di a luku wi, a si wan bun sani aini u. Ai si ibii wan fu u enke wan gudu (Deit. 7:6). Iseefi de enke wan gudu gi Yehofa, neen meke a hali i kon neen.

¹⁷ Kande yu a wan yonkuuwan di kiya a waaleiti. Kande ye fii enke a fu dii mma anga i dda e dini Yehofa meke iseefi e dini en. Kande i nai kaba biibi taki a Yehofa hali i kon neen. Ma Beibel taki: ‘Kon koosube a Gadu, da enseefi o kon koosube a yu’ (Yak. 4:8; 1 Kolon. 28:9). Te ye meke moiti fu kon koosube a Yehofa, da Yehofa seefi e kon koosube a yu. Yehofa nai si yu enke wan pikin fu wan Kotoigi namo. Te a si a moiti di ye meke fu toon en mati, da ai du san sikiifi a Yakowbesi 4:8.​—Luku 2 Tesalonikasama 2:13 tu.

18. San wo luku aini a taa artikel? (Psalm 40:8)

¹⁸ Tei paamisi Yehofa taki yo libi enke fa a wani dai dopu, ye du sani enke Yesesi. Anga en hii ati a be taigi en Dda taki aw du ala san a taigi en. (Leisi Psalm 40:8; Heb. 10:7) Aini a taa artikel, wo luku saw yeepi i fu tan dini Yehofa anga i hii ati baka tei dopu.