Wooko anga ala den sani di Yehofa e gi u
„Mi a Yehofa, a mi ai Gadu. A mi na a sama di e leli i san i mu du fu sani waka i bun.”—YESAYA 48:17.
SINGI: 117, 114
1, 2. (a) Fa Yehofa Kotoigi e si a Beibel? (b) Sowtu wan fu den buku fu Beibel i moo lobi?
ENKE Yehofa Kotoigi, u lobi a Beibel. Ai toosutu u, ai gi howpu tu. Boiti dati ai leli u sani di u sa fitoow (Romesama 15:4). A ná wan buku fu libisama, ma na a „Wowtu fu Gadu.”—1 Tesalonikasama 2:13.
2 Ala sama abi wan Beibel buku di a moo lobi. Son sama lobi den buku, Mateyesi, Malikisi, Lukasi anga Yohanisi, bika den e taki fa Yesesi be e soi den manii fi en Dda Yehofa (Yohanisi 14:9). Taawan lobi den buku di e taki fu ’den sani di mu pasa dyonson’. A buku Openbaring a wan fu den buku de (Openbaring 1:1). Son sama e fii bun te den leisi a buku Psalm. Taawan lobi leisi a buku Odo, bika ai leli den sani di e tyai wini gi den. Den sani ya e soi taki a Beibel a wan buku gi ala sama.
3, 4. (a) Fa yu e si den buku anga den sani fu a olikanisâsi? (b) Boiti den buku di sikiifi gi Kotoigi, sowtu taa sani wi e fende?
3 Fu di u lobi a Beibel, meke u lobi den buku di e yeepi u fu fusutan a Beibel. A Yehofa gi u den bolosilo, Wakititolen Titesi 2:2.
anga den taa buku fu a olikanisâsi. Den e taanga u biibi. Den e yeepi u tu fu wi á gwe fika Yehofa.—4 A omen buku a olikanisâsi sikiifi gi Yehofa Kotoigi. Ma son buku fu a olikanisâsi sikiifi gi yonkuuwan anga sama di abi pikin. Gaanse fu den artikel anga den felon na a website a gi sama di á de Kotoigi. Den sani ya e soi taki Yehofa e du san a be paamisi. Ai gi ala sowtu sama leli.—Yesaya 25:6.
5. San Yehofa e teke fu bigi?
5 Gaanse fu u abi moo ten fanowdu fu leisi a Beibel anga ala den buku fu a olikanisâsi. Neen meke a ná ala den buku fu a olikanisâsi wi e teke ten leisi. Wi á mu feegete taki Yehofa e teke en fu bigi te wi e koboloiki u ten anga koni. Ai piisii tu te wi e meke ten fu leisi efuso fu sutudeli a Beibel anga den buku fu a olikanisâsi (Efeisesama 5:15, 16). Ma u mu luku bun anga a fasi fa wi e si son buku efuso artikel fu a olikanisâsi.
6. San a wantu sani di sa tapu u fu wooko anga ala den sani di Yehofa gi u?
6 Efu wi á luku bun, wi o si enke son pisi fu a Beibel efuso son buku fu a olikanisâsi ná gi wi. San wi e du te u si enke wan fu den buku fu a olikanisâsi efuso wan pisi fu a Beibel nai fiti u? Yu e leisi en gawgaw puu ai tapu? Efuso i nai leisi en seefiseefi? Efu a dati wi e du, wi e lasi wantu leli di wi abi fanowdu. Wi á mu feegete taki a Yehofa e gi u ala den leli di wi e fende. Beibel taki: „Mi a Yehofa, a mi ai Gadu. A mi na a sama di e leli i san i mu du fu sani waka i bun” (Yesaya 48:17). Aini a artikel ya wi o taki fu dii sani di o yeepi u fu wooko anga ala den sani di Yehofa gi u.
