1-2. (a) San be e miti Pawlesi di a sikiifi a biifi gi den Efeisesama? Saide a sikiifi a biifi gi den? (b) San wo luku aini a artikel ya?

 DI PAWLESI be de a sitaafu-osu a Rome, a be wani gi den baala anga sisa fi en taanga-sikin. A sikiifi biifi gi den fu di aa be poi go luku den. A sikiifi wan fu den biifi ya na a pisiten fu a yali 60 efuso 61 gi den Efeisesama.​—Efe. 1:1; 4:1.

² Tin yali fosi a ten de, Pawlesi be de wan pisiten a Efeise e paati a bun nyunsu (Toli 19:1, 8-10; 20:20, 21). A be lobi den baala anga sisa anga en hii ati. Neen meke a be wani yeepi den fu den á gwe fika Yehofa. Ma saide a be e taki fu dunguu anga kiin di a be sikiifi a biifi gi den salufu Kelesten? San ala Kelesten sa leli fu a toli ya? Meke u luku a piki fu den akisi ya.

U KOMOTO A DUNGUU GO A KIIN

3. Fu sowtu sani Pawlesi be taki di a sikiifi a biifi gi den Efeisesama?

³ Pawlesi be taigi den Kelesten a Efeise taki: ‘U be de a dunguu, ma now u kon na a kiin’ (Efe. 5:8). Pawlesi be taigi den a sani ya fu soi fa den be kengi. Meke u luku saide a be taki den Efeisesama be de a dunguu.

4. Fa den Efeisesama be de a dunguu tei luku san den be e biibi?

⁴ Falisi leli be poti den a dunguu. Fosi den Efeisesama be toon Kelesten, den be e biibi falisi leli. Den be e bonu. A tempel fu a Giiki gadu Artemis be de aini a  foto Efeise. Den sama fu fosi be e si a tempel ya enke wan gaan gendee sani. Falisi leli be de na ala se aini a foto ya. Den sama be e meke pobiki fu a gadu Artemis e seli. A bunbun moni den be e meke anga a sani ya (Toli 19:23-27). Boiti dati, ná pikin bonu den sama ya be e bonu.​—Toli 19:19.

5. Fa den Efeisesama be de a dunguu tei luku fa den be e tyai denseefi?

⁵ A fasi fa den be e libi meke den be de a dunguu. Den sama fu Efeise be e libi a wan fa ná fiti fasi. Sen á be e kisi den seefiseefi. Den be lobi gi tyobo toli a den peesi pe den be e piisii anga den keliki fesa fu den (Efe. 5:3). A omen Efeisesama á be e si a sowtu libi ya enke ogii moo (Efe. 4:17-19). Fosi den Efeisesama be leli san Yehofa e si fu bun anga san ai si fu ogii, den kosensi á be e fon den te den be du wan ogii. Den á be e booko den ede anga fa Yehofa e fii. Neen meke Pawlesi be taki ‘den fusutan kon dunguu. Den de faawe fu Gadu’.

6. Saide Pawlesi be man taigi den Efeisesama taki den ‘kon na a kiin’?

⁶ Son wan fu den Efeisesama á be fika aini dunguu. Pawlesi be sikiifi taki den be de ‘na a kiin, bika u toon wan anga Masaa’ (Efe. 5:8). Den be bigin meke a Wowtu fu Yehofa tii den enke wan faya di e kiin a pasi gi den (Ps. 119:105). Den Efeisesama ya be tapu anga den falisi leli anga a tyobo libi fu den. Den be e meke moiti ‘fu du sani enke fa Gadu wani’. A sani de be e meke Gadu piisii.​—Efe. 5:1.

7. Saide a libi fu wi anga den Efeisesama na aseefi?

⁷ Fosi u kon a waaleiti, useefi be de a dunguu tu. U be e biibi falisi leli. U be e fii omen fesa di komoto aini falisi biibi tu. Boiti dati, u be e libi wan tyobo libi. Ma di u kon sabi san Yehofa e si fu bun anga san ai si fu ogii, u kengi.  U bigin libi enke fa a wani. A omen wini u fende di u du a sani ya (Yes. 48:17). Ma a ná ala yuu a makiliki fu tan na a kiin di u komoto aini a dunguu kaba. Saw yeepi u?

KOTI PASI GI A DUNGUU

8. Enke fa Efeisesama 5:3-5 e soi, da san den sama fu Efeise be mu koti pasi gi?

⁸ Leisi Efeisesama 5:3-5. Fu man koti pasi gi a dunguu, den Efeisesama be mu luku bun fu den á du sani di Yehofa á lobi. Sani enke hululibi anga tyobo taki. Pawlesi be membee den taki den be mu luku bun anga den sani ya, bika den sama di e du den sani ya ‘naw fende a Kownukondee fu Gadu anga Kelestesi’.

