1. Fa son sama di e dini Yehofa e fii son yuu?

 BEIBEL taki: ‘Yehofa e piisii anga a foluku fi en.’ Te u pakisei a sani ya, ná pikin piisii we piisii (Ps. 149:4). Ma son yuu te we fii booko-saka, da kande we taki: ‘Mi sabi taki Yehofa e piisii anga a foluku fi en, ma ai piisii anga mi?’ A omen sama aini a ten fu Beibel be mu feti anga a fii taki Yehofa nai piisii anga den.​—1 Sam. 1:6-10; Yopu 29:2, 4; Ps. 51:11.

2. Anga sama Yehofa e piisii?

² Beibel e soi u kiin taki sondu libisama poi meke Yehofa piisii. Fa den sa du a sani ya? Den mu soi taki den e biibi aini Yesesi. Den mu dopu tu enke wan bakaman fu Yesesi (Yoh. 3:16). Te u dopu, we soi ala sama taki den sondu di u be du fosi e hati u. We soi tu taki u naw du den sani de moo. Boiti dati, we soi taki u paamisi Yehofa taki wo libi enke fa a wani (Toli 2:38; 3:19). Yehofa e piisii te we du den sani ya, bika na a sani ya e meke wi anga en toon mati. Efu u tan meke moiti fu du saw paamisi Yehofa, aw piisii anga u. Aw si wi enke en mati tu.​—Ps. 25:14.

3. San wo luku aini a artikel ya?

³ Saide son sama e fii enke Gadu nai piisii anga den? Fa Yehofa e soi u taki ai piisii anga u? Saw yeepi wan Kelesten fu biibi taki Gadu e piisii anga en?

 SAIDE SON SAMA E FII ENKE YEHOFA NAI PIISII ANGA DEN?

4-5. Winsi we fii son yuu enke wa ná bun sama, saw sa biibi?

⁴ A omen fu u e fii enke wa bun. Son wan fu u a senten di u yonkuu we feti anga a fii ya (Ps. 88:15). Wan baala den e kai Adrián taki: ‘Senten di mi yonkuu mi e fii enke mia bun. Mi sabi ete taki di mi be de wan pikin boi, mi be e begi Gadu fu a sa meke den sama fu mi go aini a paladeisi. Mi be e fii enke mia bun sai fu go aini a paladeisi.’ Wan baala den e kai Tony á kiya a waaleiti. A taki: ‘Noiti mma anga nda taigi mi taki den lobi mi. Noiti den taigi mi taki den e piisii anga mi. Den be e meke mi fii enke nawan sani di mi be e du, bun sai.’

⁵ Te we fii enke wa bun, a bun fu holi a pakisei taki a Yehofa seefi hali u kon neen (Yoh. 6:44). Ai si den bun pisi fu u, winsi useefi nai si den. A sabi san de aini wi ati (1 Sam. 16:7; 2 Kolon. 6:30). Neen meke te a taigi u taki a lobi u, u sa biibi en, bika a nai meke sipowtu anga u.​—1 Yoh. 3:19, 20.

6. Fa Pawlesi be e si den sondu di a be du fosi a toon wan Kelesten?

⁶ Fosi u kon a waaleiti, son wan fu u du son sani di e fooseli wi ete baka di u kon a waaleiti (1 Peit. 4:3). Son baala efuso sisa abi son swakifasi di den mu feti anga den. Fa a de anga yu? Son yuu ye fii enke Yehofa á poi gii paadon? Efu a so ye fii, da holi a pakisei taki son sama di be e dini Yehofa a fosi be e fii so tu. Pawlesi be du omen ogii fosi a toon wan Kelesten. Te a be e pakisei den sani di a be du, en kosensi be e fon mi en (Rom. 7:24). Ma Pawlesi be toon wan Kelesten kaba. Aa be e du den sani de moo tu. Tokuso a be taki en na ‘a moo pikinwan fu ala den apostel’. A taki tu taki fu ala den sama di abi sondu, neen na ‘a moo gaanwan fu ala den’.​—1 Kor. 15:9; 1 Tim. 1:15.

