Saide u mu e meke „tyaipi nyanyan”?
„Nda e fende gaandi te wi e meke tyaipi nyanyan anga te wi e soi taki wi a mi bakaman.”—YOHANISI 15:8.
1, 2. (a) San Yesesi taigi den bakaman fi en a neti fosi a dede? (Luku a fowtow na a bigin.) (b) Saide a de taanga fanowdu fu holi a pakisei saide wi e peleiki? (c) San wi o luku aini a artikel ya?
A NETI fosi Yesesi dede, a taki wan hii pisiten anga den apostel fi en. A taigi den taki a lobi den anga en hii ati. A gi den a ageisitoli tu fu a doloifigoon di u be taki fi en aini a artikel a fesi. Yesesi be wani gi den bakaman fi en taanga-sikin fu meke nyanyan ala yuu. Dati wani taki den be mu holidoo te den e paati a bun nyunsu fu a Kownukondee.—Yohanisi 15:8.
2 Yesesi á be taigi den bakaman fi en san den be mu du namo, ma a be taigi den saide den be mu du san a taigi den. A taigi den saide den á be mu gi abaa te den e du a peleikiwooko. Useefi á mu feegete saide u mu holidoo te wi e du a peleikiwooko. Te wi e pakisei san Yesesi taki a o gi u taanga-sikin fu holidoo te wi e paati a bun nyunsu fu „ala sama yee” (Mateyesi 24:13, 14). Aini a artikel ya wi o taki fu fo sani di mu meke u peleiki enke fa Beibel taki. Wi o taki tu fu fo sani di Yehofa gi u di o yeepi u fu meke nyanyan ala yuu.
WI E GI YEHOFA GAANDI TE WI E PELEIKI
3. (a) San na a moo pelensipali sani di meke u mu peleiki enke fa Yohanisi 15:8 e taki? (b) San a den doloifi di Yesesi be taki fu den aini a ageisitoli fi en? Saide a sani ya fiti?
3 A moo pelensipali sani di e meke wi e peleiki, a di u wani gi Yehofa gaandi. U wani santa a nen fi en tu. (Leisi Yohanisi 15:1, 8.) Di Yesesi gi a ageisitoli fu a doloifibon a taki Yehofa na a sama di abi a goon. Yesesi taki en na a doloifibon. Den bakaman fi en a den taka fu a bon (Yohanisi 15:5). Den nyanyan efuso doloifi, na a peleikiwooko di den bakaman fu Yesesi e du. Yesesi taigi den apostel fi en taki: „Nda e fende gaandi te wi e meke tyaipi nyanyan anga te wi e soi taki wi a mi bakaman.” Te wan doloifibon e meke bun nyanyan, a sama di paandi en e fende gaandi. Te wi e du ala san u man fu paati a bun nyunsu fu a Kownukondee, wi e gi Yehofa gaandi tu.—Mateyesi 25:20-23.
Te wi e du ala san u man fu paati a bun nyunsu fu a Kownukondee, wi e gi Yehofa gaandi
4. (a) Fa wi e santa Gadu nen? (b) Fa yu e si a gaandi di yu abi fu santa Gadu nen?
4 A nen fu Gadu santa kaba. Wi á poi du wan sani fu meke a kon moo santa. Ma fa wi e santa a nen fu Yehofa te wi e peleiki? Luku san a polofeiti Yesaya taki. A taki: „A Yehofa di e tii den engel fi en u mu si enke wan sama di santa” (Yesaya 8:13). Wi e santa Gadu nen, te wi e si a nen fi en enke a moo gaan nen anga te wi e yeepi sama fu fusutan taki a nen ya santa (Mateyesi 6:9). Te wi e yeepi taawan fu kon sabi den manii fu Yehofa, anga te wi e taigi den taki a o meke sama libi fu teego aini wan Paladeisi, da a leti enke wi e soi den taki ala den sani di Saatan taki fu Yehofa a lei (Genesesi 3:1-5). Wi e santa a nen fu Yehofa tu, te wi e yeepi sama fu sabi taki neen „fiti fu kisi ala gaandi, anga gafa anga makiti” (Openbaring 4:11). Rune di e du a pioniliwooko 16 yali kaba taki: „Ai bigi gi mi fu sabi taki mi abi a gaandi fu taki gi a sama di meke hemel anga goontapu. A sani ya e gi mi taanga-sikin fu du a peleikiwooko winsi san e pasa.”
