1. Sowtu wini wi e fende te wi e wooko anga a Wowtu fu Gadu?

WINSI sowtu tesi e miti u, u poi holidoo, bika a Yehofa e gi u leli (Yes. 30:20, 21). A Wowtu fi en e yeepi u fu „de seekaseeka fu du ala sowtu bun wooko” (2 Tim. 3:17). Te wi e wooko anga den leli fu Beibel wi e koni moo den sama di e wooko anga „a koni fu a goontapu”.—1 Kor. 3:19; Ps. 119:97-100.

2. San wi o luku aini a artikel ya?

² Wi o si aini a artikel ya taki a koni fu a goontapu e gi sama taanga-sikin fu du san a sondu sikin wani. Neen meke ai taanga gi u son leisi fu wi á libi enke den sama fu a goontapu. Neen meke Beibel taki: „Luku bun fu sama á koli u anga a koni fu a goontapu ya efuso anga soso taki” (Kol. 2:8). Aini a artikel ya, wi o luku fa sama bigin biibi tu fu den lei di Saatan paati. Te wi e taki fu den lei ya, wi o si saide a koni fu goontapu a wan don sani. Wi o luku tu saide a moo bun fu wooko anga a koni fu Gadu di de aini Beibel.

3-4. Fa a fasi fa sama be e si man anga uman libi be kengi aini den yali baka 1900 na Ameekankondee?

³ Baka a yali 1900 den sama fu Ameekankondee bigin denki taa fasi fu man anga uman libi. Fosi, gaanse fu den be e biibi taki a wan man anga wan uman di toow wawan sa siibi anga denseefi. Den á be e gi den sowtu toli ya a sama ini. Ma a fasi fa den be e si sani kengi baka a yali 1900. Sama be bigin si a didon di man anga  uman e didon anga denseefi sondee fu toow, enke wan kowownu sani.

⁴ Den yali baka 1920, a fasi fa sama be e tyai denseefi anga a fasi fa den be e denki fu man anga uman libi kengi dyow, moomoo baka a Fosi Goontapu Feti. Wan ondoosukuman taki den felon, den singi, den buku, anga den lekalaama di sama be e meke a ten de be lai sani di be e meke sama pakisei sani di á fiti. A ten de, son sama be e dansi a wan fasi di be e gi taawan a fii fu didon anga man efu uman. Den be e wei koosi di á fiti tu. Beibel be taki aini den lasiti dei „sama be o lobi piisii” pasa peesi.—2 Tim. 3:4.

5. Fa sama bigin si man anga uman libi aini den yali baka 1960?

⁵ Aini den yali baka 1960 moo sama be e libi anga denseefi sondee fu toow. A libi di man anga man efuso uman anga uman be e libi anga denseefi be kon moo popileli tu. A ten de sama be bigin booko toow fu lawlaw sani. Den felon anga taa sani di den be e soi a tv be e soi kiin fa man anga uman e didon anga denseefi. San na a bakapisi fu ala den sani ya? Wan sikiifiman be sikiifi taki na a kengi di a fasi fa sama e si man anga uman libi kengi, meke omen osufamii booko. Na a sani ya meke omen dda efuso mma e gwe fika a osufamii. A omen sama á poi tan den á luku sekisi felon. A omen takuu siki paati na a goontapu fu di sama e libi wan yayo libi. Wan fu den siki ya a sida. Ala den sani ya e soi taki a koni fu goontapu a wan don sani.—2 Peit. 2:19.

6. Fa a libi di sama e libi wan hululibi e soi taki den e holibaka gi Saatan?

⁶ A fasi fa a goontapu e si sekisi, e soi fa Saatan e denki. Saatan e piisii te a si fa sama e poli a kado ya, di Yehofa gi man anga uman di toow (Efe. 2:2). Te sama e libi wan hululibi den e soi taki den nai si a kado di Yehofa gi den fu meke pikin enke wan gaan sani. Boiti dati efu den á kengi, den ná o fende a teego libi.—1 Kor. 6:9, 10.

7-8. San Beibel e taki fu sekisi?