7. Saw mu holi a pakisei fu den sondu di u be du fosi?

⁷ U Dda di de a hemel paamisi taki efu u soi taki den sondu di u be du e hati u, neen u nai du den moo, aw giw paadon (Ps. 86:5). Neen meke efu ai hati i tuutuu taki i be du wan sani di Yehofa á lobi, i sa biibi taki Yehofa gii paadon.​—Kol. 2:13.

8-9. Saw yeepi u fu feti anga a fii taki Yehofa nai piisii anga san we du gi en?

⁸ Ala u wani du ala saw poi gi Yehofa. Ma te u kon gaandi, son yuu we wani du omen sani gi Yehofa, ma wa poi. A sani ya e meke we fii enke u nai wooko sai gi Yehofa. Wan sisa den e kai Amanda taki: ‘Mi be e denki taki wooko gi Yehofa anga mi hii ati wani taki ala yuu mi mu du moo enke san be du kaba. Neen meke mi be e meke moiti fu du moo, ma mia be e poi. A sani ya be e meke mi fii enke mia be e dini Yehofa anga mi hii ati. Mi be e si enke Yehofa nai piisii anga mi.’

⁹ Saw yeepi u te we fii enke u nai wooko sai gi Yehofa? Yehofa a wan Gadu di sabi kiyoo. A nai akisi u fu du sani di a sabi taki u naw poi du. Ai teke en fu bigi te we du saw poi gi en. Pakisei sama aini Beibel di be e dini Yehofa anga den hii ati. Sama enke Pawlesi. A omen yali a wooko taanga gi Yehofa. A go a omen peesi, waka gaan langa pasi fu paati a bun nyunsu. A omen kemeente a opo tu. Ma wan pisiten en libi be kengi. Aa be poi go a peesi fu paati a bun nyunsu moo. Yehofa be e piisii anga en a pisiten  de ete? Eeye, bika a tan du san a be poi du. Neen meke Yehofa belesi en (Toli 28:30, 31). A letiso useefi libi e kengi tu. A ná ala yuu wo poi du saw gwenti du gi Yehofa. Solanga we dini Yehofa anga u hii ati, ai piisii anga u. Meke u luku wantu fasi fa Yehofa soi taki ai piisii anga u.

FA YEHOFA SOI TAKI AI PIISII ANGA U?

10. Faw sa yee te Yehofa taigi u taki ai piisii anga u? (Yohanisi 16:27)

¹⁰ A gi wi a Beibel. Yehofa lobi taigi den sama di e dini en taki ai piisii anga den. A tu peesi aini Beibel we leisi taki a kai Yesesi en Manpikin. A taki a lobi en, ai meke a piisii (Mat. 3:17; 17:5). I be o wani yee fa Yehofa e taigi i denseefi wowtu ya? Yehofa nai taki anga u komoto a hemel. Ma ai taki anga u anga a Beibel. Te we leisi fa Yesesi be e taki anga den bakaman fi en, da a leti enke we yee fa Yehofa e taki anga u. (Leisi Yohanisi 16:27.) Yesesi abi denseefi manii fi en Dda. Neen meke te we leisi fa Yesesi e taigi den bakaman fi en taki ai piisii anga den, u mu meke moiti fu yee fa Yehofa e taigi u denseefi sani ya tu.​—Yoh. 15:9, 15.

11. Faw du sabi taki te ogii e miti u, a sani ya á wani taki Yehofa nai piisii anga u moo? (Yakowbesi 1:12)

¹¹ Den sani di ai du giw. Yehofa de kabakaba fu yeepi u fu fende sani enke nyanyan, koosi anga taa sani di wi abi fanowdu fu tan a libi. Ma son yuu Yehofa e fika son sani fu miti u leti enke Yopu (Yopu 1:8-11). Te ogii e miti i, dati á wani taki Gadu nai piisii anga i. Ma te sani e miti u, a wan okasi wi abi fu soi Yehofa taki u lobi en. Wi abi a okasi fu soi en tu taki we fitoow en. (Leisi Yakowbesi 1:12.) Efu u holidoo, useefi o fii fa aw holibaka giw.

