1-2. Sowtu wini we fende baka te u dopu?

 A WAN piisii sani te wan sama dopu enke wan Yehofa Kotoigi. A wan gaandi wi abi fu toon Yehofa mati. David be taki: ‘A sama dii teke fu kon tan koosube fii o de koloku bika aw tan na a fesise pisi fu a dyali fii.’​—Ps. 65:4.

² A ná ala sama Yehofa e teke enke en mati. U be leli aini a artikel a fesi taki Yehofa e kon koosube a den sama di e kon koosube neen (Yak. 4:8). Tei paamisi Yehofa taki yo libi enke fa a wani dai dopu, yu anga en e toon moo bun mati. Baka tei du den sani ya, i sa biibi taki Yehofa o ‘belesi i te enke i nai mankei nawan sani moo’.​—Male. 3:10; Yel. 17:7, 8.

3. Sowtu faantiwowtu wan sama abi baka te a dopu enke wan Kelesten? (Peleikiman 5:4, 5)

³ Tei dopu, da a bigin i bigin dini Yehofa. Tei du a sani ya, i mu tan meke moiti fu du sai paamisi Yehofa, winsi sowtu tesi e miti i. (Leisi Peleikiman 5:4, 5.) Tei dopu, i toon wan bakaman fu Yesesi tu, neen meke i mu e meke moiti fu du sani enke en. Boiti dati, i mu du den wooko di a fika giw fu du (Mat. 28:19, 20; 1 Peit. 2:21). A artikel ya o soi i fai sa du a sani ya.

 TAN WAKA A YESESI BAKA, WINSI TESI E MITI I

4. San na a ‘pina ponsu’ di Yesesi taki den bakaman fi en mu teke? (Lukasi 9:23)

⁴ Ya mu si enke sani naw miti i baka tei dopu. Yesesi taki den bakaman fi en mu teke den ‘pina ponsu’ da den waka neen baka. Na ‘ala dei’ den mu de anga a pina ponsu ya. (Leisi Lukasi 9:23.) A sani ya wani taki na ala yuu den bakaman fu Yesesi be o abi polobelema? Nono. A wani a be wani soi den bakaman fi en taki Yehofa o belesi den te den toon wan bakaman fi en, ma tesi o miti den tu. Son wan fu den tesi ya naw makiliki fu pasa.​—2 Tim. 3:12.

5. Fa Yesesi o belesi den sama di fika sani a baka fu toon en bakaman?

⁵ Kande i famii bigin libi ogii anga i fu dii bigin dini Yehofa. Kande i fika wan wooko efuso taa sani fu dii wani du moo gi Yehofa (Mat. 6:33). I sa biibi taki Yehofa si sai du fu dii lobi en (Heb. 6:10). Dii du sani na a fasi ya, kande i kon si taki san Yesesi be taki a tuu. A be taki: ‘Iniiwan sama di gwe fika en osu, en baala, en sisa, en mma, en dda, en pikin, anga en goon fu di en a mi bakaman, efuso fu a bun nyunsu ede, o fende 100 toon moo san a be abi aini a ten ya. Aw fende osu, baala, sisa, mma, pikin, anga goon. Sani o miti en tu, ma aini a ten di e kon aw fende teego libi’ (Malik. 10:29, 30). Den sani di Yehofa gii, bigi moo ala den sani dii fika a baka fi en ede.​—Ps. 37:4.

6. Saide i mu tan feti anga sondu fii baka tei dopu?

⁶ Baka tei dopu, yo abi fu tan feti fi ya du san a sondu sikin wani (1 Yoh. 2:16). Wi a bakapikin fu Adan, neen meke a sondu e fooseli wi ete. Son yuu, kande yo fii enke apostel Pawlesi. A be taki: ‘Mi lobi a weiti fu Gadu tuutuu aini mi ati. Ma mi e si taki wan taa weiti de aini mi sikin di e feti anga a weiti fu mi fusutan. A weiti ya na a sondu di de aini mi sikin. A weiti ya e basi mi’ (Rom. 7:22, 23). Kande yo fii booko-saka son yuu fu dii mu feti anga den sondu fii fii. Ma efii sidon pakisei sai paamisi Yehofa, a sani ya o gii taanga-sikin fu tan feti fi ya du san a sondu sikin wani. Fu taki en kiin, tei paamisi Yehofa taki yo libi enke fa a wani, ai moo makiliki gii fu pasa tesi. Saide u taki so?

7. Fa a paamisi dii paamisi Yehofa taki yo libi enke fa a wani o yeepi i fi ya gwe fika en?

⁷ Tei paamisi Yehofa taki yo libi enke fa a wani, i nai teli iseefi moo. Dati wani taki ala san yo du, i mu akisi iseefi efu Yehofa e piisii anga sai wani du (Mat. 16:24). Te tesi e miti i, a fosi sani dii mu pakisei, a sai mu du fu Yehofa piisii. Winsi sowtu tesi o miti i, i mu tan du sani enke fa Yehofa wani. I mu du ala sai poi fu meke a piisii. I mu du sani leti enke Yopu. A omen ogii miti en. Winsi fa sani be e moo en tuutuu, a be taki: ‘Mio tan dini Gadu fu te mi boo koti!’​—Yopu 27:5.