U LOBI YEHOFA ANGA EN MANPIKIN
5. (a) Saide u mu peleiki te u luku san sikiifi a Yohanisi 15:9, 10? (b) Fa Yesesi yeepi den bakaman fi en fu fusutan taki den mu holidoo?
5 Leisi Yohanisi 15:9, 10. Wan taa sani di meke wi e paati a bun nyunsu fu a Kownukondee, a di u lobi Yehofa anga Yesesi (Malikisi 12:30; Yohanisi 14:15). Yesesi taigi den bakaman fi en taki den mu meke moiti fu a sa ’lobi den ala yuu’. Saide Yesesi taki a sani ya? A di a sabi taki den bakaman fi en be o abi fu holidoo meke a taigi den a sani ya. Aini Yohanisi 15:4-10 Yesesi koboloiki den wowtu „ala yuu” omen leisi fu yeepi den bakaman fi en fu fusutan taki a de taanga fanowdu fu den holidoo.
6. Fa u sa soi taki u wani Yesesi lobi wi ala yuu?
6 Fa u sa soi taki u wani Yesesi lobi wi ala yuu? A te wi e du san a taki. Den sani di Yesesi taigi u fu du a sani di enseefi be e du. A taki: „Nda lobi mi, fu di mi e holi den weiti fi en.” Yesesi soi u fa u mu waka neen baka.—Yohanisi 13:15.
7. San wan sama e du te a lobi wan taawan?
7 Yesesi soi kiin taki a te wan sama lobi wan taawan, da ai du san a taki. A be taki: „A te wan sama sabi den weiti fu mi, te ai du san a weiti taki, da a lobi mi” (Yohanisi 14:21). Den weiti di Yesesi gi wi, a Yehofa poti den. Neen meke efu wi e du a peleikiwooko enke fa Yesesi taki, wi e soi taki u lobi Yehofa (Mateyesi 17:5; Yohanisi 8:28). Te wi e soi Yehofa anga Yesesi taki u lobi den, denseefi o lobi u tu.
WI E WASIKOI SAMA TE WI E PELEIKI
8, 9. (a) San a wan taa sani di meke wi e peleiki? (b) Fa den sani di Yehofa taki aini Eseikiyeli 3:18, 19 anga 18:23 e gi u taanga-sikin fu peleiki?
8 Du fu dii sani di meke wi e peleiki, a di u wani wasikoi sama taki a dei fu Yehofa e kon. Beibel taki Nowa a be wan „peleikiman”. (Leisi 2 Peitilisi 2:5.) Di Nowa be e peleiki gi den sama fosi a Fuudu, a be musu e wasikoi den taki a goontapu be o sungu. Saide u sa taki a sani ya? Yesesi taki: „Fosi a fuudu kon sama be e nyan, den be e diingi, man be e toow anga uman, uman be e toow anga man, te enke a dei doo di Nowa go aini a ark. Den sama á be e poti pakisei a den sani di be e pasa, te enke a Fuudu kon kii ala den. A leti so a o de tu te a Manpikin fu libisama kon” (Mateyesi 24:38, 39). Winsi sama á be e poti pakisei na a bosikopu fu Nowa, toku a be e du a wooko di Yehofa gi en.
9 Te wi e paati a bosikopu fu a Kownukondee wi e gi sama a okasi fu sabi den sani di Gadu abi a pakisei fu du gi libisama. Leti enke Yehofa u wani sama poti pakisei na a bosikopu fu den sa „tan a libi” (Eseikiyeli 18:23). Te wi e peleiki osu fu osu anga te wi e peleiki a den peesi pe omen sama e pasa, wi e meke moiti fu ala sama yee taki a Kownukondee fu Gadu e kon. A o poli a ogii goontapu ya. —Eseikiyeli 3:18, 19; Daniyeli 2:44; Openbaring 14:6, 7.
A DI U LOBI SAMA MEKE WI E PELEIKI
10. (a) Saide u mu peleiki enke fa Mateyesi 22:39 taki? (b) Fa Pawlesi anga Silas yeepi a man di be e holi wakiti gi den sitaafuman a Filipi?
10 Du fu fo sani di meke wi e peleiki, a di u lobi sama (Mateyesi 22:39). Na a lobi di u lobi den e meke wi e peleiki gi den ala yuu, bika u sabi taki efu den libi kengi den sa kengi pakisei. Pakisei fa sani be waka di den be poti Pawlesi anga Silas a sitaafu-osu a Filipi. A neti de a doti seke te neen den doo fu a sitaafu-osu opo. A man di be e holi wakiti feele te a be wani kii enseefi, bika a be denki taki den sitaafuman lowe. Ma Pawlesi tapu en. A bali taigi en taki: „Ná kii iseefi!” Neen a man akisi en taki: „San mi mu du fu fende a libi?” Pawlesi anga Silas taigi en taki: „Biibi Masaa Yesesi, da yu anga yu osufamii o fende a libi.”—Toli 16:25-34.