12. Saw sa leli fu Dmitrii?

¹² Luku a toli fu wan baala fu Asiya den e kai Dmitrii. Di a lasi en wooko, a suku wooko omen mun, ma aa be poi fende. Neen meke a bigin du moo aini a peleikiwooko. A be e biibi taki Yehofa be o yeepi en. A be e tan suku wooko tu, ma aa be poi fende. Bakaten a siki te aa be poi komoto neen bedi. A be bigin fii enke en a ná wan bun dda, bika aa be poi solugu en osufamii. Boiti dati, a be e fii enke Yehofa nai piisii anga en. Wan neti, a  meisyo fi en tyai wan pampila go gi en pe a tekisi fu Yesaya 30:15 sikiifi. A tekisi e taki: ‘Efu u wani taanga, u mu de pii, daw fitoow mi.’ A meisyo fi en tyai a pampila ya go gi en neen a taigi en taki: ‘Nda, tei nai fii bun, i sa membee a tekisi ya.’ Dmitrii be kon fusutan taki Yehofa be e yeepi en, bika a osufamii fi en be abi nyanyan, koosi anga wan bun peesi fu tan. Dmitrii taki: ‘A sani di mi be mu du, a fu de pii, da mi fitoow mi Gadu.’ Efu aseefi sani ya e miti i nownow, i sa biibi taki Yehofa e booko en ede anga i. Aw yeepi i fi ya gi abaa.

13. Sama Yehofa sa meke yeepi u fu si taki ai piisii anga u? Fa ai du a sani ya?

¹³ Yehofa giw baala anga sisa. Yehofa e meke den baala anga sisa fu u du sani di e meke u si taki ai piisii anga u. Son yuu ai meke den taki wan sani na a yuu di u be abi en fanowdu. Na a sani ya wan sisa aini Asiya be kon si. Ná pikin sani be miti a sisa ya, a be lasi en wooko, bakadati a be siki wan gaan siki. Bakaten a man fi en be du wan sondu neen meke aa be poi dini enke owluman moo. A sisa ya taki: ‘Mia be poi fusutan saide den sani ya be e miti mi. Mi be fii enke a wan sani mi du di meke Yehofa gwe fika mi.’ A sisa ya begi Yehofa fu a yeepi en fu si taki aa gwe fika en. Fa Yehofa piki a begi fi en? A taki: ‘Den owluman kon taki anga mi. Den yeepi mi fu si taki Yehofa lobi mi ete.’ Ma bakaten a sisa ya be bigin fii enke Yehofa gwe fika en baka. Neen meke a begi Yehofa baka. A taki: ‘Aseefi dei de wantu baala anga sisa fu a kemeente sende wan biifi gi mi. Di mi leisi a biifi ya mi fende taanga-sikin. Mi be e fii taki Yehofa piki a begi fu mi.’ A sani  ya e soi taki Yehofa e meke den baala anga sisa fu u du sani di e meke u si taki ai piisii anga u.​—Ps. 10:17.

14. San a wan taa fasi fa Yehofa e soi u taki ai piisii anga u?

¹⁴ Wan taa fasi fa Yehofa e soi taki ai piisii anga u, a te ai meke taawan poti wi a pasi. Aini a ten fu den apostel Yehofa be meke apostel Pawlesi sikiifi 14 biifi gi den baala anga sisa. Aini sowan fu den biifi ya Pawlesi be poti den baala anga sisa a pasi, ma a be taki switi anga den. Saide Yehofa be meke Pawlesi poti den baala anga sisa ya a pasi? Yehofa a wan bun Dda. A di a lobi u meke ai poti wi a pasi (Odo 3:11, 12). Neen meke te Yehofa e poti wi a pasi anga den leli fu Beibel a ná buuse a buuse u, ma a di a lobi u meke ai du a sani ya (Heb. 12:6). San a wantu taa fasi fa Yehofa e soi u taki ai piisii anga u?