⁷ Den sama di e denki enke fa a goontapu e denki e fende taki den leli fu Beibel a ná fu a ten ya moo. Kande den e  taki: ’Saide Gadu meke wi anga a fii fu abi sekisi, da ai taigi u taki u mu feti anga a fii ya?’ Den e fende taki libisama mu man du ala san den fii. Ma a ná dati Beibel taki. Beibel taki a ná ala yuu a bun fu du san u fii. Ai soi taki u poi feti anga den sondu fii fu u (Kol. 3:5). Boiti dati Yehofa taki a man anga uman di toow sa siibi anga denseefi (1 Kor. 7:8, 9). Te wan man anga wan uman di toow e siibi anga denseefi, den ná abi fu feele taki den o kisi den takuu siki di sama e kisi te den e libi wan hululibi. Boiti dati, den nai abi den booko-ede di sama di e libi wan hululibi e abi.

⁸ A fasi fa Beibel e yeepi u fu si sekisi, nai tyai takuu bakapisi gi u. Beibel taki a siibi di man anga uman di toow e siibi anga denseefi a wan piisii sani (Odo 5:18, 19). Boiti dati Beibel taki: „Ala u mu sabi fa u mu basi u sikin fu u sa santa, da wi o meke Gadu piisii. Wi á mu meke den sekisi fii fu u basi wi enke fa ai basi den sama fu a goontapu di á sabi Gadu.”—1 Tes. 4:4, 5.

9. (a) San yeepi a foluku fu Yehofa aini den yali baka 1900 fu wooko anga den leli fu Beibel? (b) San den sani di sikiifi a 1 Yohanisi 2:15, 16 e leli u? (c) Enke fa Romesama 1:24-27 e soi, da anga sowtu fasi fu libi u mu luku bun?

⁹ Wan sani fu wan ondoo yali pasa, a foluku fu Yehofa á be e waka a sama baka di be e libi a wan fasi di e soi taki den „á sabi san bun anga san á bun” (Efe. 4:19). Den be e du ala san den man fu wooko anga den leli fu Yehofa. A Ingiisi Wakititolen fu 15 mei 1926, be taki: „Mannengee mu luku bun san den e pakisei anga fa den e tyai denseefi te den de anga wan sama di ná den toowpaa. Umansama mu luku bun anga a sani ya tu.” Winsi fa den sama fu a goontapu e tyai denseefi, a foluku fu Yehofa e wooko anga san den leli aini a Wowtu fi en di bun moo a denki fu a goontapu. (Leisi 1 Yohanisi 2:15, 16.) Ai bigi gi u taki wi abi a Wowtu fu Gadu. Ai bigi gi u tu taki Yehofa e gi u leli di e yeepi u fu wi á denki enke a goontapu ya. *—Leisi Romesama 1:24-27.

10-11. San Beibel be taki o pasa aini den lasiti dei?

¹⁰ Beibel taki aini den lasiti dei, sama be o „lobi denseefi pasa peesi” (2 Tim. 3:1, 2). Neen meke a nai foondoo wi taki a goontapu e gi sama taanga-sikin fu denki denseefi namo. Wan buku taki aini den yali baka 1970 sama be sikiifi omen buku di e soi fa sama sa meke en aini a libi. Son wan fu den buku ya be e gi sama taanga-sikin fu libi enke fa den wani. Wan fu den buku ya be taki: „I mu lobi iseefi, bika a yu na a moo moin sama di de. I bun moo ala sama.” A buku ya e gi sama taanga-sikin fu du san den wani, winsi a o tyai takuu bakapisi gi taawan.

¹¹ I be yee a fasi fu denki ya kaba? Saatan be gi Efa taanga-sikin fu du aseefi sani ya. A be taigi en taki a be o ’kon de enke Gadu. A be o sabi san bun anga san ogii’ (Gen. 3:5). Aini a ten ya, a omen sama e fii denseefi. Den e fende taki sama á mu taigi den san bun anga san á bun. Gadu seefi á mu taigi den san bun anga san á bun. Wi e si a fasi fu denki ya te u luku fa sama e si a toowlibi.

