1. San a wantu wini di we fende aini a olikanisâsi fu Yehofa?

 A WAN gaan gaandi wi abi fu de aini a olikanisâsi fu Yehofa aini a taanga ten ya. Dei fu dei a libi e moo taanga namo, ma Yehofa giw baala anga sisa fu yeepi u (Ps. 133:1). Ai yeepi u fu wi osulibi waka bun (Efe. 5:33–6:1). Ai soi u saw mu du tu te wi abi booko-ede fu man piisii baka.

2. Saw mu du? Saide u mu du a sani ya?

² U mu du ala saw man fu dini Yehofa anga u hii ati. Saide? Bika son yuu den sani di taawan e taki efuso du sa hati u. U sa lasi-ati tu te u meke wan fowtu, moomoo efu a omen leisi we meke aseefi fowtu. U mu tan dini Yehofa (1) te wan baala efuso wan sisa du wan hati sani anga u, (2) te u toowpaa du wan hati sani anga u, anga (3) te we fii booko-saka fu den fowtu di u meke. Aini a artikel ya, wo taki fu dii sama aini Beibel di den sani ya be miti. Wo luku tu saw sa leli fu den.

HOLIDOO TE WAN BAALA EFUSO WAN SISA DU WAN HATI SANI ANGA I

3. Sowtu tesi e miti a foluku fu Yehofa?

³ Tesi. Son baala anga sisa abi manii di wa kaba lobi. Son wan fu den e du sani di e hati u efuso e libi ogii anga u. Den baala di e teke fesi sa meke fowtu tu. Den sani ya sa meke sama akisi denseefi efu na a olikanisâsi fu Gadu de ya tuutuu. Pe fu den tan dini Yehofa makandaa anga den baala anga sisa, den nai taki anga den sama di be du sani anga den moo. Kande den naw kon a  den komakandaa moo tu (Sef. 3:9). A sani ya a wan koni sani fu du? Luku saw sa leli fu wan sama aini Beibel di aseefi sani ya be miti.

4. Sowtu tesi be miti apostel Pawlesi?

⁴ Sama fu Beibel. Apostel Pawlesi be sabi taki den baala anga sisa a sondu sama. Di a be toon wan disipel, son sama aini a kemeente a Yelusalem be e feele en, bika den á be e biibi taki a toon wan disipel (Toli 9:26). Bakaten son sama be e taki ogii fi en fu poli en nen (2 Kor. 10:10). Pawlesi be si fa wan owluman meke wan fowtu di be sa meke taa sama dyakata (Gal. 2:11, 12). Boiti dati, Malikisi, wan fu den sama di en anga en be e wooko, gwe fika en (Toli 15:37, 38). Pawlesi be sa meke den sani ya tapu en fu taki anga den baala anga sisa di be du hati sani anga en. Ma aa du a sani de. A tan dini Yehofa makandaa anga den baala anga sisa. San be yeepi Pawlesi fu holidoo?

5. San be yeepi Pawlesi fi en anga den baala anga sisa á poli? (Kolosesama 3:13, 14) (Luku a fowtow tu.)

⁵ Pawlesi be lobi den baala anga sisa. Pe fu a poti pakisei a den fowtu fu den, a lobi di a be lobi den be yeepi en fu poti pakisei a den bun manii fu den. Lobi be yeepi Pawlesi tu fu du san a sikiifi a Kolosesama 3:13, 14. (Leisi en.) Pakisei fa a be gi Malikisi paadon. Winsi fa Malikisi be gwe fika en a fosi leisi di a be go peleiki a omen peesi, toku aa be holi en na ati. Di a be sikiifi wan biifi gi a kemeente fu Kolose fu gi den taanga-sikin, a gafa Malikisi enke wan taanga wookoman, wan sama di be e ‘toosutu’ taawan (Kol. 4:10, 11). Di Pawlesi be de a sitaafu-osu a Rome, a be taki a wani Malikisi kon yeepi en (2 Tim. 4:11). A sani ya e soi taki aa be holi den baala anga sisa na ati. A be gi den paadon. Saw sa leli fu Pawlesi?