9. Saide u mu luku bun anga sani di sa meke u libi wan hululibi?

⁹ U mu meke moiti fu wa du den ‘soso sani di sama e du aini dunguu’ (Efe. 5:11). A omen sama di e aliki, e luku, efuso gi toli fu sani di á kiin, e go du den sani de te den fende a okasi (Gen. 3:6; Yak. 1:14, 15). Aini wan kondee, wan gaan kulu baala be de aini wan ‘kulu’ a internet. Biginbigin den be e gi denseefi taanga-sikin aini a kulu. Ma bakaten den bigin gi tyobo toli. Beina a soso seks toli den be e gi. A omen fu den hulu bakaten. Gaanse fu den taki a den toli di den be e gi meke den go du sani di Yehofa á lobi.

10. Fa Saatan e meke moiti fu koli u? (Efeisesama 5:6)

¹⁰ Saatan anga a goontapu fi en wani koli u. Den wani u biibi taki aa fowtu fu du den sani di Yehofa á lobi (2 Peit. 2:19). Ma a sani ya nai foondoo u. Didibii gwenti koli sama. Te fu kaba den nai sabi moo san bun anga san á bun (Yes. 5:20; 2 Kor. 4:4). Neen meke omen sani di e kon a tv anga internet nownow, a sani di Yehofa á lobi. Den e soi den sani ya enke na bun sani. Saatan wani u biibi taki hululibi a bun sani. A wani u biibi tu taki a libi de moo switi, a naabi nawan bakapisi. Ma a lei ai lei.​—Leisi Efeisesama 5:6.

11. Tei luku a toli fu Angela, da saide u mu wooko anga san sikiifi a Efeisesama 5:7? (Luku a fowtow tu.)

¹¹ Saatan wani u paa anga sama di e meke a moo taanga giw fu wooko anga san Yehofa taki. Pawlesi be taigi den baala anga sisa a Efeise taki ‘den á mu paa’ anga sama di e du sani di Yehofa e buuse (Efe. 5:7). U mu holi a pakisei taki a ná den sama di wi anga den e miti wawan sa kengi u manii, ma den sama di we taki anga den a internet sa kengi u manii tu. Den baala anga sisa a Efeise á be abi internet. Neen meke wi abi fu konikoni moo den. Angela, a di e tan a Asiya kon fusutan san sa miti i te ye taki anga sama a internet. A taki: ‘Biginbigin, mia be e taki anga ala sama a internet. Ma bakaten mi be e denki taa fasi. Mia be abi toobi moo fu abi mati di á be e lesipeki den weiti fu Yehofa. Bakaten mi bigin denki taki a ná wan ogii mi du efu mi du sani di Yehofa á lobi.’ Koloku den owluman yeepi Angela fu kengi a fasi fa a be e libi. A taki: ‘Nownow, mi e moo poti pakisei a sani di e gi mi taanga-sikin. Mi nai taki anga sama a internet so fuu moo.’

12. Saw yeepi u fu wa du sani di Yehofa á lobi?

 ¹² Den sama aini a goontapu e si hululibi enke wan kowownu sani. Neen meke u mu feti anga a denki ya. U sabi taki a libi de á bun (Efe. 4:19, 20). U sa akisi useefi taki: ‘Mi e du ala san mi man fu mia de makandaa anga sama a wookope te aa de fanowdu? Mi e du sani makandaa anga pikin a sikoo te aa de fanowdu? Mi mu kengi a fasi fa mi e libi anga den sama di nai lesipeki den weiti fu Yehofa? Mi e tan holi den weiti fu Yehofa winsi fa sama e soso mi?’ Enke fa 2 Timotiyesi 2:20-22 e soi, daw mu luku bun tu sama we teke enke mati aini a Kelesten kemeente. Wa mu paa anga sama di nai yeepi u fu tan libi enke fa Yehofa wani.

‘TYAI ISEEFI ENKE PIKIN DI DE A KIIN’

13. San a wani taki fu ‘tyai useefi enke pikin di de a kiin’? (Efeisesama 5:7-9)

¹³ Pawlesi á gi den baala anga sisa fu Efeise taanga-sikin fu komoto aini a dunguu namo, ma a taigi den taki den mu ‘tan tyai denseefi enke pikin di de a kiin’ tu. (Leisi Efeisesama 5:7-9.) San a sani ya wani taki? A sani ya wani taki u mu tyai useefi enke wan Kelesten ala yuu. A sani di o yeepi u fu du a sani ya, a te we sutudeli Beibel ala yuu. U mu e leisi en ala dei tu. Boiti dati, u mu e leisi den buku fu a olikanisâsi. U mu meke moiti fu sabi fa Yesesi be e tyai enseefi, daw waka neen baka. Efu we wooko anga san a leli u, u naw de aini dunguu, bika Beibel taki a de enke ‘a faya di e kiin peesi gi sama’.​—Yoh. 8:12; Odo 6:23.