12. Fa a goontapu e si a toowlibi?

 ¹² Beibel taki wan man anga wan uman di toow mu du san den paamisi a den toow dei. Ai gi man anga uman taanga-sikin fu tan anga denseefi winsi san e pasa. Beibel taki: „Wan man o gwe fika en mma anga en dda. A o tan anga en uman, da den o toon wan sikin” (Gen. 2:24). Ma den sama di e wooko anga a koni fu a goontapu e denki wan hii taa fasi. Den e taki wan sama di toow sa du san a lobi. A ná abi fu booko en ede anga san en toowpaa wani. Wan buku taki, aini son kondee te sama e toow den nai paamisi moo taki a dede namo sa paati den. Ma den e paamisi taki den o tan anga denseefi solanga a lobi de ete. A si di sama nai si a toowlibi enke wan sani di mu tan fu alaten, meke den e booko toow fu lawlaw sani. A sani ya e tyai omen booko-ede anga pen. Den sani ya e soi kiin taki a wan don sani fu si a toowlibi enke fa a goontapu e si en.

13. Saide Yehofa e buuse a fii di sama e fii denseefi?

¹³ Beibel taki: „Yehofa e buuse den sama di e fii denseefi” (Odo 16:5). Saide Yehofa e buuse den sama di e fii denseefi? Wan fu den sani di meke Yehofa e buuse den sama ya, a di den abi aseefi manii fu Saatan. Pakisei a sani ya. Saatan be wani Yesesi, a sama di yeepi Gadu meke ala sani, sutu kini a doti dini en (Mat. 4:8, 9; Kol. 1:15, 16). A nai foondoo wi taki Gadu e si en enke wan don sani te wan sama e fii enseefi.

14. Fa Romesama 12:3 e yeepi u fu si useefi enke fa Yehofa e si u?

¹⁴ Beibel e leli u taki u mu lobi useefi, ma wi á mu lobi useefi pasa peesi. Yesesi be taki: „I mu lobi taawan enke fa i lobi iseefi.” A sani ya e soi taki a á fowtu fu poti pakisei a useefi (Mat. 19:19). Ma Beibel nai gi u taanga-sikin fu denki  taki u bun moo taawan. Beibel taki: „Wi á mu e sitee anga useefi. Wi á mu e fii useefi, ma u mu abi sakafasi. U mu e si enke taawan pelensipali moo wi.”—Filip. 2:3; leisi Romesama 12:3.

15. Saide yu e si enke a moo bun fu wooko anga den leli fu Beibel di e soi fa u mu si useefi?

¹⁵ Somen fu den sama di den e teli fu koniman aini a goontapu, e si enke a wan don sani fu wooko anga den leli fu Beibel di e soi fa u mu si useefi. Den taki efi yu e si enke taawan pelensipali moo yu, sama o pina i. Ma sowtu wini sama fende di den wooko anga a denki fu a goontapu fu Saatan? San iseefi si? I si enke sama di e denki denseefi namo de koloku? Den osulibi e waka bun? Den abi tuutuu mati? Den anga Gadu a mati? San i si moo bun? I si enke a moo bun fu wooko anga a denki fu a goontapu efuso fu wooko anga san Gadu Wowtu taki?

16-17. Sowtu sani e bigi gi u? Saide ai bigi gi u?

¹⁶ Meke u taki i go a wan taa kondee neen i lasi. I be o akisi wan sama di á sabi a kondee on se i mu go? Na aseefi sani Yesesi be taki fu den koniman fu a ten fi en. A be taki: „Den e soi taawan a pasi, ma denseefi beendi. Neen meke efu wan beendiman e tyai wan beendiman, a den tu man o kai go aini wan peti” (Mat. 15:14). A sani ya e soi taki a koni fu a goontapu ya, a wan don sani gi Gadu.

¹⁷ Na ala yuu wi e fende wini te wi e wooko anga den leli fu Beibel. Den „bun fu gi sama leli, fu poti sama a pasi, fu soi den fa den mu tyai denseefi, anga fu wasikoi den fu den du sani a wan letifasi” (2 Tim. 3:16). Ai bigi u taki a olikanisâsi fu Yehofa e yeepi u fu luku bun anga a koni fu a goontapu (Efe. 4:14). Den leli di a olikanisâsi e gi wi e yeepi u fu wooko anga den leli fu Beibel. Ai bigi gi u taki wi e fende leli aini Beibel di u sa fitoow.