1, 2. (a) San e yeepi yonkuuwan fu wini Saatan anga den ogii yeye? (Luku a fowtow na a bigin.) (b) San wi o luku aini a artikel ya?

APOSTEL Pawlesi taki Kelesten de enke suudati. U de aini wan feti. A feyanti fu u de tuutuu. A ná anga libisama wi e feti, ma anga Saatan anga den ogii yeye. A dunsudunsu yali den e feti kaba. Den sabi feti. Neen meke ai gei enke u ná o poi wini den feyanti ya, moomoo te u yonkuu. Yonkuuwan poi wini den feyanti ya? Eeye den poi. Den e wini tu. San e yeepi den fu wini? A Yehofa e gi den kaakiti. Boiti dati, leti enke wan bun suudati, den e ’wei ala den sani di Gadu gi den fu feti’.​—Leisi Efeisesama 6:10-12.

² Kande na a paki di den Rome suudati be e wei, Pawlesi be abi a pakisei di a gi a ageisitoli ya (Toli 28:16). Wi o taki fu a ageisitoli ya aini a artikel ya. Wi o luku san wantu  yonkuuwan e taki fu den wini di den fende di den wei den fetisani di Gadu gi u, anga saide a á makiliki fu wei den sani ya.

3, 4. Saide u sa taki den leli fu Beibel de enke a lelibuba fu den Rome suudati?

³ Leisi Efeisesama 6:14. A lelibuba di den Rome suudati be e wei be abi ayee. A sani ya be e yeepi den fu den á kisi mankei a den ondoobee. A lelibuba be e holi a ibi ayee sani di den be e wei a den boofu-ati. Wan sani be e de a son wan fu den lelibuba fu fasi a feti-how anga a lansi fu den tu. Te wan suudati be e go a feti, a á be e booko en ede tumisi te a be wei en lelibuba.

⁴ Den tuu leli fu Beibel e kibii u gi den falisi leli fu a goontapu, leti enke fa a lelibuba fu den Rome suudati be e kibii den te den go a feti (Yohanisi 8:31, 32; 1 Yohanisi 4:1). Efu u lobi den sani di wi e leli aini a Wowtu fu Gadu, a o moo makiliki gi u fu libi enke fa Gadu wani efuso fu ’wei a sani di e kibii u boofu-ati’ (Psalm 111:7, 8; 1 Yohanisi 5:3). Efu wi e fusutan den tuu leli fu Beibel, u ná o feele fu soi den sama di e buuse u saide wi e biibi den leli ya.​—1 Peitilisi 3:15.

5. Saide wi á mu e lei?

⁵ U lobi den leli fu Beibel, neen meke wi e meke moiti fu du san Beibel taki. Wi e meke moiti fu wi á lei. Lei, a wan fu den moo gaan fetisani fu Saatan. Te wan sama e lei, a ogii ai du anga enseefi anga den sama di e biibi en (Yohanisi 8:44). Neen meke winsi fa wi a sondu sama, tokuso u mu meke moiti fu u nai lei (Efeisesama 4:25). A sani ya á makiliki. Abigail, di abi 18 yali taki: „Son leisi ai gei enke i nai fende wini te yu e taki a tuu, moomoo te a gei enke sani o miti i efu yu á lei.” Ma saide ai meke moiti ala yuu fu taki a tuu? A taki: „Te mi e taki a tuu, mi sabi taki Yehofa e piisii. Mma, nda anga den mati fu mi sabi taki den sa fitoow mi.” Victoria, di abi 23 yali taki: „Son leisi te yu e taki a tuu anga te yu e taigi taawan san yu e biibi, den e soso i. Ma yu e fende wini. Bika sama e fitoow i. Yu anga Yehofa e toon bun mati. Den sama di lobi yu e lesipeki i tu.” I si saide „ala sani di tuu mu de enke wan lelibuba di banti a u mindii”?

6, 7. Saide u sa taki leti-du de enke wan sani di u mu wei fu kibii u boofu-ati?

⁶ Wan fu den dyakiti di den Rome suudati be e wei fu kibii den boofu-ati, anga ayee a be meke. A gei a wantu pisi ayee den be e miti kon a wan fu meke a dyakiti ya. Den be e poti wantu pikin lelibuba na a dyakiti ya fu fasi en. A pisi fu a sikoo be abi ayee moo den taa pisi. Te wan suudati be wei a sowtu  dyakiti ya, a á be e poi daai enke fa a wani. Boiti dati ala yuu a be mu e luku efu a dyakiti á losi a wan peesi. A dyakiti ya be e kibii en ati anga son pisi fi en sikin te sama be koti en anga how efuso sutu en anga lansi.

⁷ Den leli fu Yehofa e kibii wi „ati” efuso a fasi fa wi e denki, leti enke fa a ayee dyakiti be e kibii wan suudati (Odo 4:23). Noiti wan suudati be o kengi a ayee dyakiti ya, da a teke wan taa dyakiti di den meke anga moo safu sani. A so useefi á mu fika den leli fu Yehofa, da u bigin du sani enke fa u wani. Useefi á koni sai fu kibii wi ati (Odo 3:5, 6). Neen meke na ala yuu u mu e luku efu u ’wei a sani di e kibii’ u boofu-ati.

