1. San Yehofa meke u kon sabi fu a feyanti fu u baka di Adan anga Efa sondu?

ADAN be sabi taki sineki á poi taki. Neen meke di a yee taki wan sineki taki anga Efa, a be fusutan taki kande a wan yeye be taki anga Efa (Genesesi 3:1-6). Ma den á be sabi sowtu yeye taki anga Efa. Toku di a yeye ya sitee anga Gadu, Adan holibaka gi en. Enseefi sitee anga Gadu (1 Timotiyesi 2:14). Baka dati Yehofa bigin tyai kon a kiin sama na a ogii-ati feyanti ya. A taki a o kii a yeye ya. Ma Yehofa taki fosi a ten de doo, a yeye di be meke a sineki taki anga Efa be o buuse ala den sama di lobi Gadu.​—Genesesi 3:15.

2, 3. Saide Yehofa á taki omen sani fu Saatan fosi a Mesiyas kon?

² Yehofa á taigi wi a nen fu a engel di sitee anga en. * (Luku a maiki a ondoo.) A 2500 yali baka di a sani pasa a Eden fosi neen Yehofa taki san a den manii fu a engel  ya (Yopu 1:6). U sabi en enke „Saatan”. Saatan wani taki „Sitee”. A dii Hebrew buku fu Beibel namo e taki fu Saatan. Den buku ya a 1 Koloniki, Yopu anga Sakaliya. Saide omen sani á be sikiifi aini Beibel fu a feyanti ya fosi a Mesiyas kon?

³ Yehofa á taki finifini fu Saatan aini den Hebrew buku fu Beibel. Den Hebrew buku fu Beibel a be fu yeepi sama fu sabi a Mesiyas anga fu waka neen baka (Lukasi 24:44; Galasiyasama 3:24). Di a Mesiyas doo, neen Yehofa meke a Mesiyas anga den disipel fi en taki moo sani fu Saatan anga den engel di e holibaka gi en. * (Luku a maiki a ondoo.) A nai foondoo wi, bika a Yesesi anga den sama di o tii anga en, Yehofa poti fu puu Saatan anga den bakaman fi en a pasi.​—Romesama 16:20; Openbaring 17:14; 20:10.

4. Saide wi á mu feele Saatan?

⁴ Apostel Peitilisi taki Saatan Didibii e waka lontu enke wan „lew di e bali”. Yohanisi kai Saatan Didibii wan „sineki” anga wan „gaan kaiman” (1 Peitilisi 5:8; Openbaring 12:9). Ma a á de fu u feele Didibii, bika a á poi du ala san a wani anga wi. (Leisi Yakowbesi 4:7.) Yehofa, Yesesi anga den engel di e dini Yehofa de anga u. Den poi yeepi u fu wini a feyanti ya. Ma toku u mu sabi a piki fu den dii akisi ya: San Saatan poi du? Fa ai koli sama? San Saatan á poi du? Meke u luku den piki fu den akisi ya anga san den e leli u.

5, 6. Saide den sama di e tii goontapu á poi puu den moo gaan fuka fu u?

⁵ A omen engel holibaka gi Saatan di a sitee anga Gadu. Fosi a Fuudu, Saatan koli wantu fu den engel ya fu saka kon libi anga uman a goontapu. Wan ageisitoli sikiifi aini Beibel di e soi san pasa. A taki di a gaan kaiman e kai komoto a hemel, neen a seepi du fu dii pisi fu den sitali kon a goontapu (Genesesi 6:1-4; Yudasi 6; Openbaring 12:3, 4). Den engel ya gwe fika a osufamii fu Gadu, neen den go holibaka gi Saatan. Wi á mu si enke den engel ya e du sani fanyafanya. Saatan seefi sete wan kownukondee, neen a teke peesi enke kownu. Den ogii yeye de aini a olikanisâsi fi en. A gi den makiti. A gi den peesi fu tii tu.​—Efeisesama 6:12.

⁶ Na a olikanisâsi fu Saatan e tii ala den kondee di libisama e tii. U sa biibi a sani ya, bika di a soi Yesesi „ala den kownukondee fu goontapu”  a taki: „Mi o gi i ala den kownukondee ya, anga a gendee fu den, bika a mi abi den. A sama mi wani mi e gi den” (Lukasi 4:5, 6). Ma toku a omen tiiman e du son sani di e tyai wini gi den sama di den e tii. Son wan wani yeepi den sama di den e tii tuutuu. Ma libisama á poi puu den moo gaan fuka fu u.​—Psalm 146:3, 4; Openbaring 12:12.

7. Boiti den tiiman fu a goontapu ya, fa Saatan e meke falisi keliki anga a bisnis fu a goontapu koli sama? (Luku a fowtow na a bigin.)