A di u lobi Yehofa, Yesesi anga taa sama meke wi e peleiki (Luku paragraaf 5, 10)
11, 12. (a) San a toli fu a man di be e holi wakiti gi den sitaafuman e leli u fu a peleikiwooko? (b) Saide u wani tan du a peleikiwooko?
11 San a toli fu a man di be e holi wakiti gi den sitaafuman e leli u fu a peleikiwooko? A baka di a doti seke fosi neen a man ya kengi a fasi fa a be e denki, neen a suku yeepi. A so sani sa waka aini a ten ya tu. Son sama di á be wani aliki a bosikopu fu Beibel e kengi a fasi fa den e denki, da den e suku yeepi te sani miti den. Son sama e buuya te den lasi den wooko efuso te den toow booko. Taawan e lasi-ati te den siki wan gaan siki efuso te wan sama di den lobi dede. Te den sowtu nowtu ya miti sama den e bigin akisi denseefi wantu sani fu a libi. Kande den á be e akisi denseefi den sani ya a fesi. Kande den kon e akisi denseefi taki: „San mi mu du fu fende a libi?” Kande dati na a fosi leisi di den o wani aliki a bosikopu di wi e paati.
12 Neen meke efu wi e peleiki ala okasi di u fende, wi o miti den sama di angii fu yee a bosikopu di wi e paati. A so wi o man toosutu den (Yesaya 61:1). Charlotte di e du a pioniliwooko 38 yali kaba taki: „Den sama fu a ten ya e buuya. Den mu fende a okasi fu yee a bun nyunsu.” Ejvor di e du a pioniliwooko 34 yali kaba taki: „Aini a ten ya omen sama e fii booko-saka. Mi wani yeepi den tuutuu. Na a sani de e yeepi mi fu peleiki.” A lobi di u lobi taawan a wan fu den sani di e meke u peleiki.
DEN SANI DI E YEEPI U FU HOLIDOO TE WI E PELEIKI
13, 14. (a) Fu sowtu kado Yohanisi 15:11 e taki? (b) San o yeepi u fu piisii enke Yesesi? (c) Fa piisii e yeepi u te wi e du a peleikiwooko?
13 A neti fosi Yesesi dede, a kai wantu sani di be o yeepi den apostel fi en fu holidoo te den e peleiki. San a den sani ya? Fa den e yeepi u aini a ten ya?
14 A piisii di wi e piisii a wan kado. A peleikiwooko de enke wan ibi? Nono. Baka di Yesesi gi a ageisitoli fu a doloifibon, a taki wi o piisii te wi e Yohanisi 15:11.) Fa a peleikiwooko e meke u piisii? Di Yesesi be gi a ageisitoli a taki en na a doloifibon, den bakaman fi en a den taka fu a doloifi. A te den taka de na a bon namo den e fende wataa anga kaakiti. A letiso a de anga wi tu. Efu wi e waka a Yesesi baka, wi o piisii leti enke fa ai piisii fu di ai libi enke fa Yehofa wani (Yohanisi 4:34; 17:13; 1 Peitilisi 2:21). Hanne di e pionili moo enke 40 yali kaba taki: „Na a piisii di mi e piisii te mi e du a peleikiwooko e yeepi mi fu tan du a wooko fu Yehofa.” Efu wi e piisii, wi o abi a kaakiti di wi abi fanowdu fu du a peleikiwooko winsi gaanse sama nai wani aliki u.—Mateyesi 5:10-12.
peleiki. (Leisi15. (a) Fu sowtu kado Yohanisi 14:27 e taki? (b) Fa freide e yeepi u fu holidoo te wi e du a peleikiwooko?
15 A freide di wi abi a wan kado. (Leisi Yohanisi 14:27.) A neti fosi Yesesi dede, a taigi den apostel fi en taki: „Mi o gi wi a freide fu mi.” Fa a freide fu Yesesi e yeepi u fu holidoo te wi e du a peleikiwooko? Te wi e du a peleikiwooko winsi san e pasa, wi e fii bun bika u sabi taki wi e meke Yehofa anga Yesesi piisii (Psalm 149:4; Romesama 5:3, 4; Kolosesama 3:15). Ulf di e du a pioniliwooko 45 yali kaba taki: „Te mi e du a peleikiwooko mi e weli, ma toku mi e piisii, bika mi sabi taki mi e du wan bun sani anga mi libi.” Wi e teke en fu bigi taki u fende a freide di nai kaba.