8. Saide u mu du sani enke fa Yehofa wani?

⁸ Yu e si enke den weiti fu Yehofa e tapu i son leisi fu du son sani? Daniel di abi 21 yali taki: „Den leliman anga den pikin fu mi kalasi e soso mi fu di mi e meke moiti fu libi enke fa Beibel taki. A sani ya be meke mi biibi kon swaki. Mi be e fii booko-saka tu.” Ma fa Daniel e fii nownow? A taki: „Bakaten, mi kon si den wini di a abi te wi e libi enke fa Yehofa wani. Son wan fu den mati fu mi nai go a sikoo moo. Taawan e somoko takuu tabaka. A tyali fu si fa den libi kon tan. Yehofa e kibii wi tuutuu.” Madison abi 15 yali. A taki: „A á makiliki fu libi enke fa Yehofa wani. Moomoo te mi e si fa den duupu fu mi e du son sani di e meke den piisii.” San Madison e du te ai fii so? A taki: „Mi e holi a pakisei taki mi a wan sama di e tyai Yehofa nen. Mi e holi a pakisei tu taki a Saatan e meke den tesi ya miti mi. Te mi pasa wan tesi, mi e fii bun.”

9-11. (a) San na a susu di wan Kelesten e wei? (b) San o yeepi u fu wi á feele fu peleiki?

⁹ Leisi Efeisesama 6:15. Wan Rome suudati á be poi go a feti anga soso futu. A dii pisi meti buba den be e miti kon a wan fu meke a susu fu den. A be switi fu waka anga a susu ya. Te wan suudati be wei a susu ya, a á be e gaata kai makiliki.

¹⁰ A susu di den Rome suudati be e wei, be e yeepi den fu wini feti. Ma a susu di wi e wei e yeepi u fu paati a „bun nyunsu fu wan moo bun sani” (Yesaya 52:7; Romesama 10:15). Son leisi u mu abi deki-ati fu peleiki. Bo di abi 20 yali taki: „Mi be e feele fu peleiki gi den pikin fu mi kalasi. Mi denki a sen be e kisi mi. Ma te mi pakisei a ten de, mi á sabi saide sen be e kisi mi. Nownow mi e piisii fu peleiki gi den duupu fu mi.”

¹¹ A omen yonkuuwan e si taki te den seeka a fesi, ai moo makiliki gi den fu peleiki. Fa i sa seeka fu peleiki? Julia di abi 16 yali taki: „Ala yuu mi e poti den buku di wi e paati gi sama aini mi sikoo tasi. Mi e meke moiti fu sabi  fa den pikin fu mi kalasi e denki anga san den e biibi. Da mi e pakisei fa mi sa yeepi den. Te mi seeka a fesi mi e man leli den sani di den wani sabi.” Makenzie di abi 23 yali taki: „Efu yu abi bun manii, neen yu e aliki bun, yu o man sabi san e miti den supee fi i. Mi e leisi ala den artikel di den baala sikiifi gi yonkuuwan. Neen meke mi man soi den supee fu mi wan tekisi aini Beibel efuso wan sani a jw.org di sa yeepi den.” Te u seeka bun fu peleiki, a leti enke u wei wan „susu” di e kisi u.

12, 13. San a wantu fu den ’ga di de anga faya’ di Saatan e sutu kon a wi?

¹² Leisi Efeisesama 6:16. Den Rome suudati be abi wan gaan skelt. A skelt be e tapu a suudati kini te doo en sikoo. Anga a skelt den suudati be e tapu den how, den lansi anga den ga fu den feyanti.

¹³ San a den ’ga di de anga faya’ di Saatan e sutu kon a yu? A lei di ai lei gi Yehofa a wan fu den ga ya. Saatan wani  i biibi taki Yehofa á lobi i. A wani i biibi tu taki nawan sama e booko den ede anga i. Ida di abi 19 yali taki: „Mi be e si enke Yehofa á lobi mi. Mi be e fii tu taki a á wani mi enke en mati.” San a sisa ya e du te ai fii so? A taki: „A den komakandaa e taanga mi biibi. Fosi mi be e sidon pii. Mi á be e gi piki. Bika mi be e si enke nawan sama be o wani aliki den piki fu mi. Ma nownow mi e seeka gi den komakandaa, da mi e meke moiti fu gi tu efuso dii piki. A á makiliki, ma te mi gi piki mi e fii moo bun. Den baala anga sisa e gi mi taanga-sikin tu. Ala yuu te mi komoto a komakandaa mi e fii taki Yehofa lobi mi.”

14. San a toli fu Ida e leli u?

¹⁴ Na aseefi fasi a skelt fu wan suudati e de ala yuu. Ma a ondoofenitoli fu Ida e soi taki u biibi nai tan aseefi fasi. A sa kon moo taanga efuso swaki. A wi mu meke moiti ala yuu fu u biibi á swaki (Mateyesi 14:31; 2 Tesalonikasama 1:3). Efu u wani u biibi de enke wan „skelt” di e kibii wi, u mu meke moiti fu a kon moo taanga.