⁷ Saatan anga den ogii yeye e koboloiki falisi keliki anga bisnis fu „koli sama a hii goontapu” (Openbaring 12:9). Ai meke den falisi keliki paati omen lei fu Yehofa. Ai meke moiti fu sama á sabi Gadu nen tu (Yelemiya 23:26, 27). A omen bun-ati sama de aini falisi keliki. Den e denki taki den e dini Gadu, ma a den ogii yeye den e dini (1 Korentesama 10:20; 2 Korentesama 11:13-15). Saatan e meke den bisnis fu a goontapu paati omen lei tu. Den e lei taki a te sama abi tyaipi moni anga goontapu gudu da den o de koloku (Odo 18:11). Den sama di biibi a lei ya e dini „Gudu” pe fu den dini Gadu (Mateyesi 6:24). Son wan fu den be lobi Gadu, ma den lobi gudu te a lobi di den be lobi Gadu kon koo.​—Mateyesi 13:22; 1 Yohanisi 2:15, 16.

8, 9. (a) San wi e leli fu Adan, Efa anga den engel di sitee anga Gadu? (b) Sowtu wini wi e fende fu a sabi di u sabi taki a Saatan e tii a goontapu?

⁸ Wi e leli tu sani fu a sitee di Adan, Efa anga son engel sitee anga Gadu. A sani ya e leli u taki a tu se namo de. A wi mu luku on se wi o teke. A se fu Yehofa efuso a se fu Saatan (Mateyesi 7:13). Ai leli u tu taki son leisi a gei enke den sama di e teke a se fu Saatan e fende wini. Adan anga Efa fende a okasi fu taki gi denseefi san bun anga san á bun. Den ogii yeye fende makiti fu taki gi libisama tiimakiti (Genesesi 3:22). Ma ala yuu ogii e miti den sama di teke a se fu Saatan. Sani nai waka enke fa den be denki!​—Yopu 21:7-17; Galasiyasama 6:7, 8.

⁹ Sowtu wini wi e fende fu a sabi di u sabi taki a Saatan e tii a goontapu? A sani ya e yeepi u fu sabi fa u mu si politiki. Ai gi u taanga-sikin fu paati a bun nyunsu tu. U sabi taki Yehofa wani u lesipeki den tiiman fu kondee (1 Peitilisi 2:17). A wani u holi den weiti fu lanti tu, solanga den nai akisi u fu du sani di a á lobi (Romesama 13:1-4). Ma u sabi tu taki wi á mu holibaka gi nawan politiki palitei. Wi á mu holibaka gi nawan tiiman tu (Yohanisi 17:15, 16; 18:36). U sabi taki Saatan á wani sama sabi Yehofa nen. U sabi tu taki ai poli Yehofa nen. Neen meke wi e du san u poi fu yeepi sama fu den sabi sama a Gadu  tuutuu. Ai bigi gi u fu tyai Yehofa nen. U lobi Gadu moo moni anga goontapu gudu.​—Yesaya 43:10; 1 Timotiyesi 6:6-10.

10-12. (a) Fa Saatan koli wantu engel? (b) San wi e leli fu a sani di den engel ya du?

¹⁰ Saatan e fende wini anga den sani di ai du fu koli sama. Son yuu a beti ai koboloiki fu kisi den. Son leisi ai du sani anga den fu den feele.

¹¹ Saatan koli wan gaan kulu engel anga wan beti. Kande a luku den omen ten fu sabi san a be mu du fu koli den. Son wan fu den engel teke a beti, di den didon anga uman. Den pikin fu den be bigi. Den be e du omen ogii anga taawan (Genesesi 6:1-4). Kande Saatan koli den engel ya taki den o tii libisama efu den be du a sani ya. Kande a du a sani ya fu a polofeititoli di Yehofa be taki fu „a pikin fu a uman” á be sa kon tuu (Genesesi 3:15). Ma Yehofa á fika en fu a du san a be wani. A tyai wan gaan Fuudu kon na a goontapu. A so sani á waka enke fa Saatan anga den ogii yeye be wani.

¹² San a sani ya e leli u? Hululibi anga heimembee a tu fu den moo kofaliki beti fu Saatan. A omen yali den engel di teke a se fu Saatan be de a hemel anga Gadu. Tokuso a omen fu den be kon abi takuu fii. Den fii ya be kon taanga te den á be poi dwengi denseefi. A sani ya e leli u taki winsi on langa wi e dini Yehofa, takuu fii sa kon aini wi ati (1 Korentesama 10:12). Neen meke ala yuu u mu e luku san de aini wi ati. U mu meke moiti tu fu puu takuu pakisei anga heimembee aini wi ati.​—Galasiyasama 5:26; leisi Kolosesama 3:5.