16. (a) Fu sowtu kado Yohanisi 15:15 e taki? (b) San be o yeepi den apostel fu den anga Yesesi á poli?
16 A de di wi anga Yesesi de mati a wan kado. Baka di Yesesi taigi den apostel fi en taki a wani den piisii, a taigi den saide a de fanowdu fu lobi taawan (Yohanisi 15:11-13). Baka dati a taigi den taki: „Mi anga wi a mati.” Ai bigi gi u taki u poi de Yesesi mati. Ma san den apostel be mu du fu den anga Yesesi á poli? Yesesi taigi den taki: „Mi poti u fu wi e meke nyanyan naamo.” (Leisi Yohanisi 15:14-16.) Dati wani taki noiti u mu gi abaa te wi e du a peleikiwooko. Wan sani fu tu yali fosi Yesesi taki a sani ya, a be taigi den apostel fi en taki: „Te wi e peleiki u mu taki: ’A Kownukondee fu hemel koosube’” (Mateyesi 10:7). Neen meke a neti fosi Yesesi dede, a gi den bakaman fi en taanga-sikin fu den holidoo te den e du a peleikiwooko (Mateyesi 24:13; Malikisi 3:14). Yesesi be sabi taki a sani ya á be o makiliki. Ma den be o man holidoo efu den anga Yesesi be o de mati. Saide? Wan taa kado be o yeepi den.
17, 18. (a) Fu sowtu kado Yohanisi 15:7 e taki? (b) Fa a kado ya yeepi den bakaman fu Yesesi? (c) Sowtu kado e yeepi wi aini a ten ya?
17 A aliki di Gadu e aliki den begi fu u, a wan kado. Yesesi be taki: „Akisi iniiwan sani di u wani, wi o fende en” (Yohanisi 15:7, 16). A sani di Yesesi paamisi den apostel be musu gi den taanga-sikin. * (Luku a maiki a ondoo.) Den apostel á be e fusutan taki Yesesi be o dede a neti de. Ma winsi Yesesi be o dede, toku a ná den wawan be o de. Yehofa be o aliki den begi fu den. A be o yeepi den tu fu du a peleikiwooko. Yehofa du den sani ya gi den tuutuu. Bika di Yesesi dede den apostel begi Yehofa fu yeepi den fu den á feele. Yehofa aliki a begi fu den.—Toli 4:29, 31.
U sa biibi anga u hii ati taki Yehofa e aliki te wi e begi en fu a yeepi u (Luku paragraaf 18)
18 A so sani e waka aini a ten ya tu. Efu wi e holidoo te wi e du a peleikiwooko, wi e soi taki u wani de mati anga Yesesi. Efu u du a san ya, u sa biibi taki Yehofa o aliki den begi fu u te ai taanga gi u fu peleiki (Filipisama 4:13). Wi e teke en fu bigi taki Yehofa e aliki den begi fu u. Ai bigi gi u tu taki wi anga Yesesi a mati. Ala den kado di Yehofa gi u, e yeepi u fu holidoo te wi e du a peleikiwooko.—Yakowbesi 1:17.
19. (a) Saide u nai gi abaa te wi e du a peleikiwooko? (b) San o yeepi u fu kaba a wooko di Gadu gi u?
19 Aini a artikel ya u luku fo sani di e meke wi e du a peleikiwooko winsi san e pasa. Wi e peleiki fu gafa Yehofa, fu santa en nen, fu soi taki u lobi Yehofa anga Yesesi, fu wasikoi sama anga fu soi taki u lobi taawan. U taki fu fo kado di wi abi tu: Piisii, freide, a de di wi anga Yesesi de mati anga a aliki di Gadu e aliki den begi fu u. Den kado ya e gi u taanga-sikin fu kaba a wooko di Yehofa gi u fu du. Yehofa e piisii te ai si fa wi e wooko taanga fu meke nyanyan.
^ paragraaf 17 Di Yesesi be e taki anga den apostel fi en, a membee den wantu leisi taki Yehofa be o aliki den begi fu den.—Yohanisi 14:13; 15:7, 16; 16:23.