15, 16. Fa a howpu fu u de enke wan suudati-ati?

¹⁵ Leisi Efeisesama 6:17. Den Rome suudati be e wei wan ati fu den á kisi mankei a den ede, den neki anga den fesi. Son wan fu den ati ya be abi wan peesi fu a suudati be sa tyai en neen ana.

¹⁶ Leti enke fa a suudati ati e kibii wan suudati ede, a so a „howpu” fu wi e kibii u denki (1 Tesalonikasama 5:8; Odo 3:21). A howpu di wi abi e yeepi wi fu poti pakisei a den sani di Gadu paamisi u. Ai yeepi u tu fu wi á lasi-ati te wi abi polobelema (Psalm 27:1, 14; Toli 24:15). Ma u mu e biibi taki den sani di Yehofa paamisi wi o pasa tuutuu. A so namo a howpu ya o man kibii wi. A wi ede u mu wei a „suudati-ati” ya, a ná wi ana u mu e tyai en.

17, 18. (a) Fa Saatan wani koli u fu u lasi howpu? (b) Fa u sa soi taki u nai meke Saatan koli u?

¹⁷ Fa Saatan wani koli u fu u lasi howpu? Pakisei fa a be wani koli Yesesi. Saatan be sabi taki Yesesi be o tii a goontapu. Ma Yesesi be o abi fu pina te enke a dede fosi a fende a gaandi ya. Baka dati a be o abi fu wakiti te enke a yuu fu Yehofa doo fu a toon Kownu. Fu di Saatan be sabi a sani ya, meke a gi Yesesi a okasi fu toon Kownu moo gaw. A taigi Yesesi taki efu a dini en wan kodo leisi namo, a be o meke a toon tiiman fu a hii goontapu (Lukasi 4:5-7). Saatan sabi tu taki Yehofa paamisi u taki a o gi u omen sani aini a nyun goontapu. Ma wi abi fu wakiti te enke a yuu de doo. Nownow a omen polobelema wi abi. Neen meke Saatan e gi wi a okasi fu abi wan bun libi aini a ten ya. A wani u si a abi di u mu abi wan bun libi aini a ten ya, enke a moo pelensipali sani, pe fu u poti a Kownukondee fu Gadu a fesi.​—Mateyesi 6:31-33.

¹⁸ A omen yonkuuwan á meke Saatan koli den. Kiana di abi 20 yali, a wan fu den yonkuuwan ya. A taki: „Na a  Kownukondee fu Gadu wawan too, poi losi ala den polobelema fu u.” Fa ai tyai enseefi fu di a sabi a sani ya? A sani ya e yeepi en fu holi a pakisei taki den sani fu a goontapu a fu wan ten. A nai booko en ede tumisi fu abi wan bun libi aini a goontapu ya, ma ai poti ala en pakisei na a dini di ai dini Yehofa.

19, 20. San o yeepi u fu moo sabi wooko anga a Wowtu fu Gadu?

¹⁹ Den feti-how fu den Rome suudati be langa wan afu meter. Den suudati ya be sabi wooko anga a feti-how fu den, bika na ala dei den be e leli fa den mu wooko anga en.

²⁰ Apostel Pawlesi taki a Wowtu fu Gadu de enke wan feti-how. Ma u mu sabi wooko anga en. A sani ya o yeepi u fu soi sama san wi e biibi. A o yeepi u fu kengi a fasi fa wi e denki tu (2 Korentesama 10:4, 5; 2 Timotiyesi 2:15). San i sa du fu sabi a Beibel moo bun? Sebastian di abi 21 yali taki: „Solanga mi leisi wan kapitel fu a Beibel, mi e sikiifi wan vers di mi lobi. Mi kon abi omen tekisi di mi lobi.” A sani ya yeepi en fu sabi moo bun fa Yehofa e denki. Daniel taki: „Te mi e leisi Beibel, da mi e sikiifi den tekisi di mi si enke o yeepi den sama di mi e miti aini a peleikiwooko. Mi kon si taki te den sama e si fa i lobi den sani di sikiifi aini Beibel anga te yu e meke moiti fu yeepi den, a sani ya e bigi gi den.”

21. Saide wi á mu feele Saatan anga den ogii yeye?

²¹ Den ondoofenitoli fu den yonkuuwan aini a artikel ya e soi taki u ná abi fu feele Saatan anga den ogii yeye. Den taanga so na tuu, ma Yehofa taanga moo den. Den ná o libi fu teego. Di Yesesi o tii wan dunsu yali, Saatan anga den ogii yeye fi en o de a sitaafu-osu. Den ná o poi du nawan ogii a ten de. Baka dati Gadu o puu den a pasi (Openbaring 20:1-3, 7-10). U sabi sama a wi feyanti. U sabi tu fa ai suku fu koli u anga san a wani du anga u. Yehofa poi yeepi u fu toto futu gi en!