1, 2. San a wantu toli di wi e leisi aini Genesesi? Sowtu wini u sa fende fu den toli ya?

BEIBEL e taki fu sama di ati be e boon a taawan. Aini den fosi kapitel fu Genesesi wi e leisi taki Kain kii en baala Abel (Genesesi 4:3-8). Wi e leisi taki Lamek naki wan yonkuuman kii (Genesesi 4:23). Wi e leisi fa den sikapuman fu Abalaham anga den sikapuman fu Lot be e kwali (Genesesi 13:5-7). Wi e leisi taki Hagar be e fii enke a bun moo Sala. Na a sani de be meke Sala ati be boon a Abalaham (Genesesi 16:3-6). Boiti dati wi e leisi taki Ismayeli á be lobi sama. Sama á be lobi en tu.​—Genesesi 16:12.

² Saide Yehofa meke sama sikiifi den toli ya aini Beibel? Den toli ya e leli u fu meke en bun anga taawan te wi anga den abi sani. Leti enke den, useefi a sondu sama. A denseefi polobelema e miti u. U mu meke moiti fu de enke den sama di be meke en bun anga taawan. Boiti dati, u mu meke moiti fu wi á de enke den sama di á be tyai denseefi bun (Romesama 15:4). Den  toli ya o yeepi u fu libi bun anga taawan.

3. San wi o taki aini a artikel ya?

³ Aini a artikel ya wi o si saide u mu meke en bun anga taawan. Wi o si tu fa u sa du a sani ya. Boiti dati wi o taki fu wantu Beibeltekisi di o yeepi u fu wi anga Yehofa á poli. Den o yeepi u fu libi bun anga taawan tu.

4. Fa den sama fu a goontapu e denki? San na a bakapisi?

⁴ A Saatan meke libisama nai libi na a wan, neen e meke den e kwali. Saide u sa taki a sani ya? A Saatan be taki a Eden taki, ala sama sa taki gi denseefi, den ná abi Gadu fanowdu (Genesesi 3:1-5). Ma te wi e luku fa a goontapu ya tan, da wi e si taki a soso polobelema a sani ya tyai gi libisama. A omen sama fende taki den sa taki gi denseefi san bun efuso san ogii. Den abi heimembee, den nai booko den ede anga taawan. Den e sitee libi. Den nai booko den ede efu den sani di den e du e meke ogii miti taawan. Den sani ya e meke sama kwali anga denseefi. Beibel taki efu wi ati e boon gaw, wi o go e kwali anga taawan. Boiti dati wi o go e sondu.​—Odo 29:22.

5. San Yesesi taki u mu du te wi anga sama abi sani?

⁵ Di Yesesi be e leli sama na a mongo, a be taigi den disipel fi en taki te den anga wan sama abi sani, den mu taki fusutan denseefi. Den mu meke moiti fu den anga a sama á kwali, winsi den e si enke den ná o fende wini te den du a sani de. A be taigi den taki den mu abi bun manii, libi bun anga taawan, den ati á mu e boon gaw. A taigi den tu taki den á mu daaidaai fu meke en bun anga taawan. Boiti dati den mu lobi den feyanti.​—Mateyesi 5:5, 9, 22, 25, 44.

6, 7. (a) Saide wi á mu daaidaai fu meke en bun anga u baala efuso sisa? (b) San den sama di e dini Yehofa mu akisi denseefi?

⁶ A Yehofa wi e dini te wi e begi, te wi e peleiki anga te wi e go a komakandaa. Efu u nai meke en bun anga u baala te wi anga den abi sani, da Yehofa ná o piisii anga den sani di wi e du gi en (Malikisi 11:25). Efu u wani wi anga Yehofa á poli, da u mu e gi taawan paadon.​—Leisi Lukasi 11:4; Efeisesama 4:32.

⁷ Yehofa wani den sama di e dini en, gi taawan paadon. A wani den libi bun anga taawan tu. U mu akisi useefi taki: ’Mi e daaidaai fu gi mi baala efuso sisa paadon? Mi e piisii fu de makandaa anga den?’ Efi i si taki i nai du den sani ya sai, da begi Yehofa fu a yeepi i. Yehofa o aliki i, a o du san i begi en. Bika den sowtu begi de, e soi taki yu abi sakafasi.​—1 Yohanisi 5:14, 15.

8, 9. San u mu du te wan sama du wan hati sani anga u?