WANTU TAA FASI FA YEHOFA E SOI TAKI AI PIISII ANGA U

15. Sama Yehofa e gi a santa yeye fi en? Fa a sani ya e yeepi u fu si taki ai piisii anga u?

¹⁵ Yehofa e gi den sama di ai piisii anga den a santa yeye (Mat. 12:18). I sa akisi iseefi taki: ‘Mi abi wantu fu den manii fu a santa yeye fu Gadu?’ Tei luku a ten di ya be sabi Yehofa anga nownow, i si enke i kon moo abi pasensi? Efii si taki nownow i kon moo abi den manii di a santa yeye fu Gadu e meke sama abi, da a sani ya e soi taki Yehofa de anga i.​—Luku a faki di den e kai ‘ Den manii di a santa yeye e meke sama abi . . .’

16. Sama Yehofa gi a wooko fu peleiki? Fa a sani ya e meke i fii? (1 Tesalonikasama 2:4)

¹⁶ A Yehofa seefi e taki sama a wani paati a bun nyunsu. (Leisi 1 Tesalonikasama 2:4.) Luku sowtu wini wan sisa den e kai Jocelyn fende fu a gaandi di a abi fu paati a bun nyunsu. Wan dei a be e fii booko-saka. A taki: ‘Mia be e fii fu du sani a dei de. Mi be e fii enke a sosokaali mi be e wooko taanga. Ma mi a be wan pionili. A dei de mi be mu go a peleikiwooko. Neen meke mi begi Yehofa, neen mi go peleiki.’ A mmanten de, Jocelyn miti Mary, wan uman di be abi switifasi. A uman ya be wani sutudeli Beibel. Baka wantu mun, Mary taki a dei di Jocelyn koko en doo, a be e begi Gadu  fu a yeepi en. San Jocelyn leli fu a ondoofenitoli ya? A taki: ‘Mi be e fii enke Yehofa be e taigi mi taki “ye meke mi piisii.”’ A tuu, a ná ala sama o aliki te we peleiki gi den. Ma u sa biibi taki Yehofa e poolo te a si a moiti di we meke fu paati a bun nyunsu anga taawan.

17. San we leli fu a sani di Vicky taki fu a dede di Yesesi dede giw? (Psalm 5:12)

¹⁷ A den sama di e meke Yehofa piisii e fende wini fu a dede fu Yesesi (1 Tim. 2:5, 6). Ma kande u dopu, ma toku u nai kaba biibi taki Yehofa e piisii anga u. Kande we fii enke a naw meke u fende wini fu a dede fu Yesesi. Saw mu du te we fii so? Holi a pakisei taki a ná ala yuu u poi biibi fa we fii efuso denki. Ma na ala yuu u sa biibi Yehofa. Ai si den sama di e biibi taki den sa fende wini fu a dede fu Yesesi enke sama di e libi enke fa a wani. A paamisi taki aw belesi den sama ya. (Leisi Psalm 5:12; Rom. 3:26) Vicky fende wini di a sidon pakisei a dede di Yesesi dede giw. A taki: ‘Mi kon fusutan taki a omen ten kaba Yehofa e pasensi anga mi. Ma a leti enke mi be e taigi en taki: “A lobi fii á bigi sai fu doo a mi. A dede fu a Manpikin fii á sai fu tapu den sondu fu mi.”’ Di a sidon pakisei a dede fu Yesesi, a bigin biibi taki Yehofa lobi en. Efu we teke ten pakisei a dede fu Yesesi, a sani ya o yeepi u fu si taki Yehofa lobi u.

18. Efu we tan dini Yehofa, da saw sa biibi?

¹⁸ Kande we meke moiti fu wooko anga den sani di u leli aini a artikel ya, ma toku we akisi useefi ete efu Yehofa e piisii anga u tuutuu. Efu a so ye fii, holi a pakisei taki Yehofa e piisii anga den sama di e ‘tan lobi en’ (Yak. 1:12). Neen meke i mu tan meke moiti fu kon koosube a Yehofa, bika ai piisii anga i. Ya mu feegete a sani ya: ‘Yehofa á de faawe fu u.’​—Toli 17:27.