DEN SANI DI O YEEPI U FU FENDE WINI TE WI E LEISI A BEIBEL
7. Saide u mu meke moiti fu si san a pisi di u leisi e leli u?
7 Meke moiti fu si san a pisi di i leisi e leli i. A tuu taki son pisi fu Beibel a wan sama den be sikiifi en gi. Taawan be sikiifi gi wan kulu sama. Ma tokuso Beibel e taki: „A Gadu seefi meke sama sikiifi ala den sani di de aini a buku fi en” (2 Timotiyesi 3:16). Neen meke u mu meke moiti fu si san a pisi di u leisi e leli u. Wan baala taki, te a leisi a Beibel, da ai meke moiti fu leli nyun sani fu a pisi di ai leisi. A sani de e yeepi en fu leli sani di a á be sabi ete. Neen ede meke te wi e leisi a Beibel, u mu e begi Yehofa fu a yeepi u fu fusutan den sani di a wani leli u.—Esra 7:10; leisi Yakowbesi 1:5.
Yu e fende wini tuutuu te yu e leisi a Beibel? (Luku paragraaf 7)
8, 9. (a) San i mu e akisi iseefi te yu e leisi Beibel? (b) San wi e leli te u luku den sani di wan baala mu du fu toon owluman?
8 I mu e akisi iseefi wantu sani. Te yu e leisi a Beibel i mu akisi iseefi taki: ’San a toli ya e leli mi fu Yehofa? Fa mi sa wooko anga a sani di mi leisi? Fa mi sa yeepi taawan anga a sani di mi leisi?’ Te yu e sidon denki den akisi ya, da yu o fende moo wini te yu e leisi a Beibel. Luku wan fu den sani di e soi saide yu o fende wini. A Beibel e taki san wan baala mu du efu a wani toon owluman. (Leisi 1 Timotiyesi 3:2-7.) Ma gaanse fu u, a ná owluman. A sani de sa meke u denki taki a pisi de nai fiti u. Ma meke u luku fa den dii akisi na a bigin fu a paragraaf o yeepi u fu fende wini te wi e leisi den sani di wan baala mu du fu toon owluman.
9 San a toli ya e leli mi fu Yehofa? Yehofa taigi u finifini san wan baala mu du efu a wani toon owluman. A sani ya e soi taki Yehofa e luku bun sama ai poti fu teke fesi aini a kemeente. Ai soi tu taki Yehofa nai meke sipowtu anga a kemeente. Beibel taki Yehofa bai a kemeente „anga a buulu fi en manpikin” (Toli 20:28). Yehofa wani den owluman abi wan bun nen. Den baala anga sisa mu man waka a den baka. Boiti dati Yehofa o akisi den faantiwowtu fu a fasi fa den e libi anga den sama fu a kemeente. A á wani wi abi booko ede te den baala ya e teke fesi (Yesaya 32:1, 2). Te wi e leisi den sani di wan baala mu du fu toon owluman, da wi e si taki Yehofa lobi u. Ai booko en ede anga u tuutuu.
10, 11. (a) Fa i sa koboloiki den pisi di e soi san wan baala mu du fu toon owluman gi iseefi? (b) Fa u sa koboloiki a pisi de fu yeepi taawan?
10 Fa mi sa wooko anga a sani di mi leisi? Efi i toon wan owluman kaba, da i mu e leisi den sani di wan baala mu du fu toon owluman naamo. A sani de o yeepi i fu go a fesi. Efu yu e „meke moiti fu toon owluman”, i mu du ala san i man fu du den sani di Beibel e taki (1 Timotiyesi 3:1). Ma ala Kelesten sa fende wini te den e leisi den sani di wan baala mu du fu toon owluman. Bika na ala Kelesten mu e fiti denseefi a taawan. Na ala den mu e du sani anga koni (Filipisama 4:5; 1 Peitilisi 4:7). Efu den baala anga sisa e si taki den owluman e tyai denseefi bun, da den o meke moiti fu den biibi taanga enke du fu den owluman.—1 Peitilisi 5:3; Hebrewsama 13:7.