⁸ Ala u a sondu sama, neen meke son leisi taawan e du sani di e hati u (Peleikiman 7:20; Mateyesi 18:7). San yu o du te a sani ya miti i? Luku san a ondoofenitoli ya e leli u. Wan sisa gi tu baala odi a wan fesa di a kemeente be  holi. Ma wan fu den baala á be lobi a fasi fa a sisa gi en odi. Di a sisa gwe, neen a baala ya bigin kuutu a sisa. Ma a taa baala taigi a baala di be e kuutu a sisa taki, a moo enke 40 yali a sisa ya e dini Yehofa kaba winsi fa omen tesi miti en. A soi a baala tu taki a á denki a fu seefi a sisa taki so anga en. San a baala du di a taa baala taigi en den sani ya? A taki: „Yu á lei, a tuu.” Neen a fika a taki.

⁹ San a ondoofenitoli ya e leli u? Te wan sama du wan sani di hati u, u poi tyai useefi enke fa Yehofa wani. Efu u lobi u baala anga sisa wi o gi den paadon. (Leisi Odo 10:12; 1 Peitilisi 4:8.) Yehofa e piisii te u nai „nai pakisei a ogii fu wan sama moo” (Odo 19:11; Peleikiman 7:9). Neen meke te wan sama du wan sani anga i, akisi iseefi taki: ’Mi mu fika a taki? A de fanowdu fu mi e pakisei a sani di a du?’

10. (a) San wan sisa du di a yee fa sama e kuutu en? (b) Sowtu tekisi yeepi a sisa fu a tan dini Yehofa anga piisii?

¹⁰ Te wan sama taigi u wan hati sani, son leisi a taanga fu feegete den sani di a taki. Luku san pasa anga wan pionili sisa di wi o kai Lucy. Wantu sama aini a kemeente be e kuutu a fasi fa a be e peleiki, anga a fasi fa a be e koboloiki en ten. A be hati en di a yee san den taki, neen meke a go taki anga wantu owluman. A fende wini? A taki den tekisi di den baala leisi gi en, yeepi en fu a á poti pakisei a den sani di den sama be e taki. Den be yeepi en fu poti pakisei a Yehofa. A fende taanga-sikin di a leisi Mateyesi 6:1-4. (Leisi.) A tekisi ya membee en taki a moo pelensipali sani, a fu meke Yehofa piisii. A so a á poti pakisei a den sani di den sama be e taki moo. Nownow winsi sama e kuutu a fasi fa ai peleiki, ai piisii, bika a sabi taki a san a poi ai du gi Yehofa.

11, 12. (a) San wan Kelesten mu du te a si enke en baala abi wan sani anga en? (b) San wi e leli te u luku san Abalaham du di den sikapuman fi en anga den du fu Lot be e kwali? (Luku a fowtow na a bigin.)

¹¹ „Bika ala wi e sondu omen leisi” (Yakowbesi 3:2). San i mu du efi i fusutan taki i baala efuso i sisa ati e boon, fu di i taki efuso du wan sani? Yesesi taki: „Efu yu e tyai wan ofaandi go na a altari, neen i membee taki i baala abi wan sani anga i, da i mu fika a ofaandi fi i na a altari fesi de da i gwe, meke en bun anga i baala fosi. Te i kaba da i go gi a ofaandi fi i” (Mateyesi 5:23, 24). I mu go taki anga a baala efuso a sisa. Te i go taki anga en, a sani di mu de a yu ede, a fu meke en bun anga en, i mu si i fowtu. A moo pelensipali sani a fu yu anga i baala efuso sisa á poli.

¹² Beibel e soi fa a foluku fu Gadu sa taki fusutan denseefi te den e losi polobelema. Luku a toli fu Abalaham anga en baala pikin Lot. Den be abi omen meti, ma a peesi fu den á be bigi sai fu den meti nyan gaasi. A so meke den sikapuman fu Abalaham anga den sikapuman fu Lot bigin kwali. Abalaham á be wani en anga Lot poli, neen meke a taigi Lot fu a teke a se kondee di a wani (Genesesi 13:1, 2, 5-9). U sa waka a Abalaham baka. A lasi di a du a sani ya?  Nono. A á teke langa, neen Yehofa paamisi en taki a o belesi en (Genesesi 13:14-17). San a toli ya e leli u? Winsi wi o lasi pikinso te u meke en bun anga u baala, Yehofa o belesi u fu di u soi lobi gi u baala efu sisa. ^[1]​—Luku a pisi ete wan pelensipali sani.

