A miti i wan leisi kaba taki yu á be sabi san i mu taigi wan sama di e kusumi fu di wan sama fi en dede? Son leisi wi e tan pii, bika wi á sabi san u mu taki efuso san u mu du. Ma wantu sani de di u sa du fu toosutu den sama di e kusumi.

Son leisi a go di wi e go luku den, anga a taigi di wi e taigi den taki wi e fusutan fa den e fii, sai kaba. Aini son kondee te i baasa wan sama efuso te i holi en ana, da a sama e si taki yu e booko yu ede anga en. Efu a sama di e kusumi wani taki, fu puu koko neen ati, da i mu aliki anga pasensi. Ma kande a moo bun sani di i sa du, a fu yeepi a sama di e kusumi anga den sani di a abi fanowdu. Kande i sa boli gi en, luku den pikin gi en efuso yeepi en seeka sani gi a beli efu a wani. Son leisi a sama di e kusumi abi den sowtu sani ya fanowdu, moo a kee di wi e kee pina anga en.

Bakaten, kande yu o wani taki fu a sama di lasi libi. Kande i sa taki fu den bun manii fu a sama efuso den bun sani di a du. Den sowtu toli ya o meke a sama di e kusumi fii bun. A man fu Pati * dede sigisi yali kaba. Den be e kai a man fi en, Lano. Pati taki: „Sama e gi mi toli fu den bun sani di Lano be du di mi á be yee ete. Den sowtu toli de e meke mi fii bun.”

Ondoosukuman kon si taki te wan sama dede, da mati e go kee pina anga a famii. Den e yeepi den tu anga den sani di den abi fanowdu. Ma te fi i denki den e feegete den. Neen meke a bun fu taki anga a sama di e kusumi baka a beli. * A omen fu den sama di be e kusumi piisii di taawan go kee pina anga den, baka di den beli. A sani de yeepi somen sama di be e kusumi fu taki puu koko a den ati.

Luku a toli fu Kaori wan yonkuu uman fu Yapan. A uman ya be e kusumi fu di en mma be lasi libi, anga fu di en gaan sisa be lasi libi, 15 mun baka di en mma dede. Ma ai bigi en taki den mati fi en e toosutu en naamo. Wan fu den mati fi en, den e kai Ritsuko. A gaandi moo Kaori, ma tokuso a de enke wan mati gi Kaori. Kaori taki: „Mi á mu lei, mi á be lobi a sani de. Bika mi á be wani wan taa sama teke a peesi fu mi mma. Mi á si enke wan taa sama o poi teke en peesi tu. Ma a fasi fa mama Ritsuko libi anga mi, meke mi kon lobi en. Ai go ala wiki anga mi a den komakandaa anga a peleikiwooko. Ai kai mi fu mi diingi te anga en. Ai tyai nyanyan kon gi mi. A sikiifi omen biifi anga kaita gi mi tu. A fasi fa mama Ritsuko libi anga mi, yeepi mi tuutuu.”

A twalufu yali kaba di Kaori mma lasi libi. Nownow en anga en man de aini a fuuten diniwooko. Kaori taki mama Ritsuko ’e booko en ede anga en ete’. A taki: „Te mi e go a mi haw osu, mi e go luku en. Mi lobi a fasi fa ai gi mi taanga-sikin.”

Wan taa sama di fende toosutu wan hii pisiten, a wan uman den e kai Polina. Polina a wan Yehofa Kotoigi aini Cyprus. Polina be abi wan man den e kai Sozos. A baala ya a be wan bun owluman aini a kemeente. A be lobi kai den pikin di ná abi mama anga dda fu kon nyan neen osu. A be lobi kai den uman di ná abi man moo kon neen osu tu (Yakowbesi 1:27). Ma di Sozos be abi 53 yali, neen wan tyali sani pasa. A dede fu di a be abi kanker neen ede. Polina taki: „Mi lasi wan bun man. A 33 yali mi anga a man ya toow.”

 Baka a beli, neen Polina foloisi go tan a Kanada anga a moo yonkuu boi fi en. A boi ya abi 15 yali. Den e kai en Daniel. Di den go a Kanada neen den go a wan fu den kemeente fu Yehofa Kotoigi. Polina taki: „Den baala anga sisa fu a kemeente ya, á be sabi u. Den á be sabi taki na a ogii de miti u. Ma toku den toosutu u. Den be e yeepi u anga son sani tu. Mi e teke en fu bigi, bika a boi fu mi á be abi dda moo fu yeepi en anga son sani. Den baala di be e teke fesi aini a kemeente be e soi Daniel taki den be e booko den ede anga en. Wan fu den e kai Daniel ala yuu te ai go meke piisii anga en mati, efuso te ai go pee bal.” Nownow ai go bun anga a boi anga en mma.

A omen sani u sa du fu toosutu den sama di de anga buduufu na ati. Boiti dati u sa yeepi den anga wantu sani tu. A Beibel e gi u taanga-sikin, bika ai taki fu wan piisii ten di de a u fesi e kon.