11 Fa mi sa koboloiki a toli ya fu yeepi taawan? U sa koboloiki den pisi fu Beibel di e soi san wan baala mu du fu toon owluman, fu meke u Beibelsutudi fusutan taki den owluman fu a kemeente á de enke den fesiman fu den keliki. A pisi ya e leli u tu taki ná pikin wooko den owluman fu a kemeente e wooko. Te u fusutan a sani de, wi o abi moo lesipeki gi den (1 Tesalonikasama 5:12). O moo wi e lesipeki den, o moo den o piisii fu du a wooko fu den.—Hebrewsama 13:17.
12, 13. (a) San u mu akisi useefi te wi e ondoosuku wan toli fu Beibel? (b) San e soi taki wi e moo fusutan wan tekisi, te wi e ondoosuku en moo fini?
12 Diki go moo dipi. Te yu e ondoosuku Beibel, i mu akisi iseefi taki:
-
Sama sikiifi a pisi ya?
-
Pe a sikiifi en? On ten a sikiifi en?
-
Fa sani be e waka na a ten di a sikiifi a buku ya?
Den sani ya o yeepi i fu fusutan den sani di yu e leisi moo bun.
13 Meke u taki yu e leisi Eseikiyeli 14:13, 14. Ai taki: „Efu wan kondee sondu, fu di den gwe fika mi, mi o naki den anga mi ana, mi o booko den tiki pe den e poti den lontu beele fu den, mi o meke angiiten kon aini a kondee. Mi o kii den sama anga den osu meti fu a kondee. ’Efu den dii man enke Nowa, Daniyeli anga Yopu be de aini a kondee, a den wawan be o tan libi. Bika den e libi a wan leti fasi.’ A so a Moo Hei Masaa Yehofa taki.” Efi i ondoosuku sani fini, da yu o si taki Eseikiyeli sikiifi a sani ya aini a yali 612 Fosi Kelestesi. Nowa anga Yopu be dede omen ondoo yali kaba, toku Yehofa á be feegete taki den be e libi a wan leti fasi. Ma Daniyeli be de a libi a ten de. A gei enke a be abi 20 yali di Yehofa taki a be libi a wan leti fasi leti enke Nowa anga Yopu. San a toli ya e leli u? Ai leli u taki Yehofa e si ala den sama di e dini en. Ai teke den sani di den e du gi en fu bigi, winsi den yonkuu.—Psalm 148:12-14.
WOOKO ANGA ALA DEN SANI DI A OLIKANISÂSI E GI U
14. Fa den artikel di a olikanisâsi sikiifi gi yonkuuwan tyai wini gi den? Sowtu wini taa sama sa fende te wi e leisi den sowtu artikel ya? (Luku a fowtow na a bigin.)
14 Den buku di sikiifi gi yonkuuwan. U si taki u sa leli wan sani fu ala den pisi fu Beibel. Leti enke fa u sa leli wan sani fu ala den pisi fu a Beibel, a so u sa leli wan sani fu ala den buku fu a olikanisâsi. Meke u go luku fu saide. Den bakabaka yali ya, Yehofa leli yonkuuwan omen sani. [1] (Luku a pisi ete wan pelensipali sani.) Den sani ya yeepi den yonkuuwan fu den á meke taa yonkuuwan a sikoo meke den libi enke fa den wani. A yeepi den tu di tesi miti den. Ma sowtu wini ala u o fende te wi e leisi den sowtu artikel ya? Te wi e leisi den buku ya, da wi e kon sabi sowtu polobelema e miti den yonkuuwan. Wi e sabi tu san na a moo bun fasi fu yeepi den efuso fu gi den taanga-sikin.