8. Fa a pakisei di yo pakisei sai paamisi Yehofa, o yeepi i fu holidoo te tesi e miti i?

⁸ Tei pakisei sai be paamisi Yehofa aini begi, a sani ya sa yeepi i fu pasa tesi. Pakisei a sani ya: Efu yu a wan baala, i be o poolo gi wan taa sama uman? Efi ya wan sisa, i be o poolo gi wan taa sama man? Noiti i be o du a sani de, bika i paamisi Yehofa taki noiti  yo du sowan sani. Efi ye puu takuu pakisei aini yu ede wantenwanten, noiti aw goo kon toon wan swakifasi gii bakaten. I naw waka na ‘a pasi fu den sama di e du ogii’.​—Odo 4:14, 15.

9. Fa a pakisei di yo pakisei sai paamisi Yehofa, o yeepi i fu si a wani fi en enke a moo pelensipali sani aini i libi?

⁹ Sai be o du efii fende wan wooko pei naw poi go na ala den komakandaa? I sabi kaba sai mu du na a pisi ya, bika senten fosi i dopu a denseefi wooko ya i be fika. I naw daai go teke den sowtu wooko ya baka, dai luku fa yo du fu doo a den komakandaa. I sabi ete san Yesesi be du di tesi be miti en? Aa be daaidaai fu taki nono. A be de kabakaba fu fika sani di be o meke aa du san a paamisi en Dda. Na aseefi sani ya i mu du tu.​—Mat. 4:10; Yoh. 8:29.

10. Fa Yehofa o yeepi i fu tan waka a Yesesi baka?

¹⁰ Te tesi e miti i, yu abi a okasi fu soi taki i wani waka a Yesesi baka tuutuu. I sa biibi taki Yehofa o yeepi i fu tan waka a Yesesi baka. Beibel taki: ‘Nawan fu den tesi di e miti u, a tesi di nai miti taa sama. Ma u sa fitoow Gadu. A naw meke tesi di ya poi tyai, miti i. Ma te tesi miti i, aw yeepi i fii holidoo.’​—1 Kor. 10:13.

FAW SA TAN WAKA A YESESI BAKA

11. San na a moo bun fasi faw sa tan waka a Yesesi baka? (Luku a fowtow tu.)

¹¹ Yesesi be e dini Yehofa anga en hii ati. Na ala yuu a be e taki anga en Dda aini begi tu (Luk. 6:12). A moo bun fasi fai sa tan waka a Yesesi baka, a te ye tan du sani di o yeepi i fi yu anga Yehofa toon moo bun mati. Beibel taki: ‘Efu  we go a fesi kaba, da meke u meke moiti fu tan go a fesi’ (Filip. 3:16). Te a langa yo yee ondoofenitoli fu sama di e meke moiti fu du moo gi Yehofa. Kande den go na a Sikoo gi Kownukondee Peleikiman efuso den foloisi go a pe moo peleikiman de fanowdu. Efi iseefi poi du den sani ya, ya mu daaidaai fu du den. A foluku fu Yehofa de kabakaba fu du moo gi en (Toli 16:9). Ma efi ya poi du den sani ya nownow noh? Dati wani taki den sama di e du den sani ya bun moo yu? A moo pelensipali sani fu wan Kelesten, na a holi di u mu holidoo (Mat. 10:22). Yehofa e poolo anga i te a si taki ye du sai poi gi en. A sani ya a wan pelensipali fasi faw sa tan waka a Yesesi baka.​—Ps. 26:1.

12-13. Sai mu du efi ye fii enke a dini di ye dini Yehofa nai meke i piisii moo enke fosi? (1 Korentesama 9:16, 17) (Luku a faki di den e kai ‘ Tan aini a siteelon’ tu.)

¹² Sai mu du efi ye fii enke a denseefi sani ye taki ala yuu te ye begi? Kande ye fii enke ye peleiki, ma a di na i mu du en. Efu a so ye fii baka dii dopu wan pisiten, ya mu fii enke a Yehofa gwe fika i. Fu di wi abi sondu meke son yuu we fuka fu du son sani di u be lobi du. Efi ye fii enke a dini di ye dini Yehofa nai meke i piisii moo enke fosi, i sa leli wan sani fu apostel Pawlesi. A be e du san a poi fu waka a Yesesi baka, ma a be sabi taki a ná ala yuu a be o du a sani ya anga piisii. (Leisi 1 Korentesama 9:16, 17.) A be taki: ‘Winsi mi nai fii fu du en, toku mio du en, bika a mi faantiwowtu.’ A sani ya e soi taki Pawlesi be de kabakaba fu du a peleikiwooko, winsi aa be e fii fu du en son yuu.