14. Fa a santa yeye sa yeepi u?

¹⁴ Wi abi a santa yeye fanowdu tu fu man tyai useefi enke ‘pikin di de a kiin’. Saide? Bika aa makiliki fu tan kiin aini a tyobo goontapu ya (1 Tes. 4:3-5, 7, 8). Ma a santa yeye poi yeepi u fu wa bigin denki enke den sama fu a goontapu. A poi yeepi u fu denki enke  fa Gadu e denki. A santa yeye poi yeepi u tu fu abi bun manii. A poi yeepi u fu libi enke fa Gadu wani.​—Efe. 5:9.

15. Saw mu du efu u wani Gadu gi wi a santa yeye? (Efeisesama 5:19, 20)

¹⁵ U sa begi Yehofa fu a gi wi a santa yeye. Yesesi be taki Yehofa o gi wi a santa yeye fi en ‘te u akisi en’ (Luk. 11:13). Te we gafa Yehofa a den komakandaa, ai gi wi a santa yeye tu. (Leisi Efeisesama 5:19, 20.) A yeye fu Gadu poi yeepi u fu libi a wan fasi di e meke Yehofa piisii.

16. Saw yeepi i fu du sani anga koni? (Efeisesama 5:10, 17)

¹⁶ Te u de fu du wan gaan sani, u mu meke moiti fu sabi ‘san Yehofa wani’, daw du sani enke fa a wani. (Leisi Efeisesama 5:10, 17.) Te we meke moiti fu sabi sowtu tekisi e taki fu a sani di u wani du, we soi taki u wani du sani enke fa Gadu wani. Efu u fusutan san Gadu wani u du, neen u du sani na a fasi de, sani o waka bun anga u.

17. San a wani taki fu koboloiki u ten anga koni? (Efeisesama 5:15, 16) (Luku a fowtow tu.)

¹⁷ Pawlesi be taigi den baala anga sisa a Efeise taki den mu koboloiki den ten bun. (Leisi Efeisesama 5:15, 16.) A feyanti fu u ‘a ogiiwan’, wani we du den sani fu a goontapu ya te, daw naabi ten moo fu wooko gi Gadu (1 Yoh. 5:19). Wan Kelesten sa bigin booko en ede anga sani enke gudu, wooko, efuso sikoo te, da a naabi ten moo fu wooko gi Yehofa. Efu a sani ya e miti wan Kelesten, da a sani ya e soi taki a bigin denki enke den sama fu a goontapu. A tuu taki aa fowtu fu du den sani ya, ma den á mu de den moo pelensipali giw. Efu u wani de pikin di de  aini a kiin, u mu tan koboloiki u ten anga koni. Wa mu meke sipowtu anga a sani ya.

18. San yeepi Donald fu koboloiki en ten anga koni?

¹⁸ I mu teke ala okasi dii fende fu du moo gi Yehofa. Na a sani ya Donald du, wan baala fu Zuid Afiikan. A taki: ‘Mi be e luku fa mi be sa du sani taa fasi, neen mi begi Yehofa fu a yeepi mi fu du moo aini a peleikiwooko. Mi begi en fu a yeepi mi fu fende wan wooko di o gi mi a okasi fu du moo. Yehofa piki a begi fu mi. A yeepi mi fu fende wan wooko. Mi anga mi uman bigin du a fuuten-diniwooko.’

19. Saw yeepi u fu tan tyai useefi ‘enke pikin di de a kiin’?

¹⁹ A biifi di Pawlesi sende gi den baala anga sisa a Efeise be musu yeepi den fu den á gwe fika Yehofa. A Beibel buku ya sa yeepi u tu. U leli taki u mu luku bun san we luku efuso aliki. U mu luku sama we teke enke mati tu. Efu we sutudeli Beibel ala yuu, a sani ya o yeepi u fu sabi faw mu tyai useefi. U mu e begi Yehofa en santa yeye tu. A santa yeye o yeepi u fu abi den manii di Yehofa wani wi abi. Efu u wooko anga den sani di Pawlesi taki aini a Beibel buku ya, wo go e du sani enke fa Yehofa wani. Efu u du sani na a fasi ya, u naw go aini a dunguu goontapu, ma wo tan aini a kiin.