13. San a wan taa fasi fa Saatan e koli sama? San o yeepi u fu a á fende u koli?

¹³ Wan taa fasi fa Saatan e koli sama na a sabi di libisama e wani sabi sani  fu tofuuwooko. Aini a ten ya Saatan e meke den ogii yeye koli sama anga falisi keliki, den felon anga den poku di sama e meke. Felon, game anga taa sani di sama e du fu piisii e meke sama denki taki tofuuwooko a wan bun sani. San u mu du fu Saatan á kisi wi anga den sani ya? Wi á mu si enke a olikanisâsi fu Gadu o taigi u sowtu felon efuso poku u mu aliki anga sowtu wan wi á mu aliki. U mu meke moiti fu sabi fa Yehofa e denki. Na a sani ya o yeepi u fu du san a lobi (Hebrewsama 5:14). Efu u lobi Gadu „anga u hii ati” wi o du sani anga koni (Romesama 12:9). Wan sama di e bidiigi taawan nai du san a taki. Neen meke fosi u luku wan felon efuso aliki wan poku, u mu akisi useefi taki: ’Mi e du den sani di mi e leli taawan? San den sutudi fu mi efuso den sama di mi e peleiki gi o denki te den si den felon di mi e luku efuso te den yee den poku di mi e aliki?’ Te wi e du den sani di wi e gi taawan taanga-sikin fu du, a o moo makiliki gi u fu Saatan á fende u koli.​—1 Yohanisi 3:18.

14. Fa Saatan e meke moiti fu meke u feele? San o yeepi u fu holidoo?

¹⁴ Saatan e du sani fu meke u feele, fu u sa du sani di Yehofa á lobi. Son leisi ai meke den tiiman tapu a wooko fu u. A sa meke den sama di wi anga den e wooko, efuso den pikin a sikoo soso u fu di wi e libi enke fa Beibel taki (1 Peitilisi 4:4). Son leisi a den famii fu u di nai dini Yehofa ai meke tapu u fu wi á go a komakandaa. Den e si enke sani o moo go bun anga u te u nai dini Yehofa (Mateyesi 10:36). San o yeepi u fu Saatan á fende u koli a den fasi ya? Wi á mu foondoo te den sani ya miti u, bika u sabi taki a Saatan e feti anga u (Openbaring 2:10; 12:17). Boiti dati wi á mu feegete a sani ya: Saatan taki a te sani e go bun anga u namo wi o dini Yehofa. A taki te tesi miti u, wi o gwe fika Gadu  (Yopu 1:9-11; 2:4, 5). Ala yuu u mu begi Gadu fu a yeepi u. U mu holi a pakisei taki Yehofa ná o fika u noiti.​—Hebrewsama 13:5.

15. Saatan poi dwengi u fu du san a wani?

¹⁵ Saatan á poi dwengi u fu du wan sani di wi á wani du (Yakowbesi 1:14). A omen sama a goontapu á sabi taki a Saatan se den de. Ma te wan sama kon sabi a tuu, neen seefi mu luku efu a Yehofa efuso Saatan a o holibaka gi (Toli 3:17; 17:30). Efu u wani aliki Gadu tuutuu, Saatan ná o poi dwengi u fu du san a wani.​—Yopu 2:3; 27:5.

16, 17. (a) San a wantu sani di Saatan anga den ogii yeye á poi du? (b) Saide wi á mu feele fu taki taanga te wi e begi Yehofa?

¹⁶ A omen taa sani Saatan anga den ogii yeye á poi du. A á sikiifi aini Beibel taki Saatan anga den ogii yeye sabi san wi e denki anga san de aini wi ati (1 Samuweli 16:7; Malikisi 2:8). U mu feele taki te wi e begi taanga Saatan anga den ogii yeye o yee wi? U mu feele taki den o kon tesi wi anga den sani di u taki aini a begi? Nono. Saide wi á mu feele? Pakisei a sani ya: U nai feele fu wooko gi Yehofa fu di wi e si enke Didibii o si u. Neen meke wi á mu feele fu begi taanga tu, soso fu di wi e si enke Didibii o yee wi. Beibel e taki fu omen sama di be e taki taanga te den be e begi Yehofa. Den á be e feele taki Didibii be o yee den (1 Kownu 8:22, 23; Yohanisi 11:41, 42; Toli 4:23, 24). Efu wi e meke moiti fu tyai useefi enke fa Yehofa wani, noiti a o fika Didibii fu du san a wani anga u.​—Leisi Psalm 34:7.

¹⁷ U mu sabi u feyanti, ma wi á mu feele en. Winsi fa wi a sondu sama, tokuso Yehofa poi yeepi u fu wini Saatan (1 Yohanisi 2:14). Efu u toto futu gi en, a o lon gwe (Yakowbesi 4:7; 1 Peitilisi 5:9). Aini a ten ya, a den yonkuuwan Saatan e moo tesi. San o yeepi den fu Saatan á fende den koli? Wi o luku a sani ya aini a taa artikel.