 ¹³ Leti enke Pawlesi, ya mu du sani anga fa ye fii namo. I mu poti a yu ede taki winsi i nai fii fu du wan sani, solanga Yehofa wani i du en, yo du en. Efi ye tan du san Yehofa wani, bakaten yo bigin piisii baka. Winsi fa ye fii, i mu tan begi, leisi i Beibel, sutudeli anga iseefi, go a den komakandaa, du a peleikiwooko tu. Den sani ya o yeepi i fu tan waka a Yesesi baka. Te den baala anga sisa o si fa ye tan dini Yehofa, a sani ya o gi den taanga-sikin.​—1 Tes. 5:11.

‘E ONDOOSUKU NAAMO LUKU EFU U DE A BIIBI’

14. Sai mu e ondoosuku naamo? Saide i mu du a sani ya? (2 Korentesama 13:5)

¹⁴ Wan taa sani di o yeepi i fu tan waka a Yesesi baka, a te ye ondoosuku iseefi ala yuu luku efi ye go a fesi. (Leisi 2 Korentesama 13:5.) Te a langa, i mu e luku fa ye du sani. Sidon dai luku sowtu gwenti yu abi. Luku efi ye begi ala dei, efi ye leisi Beibel, e sutudeli anga iseefi, e go a komakandaa efuso a peleikiwooko. Tan meke moiti fu du den sani ya anga piisii. I sa akisi iseefi taki: ‘Mi poi yeepi sama fu fusutan den moo pelensipali leli fu Beibel? Wan fasi de fa mi sa meke a peleikiwooko moo switi gi mi? A denseefi sani mi e taki ala yuu te mi e begi? Den begi fu mi e soi taki mi e fitoow Yehofa? Mi e go a komakandaa ala yuu? Fa mi sa go a fesi na a fasi fa mi e aliki a den komakandaa? Mi sa go a fesi anga a fasi fa mi e gi piki?’

15-16. San ye leli fu wan baala di be pasa tesi?

¹⁵ I mu sabi den swakifasi fii tu. A ondoofenitoli fu wan baala den e kai Robert e yeepi u fu si saide u mu sabi sowtu swakifasi wi abi. A be taki: ‘Di mi be abi wan sani fu 20 yali, mi be e wooko wantu dei aini a wiki. Wan dei di mi go a wooko, neen wan meisyo di mi anga en e wooko kai mi fu go neen osu. A taki a mi anga en wawan o de a osu, daw sa meke piisii. Biginbigin, mia taigi en kiin taki mi naw go, ma bakaten mi taigi en taki mi naw go. Mi taigi en tu saide.’ We gafa Robert taki a pasa a tesi ya. Ma bakaten a kon si taki a be sa du sani moo bun. A taki: ‘Mia be taigi a meisyo wantenwanten taki mi naw du a sani de enke fa Yowsefu be taigi a uman fu Potifar. Mia be taki kiin anga en tu (Gen. 39:7-9). Mi be foondoo taki a be taanga gi mi fu taki nono gi a  meisyo. A tesi ya yeepi mi fu si taki mi be mu meke moiti fu mi anga Yehofa toon moo bun mati.’

¹⁶ Leti enke Robert, a bun fu sidon pakisei fai sa du sani moo bun. Winsi i pasa wan tesi kaba, a bun fu akisi iseefi taki: ‘Mi taki nono wantenwanten, efuso mi daaidaai?’ Efii si taki i mu go a fesi na a pisi ape, ya mu kuutu iseefi. I mu poolo taki i sabi pei swaki. Begi Yehofa tu, dai meke moiti fu kon moo taanga na a pisi pei swaki. A sani ya o yeepi i fi ya du sani di Yehofa á lobi.​—Ps. 139:23, 24.

17. Fa we santa a nen fu Yehofa te we libi enke fa a wani?

¹⁷ A toli fu Robert á kaba ete. A taki: ‘Di mia siibi anga a meisyo, a kon a mi neen a taki: “I pasa a tesi!” Neen mi akisi en san a wani taki anga a sani ape. A taki wan mati fi en a be wan Yehofa Kotoigi fosi. A mati fi en taigi en taki ala den yonkuuwan aini den kemeente fu Yehofa Kotoigi e du sani kibiikibii. A du den e du enke den e dini Gadu, ma solanga den fende a okasi fu sondu, den e sondu. Neen a taigi a mati fi en taki da aw tesi mi fu luku efu a sani di a taki a tuu. Ai bigi gi mi taki mia du wan sani di be o poli Yehofa nen.’

18. San yo meke moiti fu du baka tei dopu? (Luku a faki di den e kai ‘ Tu artikel di yo lobi’.)

¹⁸ Tei paamisi Yehofa taki yo libi enke fa a wani dai dopu, ye soi taki i wani santa a nen fi en winsi sai pasa. I sa biibi taki Yehofa sabi den tesi di e miti i, anga a moiti di ye meke fu pasa den. Aw yeepi i te a si a moiti di ye meke fu du san a wani. I sa biibi taki aw gii a santa yeye fi en fu yeepi i fu holidoo (Luk. 11:11-13). Yehofa o yeepi i fu tan waka a Yesesi baka, baka tei dopu.