6-7. Saw yeepi u fu lobi den baala anga sisa fu u winsi fa den e meke fowtu? (1 Yohanisi 4:7)

⁶ San a toli ya e leli u? Yehofa wani u lobi den baala anga sisa fu u. (Leisi 1 Yohanisi 4:7.) Te wan baala efuso wan sisa du wan hati sani anga u, we holi a pakisei taki a ná fuseefi den du en, bika den e meke moiti fu du sani enke fa Yehofa wani (Odo 12:18). Yehofa lobi den sama di e dini en, winsi den e meke  fowtu. A nai poti wi a wan se te u meke wan fowtu. En ati nai boon naamo tu (Ps. 103:9). Ai bigi giw taki Yehofa e gi sama paadon. Useefi mu meke moiti fu waka neen baka tu​—Efe. 4:32–5:1.

⁷ U mu holi a pakisei taki moo a kaba e koosube, moo u mu meke moiti fu libi bun anga den baala anga sisa fu u. A ten de sama o moo libi ogii anga u. Kande den sooto u fu di we dini Yehofa. Te den sani ya o pasa, wo abi den baala anga sisa fu u taanga fanowdu (Odo 17:17). Luku san be miti wan owluman fu Sipanyookondee den e kai Josep. a Den be sooto en anga wantu baala fu di den nai mumui anga politiki. A taki: ‘Ala u be de na a wan peesi aini a sitaafu-osu, neen meke son yuu i be sa du sani di e fuka taawan. U be mu libi bun anga useefi. U be mu e gi useefi paadon. A sani ya be yeepi u fu libi na a wan. U be man yeepi useefi tu. Boiti dati, u be de anga sama ape di á be e dini Yehofa. Wan leisi mi be kisi mankei a mi ana. Mia be poi wooko anga en, bika den be lolo en. A wan fu den baala be e yeepi mi wasi mi koosi. A be e yeepi mi du taa sani tu. Mi be si san a tuutuu lobi di mi be abi yeepi fanowdu.’ Neen meke a nownow u mu meke en bun anga u baala anga sisa te wi anga den abi sani.

HOLIDOO TEI TOOWPAA DU WAN HATI SANI ANGA I

8. Sowtu tesi e miti toowpaa?

⁸ Tesi. Ala toowlibi abi en polobelema. Beibel e soi kiin taki sama di toow o miti anga ‘banowtu aini a libi’ (1 Kor. 7:28). Saide? Bika a toowlibi e tyai tu sondu sama kon a wan. Ala den tu man abi den manii, sani di den lobi anga sani di den á lobi. Den á kiya na aseefi fasi. Son yuu kande den o si wan manii na a taawan di den á be si ete fosi den toow. Den sani ya sa tyai polobelema kon aini a toowlibi. Pe fu den meke moiti fu losi a polobelema, den e suku fowtu a denseefi, winsi fa ala den tu man e meke fowtu. Kande den o si enke a moo bun fu den paati efuso booko a toow. Ma a sani de o losi a polobelema? b Meke u luku wan sama aini Beibel di be de aini wan toowlibi di á be makiliki.

9. Sowtu tesi be miti Abigayeli?

⁹ Sama fu Beibel. Abigayeli be toow anga Nabal. A man ya á be e libi bun anga sama (1 Sam. 25:3). A be musu taanga gi Abigayeli fu libi anga sowan man. A be abi a okasi fu booko a toow? Eeye. A be abi a okasi de di David be kon fu kii en man anga den futuboi fi en di a be wisiwasi David anga den man fi en (1 Sam. 25:9-13). Abigayeli be sa lowe, a so David be o fende a okasi fu kii Nabal. Ma aa du a sani de. A taki anga David fu aa kii Nabal (1 Sam. 25:23-27). Saide a du a sani ya?