13. San a fesiman fu wan konkelesi du di wan taa baala taki goofu anga en? San a sani ya e leli u?

¹³ Meke u luku wan sani di pasa aini a ten ya. Wan baala di bigin teke fesi a wan konkelesi, telefon wan taa baala, neen a akisi en fu a yeepi en anga a wooko. A baala di a telefon taigi en omen hati sani neen a saka a telefon, bika en ati be e boon na a taa baala di be e teke fesi a den konkelesi. Ma a baala di bigin teke fesi á be poi fika a taki. Baka wan yuu, neen a telefon a baala baka, neen den meke mofu fu sidon taki. A taa wiki, neen den miti a komakandaa. Baka di den begi Yehofa, neen den taki wan yuu langa. A baala taigi a nyun fesiman fu a konkelesi san a taa fesiman be du. A fesiman fu a konkelesi aliki anga pasensi, neen a soi a baala wantu tekisi. A so den taki fusutan denseefi, neen den tu man wooko na a konkelesi. A baala fii bun di a nyun fesiman fu a konkelesi taki switi anga en.

14, 15. (a) On ten u sa du san sikiifi a Mateyesi 18:15-17? (b) San a den dii sani di Yesesi taki u mu du te wi anga u baala efu sisa abi sani? Fu saide meke u mu meke moiti fu du den sani ya?

¹⁴ Moo gaanse, te tu Kotoigi abi sani den sa taki fusutan denseefi. Ma a ná ala yuu den poi du a sani ya. Son leisi den abi sama fanowdu fu yeepi den  enke fa Yesesi taki a Mateyesi 18:15-17. (Leisi.) A sondu di sikiifi aini a tekisi ya, a ná den pikin sondu. Fa u du sabi? Yesesi taki i wawan mu go taki anga a sama di du a sondu. Efu a á wani yee, da i mu tyai tu sama di sabi a toli. Ma efu a á wani aliki den, da i mu go taki anga den owluman. Efu a á wani aliki den owluman „da u mu si en enke wan goontapu sama, efuso wan sama di e piki lanti moni”. Aini a ten ya, a sani ya wani taki den o puu a sama na a kemeente. Kande a sondu di a sama du, a bidiigi a bidiigi wan taawan efuso a lei gi en. A sondu ya a ná hululibi, makume libi, bonu, efuso te wan sama daai baka gi a biibi. Te wan sama du den sowtu sani ya, a den owluman wawan mu taki anga en.

¹⁵ Yesesi taki a sani ya fu soi u fa u mu soi u baala anga sisa taki u lobi den (Mateyesi 18:12-14). Fa u sa du a sani di Yesesi taki ya? (1) U mu meke moiti fu meke en bun anga u baala efu sisa, ma te wi e go wi á mu tyai taa sama. Kande a de fanowdu fu taki anga en wantu leisi. Ma san i mu du te wi á fusutan useefi di i taki anga en wantu leisi? (2) U mu kai wan sama di sabi a toli efuso wan sama di poi si kiin sama abi a fowtu, fu kon na a taki. Efu a polobelema losi, da i „wini i baala”. Ma a te yu á fende wini baka di i taki anga i baala omen leisi da i sa du a du fu (3) sani. I sa go taki anga den owluman.

16. Te wi e losi polobelema enke fa Yesesi taki da wi e soi taki u lobi u baala. Saide u sa taki a sani de?

¹⁶ A ná ala yuu a de fanowdu fu du ala den sani di sikiifi a Mateyesi 18:15-17. A sani ya e gi u taanga-sikin. Saide? Bika moo gaanse, a sama e si en fowtu, da ai kengi. Neen meke a ná ala yuu a de fanowdu fu puu en na a kemeente. Fu di a si en fowtu, meke a taawan mu gi en paadon. A sani de o yeepi den fu meke en bun baka. A sani di Yesesi taki e soi kiin taki a á de fanowdu fu go a den owluman gawgaw. A baka te u du a fosi sani anga du fu tu, u mu go a den owluman. Boiti dati, buweisi mu de taki a sama du wan sondu tuu.

17. Sowtu wini wi o fende te wi e meke moiti fu libi bun anga taawan?

¹⁷ Enke sondu sama wi o go e du hati sani anga taawan. A disipel Yakowbesi sikiifi taki: „Efu wan sama nai sondu anga en mofu, da a ná abi nawan fowtu. Boiti dati a man basi en hii sikin” (Yakowbesi 3:2). Te wi anga u baala abi wan sani, u mu meke moiti fu meke en bun anga en (Psalm 34:14). Te wi e meke en bun anga u baala efu sisa wi anga den ná o poli. Boiti dati wi o libi na a wan (Psalm 133:1-3). A moo pelensipali sani a taki wi anga Yehofa o de bun mati, „a Gadu di e gi sama freide” (Romesama 15:33). Te wi e losi polobelema anga lobi, wi o fende ala den belesi ya.