15. Saide a fiti fu gaansama leisi den sani di den sikiifi gi yonkuuwan?
15 Den Kelesten di á yonkuu moo á mu si enke den buku de á fiti den. Gaanse fu den polobelema di sikiifi aini den artikel de e miti gaansama tu. Ala u mu taigi taawan san wi e biibi. Te wi ati boon, u mu holi useefi. Den supee fu u e dwengi u fu du sani di á bun. Boiti dati u mu luku bun san wi e luku efuso aliki. U mu luku san wi e du fu meke piisii tu. Neen meke winsi a yonkuuwan den sikiifi den buku ya gi, toku na a Beibel den puu den sani di sikiifi aini. Neen meke na ala Kelesten sa fende wini fu den.
16. San a wan taa sani di den buku fu u e yeepi yonkuuwan fu du?
Peleikiman 12:1, 13.) Ma gaansama e fende wini fu den sani de tu. A artikel di be de aini a Ontwaakt! fu april 2009, be soi fa yonkuuwan sa meke a leisi di den e leisi Beibel de wan piisii sani gi den. A artikel be e taki fu wantu sani di den sa du te den e leisi Beibel. A be abi wan faki di e soi den sani di i sa du te yu e sutudeli. Gaansama fende wini fu a artikel ya tu? Wan sisa taki a be taanga gi en fu leisi Beibel ala dei. A sisa ya abi pikin. Ma toku a du den sani di sikiifi aini a artikel ya. A taki nownow ai angii fu leisi a Beibel. Ai fusutan moo bun fa ala den buku fu Beibel e fiti anga denseefi. A taki: „A no fosi mi e si fa a Beibel switi fu leisi.”
16 Den sani di den sikiifi gi yonkuuwan e yeepi den fu den anga Yehofa toon bun mati. (Leisi17, 18. Sowtu wini wi o fende te wi e leisi den artikel di sikiifi gi sama di á de Kotoigi?
17 Den buku di sikiifi gi sama di á de Kotoigi. Fanafu a yali 2008 a olikanisâsi meke wan Wakititolen gi Yehofa Kotoigi aini son tongo. Boiti dati den meke wan Wakititolen tu gi sama di á de Kotoigi. Fa u sa wooko anga den artikel ya? Pakisei a toli ya. Te i kai wan sama fu kon na a Kownukondee zaal, yu e poolo te a kon. Te wan baala e holi wan lezing, da yu e pakisei a sama di i kai. Yu e akisi iseefi fa a sama e si den sani di a yee. Yu e pakisei tu fa den sani de sa taanga en biibi. Yu e moo fusutan saide meke a toli di a baala e taki de fanowdu.
18 Na aseefi sani e pasa te wi e leisi den artikel di sikiifi gi sama di á de Kotoigi. A Wakititolen di wi e paati gi sama anga den artikel di de a jw.org e taki sani a wan fasi di á taanga fu fusutan. Te wi o leisi den artikel ya, da wi o fusutan son toli fu Beibel moo bun. Den o moo doo wi ati tu. Boiti dati son leisi wi e leli nyun sani di u sa koboloiki aini a peleikiwooko. A Ontwaakt! e yeepi u fu biibi taki a wan Gadu meke ala sani. Boiti dati ai soi u fa u sa taki anga son sama fu a biibi fu u.—Leisi 1 Peitilisi 3:15.
19. Fa u sa soi Yehofa taki wi e teke den sani di ai du gi u fu bigi?
19 U si kiin taki a omen sani Yehofa e leli u. Ala den sani ya e tyai wini gi u (Mateyesi 5:3). Neen meke u mu e wooko anga ala den sani di Yehofa gi u. Efu u du a sani de, wi o fende wini. Boiti dati wi o soi Yehofa taki wi e teke ala den sani di ai du gi u fu bigi.—Yesaya 48:17.
^ [1] (paragraaf 14) Wantu fu den buku di den meke gi yonkuuwan na a Wat jonge mensen vragen—Praktische antwoorden, Pisi 1 anga Pisi 2, anga den artikel di den e kai „Jonge mensen vragen” di de na a website.