10. San be yeepi Abigayeli fu holidoo di tesi be e miti en aini a toowlibi?

¹⁰ Abigayeli be lobi Yehofa. A be e  lesipeki a fasi fa Yehofa be e si a toowlibi. A be musu sabi san Gadu be taigi Adan anga Efa enke a fosi toowpaa (Gen. 2:24). Abigayeli be sabi taki Yehofa e si a toowlibi enke wan santa sani. A be wani du san Yehofa lobi. Neen meke a be du ala san a poi fu kibii en osufamii, moomoo a man fi en. Aa daaidaai fu tapu David fu aa kii Nabal. A be begi David fu wai ede gi en gi wan sani di enseefi á du. Yehofa be lobi a uman ya, bika aa be e denki enseefi namo. San man anga uman sa leli fu Abigayeli?

11. (a) Fa Yehofa wani toowpaa tyai denseefi? (Efeisesama 5:33) (b) San ye leli fu a sani di Carmen du fu kibii a toowlibi fi en? (Luku a fowtow tu.)

¹¹ San a toli ya e leli u? Yehofa wani sama di toow lesipeki denseefi, winsi aa makiliki fu libi anga den toowpaa. Ai piisii te ai si fa toowpaa e meke moiti fu losi den polobelema fu den. Ai piisii tu te a si taki den e lesipeki denseefi. (Leisi Efeisesama 5:33.) Luku a toli fu Carmen. Baka sigisi yali di a toow, neen a bigin sutudeli Beibel anga den Yehofa Kotoigi. Bakaten neen a dopu. A taki: ‘Mi man á be lobi a sani di mi du. A be e dyalusu anga Yehofa. A be e soso mi. A be e taigi mi taki aw fika mi.’ Toku Carmen holidoo. A 50 yali langa a meke moiti fu soi en man taki a lobi en. Ai lesipeki en tu. A taki: ‘Moo den yali be e pasa, moo mi be e leli fu fusutan fa mi man e fii. Mi be e meke moiti fu taki a wan lesipeki fasi. A toowlibi santa gi Yehofa, neen meke mi be e du ala san mi poi fu a toowlibi fu wa poli. Noiti mi taigi mi man taki mio gwe, bika mi lobi Yehofa.’ c Te polobelema de aini a toowlibi, i sa biibi taki Yehofa o yeepi i fu holidoo.

HOLIDOO TE YE FII BOOKO-SAKA FU DEN FOWTU DII MEKE

12. Sowtu tesi sa miti u te u du wan gaan sondu?

¹² Tesi. Efii du wan gaan sondu, a sani ya sa meke ye fii booko-saka. Beibel taki den sondu fu u sa meke u ‘kusumi’. Den sa meke u ‘fii booko-saka’ tu (Ps. 51:17). Wan baala den e kai Robert be e meke moiti fu toon wan dinali. Ma a be du wan gaan sondu bakaten. A sani ya meke a be e fii enke a daai baka gi Yehofa. A taki: ‘Ná pikin fon mi kosensi  be e fon mi. Mia be e fii bun seefiseefi. Mi be e kee te mi be e begi Yehofa. Mi be e fii enke Gadu á be o teke en ten fu aliki a begi fu mi, bika mi du wan sani di hati en.’ Te u du wan gaan sondu, u sa fii booko-saka te da we fii enke Yehofa gwe fika u. A fii ya sa meke u tapu fu dini Yehofa (Ps. 38:4). Efii fii so wan leisi kaba, da luku a toli fu wan sama aini Beibel di be tan dini Yehofa winsi fa a be du wan gaan sondu.

13. Sowtu gaan sondu Peitilisi be du? Sowtu fowtu a be meke fosi a du a gaan sondu?

¹³ Sama fu Beibel. A neti fosi den kii Yesesi, apostel Peitilisi meke wantu fowtu di meke a du wan gaan sondu. A be e fitoow enseefi, neen meke a be e gafa taki winsi ala den taa apostel gwe fika Yesesi, noiti aw gwe fika en (Malik. 14:27-29). Bakadati, di den be de aini a dyali fu Getsemanei a be taanga gi en fu tan anga ain (Malik. 14:32, 37-41). Di wan gaan kulu sama kon fu kisi Yesesi, Peitilisi lon gwe fika en (Malik. 14:50). Te fu kaba, a taki dii boo taki aa sabi Yesesi. A sweli seefi taki aa sabi en (Malik. 14:66-71). San Peitilisi du di a fusutan taki a du wan gaan sondu? A bali wan gaan adyumadye, bika ná pikin hati a sani di a be du hati en (Malik. 14:72). Pakisei fa Peitilisi be musu e fii di den kii Yesesi. A be musu e fii enke aa bun seefiseefi.

14. San be yeepi Peitilisi fu tan dini Yehofa? (Luku a fowtow a fesise fu A Wakititolen.)

¹⁴ A omen sani de di be yeepi Peitilisi fu tan dini Yehofa. Aa be e de en wawan pii a wan peesi, ma a be e de makandaa anga den baala anga sisa. Den be e toosutu en (Luk. 24:33). Boiti dati, di Yesesi weki baka a meke Peitilisi si en, bika kande a be wani gi en taanga-sikin (Luk. 24:34; 1 Kor. 15:5). Bakaten, pe fu Yesesi puu kaasi gi en fu den fowtu di a meke, a taigi en taki aw gi en wan gaan faantiwowtu (Yoh. 21:15-17). Peitilisi be sabi taki a du wan gaan sondu, ma a be e meke moiti fu du san bun. Saide? Bika a be sabi taki Yesesi lobi en ete. Den baala be e holibaka gi en tu. Saw sa leli fu a toli fu Peitilisi?

15. San Yehofa wani u biibi? (Psalm 86:5; Romesama 8:38, 39) (Luku a fowtow tu.)

¹⁵ San a toli ya e leli u? Yehofa wani u biibi taki a lobi u. A de kabakaba fu giw paadon. (Leisi Psalm 86:5;  Romesama 8:38, 39.) Te u du wan sondu, u kosensi e fon u. A so u meke. Ma a fon di u kosensi e fon u á wani taki Yehofa á lobi u moo efuso taki a naw giw paadon. Efu a so we fii, u mu suku yeepi wantenwanten. Robert di u be taki fi en kaba taki: ‘Fu di mi be e fitoow miseefi, meke mi be du wan gaan sondu. Mi be e si enke mi be o poi pasa ala den tesi di be o miti mi.’ Robert be kon fusutan taki a be mu taki anga den owluman. A taki: ‘Di mi du a sani de, mi si taki Yehofa lobi mi ete. Den owluman seefi be soi mi taki den lobi mi. Den yeepi mi fu biibi taki Yehofa á gwe fika mi.’ Useefi sa biibi taki Yehofa lobi u tuutuu. Efu u soi taki den sondu fu u e hati u, u suku yeepi, neen u meke moiti fu wa meke a fowtu de moo, u sa biibi taki Yehofa o giw paadon (1 Yoh. 1:8, 9). Efu we biibi taki Yehofa de kabakaba fu gi sama paadon, a sani ya o yeepi u fu tan dini en winsi u be meke wan fowtu.

16. Saide i de kabakaba fu tan dini Yehofa?

¹⁶ Yehofa e teke en fu bigi te a si a moiti di we meke fu dini en aini a taanga ten ya. Fu di Yehofa e yeepi u, meke u poi tan dini en winsi u meke wan fowtu efuso te wan sama du wan hati sani anga u. U mu lobi den baala anga sisa fu u, daw gi den paadon te den du wan hati sani anga u. We soi taki u lobi Yehofa tuutuu te we meke moiti fu losi den polobelema di wi abi aini a toowlibi. Boiti dati, efu u du wan gaan sondu, u mu suku yeepi a Yehofa, da aw giw paadon. U mu tan dini en tu. U sa biibi taki Yehofa o belesi u te u nai ‘tapu fu du san bun’.​—Gal. 6:9.